Kon Giunsa Nako Pagpukgo ang Akong Dakong Ambisyon

Sumala sa giasoy ni Waikato Gray

ANG akong pagkatawo sa Disyembre 2, 1928, may pagkatalagsaon. Kadto suhi nga pagkahimugso nga ako ug ang akong inahan hapit mamatay. Ingong sangpotanan, ako nahimugsong may hiwing mga tiil. Maayo na lang, ang usa ka igsoong babaye sa akong lola mitabang kanako ug sa kadugayan nagtul-id niana. Alang sa akong pagkinabuhi ingong Maori sa New Zealand, ang iyang tabang misangpot nga bililhon.

Ang akong amahan, si Clark Gray, maoy sakop sa Ngati-Tuwharetoa Maori nga tribo ug ang akong inahan, si Hore Teree, maoy gikan sa Ngati-Kahungunu nga tribo. Sumala sa karaang Maori nga talaan sa kagikanan, nabatonan ko ang maayong panulondon, kay naggikan sa duha ka ambisyosong pangulo sa tribo. Ang ambisyon o tingusbawan usab nahimong matuklorong impluwensiya sa akong kinabuhi.

Paglingkawas sa Kakabos

Ako maoy ikatulo sa pamilya nga sa igong panahon may walo ka anak. Panahon kadto sa Dakong Depresyon, ug kabos kaayo ang akong mga ginikanan. Kaming napulo nagpuyo sa duhag-lawak nga balay sa Bay View, duol sa Napier, North Island, New Zealand. Ang pagpangahoy sa baybay ug pagkalos sa tubig sa upat-galon (15 L) nga taro gikan sa atabay sa silingan maoy adlaw-adlawng mga trabaho nga akong mahinumdomang tin-aw. Kami mobaktas ug lima ka milya (8 km) nga magtiniil paingon sa eskuylahan, ting-init ug tingtugnaw.

Ang maong kakabos mihaling sa akong ambisyon nga magbatog mas maayong kaugmaon​—magbatog desenteng edukasyon ug mahimong inilang tawo. Ang eskuylahan mao ang dapit sa pagsugod. Samtang ako nagpadayon sa akong akademikanhong mga pagtuon, ako nanghawod usab sa atletika ug sa rugby football. Ako ang nahimong hawod nga maglulumba sa akong pagkahayskul ug sa wala madugay nahimong sakop sa tem sa rugby. Sa mga estudyante, ang akong kabantog sa pagdulag rugby ingong topnotch-wing-three-quarter mikaylap sa tibuok North Island.

Pagkahuman sa hayskul ako misulod sa kolehiyong nagbansay sa mga magtutudlo sa Wellington ug mitungha usab sa usa ka tuig sa Victoria University una modawat sa usa ka posisyon sa pagtudlo sa Manutahi District High School. Samtang didto ako, ako napiling usa ka gisulayang magdudula alang sa tem sa Maori All Blacks Rugby. Ang pagdula alang sa nasyonal nga tem sa rugby sa New Zealand mao ang damgo sa daghang Maori. Dakong kadungganan nga ako gipaapil sa maong mga pagsulay.

Ang akong mga ambisyon nagkatuman. Ako usa ka Maori nga magtutudlo ug sa ingon nahimong inila sa mga natad sa akademik ug sa dula. Ang kakabos nahanaw na​—pagkahalayo sa kabos Maori nga bata sa katuigang 1930!

Nakaila Ka ba sa Ngalan sa Diyos?

Samtang ako nagtungha sa kolehiyo, ako may hinungdan sa pagsusig maayo sa relihiyon. Ako namatuto nga Anglikano. Ngani, ang mga serbisyo sa simbahan sa usa ka panahon gihimo pa sa among balay. Miabot ang dakong pagsulay sa pagkamatay sa akong amahan. Sa kanunay ako nangutana sa akong kaugalingon nganong gikuha sa Diyos ang akong amahan sa dihang siya gikinahanglan kaayo sa akong inahan ug sa walo niya ka anak. Kadto daw dili makataronganon.

Sa maomaong panahon ang akong inahan misugod sa pagtambong sa mga pagtuon sa Bibliya nga gihimo sa mga Saksi ni Jehova uban sa pila ka silingan. Ako nasuko. Kami may kaugalingong relihiyon, busa nganong magtagad pa siya nianang mga Saksi?

