Usa ka Bag-ong Tunghaan nga Pagabuksan!
Kining artikuloha mao ang unod sa panapos nga mga pahayag sa tsirman panahon sa graduwasyon sa ika-82 nga klase sa Gilead.
SUKAD sa pagsugod niini niadtong Pebrero 1943, ang Watchtower Bible School of Gilead nakabansay ug kapin sa 6,000 ka dedikadong ministro sa mga Saksi ni Jehova alang sa misyonaryong buluhaton. Sulod sa kapin sa 40 ka tuig nga gipadala kining mga misyonaryoha, kawhakawhaang mga yuta ang nabuksan aron makabaton sa bug-os nga pamatuod mahitungod sa Gingharian. Sa paghinumdom kon unsay nahimo ni Jehova, ang katawhan sa Diyos tinong nagakalipay nga makitang natuman ang usa ka talagsaong tagna.
Sa Isaias kapitulo 49, mga bersikulo 9-12, ang propeta mitagna sa pagpagawas sa mahiligon-sa-pagkamatarong nga katawhan nga gihuptang binihag sa relihiyosong paagi sa “Dakong Babilonya.” Pinaagi sa iyang dinihogang ulipon nga matang sa yuta, ang mamandoong pagtawag ni Jehova nagagula: “Isulti sa mga binilanggo, ‘Gumula kamo!’ ngadto niadtong anaa sa kangitngitan, ‘Pakita kamo!’ Sa daplin sa mga dalan sila magabantay . . . Sila dili pagagutomon, ni sila pagauhawon, ni hampakon sila sa makapagbang kainit o sa adlaw. Kay ang Usa nga maluoy kanila maoy magagiya kanila, ug ubay sa mga tuboran sa tubig iyang pagadad-on sila . . . Tan-awa! Kini sila magagikan pa sa halayo.” May pagsanong ba? Aduna gayod! Ang mga tawong buotan ug kasingkasing nga ginatos ka libo nangabot, gikan sa tanang direksiyon, nga nagpadayag sa ilang kaugalingon nga gigutom sa kamatuoran, nga matinguhaon nga pakan-on ug malamdagan sa Pulong sa Diyos, nga nagatinguhang mahigawas sa espirituwal nga paagi gikan sa “Dakong Babilonya.” (Pinadayag 17:5) Karon sila anaa sa sulod sa yutan-ong dominyo sa iyang Gingharianong organisasyon, nga nagakaon sa dagayang espirituwal nga pagkaon.
Talagsaong Pagtubo
Sa tungatunga sa katuigang 1940, ang kayutaan sa Latin Amerika ug sa dapit sa Caribbean nahiapil sa unang nakabenepisyo sa mga misyonaryo sa Gilead. Diyutay ra ang mga magmamantala sa maong mga dapit, nga nahimong usa ka dakong hagit ang paghatag sa bug-os nga pamatuod sa Gingharian. Pananglitan, ang Puerto Rico may 25 lamang ka magmamantala niadtong 1944. Ang Costa Rica may 181. Ang Mexico may 2,431 ka magmamantala niadtong 1944 sa dihang nangabot ang unang mga graduwado sa Gilead. Apan samtang ang mga tawong gigutom sa kamatuoran migula sa relihiyosong kangitngitan ug nagpadayag sa ilang kaugalingon nga mga nangita sa Gingharian sa Diyos, sila makugihong misangyaw, ug ang pipila nagpalista sa payunir nga pag-alagad. Ang mga lalaki nagtinguha sa responsabilidad. Ang sangpotanan? Karong adlawa, ang Puerto Rico nagtahog 21,943 ka aktibong ministro, upat ka pilo sa gidaghanon nga aktibo sa 12 ka yuta nga nagtaho sa dapit sa Caribbean niadtong 1947. Ang Costa Rica may mas daghang magmamantala karon kay diha niadto sa tibuok Sentral Amerika 40 ka tuig kanhi. Sa Enero niining tuiga, ang Mexico mitahog usa ka bag-ong kinatas-ang ihap nga kapin sa 206,000 ka magmamantala, nga maoy hapit susama ka daghan sa mga magmamantala nga nagsangyaw sa tibuok kalibotan 40 ka tuig nga miagi.
Sa Amerika del Sur kini susama. Sa dihang unang gipadala ang mga misyonaryo sa Argentina niadtong 1947, may 790 ka magmamantala. Karong adlawa adunay 63,613 ka aktibong ministro, 26 ka pilo sa gidaghanong nagsangyaw sa 12 ka nagkalainlaing kanasoran sa Amerika del Sur 40 ka tuig nga miagi. Ug komosta ang Brazil? Sa gipadala ang unang mga misyonaryo didto niadtong 1945, 394 lamang ka magmamantala ang nagbuhat sa pagsangyawng buluhaton. Apan sila milahutay, ug ang Brazil karon misaylo sa 200,000 ka magmamantala. Kana kapin sa 80 ka pilo sa gidaghanon nga aktibo sa tibuok Amerika del Sur niadtong 1947. Ang ubang nasod nianang kontinenteha nagtala usab ug talagsaong mga pagtubo.
