“Sila Makig-away Batok Kanimo, Apan Sila Dili Makadaog Kanimo”
ANG Soberanong Ginoo si Jehova nagsulti sa batan-ong si Jeremias nga Siya magahimo kaniyang “usa ka kinutaang siyudad ug usa ka puthaw nga haligi ug tumbaga nga mga paril” batok kang bisan kinsang magtinguha sa paglaglag kaniya. Sa modernong panahon, ingong mga Saksi ni Jehova atong nabatonan ang samang pasalig gikan sa atong Diyos. Oo, sa pag-impluwensiya ni Satanas, ‘sila makig-away batok kanato,’ apan dili makadaog. “Kay ‘ako magauban kanimo,’ nagaingon si Jehova, ‘sa pagluwas kanimo.’”—Jeremias 1:18, 19.
Sa kabalangayan sa Solomon Islands, ang mga estranghero mosulod nga mameligro ang ilang kinabuhi, ilabina kon sila magdalag bag-ong relihiyon. Kana ang kasinatian sa duha ka espesyal payunir sa mga Saksi ni Jehova. Ang bangis-hitsurang mga tagabalangay nagbingat sa mga pana tunong kanila. Sila gimandoan sa pagpana! Samtang ang kahimtang nahimong kulba, sa kalit ang usa ka lalaking tigulang mibalda, nga miingon: “Kini sila akong mga bisita. Ayaw ninyo silag unsaa.” Sa kalagot sa mga tagabalangay, iya silang gidala sa iyang balay. Ang maong tawo nakadungog bahin sa mga Saksi; sa maong panahon iyang gikuha ang librong Ikaw Mabuhing Walay Kataposan sa Paraiso sa Yuta, ug nasugdan ang usa ka pagtuon sa Bibliya. Siya misugod dayon sa pag-adto sa mga tigom. Karong adlawa ang mga igsoon makasangyaw nga libre nianang dapita, nga mapasalamaton sa unang pagluwas ni Jehova.
Ang pagkaluwas kadaghanan miabot tungod kay nailhang usa sa mga Saksi ni Jehova. Tungod sa balay-balay nga pagsangyaw, nailhan sa mga tawo kon kinsa ang mga Saksi ug kon unsa ang ilang baroganan bahin sa mga isyu karong adlawa. Sa usa ka gamayng balangay sa Peru, ang mga terorista nagbutangbutang sa mga tagabalangay nga giluiban sila. Ilang gironda ang mga lalaki sa lungsod ug gipalinya sila aron pusilon. (Sa susamang mga kahimtang ang tibuok nga mga balangay gitodas.) Apan niadtong puntoha, usa sa mga terorista nakaila sa usa ka igsoong lalaki ug miingon ngadto sa mga tigpatay: “Kanang tawhana dili usa kanila. Ako nakaila nga siya usa ka Saksi ni Jehova, ug sila dili mag-apil-apil sa politika.” Ang igsoon gibuhian. Tinong si Jehova nagapanalipod sa mga iya!
Ang islang teritoryo sa Cyprus nagtaho nga ang Grego Ortodoksong Iglesya aktibo kaayo sa pagsulay sa pagdaot sa buluhaton sa mga Saksi ni Jehova. Ang iglesya nanagtag ug mga pulyeto nga nagabutangbutang sa mga Saksi sa daghang butang ug nagadili sa mga tawo niini sa pagpakigsulti sa mga Saksi. Ang pila ka teologo nag-organisar gani sa ilang kaugalingon aron duawon ang mga tawong nakigtuon uban sa mga Saksi ni Jehova, nga naningkamot sa pagpaluya kanila. Mahulagwayon mao ang nahitabo sa Paphos, diin si Pablo ug si Bernabe kas-a nagbuntog sa susamang pagsupak. (Buhat 13:6-12) Ang usa ka pari-teologo misulay sa pagkombinsir sa tulo ka nagkalainlaing tawo sa paghunong sa pagsusi sa Bibliya uban sa mga Saksi ni Jehova. Sila, sa baylo ug nag-iyahay, mihikay nga ang usa ka igsoon mokuyog kanila sa pagpakigdiskusyon sa maong teologo. Ingong resulta, silang tulo karon aktibong nakig-uban sa mga Saksi. Ang pari mikomento, ‘Dili na gayod ko makigdiskusyon sa mga Saksi ni Jehova.’
