‘Sa Bantayanang Torre Ako Nagatindog’

“Ug siya misinggit ingon sa usa ka leyon: ‘Sa bantayanang torre, Oh Jehova, ako nagatindog sa kanunay sa maadlaw, ug sa akong bantayanan ako gibutang sa tibuok nga mga gabii.’”​—ISAIAS 21:8.

ANG usa ka 21-anyos nga lalaking mahadlokon sa Diyos nga nagpuyo sa amihanan-silangang Tinipong Bansa may usa ka misyon. Ang pagyagyag sa bakak relihiyosong mga pagtulon-an sa iyang adlaw, ilabina ang mga doktrina sa walay-kataposang pagsakit ug predestinasyon mao ang iyang tumong. Gawas pa, buot niyang labanan ang kamatuoran mahitungod sa lukat ug sa katuyoan ug paagi sa pag-anhi ni Kristo. Unsaon niya pagbuhat kanang tanan? Pinaagi sa pagpasidlak sa kahayag sa Pulong sa Diyos, ang Balaang Bibliya, mahitungod sa relihiyosong mga pagtuo.​—Salmo 43:3; 119:105.

1, 2. (a) Unsang tumong ang nabatonan ni Charles T. Russell? (b) Sa unsang paagi ang mga basahon sa Bibliya makatabang sa pagpalampos sa iyang tumong?

² Si Charles T. Russell, ang unang presidente sa Watch Tower Society, mao kanang tawhana, ug siya mihukom niadtong 1873 sa pagpatik ug relihiyosong mga basahon ingong usa ka paagi sa pagpaila sa kahayag sa kamatuoran sa Bibliya. Alang sa sinserong mga magbabasa, ang maong mga basahon magpadayag sa mga liki sa mga doktrina sa Kakristiyanohan. Ang bisan unsang tinagong mga depekto sa doktrina dili makaeskapo sa kusog nga kahayag sa Bibliya. (Efeso 5:13) Sa samang panahon, ang maong mga basahon magpadan-ag sa ‘maayong pagtulon-an’ aron lig-onon ang pagtuo sa mga magbabasa. (Tito 1:9; 2:11; 2 Timoteo 1:13) May pasiuna ba ang kadasig alang sa kamatuoran sa Bibliya nga mitukmod kang Russell ngadto sa iyang tinguha?​—Itandi ang 2 Hari 19:31.

Unang mga Kristohanon:Mga Manlalaban sa Pulong sa Diyos

³ Ang unang-siglong mga Kristohanon milaban sa kagamitan sa Pulong sa Diyos taliwala sa mga Hudiyo ug sa mga Hentil. Sila nagtindog samag napahimutang sa usa ka bantayanang torre, nga nagmantala sa kamatuoran sa tanan nga magpatalinghog. (Mateo 10:27) Ang ilang Pangulo, si Jesu-Kristo, mao ang nanguna. Matud niya: “Alang niini ako natawo, ug alang niini ako mianhi sa kalibotan, aron ako magapamatuod sa kamatuoran.” (Juan 18:37) Bisan tuod hingpit, siya wala magsalig sa iyang kaugalingong kaalam o sa personal nga mga hunahuna. Hinunoa, ang iyang mga pagtulon-an naggikan sa iyang Superyor nga Magtutudlo, si Jehova nga Diyos. “Wala akoy ginabuhat sa akong kaugalingong kabubut-on,” iyang gisultihan ang usa ka pundok sa mga Hudiyo. “Apan sumala sa gitudlo sa Amahan kanako ako nagasulti niining mga butanga.” (Juan 8:28; tan-awa usab ang Juan 7:14-18.) Sumala sa mga asoy sa Ebanghelyo sa iyang yutan-ong ministeryo, si Jesus mikutlo (o nagpahayag sa susamang mga hunahuna) gikan sa halos katunga sa mga basahon sa Hebreohanong Kasulatan.​—Lucas 4:18, 19 (Isaias 61:1, 2); Lucas 23:46 (Salmo 31:5)

