Mga Magmamantala sa Gingharian Nagtaho
Sa New Zealand—Usa ka Adlaw nga Halandumon
“BUG-OS gayod ang among kalipay nga mahauban kaninyo. Dili gayod kami malimot niini!”
“Sa tanan kong teokratikanhong mga asosasyon, wala pa gayod ako makasinatig ingon niini.”
“Kadto nahisamag nagpahimulos kami sa usa ka adlaw sa bag-ong sistema sa mga butang.”
Kini pipila sa mga komento sa mga delegado ngadto sa programa sa dedikasyon sa hedkuwarter sa sanga sa Watch Tower Bible and Tract Society sa New Zealand, Nobyembre 29, 1986. Nganong kadtong mga tawhana natandog pag-ayo? Tungod kay kadto tinuod nga halandumong adlaw. Itugot nga among ipakig-ambit kaninyo ang pipila sa mga hinungdan ngano.
Nahauna, ang matahom nga mga pasilidad nga gidedikar naghimo sa adlaw nga halandumon. Si John E. Barr, sa Nagamandong Lawas sa mga Saksi ni Jehova, nagbatbat sa bag-ong natukod nga Kingdom Hall ug sa langkit nga mga pasilidad sa sanga ingong “angayan, elegante, maanindot . . . Ang natapos nga trabaho mobanaag sa mainampingon kaayong pagtagad sa detalye, sa katahom. Ang tanan daw magkabagay.”
Usa ka Kristohanong Pagkamanagsoon
Niadto, halandumon ang pagkakita nga nagkauban ang daghan kaayong mga karaan, mga Saksi nga nagaalagad kang Jehova nga matinumanon sa daghan, daghang katuigan. Ngani, kini sila mao ang kinabag-an sa 658 ka dinapit nga bisita. Sa dihang nakahibalag sila sa daang mga higala, nga daghan kanila wala nila makita sa tinagpulo ka katuigan, gibati nilang sama kang Pablo, sa dihang, tapos ang hataas nga panaw, siya nakigtagbo sa mga igsoon nga taga-Roma: “Sa pagkakita sa [iyang mga igsoon], si Pablo nagpasalamat sa Diyos ug nagmaisogon.” (Buhat 28:15) Ang pagkakita sa maong mga panig-ingnan sa malungtarong pagkamaunongon—nga ang pipila presente bisan pa sa dili-maayong lawas—maoy tinubdan sa pagdasig ug pasalamat.
Ang adlaw halandumon, usab, tungod sa mainiton internasyonal nga pagkamanagsoon nga nasinati. Ang mga Saksi ni Jehova sakop sa tibuok-yutang kapunongan, ug kadto gipamatud-an sa mga bisita nga naggikan pa sa halayong Australia, Tinipong Bansa, Canada, Britanya, ug Taiwan, ingon man gikan sa Papua New Guinea, Samoa, ug ubang isla sa South Pacific. Ang mga telegrama nangabot gikan sa daghan nga dili makatambong sa personal, apil ang mga pangomosta gikan sa Nagamandong Lawas, mga membro sa pamilyang Bethel sa Brooklyn, ug sa ika-82 nga klase sa misyonaryong tunghaan sa Gilead. Sa pagkamatuod, makapalig-on sa pagtuo nga mahibalo sa interes sa daghan kaayong igsoon diha sa daghan kaayong nasod sa pagpahinungod sa mga pasilidad sa sanga sa New Zealand.
Mga Patukoranan Gipahimutang sa Maunongong mga Saksi
Ang pahinumdoman sa hataas nga kasaysayan sa buluhaton sa pagwali sa New Zealand nga mitultol sa pagtukod niining kinaulahiang mga pasilidad sa sanga maoy makalipay ug naghimo usab sa adlaw nga halandumon. (Itandi ang Hebreohanon 10:32.) Sumala sa giingon sa usa ka mamumulong: “Bisan pag hinungdanon ang pisikal nga mga patukoranan sa maanindot nga bag-ong mga tinukod sa Bethel, ang labi pang makahuloganon mao ang masambingayong mga patukoranan nga gipahimutang sa maunongon, nagsakripisyo-sa-kaugalingong mga igsoong lalaki ug babaye balik pa gayod sa sinugdanan sa siglo.”
Kadto gisundan sa mga interbiyo sa 11 ka matinumanong lalaki ug mga babaye nga may giipong total sa 680 ka tuig nga dedikadong pag-alagad. Sila naghinugilon bahin sa usa sa kinaunhang mga kombensiyon sa New Zealand, niadtong 1913. Gihinumdoman nila ang mga kapaitan sa pagpayunir sa South Island sa katuigang 1930, ang kalisod sa katuigan sa Gubat sa Kalibotan II sa dihang gidili ang organisasyon, ang pagkaporma sa sanga sa New Zealand niadtong 1947, ang pag-abot sa unang mga misyonaryo sa Gilead, ug ang pagtukod sa unang Kingdom Hall sa nasod niadtong 1950. Ang gikahiusang pagbati niadtong giinterbiyo mao: “Pagkamapasalamaton namong kami ania dinhi ug makakita sa ebidensiya sa pag-uswag nga, sa unang mga adlaw, wala gayod namo damgoha nga posible!”
Panalangin ni Jehova
Tingali ang pangunang butang nakahimo sa adlaw nga dili hikalimtan mao ang kaamgohan nga gigiyahan sa panalangin ni Jehova ang trabaho sa konstruksiyon ug gipalampos kana. Nahiangay, usa ka bahin sa programa sa adlaw mao ang nag-ulohan: “Ang Maayong Kamot sa Atong Diyos Ania Kanato.”—Nehemias 2:8.
Ang maayong kamot ni Jehova nakita sa pagkamatinabangon ug kooperasyon sa lokal nga mga negosyante ug mga awtoridad, ingon man diha sa Kristohanong mga hiyas nga gipadayag sa mga trabahante mismo diha sa puwesto. Usa ka negosyante, nga miduaw sa puwesto sa konstruksiyon, mipahayag: “Wala gayod ako makasinati sa laing dapit sa pagbati sa kalinaw ug kahilom sa dihang ako ania dinhi.”
Ang panalangin ni Jehova nakita diha sa pagkamanggihatagon sa ordinaryong mga Saksi sa tibuok nasod nga nagsuportar sa proyekto sa panalapi. Kadto napanid-an usab diha sa pagkamasinugtanon niadtong nagtanyag sa ilang kaugalingon sa pagbuhat sa aktuwal nga trabaho. Tanantanan, 1,237 ang nagpel-ap sa mga aplikasyon nga nagboluntaryo sa ilang pag-alagad, nga ang pipila mibiyahe paingon sa puwesto gikan sa lagyong mga nasod ug sa ilang kaugalingong gastos aron mogugol ug pila ka semana o bulan sa pagtabang sa trabaho sa konstruksiyon. Matud sa usa ka igsoon: “Ang pagtabang sa trabaho sa puwesto maoy usa ka panahon sa dakong kausaban sa akong kinabuhi.”
Sumala sa gihisgotan ni Igsoong Barr sa pakigpulong sa dedikasyon, ang bag-ong mga pasilidad sa sanga angay isipon nga “panggawas, dayag nga ebidensiya sa Mesiyanikong Gingharian sa Diyos nga natukod na karon.” Oo, kadto usa gayod ka halandumong adlaw alang sa New Zealand. Sa kataposan, may kinasingkasing nga tubag sa bahin sa tanang nanambong ngadto sa usa ka resolusyon nga misaad sa “bug-os nga pagpaluyo sa organisasyon ni Jehova ingon nga gihawasan sa among sangang-buhatan.”