Mas Maayong Papel sa Kababayen-an—Bug-os ba

nga Panalangin?

“SA KATIBUK-AN, ang mga babaye sa katuigang otsenta mas edukado, mas himsog ug panglawas, ug hataas ug kinabuhi, mas magantihon ang mga kinabuhi.” Niadtong mga pulonga, ang magasin mitapos sa iyang artikulo: “Mao Kana Kami Kaniadto; Mao Kana Kami Karon.” Apan tinuod ba nga ang mas maayong papel sa kababayen-an nagsagol nga panalangin tungod sa dili maayong mga epekto niini?

Epekto Diha sa Kaminyoon ug Pamilya

Pananglitan, anaa ang komung panagbangi tali sa maayong panimalaynong kinabuhi ug sa pagpadayon ug karera. Ang usa ka taho miingon: “Walay posibilidad nga hatagan ug pangunang pagtagad sa mga babayeng ehekutibo ang panimalaynong kinabuhi kay sa ilang katugbang nga mga lalaki, ug hayan duha ka pilo kanila mga diborsiyado.” Tingali mahibulong ka kon ngano. Ang usa ka propesor sa management sa California State University mibatbat: “Gilantaw sa mga lalaki ang palibot sa ilang panimalay ingong sistema sa pagsuporta, samtang gilantaw kini sa mga babaye nga usa ka palas-anon. Moabot ang lalaki sa balay ug magparelaks siya; mao kanay iyang gihagoan sa pagtrabaho. Apan alang sa mga babaye nakadugang kini sa kabug-at sa trabaho.”

Kini dili lamang tinuod bahin sa mga ehekutibo. Ang mga kababayen-an sa Russia dugay nang nagtrabaho kay sa mga kababayen-an sa mga nasod sa Kasadpan. Nakita gihapon nila nga usa ka palas-anon ang pag-atiman sa trabaho ug pamilya. Ang taga Russia nga editor sa Working Woman miingon: “Ang mga babaye mao ang dugokan sa pamilya ug kinahanglang mabination aron makamugnag atmospera nga may pagbati ug gugma.” Busa giatubang nila ang dobleng palas-anon, samtang daghang mga bana dili motabang sa buluhaton sa balay.

Laing hinungdan sa panag-away mao ang giilustrar sa usa sa labing malamposong babaye sa Wall Street. Siya mipasigarbo: “Ang trabaho alang kanako maoy usa ka kalingawan,” ug siya midugang, “Gusto ko ang akong ginabuhat, ug talagsa ra akong mopaangay”​—bisan alang sa iyang pamilya. Ang kaayohan niini nagadepende sa iyang bana nga maoy nagaatiman sa ilang duha ka anak, bisan ug usa siya ka negosyante. Gibatbat sa iyang mga kauban ang iyang tuman nga kaikag nga “dili maayo alang sa mga relasyon sa pamilya.”

Kaamgid usab kini sa usa sa modernong mga primer ministro. Ang iyang pamilya wala kaayo makabaton sa maayong pagtagad tungod sa iyang politikal nga mga ambisyon. Samtang nagdako, ang iyang mga anak mipuyo sa balay sa ilang uyoan tungod kay, sumala sa gisulti kanamo, “ang usa sa mga butang nga [ilang] gusto mao lamang ang dungang paglingkod sa pagpangaon ingong pamilya, usa ka butang nga dili masayong hikayon” sa balay.

Sa dili pa dugayng interbiyo sa upat ka nangunang mga ehekutibong babaye sa Uropa, ang usa miingon nga halos ang iyang bana lamang ang nagmatuto sa ilang 12-anyos nga anak nga babaye. Laing ehekutibo miingon nga sa mga hinapos sa semana lamang nga siya makaatiman sa iyang mga anak. Sumala sa mga taho sa balita, namatikdan sa tumatambong nga tulo niining mga babayehana kulang sa tawhanong pagbati.

Siyempre, ang ubang mga babaye adunay sekular nga trabaho tungod sa kawalad-on, tingali namatay ang iyang bana o mibiya sa pamilya. Busa alang niining mga babayehana, ang pagkakitag trabaho tingali maoy tipik nga panalangin, apan gusto man nila o dili, kinahanglang ilang sagubangon ang negatibong mga bahin.