4. Paghatag ug mga panig-ingnan sa unsang paagi gigamit ni Jesus ang Pulong sa Diyos sa pagtudlo sa kamatuoran.

⁴ Bisan tapos sa iyang pagkamatay ug pagkabanhaw, si Kristo migamit gihapon sa Pulong sa Diyos aron sa pagtudlo sa kamatuoran. Pananglitan, dihang si Cleopas ug ang iyang kauban nagpanaw gikan sa Jerusalem paingon sa Emmaus, gitabangan ni Jesus ang maong mga tinun-an sa pagpangatarongan sumala sa Kasulatan. Ang talaan nagaingon: “Ug sugod kang Moises ug sa tanang Manalagna iyang gihubad ngadto kanila ang mga butang maylabot kaniya diha sa tibuok nga Kasulatan.” (Lucas 24:25-27) Sa ulahi niadtong adlawa mismo, si Jesus mipakita ngadto sa 11 ka apostol ug sa pipila sa iyang mga tinun-an aron sa paglig-on sa ilang pagtuo. Sa unsang paagi? Pinaagi sa mahanasong paggamit sa Kasulatan. Si Lucas misulat: “Unya siya [Jesus] nag-abli sa bug-os sa ilang mga hunahuna aron sa pagsabot sa kahulogan sa Kasulatan, ug siya miingon kanila: ‘Niining paagiha nahisulat nga si Kristo magaantos ug mobangon gikan sa mga patay sa ikatulong adlaw.’”​—Lucas 24:45, 46.

5. Sa Pentekostes 33 K.P., giunsa ni Pedro pagsundog ang panig-ingnan ni Kristo sa paggamit sa Kasulatan?

⁵ Sa pagsunod sa Sulundan niini, sa tuig 33 K.P. gisugdan sa Kristohanong kongregasyon ang publikong ministeryo niini pinaagi sa paggamit sa Kasulatan. Ang nahitaboan: usa ka hawan nga dapit sa gawas sa usa ka balay sa Jerusalem. Human sa pagkadungog sa “kusog nga huros sa hangin” ibabaw nianang balaya, ang panon sa kaliboang Hudiyo sa Jerusalem ug Hudiyong mga dumuduaw nadani niadtong dapita ug nagkatigom. Si Pedro miadto sa atubangan​—ug ang 11 pa ka apostol mialirong kaniya​—ug uban ang kusog nga tingog siya misugod sa pagsulti: “Mga tawo sa Judea ug kamong tanang pumuluyo sa Jerusalem, hibaloi ninyo kini ug patalinghog sa akong mga pulong.” Unya sa pagpunting “kon unsay gisulti pinaagi sa manalagnang si Joel” ug ang “gisulti ni David,” gipatin-aw ni Pedro ang mga milagro nga bag-o pang nahitabo ug nga “ang Diyos naghimo kaniya nga Ginoo ug Kristo, kining Jesus nga inyong gilansang.”​—Buhat 2:2, 14, 16, 25, 36.

6. (a) Isaysay kon unsay nahitabo sa usa ka tigom sa unang siglong nagmandong lawas. (b) Sa unsang paagi ang mga kongregasyon gipahibalo sa desisyon sa nagmandong lawas, ug uban ang unsang kaayohan?

⁶ Sa dihang ang unang mga Kristohanon nagkinahanglag katin-awan bahin sa pagtuo ug panggawi, ang unang siglong nagmandong lawas migamit usab pag-ayo sa Kasulatan. Pananglitan, panahon sa tigom sa nagmandong lawas sa tuig 49 K.P., ang tinun-ang si Santiago, nga nagsilbing tsirman, nagtumong sa ilang pagtagad sa usa ka nahiangayng kasulatan nga makita sa Amos 9:11, 12. “Katawhan, mga igsoon, patalinghogi ako,” siya miingon. “Si Symeon misugid sa bug-os giunsa sa Diyos sa unang panahon pagliso sa iyang pagtagad ngadto sa kanasoran aron sa pagkuha gikan kanila sa usa ka katawhan alang sa iyang ngalan. Ug niini mouyon ang mga pulong sa mga Manalagna, sumala sa nahisulat.” (Buhat 15:13-17) Ang tibuok lawas miuyon sa sugyot ni Santiago ug unya nagsulat sa ilang desisyon nga gipasukad sa kasulatan aron kini ikahatod sa tanang kongregasyon ug ilang mabasa. Unsay sangpotanan? Ang mga Kristohanon “nagmaya tungod sa pagdasig,” ug “ang mga kongregasyon nagpadayong nalig-on sa pagtuo ug pag-uswag sa gidaghanon sa adlaw-adlaw.” (Buhat 15:22-31; 16:4, 5) Busa, ang unang Kristohanong kongregasyon nahimong “usa ka haligi ug tukod sa kamatuoran.” Apan komosta ang modernong kasaysayan? Sundogon kaha ni C. T. Russell ug iyang kaubang mga estudyante sa Bibliya ang maong maayo, unang-siglong panig-ingnan? Sa unsang paagi ilang labanan ang kamatuoran?​—1 Timoteo 3:15.

