Kon sa Unsang Paagi Kita Makaila sa Diyos

ANG pila ka tawo nagtuo nga ang Diyos maoy bisan diin, presente diha sa mga bituon ug sa mga planeta, sa balangaw, sa pako sa usa ka langgam, sa usa ka dahon sa sagbot. Bisan pa niana, ang Bibliya nagatudlo nga ang Diyos, ingong Persona, dunay tino nga dapit. Ang makinaadmanong Haring Solomon miingon sa usa ka pag-ampo ngadto sa Diyos: “Mamati ka usab gikan sa mga langit, ang imong natukod nga dapit puloy-anan.” Ug diha sa basahong Isaias sa Bibliya, ang Diyos mismo gikutlo nga miingon: “Ang mga langit mao ang akong trono.”​—1 Hari 8:49; Isaias 66:1.

Bisan tuod ang Diyos dili presente diha sa iyang kalalangan, ang mga kinaiya sa iyang personalidad gibanaag dinha. Matud ni apostol Pablo sa Roma 1:20: “Ang iyang dili-makita nga mga kinaiya sa tin-aw makita sukad sa paglalang sa kalibotan hangtod sa unahan, tungod kay kana sila maila pinaagi sa mga butang nabuhat, bisan ang iyang walay-kataposang gahom ug Pagkadiyos.” Ang salmistang si David susamang misulat: “Ang mga langit nagapahayag sa himaya sa Diyos; ug ang hawan nagasugid sa buhat sa iyang mga kamot. Ang adlaw ngadto sa adlaw nagapamulong, ug ang gabii ngadto sa gabii nagapadayag ug kinaadman.”​—Salmo 19:1, 2.

Oo, lantaw sa gawas sa bituonong gabii ug palandonga sa makadiyut ang dako kaayong kaalam ug gahom nga gikinahanglan sa paglalang ug pagmentenar sa atong uniberso! (Itandi ang Isaias 40:26.) Sa pagkamatuod, ang kalalangan maoy dili-mahutdan nga tinubdan sa impormasyon mahitungod sa personalidad sa Diyos. Ug ang tawo dili makaila sa bug-os sa dako kaayong pamatuod nga ginapalanog niini mahitungod sa mga kinaiya ug mga hiyas sa Diyos. Ang basahong Job nagapahinumdom kanato: “Ania karon! Kini sila mao ang mga bahin sa iyang mga paagi, ug usa ra gayod ka hunghong ang nabati mahitungod kaniya!” (Job 26:14) Adunay karaang Suwekong panultihon: ‘Ang maestro labaw kay sa iyang mga binuhat.’ Uyon niana, kon labaw ang kalalangan, ang Diyos mas labaw pa gayod; kon ang kalalangan nagapasundayag ug kaalam, ang Diyos labi pa gayong maalamon; kon ang kalalangan nagapasundayag ug gahom, ang Diyos labi pa gayong gamhanan!

Ang Bibliya​—Basahon sa Diyos

Sa ingon ang kalalangan nagahatag ug daghang impormasyon mahitungod sa Diyos. Bisan pa niana, ang pagtuon ba sa kalalangan makatug-an kanimo sa ngalan sa Diyos? Mopadayag ba kini kon unsa ang katuyoan luyo sa kalalangan o nganong iyang gitugotan ang pagkadaotan? Ang mga tubag nianang mga pangutanaha nagakinahanglag labaw pa kay sa pagtuon sa materyal nga kabuhatan sa Diyos. Maayo gani, gitino sa Diyos nga ang maong impormasyon mahitungod kaniya gipadayag diha sa Bibliya.

Dinha ang Diyos wala gayod ipadayag ingong abstrakto, dili-ikabatbat nga intelihensiya o omnipresenteng puwersa o gahom. Sa Buhat 3:19 atong mabasa ang kabahin sa “persona ni Jehova.” Dihang ang iyang Anak, si Jesu-Kristo, gibanhaw gikan sa mga patay, ang Bibliya nagaingon nga siya misulod sa langit mismo aron moatubang sa “persona [sa literal, “nawong”] sa Diyos.” (Hebreohanon 9:24, Kingdom Interlinear) Tino, si Jesus wala gayod magtawag sa Diyos nga usa ka Dakong Puwersa, Walay-Kinutobang Intelihensiya, o ubang abstraktong pulong sa dihang siya naghisgot mahitungod kaniya o miampo kaniya. Sa kaatbang, sa kasagaran siya nagtawag kaniyang langitnong Amahan, usa ka termino nga nagpadayag sa iyang lalom nga pakigsuod sa Diyos.​—Mateo 5:48; 6:14, 26, 32.