Negatibong mga Epekto

Nga ang nausab nga papel sa babaye dili bug-os nga panalangin matin-aw gikan sa komung epekto dihang mas taas ang mga asawa kay sa ilang mga bana ug suweldo o sa propesyonal nga kahimtang. Sumala sa usa ka terapista, kining kiling “nahimong dako ug nailhang dugokan sa krisis sa dugang ug dugang mga kaminyoon.” Ang reklamo sa usa ka bana kasagaran: “Sa akong kaisipan gidayeg ko ang iyang kalamposan. Apan sa emosyon lain ang akong gibati. Gibati kong abandonado ako. Ug mibati akong sad-an tungod kay naguol kaayo ako.” Kon kinahanglang motrabaho ang duha ka Kristohanong mga kapikas, ang mahigugmaong pag-estoryahay ug konsiderasyon makatabang sa pagkunhod niining negatibong mga pagbati ug mga epekto.​—1 Pedro 4:8.

Laing butang nga nagpakita nga ang kauswagang nahimo sa kababayen-an dili bug-os nga panalangin mao ang pasiugda nga gihimo sa feminists nga nakahatag dakong bentaha kanila. Ang The Coming Matriarchy nagpunting sa panahon dihang mga babayeng makikaugalingon ang magapalakaw sa kalibotan ug kinsa mangutana, “Unsay makuha ko gikan niini?” Makaikag, mao kanay gipahayag sa malamposong babayeng kapitalista nga gihisgotan sa sinugdan; dili siya interesado sa pagtabang sa uban aron moasenso gawas kon makaganansiya siya niana. Siya miadmiter: “Maikagon ra kaayo ako sa ganansiya.” Unsa ba ka maalamon kana, sumala sa tambag ni Jesus? Diha sa Wali sa Bukid siya miingon: “Tagda ang ubang tawo sama sa imong gustong ipatagad kanimo.” “Ayaw kamo pagkabalaka tungod sa ugma, tungod kay ang ugma may iyang kaugalingong mga kabalaka.” (Mateo 7:12; 6:34, American Translation) Siyempre, maningkamot ang Kristohanong mga kababyen-an sa pagbaton ug samang hunahuna ni Jesus niining mga butanga.

Mailisan ba ang Moralidad sa Bibliya?

Sa piho ang labing negatibong bahin sa nausab nga papel sa mga babaye mao ang pagkadaot sa moral nga mga prinsipyo. Ang mga paghisgot sa feminist bahin sa Diyos ug relihiyon talagsa ra ug sagad pagpanaway. Ang mga babayeng nagapalangan sa mga kaminyoon tungod sa ilang mga karera moingon nga ang kasal dili kinahanglan sa dili pa makigrelasyon sa sekso.

Ang negatibong hilig sa kalihokan sa feminist mao ang pagpaluyo niini sa lesbianismo. Sa 1971 ang tinuig nga tigom sa NOW (National Organization of Women) mihukom: “Nga giila sa NOW ang dobleng paglupig sa mga babayeng mga tomboy, Nga ang katungod sa babaye sa iyang kaugalingong lawas naglakip sa katungod sa paglatid ug sa pagpahayag sa iyang kaugalingong seksuwalidad ug sa pagpili sa iyang kaugalingong paagi sa kinabuhi, Nga gidawat sa NOW ang paglupig sa mga tomboy nga usa ka makataronganong kabalaka sa feminism.” Apan, itandi, ang paghukom sa Diyos diha sa Roma 1:26, 27. Nagkauyon sa feminist nga kaisipan bahin sa lesbianismo mao ang paglaban sa aborisyon kon gikinahanglan. Ang propesor sa pamalaod sa Tulane University si Billups Percy miingon: “Ang pag-isip sa pagpatay sa bata nga gisabak ingong laing paagi lamang sa pag-opera maoy pagsalikway sa mga kasiglohan sa kriminolohiya, teolohiya ug sa moral nga pilosopiya.”