Mga Magasin nga May Halayong Panglantaw

7. (a) Unsa ang katuyoan sa Zion’s Watch Tower? (b) Kang kinsa kini misalig alang sa suportar?

⁷ Ang Hulyo 1879 mao ang sinugdanan sa pangunang galamiton ni Russell alang sa kalamdagan bahin sa Bibliya​—ang Zion’s Watch Tower and Herald of Christ’s Presence. Ang unang isyu niana nagpahayag sa hamiling katuyoan sa magasin: “Sumala sa gipaila sa ngalan, ang tumong niini mao ang pagkabantayanan nga gikan niana ikapahibalo ang mga butang makaiikag ug mapuslanon ngadto sa ‘gamay nga panon,’ ug ingong ‘Tigsibya sa Presensiya ni Kristo,’ aron sa paghatag sa ‘pagkaon sa hustong panahon’ ngadto sa ‘panimalay sa pagtuo.’” Ang pagsalig diha sa Diyos nga makagagahom sa tanan mao ang batong pamag-ang sa magasin. Ang ikaduhang isyu niana nagpahayag: “Ang ‘Zion’s Watch Tower,’ sa among pagtuo, nagbaton kang JEHOVA ingong tigpaluyo, ug samtang kini ang kahimtang kini dili gayod magpakilimos o mopetisyon sa mga tawo alang sa suportar. Sa dihang Siya si kinsa nagaingon: ‘Ang tanang bulawan ug ang salapi sa kabukiran akoa,’ mapakyas sa pagtagana sa gikinahanglang salapi, atong sabton nga kana mao na ang panahon sa paghunong sa pagpatik.”

8. Isaysay ang pag-uswag sa Bantayanang Torre sa kahayag sa Isaias 60:22 ug Zacarias 4:10.

⁸ Ang Zion’s Watch Tower, nga karon The Watchtower o Ang Bantayanang Torre, gipatik nga padayon sulod na sa kapin ug 107 ka tuig. Kini miuswag gikan sa binulang magasin nga may 6,000 ka kopya nga gipatik sa usa ka pinulongan ngadto sa kaduha-sa-bulang magasin nga may 12,375,000 ka kopya nga mabatonan sa 103 ka pinulongan.​—Itandi ang Isaias 60:22; Zacarias 4:10.

9. Sa unsang paagi ang titulong Watch Tower haom nga titulo?

⁹ Ang titulo, Watch Tower, maoy tukmang pagkapili ni Russell. Ang pulong nga kasagarang gigamit sa Hebreohanong Kasulatan alang sa “bantayanang torre” nagkahulogang “lantawanan” o “paniirang dapit,” nga gikan niana ang magbalantay daling makakita sa kaaway sa halayo ug magpalanog sa abanteng pasidaan sa pagsingabot sa kapeligrohan. Nan, nahiangay nga sa unang 59 ka tuig nga pagpatik, ang panid sa titulo nagdala niining mahagitong pangutana nga gikan sa Isaias 21:11, 12, King James Version: “Magbalantay, Unsa man ang sa Gabii?” “Ang Buntag Modangat.”

