Mga Magmamantala sa Gingharian Nagtaho

Usa ka Malipayong Reunyon sa Brazil

Sa 67 ka misyonaryong nabansay sa Gilead nga karon nagaalagad sa Brazil, 63 nagtigom sa sangang buhatan ug nagpakuha niining makasaysayanhong letrato. Kining malipayong reunyon nahitabo niadtong Nobyembre 18, 1986, panahon sa pagduaw ni A. D. Schroeder, usa ka membro sa Nagamandong Lawas sa mga Saksi ni Jehova sa Brooklyn, New York.

Maoy 41 ka tuig nga miagi sa halos tukmang adlaw​—sa Nobyembre 17, 1945​—nga duha ka graduwado sa unang klase sa Watchtower Bible School of Gilead miabot sa Brazil. Alang sa usa kanila, si Charles Leathco (luyo, wala sa sentro), kadto espesyal nga reunyon, tungod kay siya ug ang bisitang si Charlotte Schroeder maoy mga klasmet sa Gilead, ug si Igsoong Schroeder maoy usa sa ilang mga instruktor.

Sukad niadtong unang klase, ang total nga 258 ka misyonaryo nangabot sa Brazil. Apil kanila mao ang 16 ka lumad nga taga-Brazil. Usa kanila, si Augusto Machado (atubang nga wala), nakakat-on sa kamatuoran gikan sa usa ka unang misyonaryo, nakaadto sa Gilead ug mibalik sa Brazil. Siya nag-alagad sa sangang buhatan sulod sa miaging 30 ka tuig ug karon mao ang coordinator sa Komite sa Sanga. Bisan pag daghan sa mga misyonaryo wala na mag-alagad sa misyonaryong natad, ang maayong buhat nga ilang gihimo nagapabilin. Niadtong 1945 may 344 lamang ka magmamantala sa Gingharian nianang nasora; karon ang Brazil duol na sa 200,000 ka marka, nga nagtaho sa kinatas-ang ihap nga 196,948 ka magmamantala sa 1986 nga tuig sa pag-alagad.

Dako gayod nga kalipay alang sa mga misyonaryo sa Brazil, batag tigulang, ang paghinumdom sa tanang kahibulongang kalihokan sa miaging 41 ka tuig panahon sa maong malipayong reunyon.