Usa ka taho nagsugilon nga sa miaging dekada kusog nga miuswag ang seryosong mga krimen sa kabahin sa mga babaye kay sa mga lalaki. Tali sa 1974 ug sa 1979, ang numero sa mga babaye sa Tinipong Bansa nga gidakop sa panikas miuswag halos 50 porsiento, apan miuswag lamang ug 13 porsiento diha sa mga lalaki. Ang pagpangawkaw ug salapi sa mga babaye miuswag usab ug duolan sa 50 porsiento apan 1.5 porsiento lamang sa mga lalaki. Ang nadakpan sa pagpalsipikasyon ug panglibong taliwala sa mga babaye miuswag ug 27.7 porsiento apan ubos sa 10 porsiento tali sa mga lalaki. Sa matin-aw ang nausab nga papel sa mga kababayen-an wala moresultag bug-os nga katagbawan.

Ang paggamit sa tabako miuswag usab diha sa mga babaye. Ang kanser sa baga tungod sa pagtabako mao nay mipuli sa kanser sa suso ingong numero unong hinungdan sa mga nangamatay sa kanser tali sa mga babaye. Sa miaging tuig kini ang hinungdan sa 25 porsiento sa tanang nangamatay sa kanser tali sa mga babaye ug nagauswag sa proporsiyong 7 porsiento sa usa ka tuig.

Usa ka Makatagbawng Umaabot—Sa Unsang Paagi?

Ang trabaho ba o karera nakahatag sa kadaghanang mga babaye ug bug-os nga katagbawan sa kinabuhi? Dayag nga wala, nga maoy dugang ug dugang nakaplagan sa uban. Si Hilary Cosell, awtor sa Woman on a Seesaw: The Ups and Downs of Making It, mihisgot ning problemaha diha sa usa ka artikulo, nga nangutana: “Kon ang mga kababayen-an nakasala niadto may labot sa kaminyoon ug pagkainahan ug pagkaasawa, dili ba mahimong makasala na usab sila may labot sa propesyonalismo, karera ug kalamposan?” Siya nangutana usab: “Mabuhat ba gayod nato ang tanang butang nga nahimo sa atong mga inahan, ug ang tanang butang nga nahimo usab sa atong mga amahan?”

Sa susama, diha sa The Cost of Loving, si Megan Marshall miingon nga “ang pang-atubangang propesyonal nga katakos nagatabon ug gamayng bahin lamang sa tinagong mga samad: nangapakyas nga mga gugma, pagpatuyang sa pakigsekso, pagsulay sa lesbianismo, mga aborisyon, diborsiyo ug yanong kamingaw.” Iyang giasoy kon sa unsang paagi nakapanganak ang kapunongan sa kababayen-an ug “Sugilambong sa Pagkinaugalingon,” apan alang sa kadaghanan, kini wala moobra.

Si Marshall mitapos nga “kita kinahanglang may pagsalig sa taas ug abot nga gugma nga proteksiyon ang maayong kaminyoon,” nga “dili mahimong mag-inusara ang tawo,” ug nga “kinahanglang mangita kitag tawong pagatagdon, ug nga motagad kanato.” Makapahinumdom kini sa mga pulong sa labing dakong Magtutudlo nga nabuhi sukad sa yuta, si Jesu-Kristo. “Adunay dakong kalipay ang paghatag kay sa pagdawat.”​—Buhat 20:35.

Sa tinuod, ang mga tawo hilig mobuhat hingaping mga butang. Nga ang moderno mas maayong papel sa babaye dili bug-os nga panalangin ug gipasiugda kini sa mga pulong ni manalagnang Jeremias: “Wala sa tawo nga molakaw aron sa pagtultol sa iyang mga lakang.” (Jeremias 10:23) Ang Kristohanong babaye, nga nahibalo kon unsa ang kausabang nahitabo (duyog sa mga palanangin ug mga suliran), mas makasabot sa bili sa pagsunod sa tambag sa Diyos. Nakita sa eksperyensiya nga kini “labing tilinguhaon kay sa bulawan.” ‘Ang pagbantay kanila adunay dakong balos.’​—Salmo 19:7-11.