Mga Pangutana Gikan sa mga Magbabasa

◼ Gisultihan ni Moises ang mga Israelitas nga “ang mga butang nga gipadayag atoa ug sa atong mga anak sa walay kataposan.” (Deuteronomio 29:29) Lakip ba niining “mga butang nga gipadayag” ang kahayag nga midan-ag sa Pulong sa Diyos sa panahon niining kataposang mga adlaw?

Dili, dili hustong sabton ang mga tagna nga gihatag kanato niining kataposang mga adlaw nga katupong sa “mga butang nga gipadayag” nga gihisgotan ni Moises.

Sumala sa konteksto sa mga pulong ni Moises, “ang mga butang nga gipadayag” nga iyang gihisgotan may kalabotan sa tugon sa Kasugoan. (Deuteronomio 29:25) Gipakita ni Moises nga kining “mga butang nga gipadayag” may dalang mga obligasyon. Ang kapakyasan sa pagsunod niining mga obligasyona mopalihok kang Jehova sa pagdisiplina sa iyang katawhan.

Ang tugon sa Kasugoan, sa pagkamatuod, maoy kapahayagan nga gikan ni Jehova nga Diyos. Kadto gisundan sa ubang mga kapahayagan ngadto sa mga patriarka, kang Noe, ug balik pa ngadto kang Adan. Si Moises gigamit sa pagsulat niining mga butanga nga gipadayag hangtod sa iyang panahon, ug sila gitipigan alang kanato diha sa unang lima ka basahon sa Bibliya. Sa ulahi, gibatbat sa artikulo “Ang mga Butang nga Gipadayag Atoa” (Ang Bantayanang Torre, Mayo 15, 1986), nga ang “mga butang nga gipadayag” naglakip sa tanang impormasyon nga narekord sa Bibliya.​—2 Timoteo 3:16.

Busa, ang Bibliya nasudlan sa “balaang mga kapahayagan sa Diyos,” ang mga butang nga gipadayag kaniya. (Roma 3:2) Dihang ang lumad nga mga Hudiyo wala magmatinumanon, ang dinihogang mga Kristohanon nahimong mga piniyalan niining “mga butang nga gipadayag,” ug ang Kristohanong kongregasyon nahimong “haligi ug kalig-on” alang kanila. (1 Timoteo 3:15; 1 Corinto 4:1) Busa, ang mga sakop nianang kongregasyona karon tukmang makapalanog sa mga pulong ni Moises, nga “ang mga butang nga gipadayag atoa.”

Karon, si Jehova nakahatag dakong kadan-agan niining “mga butang nga gipadayag.” Sumala sa gitagna ni Daniel, ang katawhan ni Jehova ‘nagadalagan ngadto nganhi’ sa dinasig nga Pulong, ug ang ‘tinuod nga kahibalo modagaya.’ (Daniel 12:4) Busa, kita nahibalo na kon kinsa ang “ubang mga karnero.” (Juan 10:16) Kita nakaila sa “dakong panon.” (Pinadayag 7:9-17) Atong nakita ang katumanan sa sambingay sa mga karnero ug sa mga kanding. (Mateo 25:31-46) Kining mga butanga gibutyag, o gipahibalo, kanato apan dili sa samang diwa sa “mga butang nga gipadayag” sama sa natala sa dinasig nga Pulong ni Jehova.

Busa, dili husto nga ang ingon nga kauswagan sa pagsabot itupong sa dinasig nga mga kapahayagan nga naglangkob sa “mga butang nga gipadayag” nga narekord sa Bibliya. Hinunoa, pinaagi sa mainampingong pagtuon sa Bibliya, ang katawhan ni Jehova nangita diha sa pag-ampo sa hustong pagsabot sa “mga butang nga gipadayag.” Si Jehova, pinaagi sa balaang espiritu, mihatag nianang maong pagsabot sa iyang tinudlong panahon.

Ang Bibliya nagsugilon kanato nga “ang alagianan sa matarong ingon sa banagbanag sa kahayag nga nagakasanag sa kahayag hangtod sa pagkahingpit sa adlaw.” (Proverbio 4:18) Ang nagakauswag nga kahayag nga gipadan-ag ni Jehova diha sa “mga butang nga gipadayag” nagpakita nga hapit na ang pagkahingpit sa “adlaw” ug nagpamatuod nga ang iyang panalangin anaa sa Kristohanong kongregasyon karon.