Mga Kostumbre o mga Prinsipyo sa Bibliya—Hain ang Nagagahom sa Imong Kinabuhi?
ANG Hapon nga lalaki nga mibisita sa laing Asyanhong nasod mitan-aw nga nakurat ug wala makatuo. Ang iyang tagbalay, nga migamit sa iyang kaugalingong chopsticks, mihilinghiling sa karne diha sa bandehadong pangsilbi, mipilig maayong hiwa, ug dayon mibutang niana sa panaksan sa kan-on sa bisita! Sa ila sa Hapon, kadto isipon nga dili maayong batasan. Walay mogamit sa iyang kaugalingong chopsticks sa pagkuhag pagkaon gikan sa komung sud-an gawas balihon una ang chopsticks aron ang tumoy nga ibutang sa baba dili mahidapat sa pagkaon. Apan ang iyang tagbalay matinguhaon lamang gayod sa pagpasidungog kaniya, dili sa pagpanamastamas kaniya. Ang butang dili katuohan sa Hapon maoy usa ka buhat sa pagtahod nianang nasora!
Magkalain gayod ang mga kostumbre! Pagkadili-makataronganon ang daghang kostumbre! Ug kinsay makasulti kon hain ang labing maayo? Hinuon, ang pila ka kostumbre gipasukad sa mga patuotuo o bakak nga mga pagtulon-an. Alang sa mga tawo kansang mga konsensiya nabansay sa Bibliya, tin-aw nga angay likayan ang maong mga kostumbre. Unsay makatabang sa usa nga buot magpahimuot sa Diyos sa paghukom haing mga kostumbreha ang sundon ug sa unsang gidak-on? Makatabang ang pagsunod sa mga prinsipyo sa Bibliya, kay ang usa ka Kristohanon nagadawat sa Bibliya ingong iyang sukdanan bisan kon diin siya nagapuyo.
Pagpadapat sa mga Prinsipyo sa Bibliya
Napasundayag na pag-ayo nga ang Pulong sa Diyos may dakong gahom sa paglihok diha sa kasingkasing sa mapaubsanong tawo ug sa pagpahiuyon sa dugang ug dugang pa sa iyang kinabuhi ngadto sa dalan sa Diyos. Si apostol Pablo miingon nga gidawat sa mga Kristohanon sa Tesalonica ang Pulong sa Diyos “sumala kon unsa sa pagkamatuod kini, ingon nga pulong sa Diyos nga nagalihok usab diha kaninyong mga magtutuo.” (1 Tesalonica 2:13) Gamhanan kaayo ang maong Pulong nga, sumala sa ginapunting sa 1 Corinto 6:9-11, kini nagpahinabo nga daghan sa karaang Corinto, nga ilado sa pagkamapatuyangon, mibiya sa ilang kanhing panggawi sa pagpangawat, pakighilawas, paghuboghubog, ug homoseksuwalidad. Ang Pulong sa Diyos nagalihok ba usab diha kanimo? Ang mga prinsipyo ba niini nagamando sa imong kinabuhi sa labing bug-os, nga tungod niana ikaw makasabot kon unsay buhaton kon moatubang sa lokal nga mga kostumbre?
May panahon nga dayag ang usa ka kostumbre laktud nahisupak sa mga prinsipyo sa Bibliya. Sa maong mga kahimtang ang usang nasayod sa mga sukdanan ni Jehova ug buot mopahimuot kaniya molikay sa maong mga kostumbre. Pananglitan, ang kostumbre tingali mao ang pagsunog ug insenso sa usa ka lubong sa paghupay sa namatay o sa iyang “mibulag nga kalag” o aron hatagan siyag maayong pagpalarga ug lipayon ang iyang “kalag.” O tingali ang mga modelo sa mga balay, mga TV, mga kotse, ug uban pa, sunogon uban sa hunahunang itagana kaniya ang kalipay didto sa kalibotan sa espiritu. Bisan pa niana, ang Kristohanon nga nagtuo sa gipamulong sa Bibliya nga ang mga patay “walay nahibaloan nga bisan unsa” nasayod nga ang maong mga batasan gipasukad sa bakak nga mga pagtuo ug sa ingon molikay niana.—Ecclesiastes 9:5, 10; Salmo 146:4.
Hinuon, kon ang usa ka kostumbre wala maglapas sa laktud sa mga prinsipyo sa Bibliya apan yanong mas nagapalisod sa imong pag-alagad sa bug-os pa kang Jehova nga Diyos, mas lisod ang paghimog kalainan ug pagpadayag nga ang mga prinsipyo sa Bibliya nagamando sa imong kinabuhi. Ang hataas nga pagtamod sa edukasyon ug sa materyal nga kalamposan, tibuok-kinabuhing pagpasakop sa mga ginikanan, ug pagpili sa ginikanan sa mga kapikas sa kaminyoon nahiapil sa pipila ka kanat nga kostumbre nga makaapektar sa relasyon sa usa uban kang Jehova. Sa unsang paagi ang mga prinsipyo sa Bibliya ikapadapat sa mga kahimtang nga sama niini?
[Hulagway sa panid 3]
Pagsunog sa mga modelo sa serbisyo sa paglubong