Ang pila ka pari nanuntok pa sa mga Saksi samtang kini sila naghimo sa balay-balay nga buluhaton sa usa sa mga balangay. Katingalahan, pila ka adlaw sa ulahi, gihapak ug alimpulos ang balangay, nga nangaguba ang mga atop sa daghang balay. Ang pila ka tagabalangay mikomento: ‘Gaba na kini sa Diyos tungod sa gibuhat sa mga pari ngadto sa mga Saksi ni Jehova.’ Sa maong balangay, ang mga tawong buotan ug kasingkasing nagapadayon gihapon sa atong mga igsoon nganha sa ilang mga balay. Sa usa ka higayon, samtang ang usa ka igsoon nagtanyag sa bag-ong mga magasin ngadto sa usa ka tawong interesado, usa sa mga pari nga nanuntok sa mga igsoon nakalabay ug misulti sa igsoon nga dili hilabtan ang ‘iyang panon.’ Ang tawong interesado miingon ngadto sa pari, ‘Ako edaran na nga nahibalo kon unsay ginabuhat.’ Busa ang klero wala makadaog sa mga Saksi ni Jehova; ang ilang paningkamot misumbalik kanila, ug mas daghang tawo ang nagabarog dapig kang Jehova.
Sa usa ka gidaot-sa-gubat nga nasod sa Sentral Aprika, ang usa ka magtatan-aw sa sirkito gipahunong alang sa naandang pagsusi sa mga sundalo. May usa ka butang diha sa sulat nga dala niya nga ilang gisupakan ug gidala siya ngadto sa hedkuwarter sa kapolisan, diin siya gilapdosan ug gikulata sa tulo ka sundalo. Bisan pag walay sumbong ang gipasaka batok kaniya ug walay gihimo nga husay, siya gipriso sulod sa usa ka tuig. Sa unom ka bulan siya gibutang sa huot nga atob nga may 40 pa ka ubang priso. Tungod sa guot nga lugar, sila nagturnoturno sa pagkatulog, nga tagtulo ka oras sa usa ka panahon. Sa ubang panahon, kinahanglang sila magpabiling nagatindog. Samtang ang atong igsoon didto, 137 ka priso namatay, ug siya gihatagan sa trabaho sa pagbutang sa ilang mga lawas sa sako aron ilubong.
Ang maong magtatan-aw sa sirkito nagmentenar sa iyang espirituwal nga kusog pinaagi sa paggugol ug daghang panahon sa pagsangyaw ngadto sa kaubang mga priso. Ang iyang mga taho nagpakitag kapin sa 30 oras sa usa ka bulan nga gigugol sa pagsangyaw; siya midumalag upat ka pagtuon sa Bibliya samtang diha sa prisohan. Usa sa iyang mga estudyante misugod gani sa pagsangyaw ngadto sa uban. Latas nianang tanang pagsulay, si Jehova nag-atiman sa maong igsoon, kinsa nagahatag niining tambaga sa uban: “Kon anaa sa prisohan, itugyan lamang ang tanan sa mga kamot ni Jehova. Paabota siya. Salig kaniya. Ayaw pagkabalaka sa hilabihan. Magmatinumanon.”