Busa, ang Diyos dili usa ka walay-ngalang “Usa ka Butang” kondili usa hinuon ka Persona nga may ngalan. Nagaingon ang Salmo 83:18: “Aron ang mga tawo makaila nga ikaw, kansang ngalan mao si Jehova, ikaw lamang ang Hataas Uyamot sa tibuok nga yuta.” Matuod, ang Bibliya nagagamit usab sa mga titulo o mabatbatong mga termino alang sa Diyos: “Makagagahom sa Tanan,” “Hari nga Walay Kataposan,” “manluluwas,” “Magbalantay,” “Karaan sa mga Adlaw,” “magtatan-aw,” “Dakong Magtutudlo,” “Dakong Magbubuhat,” “Bato.” (Ruth 1:20; 1 Timoteo 1:17; Isaias 43:11; Salmo 23:1; Daniel 7:9, 13, 22; 1 Pedro 2:25; Isaias 30:20; 54:5; Deuteronomio 32:4) Hinuon, ang maong mga pulong nagapadayag sa dugang mga kinaiya sa personalidad sa Diyos, sama sa iyang pagkamakagagahom sa tanan, iyang mahigugmaong kabalaka sa iyang katawhan, ug sa iyang walay-kinutobang kaalam.

Tungod kay ang Diyos usa ka Persona, siya usab may mga gusto ug mga dili-gusto​—bisan mga pagbati. Ang Bibliya nagasugid kanato nga siya nahigugma sa iyang katawhan (1 Hari 10:9), nagakalipay sa iyang kabuhatan (Salmo 104:31), nagadumot sa pagsimbag diyosdiyos (Deuteronomio 16:22), ug mobatig kasakit mahitungod sa pagkadaotan. (Genesis 6:6) Sa 1 Timoteo 1:11 siya gitawag ganing “ang malipayong Diyos.”

Suod nga Pagkaila sa Diyos

Tinuod, walay tawhanong kaisipan ang may igong luna sa pagdawat sa tibuok kapahayagan sa personalidad sa Diyos. “Oh kahilabihan ang bahandi ug kaalam ug kahibalo sa Diyos! Pagkadili-matugkad ang iyang mga paghukom ug pagkadili-matukib ang iyang mga paagi! Kay ‘kinsay nasayod sa hunahuna ni Jehova, o kinsay nahimong iyang magtatambag?’” (Roma 11:33, 34) Bisan pa niana, alang sa usang may pagtuo, ang Diyos mahimong sama ka matuod ni bisan kinsang laing tawo. Ang Bibliya nagasugid kanato nga “si Noe milakaw uban sa matuod nga Diyos,” nga daw si Jehova diha mismo sa iyang kiliran. (Genesis 6:9) Ang Diyos matuod usab kaayo alang kang Moises nga kadto nahisamag siya “nakakita sa Usa nga dili makita.” (Hebreohanon 11:27) Ug bahin kang Abraham giingon nga siya “higala ni Jehova.”​—Santiago 2:23.

Hinuon, ang Diyos sa personal nagpadayag sa iyang kaugalingon kang Noe, Abraham, ug Moises. ‘Aw, kon ang Diyos magpadayag sa iyang kaugalingon nganhi kanako sa maong personal nga paagi,’ ang pila tingali moingon, ‘siya mahimo usab nga matuod kanako.’ Apan, hinumdoming si Noe, Abraham, ug Moises wala magbaton ug Bibliya. Sila wala mahibalo bahin kang Jesu-Kristo ni sa tanang dinosenang tagna nga iyang gituman. Ingong resulta, ang tanan nga gipadayag ni Jesu-Kristo mahitungod sa Diyos wala nila hisayri. Ilalom sa maong mga kahimtang, kinahanglanon ug angay nga ang Diyos mohimo nianang direktang mga pagpadayag sa iyang kaugalingon.

Apan, karong adlawa, kita nagbaton sa Bibliya ug sa pagsabot sa kasiglohan nga pagkatuman sa mga tagna sa Bibliya. Nabatonan ta ang mga talaan sa Ebanghelyo sa kinabuhi, mga kabuhatan, ug mga pulong ni Jesu-Kristo. Ug si Pablo nagaingon: “Diha kaniya [Kristo] ang tanang kabug-osan sa balaang kinaiya nagapuyo sa lawasnon.” (Colosas 2:9) Oo, kita makahimo sa pagkaila sa Diyos uban ang kasuod nga dili posible sa mga adlaw sa mga patriarka. Dili ba kini labawng mobakwi sa kamatuorang siya wala magpadayag nga direkta sa iyang kaugalingon kanato?

Pagbasag Bibliya Mopaduol Kanato sa Diyos

Atong mabasa sa Santiago 4:8: “Dumuol kamo sa Diyos, ug siya moduol kaninyo.” Pinaagi sa pagbasa sa Bibliya, kita makaduol sa Diyos. Apan sa unsang paagi? Sa usa ka butang, pinaagi sa pagbasa sa usa ka bahin sa Bibliya sa matag adlaw, imong masayran ang bag-ong mga kinaiya ug mga hiyas sa iyang personalidad. Samtang ikaw magbasa, sa balikbalik hunong ug pangutan-a ang imong kaugalingon: ‘Unsay akong nakat-onan bahin sa Diyos niining bersikuloha o bahina?’ Dugang pa, makaampo ka alang sa espiritu sa Diyos sa pagsilbing usa ka “magtatabang” sa imong pagsabot ug imong pagpaduol sa Diyos.​—Juan 14:26.