Sa pagliso ngadto sa Halayong Silangan, makita usab nato ang kahibulongang ebidensiya sa pagpanalangin ni Jehova samtang ang makapahigawas nga mensahe sa kamatuoran sa Gingharian nakapaarang sa linibo sa paggula sa kangitngitan. Sa dihang ang unang mga misyonaryo giasayn sa Hapon niadtong 1949, walo lamang ka magmamantala ang nagtaho. Sa walo ka kayutaan sa Asia nga nagtahog kalihokan 40 ka tuig nga miagi, may katibuk-ang gidaghanon nga 475 ka aktibong ministro. Karong adlawa, adunay 116,272 sa Hapon lamang.
Sa South Pacific may duha lamang ka sangang buhatan niadtong 1959. Sa tabang sa mga magmamantala gikan sa Australia nga namalhin aron sa pag-alagad diin dako ang panginahanglan, ug sa paningkamot sa ubang magmamantala sa kongregasyon ug sa pipila ka misyonaryo, ang linibong katawhan naabot sa maayong balita diha sa nagkalainlaing isla nga mga teritoryo. Karon adunay dugang unom ka sangang buhatan sa maong bahin sa kanataran.
Ang kasaysayan sa pagkaugmad sa Aprika makalilipay usab. Ang 17 ka nasod nga nagtaho sa 1947 may katibuk-ang gidaghanon nga 24,896 ka magmamantala. Apan uban sa pagtabang sa mga misyonaryo sa pagpalapnag nga kusog sa maayong balita, ang ginatos ka libo sa wala madugay nagpadayag sa ilang kaugalingon nga nangita kang Jehova ug sa iyang pagkamatarong. Karong adlawa, sa Nigeria lamang, mga 130,000 ka Saksi ang madasigong nagasangyaw sa mensahe sa Gingharian.
Walay pagduhaduhang ang makapahigawas nga Pulong sa kamatuoran ni Jehova nagabuhat sa butang iyang gikalipayan. Kini may tinong kalamposan sa butang nga tungod niana kini gipadala. (Isaias 55:10, 11) Karon nga ginatigom ang dako kaayong ani, kanang samang Pulong nagapasalig kanatong ipatungha ni Jehova ang mas daghang nabansayng magbalantay. (Itandi ang Jeremias 23:4.) Ang Nagamandong Lawas nasayod gayod sa nagausbawng panginahanglan sa mga lalaking may katakos aron sa pag-atiman sa mga responsabilidad diha sa kanataran ingon man sa nagkalainlaing sangang buhatan sa Sosyedad. Gihimo ang mga lakang sa pagtabang sa pagtagana sa maong panginahanglan.
Ang Tunghaan sa Ministeryong Pagbansay
Kamong mga graduwado sa ika-82 nga klase sa Gilead, ingon man ang tanang presente niining labing makapalig-ong okasyon, malipay sa pagkahibalo nga sa tinghunlak sa 1987 ang usa ka bag-ong tunghaan pagabuksan. Kining Tunghaan sa Ministeryong Pagbansay, ingon nga maoy pagtawag niini, mahimong usa ka bahin sa Watchtower Bible School of Gilead, sa ingon magpaarang sa mga igsoong lalaki gikan sa ubang kayutaan sa pagtambong. Ang unang klase gidahom nga mosugod sa mga Oktubre 1 niining tuiga sa siyudad sa Pittsburgh, Pennsylvania, U.S.A., ang unang sentro sa sayong kaugmaran sa Sosyedad. Sa pagkahuman sa unang klase, ang ubang klase pagahimoon nga panapanahon sa nagkalainlaing bahin sa Tinipong Bansa.
Ang tinong Kasulatanhong mga kinahanglanon kinahanglang makab-ot niadtong patunghaon. Ang pagbansay igahatag sa sinugdan ngadto sa ulitawong mga ansiano ug ulitawong ministeryal nga mga alagad nga maayog panglawas. Kon ang pipila mga payunir, labing maayo. Kadtong dapiton sa tunghaan kinahanglang andam moalagad, human sa ilang pagbansay, sa bisan diing dapit nga adunay panginahanglan sa tibuok-kalibotang natad. Kini magkinahanglan sa espiritu ni Isaias, kinsa mitanyag sa iyang kaugalingon nga kinabubut-on, nga miingon: “Ania ako! Ipadala ako.” (Isaias 6:8) Kamong mga graduwado niining ika-82 nga klase, uban sa mga misyonaryong nagaalagad na sa kapin sa usa ka gatos ka kayutaan, makapanglantaw sa unahan sa nahaigong panahon nga magbaton sa ubang binansayng mga igsoon nga nagabuhat abaga sa abaga uban kaninyo.
Ang usa ka bug-os bag-ong kurikulum naandam alang sa Tunghaan sa Ministeryong Pagbansay. Ang tunghaan natukod sa tuyo sa pagbansay sa mga igsoong lalaki nga kuwalipikado nga may pila ka kasinatiang organisasyonal ingong mga ansiano o ministeryal nga mga alagad sa kongregasyon.