10. Kinsa karong adlawa ang magbalantay sa Isaias 21:11, ug unsang mensahe ang iyang ginapahibalo?

¹⁰ Ang gibutang nga magbalantay sa tagna ni Isaias moabante sa dili madugay. Taliwala sa naglungtad nga daotang kahimtang sa kasub-anan karon, si Russell malipayong nagsibya sa maayong balita sa “buntag” nga modangat. Ang Milenyong Paghari ni Jesus nga may kalinaw mao ang tema sa usa ka gikahinangpang balita. Apan una pa modangat “ang buntag,” ang matang nga nag-alagad nga magbalantay​—ang nahibilin sa espirituwal nga Israel karong adlawa​—maisogong nagapasidaan sa pag-uswag sa “ang gabii,” nga modangat sa labing mangitngit nga punto sa “gubat sa dakong adlaw sa Diyos nga Makagagahom sa Tanan” sa Har–​Magedon.​—Pinadayag 16:14-16.

11, 12. (a) Sa unsang paagi ang mga pulong sa Isaias 21:8 nagapakita nga ang magbalantay nga matang maoy matinumanon ug maigmat? (b) Gikan sa unsang ahente o tinugyanan ang taho karong adlawa, ug pinaagi sa unsa kini ilabinang gipakaylap?

¹¹ Nga sayosayo, sa Isaias 21:8, kita gipailaila niining matinumanong magbalantay pinaagi niining mga pulonga: “Ug siya misinggit ingon sa usa ka leyon: ‘Sa bantayanang torre, O Jehova, ako nagatindog sa kanunay sa maadlaw, ug sa akong bantayanan ako gibutang sa tanang gabii.’”

¹² Handurawa ang usa ka magbalantay nga gibutang sa usa ka habog nga torre, nga nagtikubo, nga nag-aninaw sa kapunawpunawan sa maadlaw, nga naglisod sa pagtan-aw sa kadulom sa magabii​—sa kanunay maigmat. Karon ikaw nagbaton sa pangunang ideya nga gipasa sa Hebreohanong pulong alang sa “bantayanang torre” (mits·pehʹ) sumala sa pagkagamit niana sa Isaias 21:8. Sanglit ang magbalantay mabinantayon kaayo, kinsa ba nga anaa sa iyang hustong pangisip ang magduhaduha sa iyang nanagingting nga taho? Sa susama karong adlawa, ang magbalantay nga matang naningkamot sa kaugalingon pinaagi sa pagsusi sa Kasulatan sa pagtan-aw kon unsay gitagana ni Jehova alang niining sistemaha sa mga butang. (Santiago 1:25) Unya ang maong magbalantay nagapahayag nianang mensahea sa kusog ug sa kawalay-kahadlok, pinaagi ilabina sa mga panid sa Ang Bantayanang Torre. (Itandi ang Amos 3:4, 8.) Kining magasina dili gayod mosibog gikan sa paglaban sa kamatuoran tungod sa kahadlok!​—Isaias 43:9, 10.

13. Unsang kaubang magasin ang mipatim-aw niadtong 1919, ug unsang susamang katuyoan ang nabatonan niini?

¹³ Niadtong Oktubre 1, 1919, ang usa ka bag-ong magasin mitungha sa talan-awon sa kalibotan: The Golden Age.a Ang magbalantay nga matang mogamit sa maong instrumento ingong kauban sa Ang Bantayanang Torre. Bisan pag ang mga artikulo niini dili motukib sa mga ulohan sa Bibliya nga sama ka dulot sa mga artikulo sa Ang Bantayanang Torre, kini magpasidaan sa katawhan bahin sa bakak relihiyosong mga pagtulon-an, sa umaabot nga kalaglagan sa presenteng daotang sistema sa mga butang, ug sa bag-ong yuta sa pagkamatarong nga mosunod. Oo, kini magalaban usab sa kamatuoran!