Dayon usa ka adlaw si Rudolph Rawiri, usa ka lokal nga Saksi, miabot sa pagduaw kanako. Ako mihukom nga siya akong ibutang sa iyang dapit. Apan ang iyang pahiyom ug maayong pamatasan nakadani kanako. Siya nangutana ug yanong pangutana, “Nakaila ka ba sa ngalan sa Diyos?” Ako mitubag: “Jesus.” Ako iyang giagda sa pagpakli sa akong King James Bible sa Salmo 83:18. Pagkakatingad-anan! Diha ang ngalan sa Diyos sa akong kaugalingong Bibliya: “Aron sila makaila nga ikaw, kansang ngalan lamang mao si JEHOVA, mao ang Hataas Uyamot sa tibuok yuta.”

Ako nakadayeg. Nganong ang akong simbahan wala magpasiugda nianang balaang ngalan? Sa ulahi, ang laing Maori nga Saksi, si Charles Tareha, mianha sa among balay ug midumalag regular nga pagtuon sa Bibliya uban kanako. Among nailhan ang tagingting sa kamatuoran sa Bibliya ug giputol ang tanang koneksiyon sa Iglesya sa Inglaterra. Ako nahimong bawtismadong Saksi sa 1955.

Kon Nganong Ako Nadani sa Kamatuoran

Sanglit ako namatuto nga Anglikano, nganong ang mga pagtulon-an sa mga Saksi ni Jehova nakadani kanako? Samtang sila nagpatin-aw sa Pulong sa Diyos, ako nadani sa kayano ug sa lohika. Siyempre, alang sa daghang tawo ang maong kayano sa kaugalingon usa ka babag. Apan akong nasabtang ang Bibliya dunay pasukaranang mga prinsipyo, mga balaod ug mga lagda alang sa bisan unsang suliran nga tingali motungha sa kinabuhi.​—Itandi ang Salmo 119.

Kana tinuod ilabina sa panagtiayon. Sa Bibliya, akong nakaplagan ang mga latid alang sa malamposong kaminyoon. Kana nakabulig kanako sa pagtan-aw kon diin ako makapauswag ingong bana ug amahan pinaagi sa pagdawat sa akong mga responsibilidad. Siyempre, ako bulahan kaayong nakakaplag ug buotan kaayong asawa sama kang Hinewaka, nga sakop sa Ngati-Porou East Coast nga Tribo. Kami naminyo niadtong 1954. Gidawat dayon niya ang kamatuoran sa Bibliya, ug kami nagtabangay sa usag usa sa pagpadapat sa mga prinsipyo sa Pulong sa Diyos.​—Tan-awa ang Proverbio 31:10-31.

Ako nakadayeg usab kaayo sa hataas nga mga sukdanan sa moral nga ginasunod sa mga Saksi. Aron makabatog maayong pagbarog uban kang Jehova, kinahanglang ihunong ang tanang imoral nga kagawian​—ang pakighilawas, panapaw, pamakak, pangawat, kapintasan, pagpatay, pagdumot, ug rasismo nga tanan ginatunglo sa Pulong sa Diyos. Akong nakita ang mga kaayohan sa maayong kagawian alang kanako ug sa uban. Walay daotang mga bunga nga ikabasol.​—1 Corinto 6:9, 10.

Nahigawas sa Patuotuo

Ang Maori nga mga patuotuo maoy duyog sa Maori nga panulondon. Kami nahadlok kaayo sa mga kalag sa mga patay, ug ang mga pagtulon-an sa Anglikano mahitungod sa dili-mamatay nga kalag nakapasamot lamang sa akong mga kahadlok isip Maori. Apan sa misugod ako sa pagtuon sa Bibliya uban sa mga Saksi, akong nasayrang si Jesus miingon: “Inyong mahibaloan ang kamatuoran, ug ang kamatuoran magapagawas kaninyo.” (Juan 8:32) Oo, ang tukmang kahibalo sa Pulong sa Diyos nagpagawas kanako gikan sa kaulipnan sa Maori nga mga patuotuo.

Akong mahinumdoman ang usa ka pananglitan. Ang akong lolo namatay, ug sulod sa 48 ka oras ang akong lola namatay usab​—sa kaguol. Siya gihaya sa salog sa sala, tapad sa akong lolo nga nasulod na sa lungon. Daghang tigulang Maori nagtindog palibot sa lawas, apan dihang ang tig-atiman sa patay nangayog tabang sa pagbutang niya sa lungon, silang tanan nangawala gikan sa lawak! Ug dili pa tungod sa akong kahibalo sa kamatuoran, ako mokalagiw usab unta. Kay nahibalong ang mga patay nagakatulog lamang sa kamatayon, ako wala magpanuko sa pagtabang sa pag-alsa sa lawas sa akong minahal nga lola aron isulod sa iyang lungon.

