Mga Magmamantala sa Gingharian Nagtaho
Gipadak-ang mga Pasilidad sa Pagtugbang sa Pag-uswag sa Gingharian
ANG adlaw sa dedikasyon sa bag-o pang gipadak-ang pasilidad sa sanga sa mga Saksi ni Jehova maoy makalilipay kaayong adlaw sa Caribbeanong isla sa Jamaica. Kadto nga pagpadako gikinahanglan tungod sa pagpanalangin ni Jehova sa matinumanong paningkamot sa mga igsoon sa pagsangyaw sa maayong balita niining matahom nga islang tropikanhon.
Ang usa ka misyonaryong balay naestablisar sa Jamaica ingon ka sayo sa 1946. Pinaagi sa pagpanguna sa mga misyonaryo sa buluhaton, kusog ang pag-uswag sa mga magmamantala, mao nga sa napulo ra ka tuig ang aberids nga gidaghanon sa mga Saksi nga nagtaho kada bulan miuswag gikan sa 732 ngadto sa 3,216. Gikinahanglan ang paghikay alang sa bag-ong mga pasilidad aron sa pag-atiman sa pag-uswag.
Niadtong 1954 ang angayang yuta nabatonan ug nagsugod ang pagtukod sa usa ka lig-on bag-ong dos-andanas nga tinukod sa hilom duol nga dapit sa Kingston. Kadto nahuman sa Mayo 1958. Ang gidaghanon sa mga magmamantala niadtong tuiga miuswag ngadto sa kinatas-ang ihap nga 4,367.
Ang ‘pagtanom’ ug ‘pagbisibis’ nagpadayon ug si Jehova “padayong nagpatubo niana,” mao nga sa pagka 1983 ang gidaghanon sa mga magmamantala miuswag ngadto sa kapin ug 7,000, nga mimugna sa panginahanglan sa dugang pagpadako. (1 Corinto 3:6) Ang Komite sa Sanga, uban ang pagtugot sa Nagamandong Lawas, mihukom sa pagpadako sa presenteng mga pasilidad. Kapin ug 250 ka igsoon gikan sa tibuok isla miabot sa pagtabang. Ang hanas ug dili-hanas nga mga trabahante miboluntaryo sa ilang serbisyo, ingon nga mga kantero, mga panday, mga elektrisyan, ug mga tubero. Ang ilang mga edad naggikan sa 10 ngadto 86. Ang pipila nangamot ug kuwarta alang sa proyekto, ang uban nangamot ug pagkaon alang sa mga trabahante, ug ang uban pa nagbukas sa ilang mga balay aron sa pagtaganag mga sak-anan alang sa mga boluntaryo nga tagalayo. Sa usa ka tuig ang proyekto, nga mao ang pagdugang ug ikatulong andana nga may lima ka kuwarto ug dapit sa lulinghayaw, usa ka kuwarto sa ikaduhang andana, ug 400 tiil kuwadrado (37 sq m) nga lunang pondohanan, nahuman, nga andam gamiton sa 11 ka sakop sa pamilyang Bethel.
Si Milton Henschel, membro sa Nagamandong Lawas sa mga Saksi ni Jehova, mihatag sa pakigpulong sa dedikasyon sa Pebrero 22, 1986. Siya nagpakigpulong sa temang “Ang Madaogong Prosisyon.” (2 Corinto 2:14) Kadtong nagpatalinghog sa programa sa dedikasyon may total nga 2,949. 380 kanila didto sa Kingdom Hall ug sa ubang bahin sa tinukod, ug ang uban nakonektar pinaagi sa telepono ug sa radyo sa ubang Kingdom Hall sa siyudad ug sa usa ka awditoryum sa eskuylahan.
Kadaghanan niadtong gidapit ngadto sa Kingdom Hall sa sangang buhatan mao ang mga igsoong lalaki ug mga igsoong babaye nga diha sa kamatuoran sulod sa 30 anyos o labaw pa. Daghang ekspresyon sa pagpabili ang nadunggan alang sa nindot nga dugang sa tinukod. Maoy among paglaom nga daghan pa sa “dakong panon” sa “ubang mga karnero” ang moduyog sa madaogong prosisyon samtang ang bag-ong pasilidad sa sanga gamiton sa pag-atiman sa pag-uswag sa Gingharian sa Jamaica.