14. Unsa ang tumong sa Consolation, nga sa ulahi Awake! o Pagmata!?

¹⁴ Napulog-walo ka tuig sa ulahi ang ngalang The Golden Age giilisag Consolation. “Ang bag-ong ngalan nagabarog alang sa kamatuoran,” mipahayag ang isyu sa Oktubre 6, 1937. Ang Consolation nahimong Awake! o Pagmata! uban sa Agosto 22, 1946 nga isyu. Niadtong isyuha kini nanaad: “Ang pagkamatinumanon ngadto sa kamatuoran mao unya ang labing hataas nga tumong niining magasina.” Hangtod niining adlawa, kini wala mapakyas sa pagtuman nianang saara. Sa talagsaong paagi, Ang Bantayanang Torre ug Pagmata! nagapataas sa bandera sa kamatuoran aron kana makita sa tanan. Sa pagbuhat niana, ang mga magasin nagasubay sa dalan nga gihayagan sa unang Kristohanong kongregasyon.​—3 Juan 3, 4, 8.

Ang Bantayanang Torre ug Pagmata!:Mga Manlalaban sa Kamatuoran

15. (a) Unsang paagi sa paghatag ug espirituwal nga pagkaon karong adlawa ang susama sa iya sa unang Kristohanong kongregasyon? (b) Gawas sa pagkutlog mga bersikulo sa Bibliya, unsa pa ang gikinahanglan? Paghatag ug mga panig-ingnan.

¹⁵ Ang “matinumanon ug maalamong ulipon” nga matang, ang “magbalantay,” karong adlawa nagagamit sa magasing Bantayanang Torre ilalom sa direksiyon sa Nagamandong Lawas sa mga Saksi ni Jehova ingon nga pangunang galamiton sa pagpanghatag ug espirituwal nga “pagkaon sa hustong panahon.” (Mateo 24:45) Kini nagasunod sa sumbanan sa unang-siglong kongregasyon, nga nagasulat sa impormasyon bahin sa doktrina ug mga maayong kagawian aron “mabasa sa tanang igsoon.” (1 Tesalonica 5:27) Sukad sa sinugdanan niini Ang Bantayanang Torre nahimong magasin nga nagagamit sa Bibliya ug nagatudlo sa Bibliya. Pananglitan, ang unang isyu sa Zion’s Watch Tower nagkutlo o nagsitar ug kapin sa 200 ka teksto gikan sa labing menos 30 ka basahon sa Bibliya. Apan labaw ang gikinahanglan kay sa pagkutlo lamang sa mga bersikulo sa Bibliya. Ang mga tawo nagakinahanglag tabang sa pagsabot niana kanila. Ang Bantayanang Torre sa kanunay nagduso sa pagsabot sa Bibliya. Gikan sa 1892 ngadto 1927 ang matag isyu naundan sa senemanang pagbasa sa Bibliya ug usa ka paghisgot sa usa ka pasukaranang teksto gikan sa matag pagbasa. Alang sa ubang pananglitan, tan-awa ang tsart nga nag-ulohang “Mga Artikulo sa Bantayanang Torre nga Nakahimog Kasaysayan, Dekada por Dekada.”

16, 17. Unsay gihimo sa unang editor sa Bantayanang Torre sa pagtino nga kining magasina sa kanunay magalaban sa kamatuoran sa Bibliya?

¹⁶ Sa unsang paagi mahuptan sa Bantayanang Torre ang kaputli sa gipatik nga mensahe? Ang unang editor sa magasin, si C. T. Russell, miestablisar ug mga panalipod sa pagseguro nga ang gipatik sa Bantayanang Torre mao ang kamatuoran sumala sa nasabtan niadto. Usa sa maong mga panagang gipaila diha sa iyang testamento sa Hunyo 27, 1907. (Si Russell namatay sa Oktubre 31, 1916.) Ang iyang testamento nagaingon:

“Akong gimando nga ang tibuok editoryal nga pagdumala sa ZION’S WATCH TOWER mahimutang sa mga kamot sa usa ka komite sa lima ka igsoong lalaki, si kinsa akong awhagon ngadto sa dakong pag-amping ug pag-unong sa kamatuoran. Ang tanang artikulo nga mopatim-aw diha sa mga lindog sa ZION’S WATCH TOWER angay magbaton sa walay-pagkabalhing pag-uyon sa labing menos tulo sa komite sa lima, ug akong iawhag nga kon ang bisan unsang butang giuyonan sa tulo mailhan o isipong supak sa mga hunahuna sa usa o duha sa ubang membro sa komite, kanang mga artikuloha ioktaba alang sa pamalandong, pag-ampo ug panaghisgot sulod sa tulo ka bulan una ipatik​—nga kon posible ang panaghiusa sa pagtuo ug mahuptan sa editoryal nga tagdumala sa magasin ang mga bugkos sa pakigdait.”