Sukad niadto, ingong ministro sa mga Saksi ni Jehova, ako nakahimog daghang serbisyo sa paglubong ug nakalipay sa daghan pinaagi sa yanong mga pagtulon-an sa Bibliya mahitungod sa mga patay. Sa akong hunahuna ang kayano sa asoy sa Juan 11:11-44 nagapatin-aw gayod sa isyu. Gipakasama ni Jesus ang kamatayon ngadto sa pagkatulog. Walay pag-antos, pagpaabot lamang sa pagkabanhaw, nga samag natulog lamang.

Usa ka Pagsulay sa Pagkamaunongon

Ang lalom pang kahibalo sa Bibliya ug sa panig-ingnan ni Kristo nagsugod sa pagbutang kanako sa pagsulay. Ang ambisyon dako gihapong impluwensiya sa akong kinabuhi. Ang karera sa pagkamagtutudlo ug ang mga dula naghatag sa tanang butang tinguhaon sa usa. Apan sa maong panahon diha sa akong atubangan ang pagpili tali sa ubos, yano nga kinabuhi sa usa ka Kristohanong saksi ni Jehova o ang pagsulay sa pagpahaom sa akong mga ambisyon nganha sa akong bag-ong-kaplag nga pagtuo.

Niadtong 1957 akong giatubang ang usa ka lisod nga desisyon, usa ka dakong pagsulay sa akong pagkamaunongon sa Diyos. Ako gihatagag asaynment sa paghatag ug pakigpulong sa Bibliya panahon sa usa ka distritong kombensiyon sa mga Saksi ni Jehova nga himoon sa Lower Hutt. Apan ingong magtutudlo, kinahanglang mangayo akog espesyal nga permiso sa pagtambong sa kombensiyon. Gibalibaran ako sa Hunta sa Edukasyon sa Hawke’s Bay.

Ako diha sa kinasang-an​—magpabilin ba ako sa eskuylahan ug balibaran ang asaynment sa kombensiyon? O ipameligrong mawad-an ako sa akong trabaho ug motambong sa kombensiyon nga walay permiso? Dili sayon ang paghukom. Nagustohan ko ang pagtudlo, ug ang mga bata ug mga ginikanan nagsalig kanako. Ang prinsipal mihangyo nga ako magpabilin sa eskuylahan. Apan akong nahinumdoman ang mga pulong ni Jesus: “Si bisan kinsa nga dili modawat sa iyang kahoy sa pagsakit ug mosunod kanako dili takos kanako.” (Mateo 10:38) Andam ko bang isakripisyo ang materyal aron mabatonan ang espirituwal nga panalangin? O mobabag ba ang akong dakong ambisyon?

Akong gibiyaan ang ambisyon sa akong kinabuhi ug ang trabahong akong nagustohan, nga mao ang pagtudlog mga bata. Ako miadto sa Kristohanong kombensiyon ug nawad-an sa akong posisyon sa pagkamagtutudlo. Bisan pa niana, sa paglingi ako nasayod nga kadto ang hustong desisyon. Akong gibiyaan ang pagtudlo sa mga bata, apan sa kadugayan kana mitultol kanako sa pagtudlo sa mga hamtong sa labi pang dakong lugar. Sa pagbuhi sa akong pamilya, ako mihimo sa pagpanghinlo ug pagpananom nga trabaho. Sa kadugayan akong gihimo ang inoras nga trabaho sa opisina ug sa talyer, nga tungod niana nakaarang ako sa paggugol sa mas daghang panahon sa pagsangyaw.

Dakong Pagsulay Maylabot sa Panglawas

Sa usa ka yugto ako napaubos kaayo. Ingong magdudula, ako kanunayng nag-atiman sa akong lawas. Unya, nga kalit, ako giatake sa hampak sa mga puti​—ang tesis. Ako gibutang sa Waipukurau nga ospital sa paningkamot sa pagtambal sa akong sakit. Ang akong baga wala mosanong sa tambal. Ang hukom sa doktor mao nga kinahanglang ako operahan aron sa pagkuha sa ibabaw walang bahin sa akong baga. Ang siruhano dili mohimo sa operasyon kon walay abuno sa dugo. Ang mga prinsipyo sa Bibliya dili makatugot nga ako modawat ug dugo sa laing tawo sa akong lawas. (Buhat 15:28, 29) Akong gisugyot sa doktor nga ako abunohan sa mga kapuli sa dugo nga andam akong modawat. Kana iyang gibalibaran. Akong gidala kana kang Jehova pinaagi sa pag-ampo.

Ang mga doktor mihukom sa paghunong sa tanang tambal. Hinunoa, ako gihatagag pisikal nga terapiya sa dagway sa mga ehersisyo sa lakaw sulod sa duha ka semana. Tapos niana ako gieksrehan ug gipatawag sa opisina sa superintendente alang sa hukom. Pagkakulbahinam! “Maayo na ang imong baga. Makapauli ka na,” matud niya. Natubag ang akong pag-ampo, ug ako mipauli sa balay ngadto sa akong asawa ug akong anak.