Sa usa ka bahin sa Zimbabwe, ang mga anak sa mga Saksi ni Jehova gipalagpot sa tunghaan tungod kay dili moapil sa politikanhong mga bansaybansay. Kay wala matagbaw niana, ang mga bugoy nagsunog pa sa mga balay sa mga ginikanan ug nagdaot sa ilang mga tanom. Ang Saksing mga pamilya napugos sa pagkalagiw alang sa ilang mga kinabuhi, nga nagbiya sa mga baka ug ubang kabtangan. Bisan pa niana, kana gidala ngadto sa labaw nga mga awtoridad sa kagamhanan nga malulutong mihikay nga makabalik ang mga pamilya sa ilang mga balay. Giuli ang ilang mga baka, ug ang gobyerno mihimog mga lakang sa pagbayad sa mga igsoon sa ilang mga kapildihan. Ang mga Saksi ni Jehova tinuod mapasalamaton kon ang “labaw nga mga pagbulot-an” sa ingon magapakitang sila ‘mga ministro sa Diyos alang sa kaayohan.’ (Roma 13:1-4) Latas nianang tanan, nahatag ang maayong pamatuod, ug ang katawhang lokal nagapakita karon ug dakong interes sa mensahe sa Gingharian. Sumala sa pagpahayag niini sa usa sa mga igsoon, ‘Kami nahibalo nga si Jehova makahimo sa maong mga kahimtang nga mosangpot nga usa ka pamatuod sa iyang ngalan.’
Si Jehova nagpanalangin sa buluhaton sa Malawi sa miaging tuig sa pag-alagad. Diha lamang sa mga dapit diin ang lokal nga mga tagabalangay nagahambin ug pagdumot nga nasinati sa mga Saksi ang pagpanghasi. Ang mosunod nga taho nagapamatuod niini: “Sa daghang bahin sa kanataran, ang kahimtang linaw. Apan sa usa ka kongregasyon, duha ka Saksing pamilya ang gisamok pag-ayo sa mga pundok sa batan-on. Ang ulo sa usa sa maong mga pamilya grabeng gikulata nga siya nawad-ag panimuot sa upat ka oras. Human niadto, siya gidala ngadto sa estasyon sa polisiya, diin ang polis nga didto nagpadayon usab sa pagkulata kaniya ug sa uban nga gidala uban kaniya. Ugaling, sa ulahi laing polis ang naeskedyul. Kadto siya maluluton. Iyang gibuhian ang mga igsoon ug gipapauli, ug sila nagpasalamat kang Jehova tungod niadtong wala-dahomang pagluwas. Nadiskobrehan sa ulahi nga ang hinungdan sa maong hitabo mao ang personal nga pagdumot sa suod nga mga paryente. Ang among tumatambong sa Memoryal karong tuiga makapadasig. Kami may 23,476. Kini nagapakitang may mga tawong karnerohon pa nga kinahanglang tabangan aron mahimong mga tinun-an ni Jesu-Kristo dinhi sa Malawi.”
Usa ka nasod sa Silangang Uropa nagpadala niining mensahe sa apresasyon: “Kami mapasalamaton sa suod nga kontak nga among nasinati uban sa Nagamandong Lawas pinaagi sa tanang kanal-galamiton sa yutan-ong organisasyon ni Jehova. Pinaagi niini kami gitugotan sa pagkakita sa unsang paagi ang atong langitnong Amahan nagatigom, pinaagi sa iyang Anak ug sa tanang manulonda, sa iyang mga karnero karong adlawa, ug sa unsang paagi kami makabatog gamayng bahin niini. Talagsaon kini nga pribilehiyo! Gipanalanginan sa atong Amahan ang among paningkamot sa pag-uswag. Ang mas daghang panahong nagugol sa kanataran, mas daghang auxiliary payunir nga madasigong nagsangyaw sa maayong balita, ug ang labing daghang tinahing basahon nga sukad napahulam o napahimutang sa kanataran mao ang mga resulta sa maong panalangin.”
Ang modernong-adlawng budyong sa Tinghugyaw gipatingog nga kusog ug tin-aw. Ang nag-unang gitigom nga taho nagapakita sa unsang paagi ang mga Saksi ni Jehova sa tanang bahin sa yuta nagatubag sa maong panawag.