¹⁷ Ang matag membro sa Editoryal nga Komite, sumala sa testamento ni Russell, kinahanglang “maunongon sa bug-os sa mga doktrina sa Kasulatan” ug magpadayag, ingong iladong mga kinaiya, “ang kaputli sa kinabuhi, katin-aw sa kamatuoran, kadasig alang sa Diyos, gugma alang sa mga igsoon ug pagkamaunongon ngadto sa Manunubos.” Gawas pa, gikondisyon ni Russell nga “sa bisan unsang paagi dili ipaila kon kinsa ang mga tagsulat sa nagkalainlaing artikulo nga mopatim-aw sa magasin . . . nga ang kamatuoran maila ug mapabilhan tungod sa kaugalingong bili niana, ug ang Ginoo mailhan ilabina nga Ulo sa iglesya ug ang Tuboran sa kamatuoran.”

18. Nganong kita makabasa sa Bantayanang Torre ug Pagmata! uban ang pagsalig?

¹⁸ Hangtod karong adlawa ang Nagamandong Lawas nagasunod sa susamang mga latid. Ang matag artikulo diha sa Ang Bantayanang Torre ug Pagmata! ug ang matag panid, apil ang mga dibuho, ginasusi sa piniling mga membro sa Nagamandong Lawas una kini imprentahon. Dugang pa, kadtong nagatabang sa pagsulat sa mga artikulo alang sa Bantayanang Torre maoy Kristohanong mga ansiano nga nagapabili sa kaugdang sa ilang asaynment. (Itandi ang 2 Cronicas 19:7.) Sila nagagugol ug daghang oras sa pagdukiduki sa Bibliya ug sa ubang reperensiya aron sa pagtino nga ang nahisulat mao ang kamatuoran ug kini matinumanong nagasunod sa Kasulatan. (Ecclesiastes 12:9, 10; 2 Timoteo 1:13) Kasagaran na nga ang usa ka artikulo sa magasin​—nga tingali imong basahon sa 15 minutos​—andamon sa duha ka semana ngadto sa kapin sa usa ka bulan.

19. Unsay imong mahimo sa paglaban sa kamatuoran sa Bibliya?

¹⁹ Busa, makabasa ka sa Bantayanang Torre ug Pagmata! uban ang pagsalig. Apan labaw pa ang imong mahimo. Makatanyag ka nga madasigon niining mga magasina ngadto sa uban aron sila mahibalo usab sa kamatuoran ug makabatog kaayohan sa pagpatalinghog sa ‘magbalantay nga nagatindog sa bantayanang torre.’ (Isaias 21:8) Oo, uban sa modernong-adlawng magbalantay, ikaw makalaban usab sa kamatuoran sa Bibliya.

[Mga footnote]

Nahinumdom Ka Ba?

◻ Nganong si C. T. Russell misugod sa pagpatik ug mga basahon sa Bibliya?

◻ Giunsa sa unang mga Kristohanon paglaban ang kamatuoran?

◻ Nganong ang pulong “Bantayanang Torre” anaa sa titulo niining magasina?

◻ Kinsa ang modernong-adlawng magbalantay, ug unsang galamiton ang iyang gigamit sa pagpadako sa iyang tingog?

◻ Sa unsang paagi ang Bantayanang Torre ug Pagmata! nagalaban sa kamatuoran sa Bibliya?