Ang Panginahanglan sa Pag-uswag
Tapos sa pangiling adlaw sa Pentekostes sa 33 K.P., ang Kristohanong kongregasyon aktibo kaayo sa pagpalapnag sa maayong balita sa Jerusalem, sa tibuok Judea ug Samaria, ug unya, sa ulahi, sa lagyo pang mga bahin sa yuta. (Buhat 1:8) Sa mga tuig 60 K.P., si apostol Pablo, kinsa nanguna sa mga buluhatong pagwali taliwala sa kanasoran, misulat ngadto sa mga taga-Colosas, nga miingon: “Kining paglaom nga inyong nadungog kaniadto pinaagi sa pagpahayag sa kamatuoran nianang maayong balita nga nagpadayag mismo kaninyo, maingon nga kini nagabunga ug nagauswag sa tibuok kalibotan.” Unya, siya midugang nga kadtong kaubang mga magtutuo ‘angay dili mobulag sa paglaom nianang maayong balita nga ilang nadungog, ug gikawali sa tanang kalalangan sa silong sa langit.’—Colosas 1:5, 6, 23.
Sa hamubo lamang nga panahon, ang unang mga Kristohanon nakapalapnag sa maayong balita sa bisan diin. Si Jehova naghatag sa pag-uswag, uban sa pagdaghan sa hilabihan sa mga tinun-an. Kadto nagkinahanglag dugang mga lalaking may katakos sa pagtudlo diha sa kongregasyon ug sa pag-atiman sa panon. Usa sa batan-ong mga magtatan-aw nga gisang-atan sa maong responsabilidad mao si Timoteo. Unsay giawhag ni apostol Pablo nga buhaton ni Timoteo? Kinahanglang walay paghunong sa iyang pagbansay: “Pinaagi sa paghatag niining mga pagdasig ngadto sa mga igsoon ikaw mahimong usa ka maayong ministro ni Kristo Jesus, usa nga binuhi sa mga pulong sa pagtuo ug sa maayong pagtulon-an nga imong gisunod . . . Bansaya ang imong kaugalingon uban ang diyosnong debosyon ingong imong tumong.” (1 Timoteo 4:6-8) Kini labi pang hinungdanon kay sa paghatag sa bug-os nga pagtagad sa usa ka personal nga interes o pangagpas, apil bisan ang lawasnong mga ehersisyo ug pagbansay. Sa pagtuman sa bug-os sa iyang ministeryo, si Timoteo kinahanglang magbantay sa iyang kaugalingon ug sa iyang pagpanudlo.
Kamong mga graduwado niining klaseha sa Gilead nakadawat ug pagbansay alang sa inyong misyonaryong buluhaton. Ang maayong espirituwal nga mga gasa gihatag kaninyo sa mga magtatan-aw nga kuwalipikadong magtudlo. Karon ginatagana ang dugang maayong programa sa pagtudlo alang sa mga lalaking may katakos nga may pila ka kasinatian sa pag-atiman sa kongregasyonal nga responsabilidad. Sila pagabansayon uban sa diyosnong debosyon ingong tumong, nga motabang kanila sa pagbaton sa hustong kaisipan ug magsangkap kanila sa pagsentro sa hunahuna nganha sa dugang gisulat ni Pablo kang Timoteo: “Ayaw tugoti nga may tawong magatamay sa imong pagkabatan-on. Sa kaatbang, mahimong panig-ingnan ngadto sa mga matinuohon sa sinultihan, sa kagawian, sa gugma, sa pagtuo, sa kaputli, . . . Magpadayon sa pagkugi sa katilingbanong pagbasa, sa pagpanambag, sa pagpanudlo. Palandonga kining mga butanga; ibug-os ang imong pagtagad kanila, aron ang imong pag-uswag madayag sa tanang tawo.”—1 Timoteo 4:12, 13, 15.
Sama sa kahimtang ni Timoteo, kadtong mga igsoong lalaki nga gitudlo sa responsabilidad sa kongregasyon karong adlawa, apil ang batan-ong mga lalaki, angay makaamgo nga karon mao ang nahiangay ug dinaliang panahon aron ilang ipadayag ang ilang pag-uswag. Sa pagbuhat niana, ilang ihatag ang ebidensiya sa kinasingkasing nga paagi nga nakakab-ot sa balaang mga sukdanan ug may tiunay nga disposisyon sa pag-atiman sa espirituwal nga intereses, sa ingon may katakos alang sa dugang mga pribilehiyo sa pag-alagad.—Filipos 2:20, 21.
Tungod sa panginahanglang nagalungtad niining panahona sa pagpalampos sa balaang katuyoan, usa ka pribilehiyo nga gamiton ni Jehova sa bisan diin sulod sa iyang organisasyon. Pagkamapasalamaton nato kaniya ingong atong Dakong Magbalantay ug sa Maayong Magbalantay, si Jesu-Kristo, tungod niining bag-o, tukma-sa-panahong organisasyonal nga tagana, ang Tunghaan sa Ministeryong Pagbansay!