Katagbawan sa Pag-alagad,Dili Ambisyon

Samtang ako miuswag ingong usa ka Saksi, ako natagbaw sa kinahanglanong mga butang sa kinabuhi inay mahimong ambisyoso alang sa gawas nga mga timaan sa kalibotanong kalamposan. Sulod sa 28 ka tuig ako nag-alagad nga usa ka ansiano sa Wairoa nga Kongregasyon sa mga Saksi ni Jehova. Ang Wairoa maoy usa ka lungsod nga may 5,000 lamang ka molupyo, uban ang populasyon sa kabalangayan nga mga 7,000 pa. Sila kadaghanan Maori, ug sama sa tanang mga katawhang Polynesian, sila mahigalaon, esiesi lang, ug manggihatagon. Kining espirituha gibanaag diha sa among kongregasyon, nga mitubo ngadto sa kapin ug 90 ka aktibong magmamantala sa maayong balita.

Ang usa ka espesyal nga bahin sa akong ministeryo mao ang pagtabang sa mga bana nga dili magtutuo. Usa kanila mao si John McAndrew, nga hinabako kaayo ug palainom, nga nailhang labing bagis ug labing gikaintapan sa lungsod. Apan ang kamatuoran sa Bibliya nag-usab kaniya, ug siya karon nagaalagad nga nagadumalang magtatan-aw sa Wairoa nga Kongregasyon.

Ang laing bana nga dili magtutuo mao si John Salmon, usa ka negosyante, kinsa mibalhin sa Wairoa aron ipahilayo ang iyang asawa gikan sa mga Saksi. Sa ako siyang nahibalag, siya makigsulti lamang kon akong gamiton ang King James Bible. Kadto dili gayod suliran. Kon buot sabton, kana ang pangunang hubad nga gigamit sa mga Saksi ni Jehova sa wala pa ang 1950, sa wala pa unang mapatik ang New World Translation. Busa, pinaagi sa iyang kaugalingong Bibliya, siya natabangan sa pag-ila ug sa pagdawat sa kamatuoran.

Si Tutura Waihape maoy laing talagsaong tawo, usa ka batan-ong minyong Maori nga may masanagong karera sa rugby sa iyang unahan. Sa misugod ako sa pagtuon sa Bibliya uban kaniya, siya nakabaton sa labing taas nga buhok nga sukad akong nakita sa usa ka lalaki. Samtang siya miuswag sa kahibalo kang Jehova ug kang Kristo Jesus, nausab ang iyang tinamdan. Ang iyang gugma sa kamatuoran labi pang importante kay sa pagkainila tungod sa iyang taas nga buhok, ug kana iyang gipaputol. Karong adlawa, siya nagaalagad sa kongregasyon ingong ministeryal nga alagad.

Ang Bug-os-Panahong Karera sa Pagkamagtutudlo

Sa milabayng napulo ka tuig, ako nagaalagad nga regular payunir nga ministro, nga nagagugol sa aberids nga 90 oras matag bulan sa ministeryo. Ang akong asawa maoy payunir sulod na sa 15 anyos, ug ang akong tulo ka anak nakatilaw usab sa pagpayunir sa ilang pagbiya sa eskuylahan.

Ingong tayuktok sa among pag-alagad kang Jehova ang akong asawa ug ako karon nagaalagad diin dako ang panginahanglan sa Niue Island. Kini maoy sa amihanan sa New Zealand, sa Pasipiko. Among nadiskobrehang ang gamayng populasyon sa mga 2,800 ka molupyo mahiligon sa relihiyon, ug daghan ang gustong makighisgot sa Bibliya. Samtang ania dinhi, kami nakatabang usab nga maorganisar nga mas maayo ang usa ka gamayng kongregasyon.

Nahanaw na ang akong dakong ambisyon sa personal nga kauswagan ug dungog. Akong naamgohang ang labi pang hinungdanon mao ang pasidungog nga igahatag sa mga tawo kang Jehova nga Diyos. Sumala sa pagpahayag niana ni Haring David: “Ipasidungog kang Jehova, Oh mga banay sa mga katawhan, ipasidungog kang Jehova ang himaya ug kusog. Ipasidungog kang Jehova ang himaya sa iyang ngalan.” Dinhi sa among gamayng pulo sa Niue, kana ang among gipaningkamotang buhaton.​—1 Cronicas 16:28, 29.

[Hulagway sa panid 12]

Nagsul-ob sa tradisyonal Maori nga biste