3. Giunsa ni Jesu-Kristo ang paghatag ug sulundan sa paglaban sa kamatuoran?

[Chart sa panid 13]

Mga Artikulo sa Bantayanang Torre nga Nakahimog Kasaysayan, Dekada por Dekada

1879: “Ang Diyos Gugma”​—naglaban sa halad lukat ni Jesus ingong pasikaranan sa pagtubos sa katawhan Hulyo

1879: “Kon Nganong Gitugotan ang Pagkadaotan”​—nagsaysay nganong ang presensiya ni Jesu-Kristo dili makita Agosto

1880: “Usa ka Lawas, Usa ka Espiritu, Usa ka Paglaom”​—nagpunting sa 1914 nga magtapos sa Hentil nga mga Panahon

1882: “Ang Bayad sa Sala Mao ang Kamatayon”​—nagyagyag sa doktrina sa walay-kataposang pagsakit ingong pagsalikway sa gugma sa Diyos

1885: “Ebolusyon ug ang Panahong Maalamon”​—nagyagyag sa kabakakan sa teoriya sa ebolusyon

1897: “Unsay Ginaingon sa Kasulatan Bahin sa Espiritismo?”​—mihatag ug pamatuod sa demonyohanong kagikan sa espiritismo

1902: “Diyos ang Una​—Iyang mga Pagtudlo sa Katungdanan”​—nagpasiugda sa pagsugot sa kasugoan sa Diyos diha sa pamilya ug sa mga pakiglabot sa negosyo

1919: “Bulahan ang Dili-Mahadlokon”​—naghatag ug bag-ong kinabuhi sa nahigmata nga organisasyon sa dili-mahadlokong mga magsisimba

1925: “Pagkatawo sa Nasod”​—nagpatin-aw sa mga tagna nga nagpakitang ang Gingharian sa Diyos natawo niadtong 1914

1931: “Usa ka Bag-ong Ngalan”​—sukad niadto ang ngalang mga Saksi ni Jehova magpalahi sa matuod nga mga Kristohanon gikan sa apostatang Kakristiyanohan

1935: “Ang Dakong Panon”​—nagpakitang ang pagtigom nagpadayon niadtong magpuyo sa walay kataposan sa yuta

1938: “Organisasyon”​—nagpailaila sa tinuod teokratikanhong kahikayan taliwala sa mga Saksi ni Jehova

1939: “Neyutralidad”​—naglig-on sa mga Saksi ni Jehova sa tibuok kalibotan sa pagsagubang sa mga kalisod sa Gubat sa Kalibotan II

1942: “Ang Bugtong Kahayag”​—nagpalanog sa sige padayon nga pahibalo aron ipadayon ang buluhaton sa maisogong pagsangyaw

1945: “Dili-Matarog Alang sa Matarong nga Pagsimba”​—nagpakita nga ang mga Kristohanon kinahanglang molikay sa pagdawat ug abono sa dugo

1952: “Paghupot sa Organisasyon nga Mahinlo”​—nagpakita nga Kasulatanhon ang pagpalagpot pinaagi sa mga kongregasyon

1962: “Pagpasakop sa ‘Labaw nga mga Pagbulot-an’​—Ngano?”​—mihatag ug mga katarongan sa relatibong pagpasakop sa tawhanong mga gahom

1973: “Paghupot sa Kongregasyon sa Diyos nga Hinlo sa ‘Panahon sa Iyang Paghukom’”​—miagda sa paglikay sa pagtabako

1979: “Kadasig Alang sa Balay ni Jehova”​—nagsubli nga ang balay-balay nga pagsangyaw nagasunod sa sumbanan sa mga apostol

1982: “Mga Hinigugma, . . . Magpabilin Kamo sa Gugma sa Diyos”​—nagpasidaan sa mga Kristohanon sa paagi sa paglihok sa mga apostata

1983: “Paglakaw Uban sa Diyos sa Mapintas nga Kalibotan”​—naglig-on nga ang mga Kristohanon kinahanglang walay bahin sa kapintasan

1984: “Ang bag-ong Toril Alang sa ‘Ubang mga Karnero’”​—gitin-aw sa unsang paagi kining yutan-ong matang gidala sa pagpakighiusa niadtong anaa sa “panon” sa bag-ong tugon

1987: “Kristohanong Tinghugyaw Mosangko sa Milenyo”​—nagpakita sa unsang paagi ang tanang maunongong mga Kristohanon makabaton sa kagawasan ug sa kinabuhi