“Akong gipabilhan ang pagbatog labing maayong pagsabot kang Jehova ingong usa ka persona,” mipahayag ang usa ka babayeng Kristohanon nga nagbasa sa Bibliya gikan sa hapin ngadto sa hapin. Siya usa ka estudyante sa Watchtower Bible School of Gilead, nga nagabansay ug mga misyonaryo nga ipadala sa tibuok kalibotan. Unsang paagi sa pagtuon sa Bibliya ang gigamit niining tunghaana? Mipatin-aw ang usa sa mga instruktor: “Among sugdan ang usa ka proyekto sa pagtuon sa tibuok Bibliya ingong grupo. Among kuhaon ang 10 ngadto 15 ka panid sa usa ka adlaw, nga ang tanang . . . estudyante magadukiduki ug moamot sa among panaghisgot. Kon among mahibalag ang usa ka lisod nga bersikulo, among tagdon ang (1) konteksto, (2) ang mga kahimtang sa panahon sa pagsulat, ug (3) ang kahulogan sa pasukaranang mga pulong sa teksto. Kami kanunay mangutana, ‘Unsay ginasugid niini mahitungod kang Jehova ug sa iyang mga hiyas?’ Among makitang kini kanunay may gisugid bahin kaniya.”

Bisan pag tingali ikaw wala makapribilehiyo sa pagtuon sa Bibliya sa pormal niining tunghaana, ang pila niining mga paagi sa pagtuon mahimong molampos kanimo ug sa imong pamilya. Pananglitan, sa mga Saksi ni Jehova naandan ang pagtuon sa pila ka kapitulo sa Bibliya kada semana maylabot sa ilang mga tigom sa kongregasyon. Nganong dili sundon kining eskedyul sa pagbasa sa Bibliya ingong pamilya? Dugang pa, ang Watch Tower Society nagapatik sa mga tabang sa panukiduki, sama sa Aid to Bible Understanding ug sa New World Translation Reference Bible, nga makatabang kanimo sa lisod nga bahin sa Bibliya.a Ang regular nga programa sa pagbasag Bibliya makapausbaw ug dako sa imong pagpabili sa personalidad ni Jehova.

Makapili ka usab sa usa ka bahin sa Bibliya nga makaikag sa linain kanimo. Pananglitan, kon imong pilion ang pagtuon sa 17 ka bersikulo sa Salmo 86, makaplagan nimo ang labing menos 15 ka kinaiya sa personalidad sa Diyos: Siya maayo, andam mopasaylo, dagaya sa mahigugmaong-kalulot, andam motubag sa mga pag-ampo, walay-katupong taliwala sa mga diyos, dili-hitupngan ingong usa ka mamugnaong magbubuhat, usa ka soberanong magmamando, usa ka dakong magbubuhat sa kahibulongang mga butang, usa ka manluluwas gikan sa kamatayon, maluluy-on, mapuangoron, hinay masuko, dagaya sa kamatuoran, usa ka magtatabang, ug usa ka maglilipay. Unsang labaw nga tumong ang imong mabatonan kay sa pagsulay nga makakat-on bahin sa imong Maglalalang?

Labaw nga mga Kaayohan sa Pagkaila sa Diyos

Ang pagkab-ot sa atong kinalabwang tumong nga kinabuhing walay kataposan usa lamang ka kaayohan sa pagkaila sa Diyos. (Juan 17:3) Dugang pa, anaa ang kaayohan sa pagbatog matag-adlaw nga kauban nga matinagdanon kanimo ug lig-on sama sa bato. (Salmo 18:31) Sa gibati ni Haring David nga gilibotan sa mga kaaway ug nabug-atan sa mga suliran, iyang nakaplagang ang Diyos mao ang bugtong matuod nga magtatabang nga mabatonan. Busa siya miingon: “Itugyan nimo ang imong palas-anon kang Jehova mismo, ug siya magalig-on kanimo. Dili gayod niya itugot nga matarog ang matarong.”​—Salmo 55:22.

Ikaw, usab, makapahimulos nianang relasyona uban sa Diyos, kon mogahin ka lamang ug panahon sa pag-ila kaniya. Kini dili kaayo lisod. Paningkamot sa pagbasa sa iyang Pulong. Pakig-uban niadtong kang kansang mga kinabuhi nagapasundayag nga sila nakaila sa Diyos, sama kanila nga nagdala kanimo niining magasina. Sangpita si Jehova sa pag-ampo. Kay ang Diyos dili puwersa nga impersonal nga dili makadungog sa imong mga pagtuwaw. Siya usa ka Diyos nga buhi ug usa ka “Tigpatalinghog sa pag-ampo.” Ug “kon imo siyang pangitaon, siya imong hikaplagan.”​—Salmo 65:2; 1 Cronicas 28:9.

[Footnotes]

[Hulagway sa panid 5]

Ang Diyos nagpadayag nga personal kang Noe, Abraham, ug Moises

[Hulagway sa panid 7]

Ang kalalangan maoy dili-mahutdan nga tinubdan sa impormasyon mahitungod sa personalidad sa Diyos