Mga Batan-on—Kamo ba Mauswagon sa Espirituwal?
“Palandonga kining mga butanga; magmapuliki niini, aron ang imong pag-uswag makita sa tanan.”—1 TIMOTEO 4:15.
UNSAY kahulogan sa pagkahimong mauswagon sa espirituwal? Kini nagkahulogang mahisama sa batan-ong Jesus ug Timoteo, kinsa nag-una sa espirituwal nga intereses diha sa ilang mga kinabuhi. Kon ikaw mauswagon sa espirituwal, mahibalo ka kon unsay imong buhaton sa imong kinabuhi. Dili ka moingon: ‘Unya ra ako magsugod sa paghunahuna sa pag-alagad kang Jehova inigkagulanggulang na nako.’ Dili, imong alagaron siya karon!
1, 2. Unsay kahulogan, ug ang dili kahulogan, sa pagkahimong mauswagon sa espirituwal?
2 Sa laing bahin, ang pagkahimong mauswagon sa espirituwal wala magkahulogang samag mongha, magpakitang relihiyoso, o pagkahimong himasa kaayog libro, ni nagkahulogan kini nga magmasulob-on, pormal, ug dili gayod makigsandurot sa uban. (Juan 2:1-10) Malipayong Diyos si Jehova, ug nagatinguha siya nga ang iyang yutan-ong mga anak magmalipayon. Busa ang kasarangang pakigbahin sa mga dula ug ubang mga kalihokan sa kalingawan may pag-uyon sa Diyos.—1 Timoteo 1:11; 4:8.
Mapamatud-an sa Bawtismo
3 Ang pagpangandam alang sa bawtismo ug ang pagpabawtismo maoy mga ebidensiya nga mauswagon sa espirituwal ang batan-on. Kon, sumala sa gisugyot, nga tin-edyer pa si Timoteo dihang nahimo siyang kaubang misyonero ni apostol Pablo, malagmit gibawtismohan si Timoteo sa iyang tunga o sayo nga katuigan sa pagkatin-edyer. Gimatuto siya sa Kasulatan sukad pa sa pagkabata, ug sa dihang nasangkapan na sa tukmang kahibalo ug pagsabot, wala siya magpanuko sa pagpabawtismo.—2 Timoteo 3:15.
4. Unsang pangutana ang gibangon diha kang Felipe, ug bisag mao pay pagkasayod sa nangutana bahin kang Kristo, nganong misugot si Felipe sa iyang hangyo?
4 Kamusta kamong mga tin-edyer nga namatuto sa Kasulatan? Inyo bang napalandong ang mga pangutana: “Unsay nakapugong kanako sa pagpabawtismo?” Sa unang siglo, kanang pangutana gibangon sa usa ka tawo nga sinati kaayo sa Kasulatan apan bag-o pa lang nakaila kang Kristo. Tinuod, wala mahibaloi sa tawo ang tanang butang nga angay mahibaloan mahitungod sa mga katuyoan sa Diyos, apan napalihok siya tungod sa lalom nga pagpabili sa butang nga iyang nahibaloan! Busa, walay katarongan ang tinun-ang Felipe sa pagdumili sa pagbawtismo kaniya.—Buhat 8:26-39.
5. Unsay gikinahanglan aron ikaw mabawtismohan?
5 Unsay nakapugong kanimo sa pagpabawtismo? Siyempre, aron mahimong kuwalipikado, angay imong masabtan kon unsa ang nalangkit. Angay nga may dako kang tinguha sa pag-alagad kang Jehova tungod kay imong gihigugma siya. Angay nga mohimo ka usab ug personal nga dedikasyon kaniya diha sa pag-ampo. Dugang pa, angay sundon nimo ang moral nga mga sukdanan sa Diyos ug may igong kasinatian sa pagpaambit sa imong pagtuo diha sa uban. Dihang kuwalipikado ka na, hinungdanong magpadayon ka ug magpabawtismo.—Mateo 28:19, 20; Buhat 2:38.
6. Ikatandi sa unsa ang bawtismo, ug unsay angay mosunod niana?
6 Samtang ang pagpabawtismo maoy pamatuod nga ikaw mauswagon sa espirituwal, hinumdomi nga ang bawtismo maoy sinugdanan lamang nga lakang. Dihang magpahinungod kang Jehova, mahimo kang dumuloong niining daang kalibotan nga gimandoan ni Satanas. Busa ang dedikasyon ikatandi sa pag-aplay alang sa kinabuhing dayon diha sa bag-ong sistema sa Diyos, ug sa ingon, ang pormal nga seremonya sa bawtismo maoy kapasundayagan atubangan sa mga saksi nga nagalig-on niining kamatuorana. (Juan 12:31; Hebreohanon 11:13) Unya kinahanglang matinumanon kang magkinabuhi sa imong dedikasyon aron makadawat sa gasa sa Diyos nga kinabuhing dayon.—Roma 6:23.
Mapamatud-an Pinaagi sa Paggawi
7. Sa unsang paagi ang imong tinamdan sa mga butang sa kalibotan nalangkit sa imong pagkamauswagon sa espirituwal?
7 Mauswagon ka ug dili sa espirituwal mapamatud-an usab diha sa imong tinamdan sa mga butang sa kalibotan. Unsang mga butanga? Naglakip sila sa mapatuyangong paagi sa kinabuhi, sa mga droga, seksuwal nga kagawasan, imoral nga mga pelikula, malaw-ayng mga musika, mahilas nga mga sinultihan, makapukaw sa sekso nga mga sayaw, pagkamapahitas-on tungod sa rasa ug nasyonalidad, ug uban pa. (1 Juan 2:16; Efeso 5:3-5) Ang mga batan-on, ilabina, ang kinahanglang magbantay. Hinumdomi, ang paagi sa imong paggawi mahitungod niining mga butanga mopadayag sa imong espirituwal nga panglawas.—Proverbio 20:11.
8. Nganong nagpanuko ang ubang mga batan-on sa pagpabawtismo?
8 Gitino ni Satanas nga madanihon kaayo ang imoral nga mga paagi sa kalibotan. Sa pagkatinuod, usa ka 15-anyos miingon: “Sa atong dugang pagtan-aw sa sekso ug mga droga sa TV, dugang nga mahimong normal kining tan-awon sa katilingban.” Ang mga batan-on nga dili makigbahin sa mga paagi sa kalibotan gipabati nga mga katingad-anan sila ug nga may nakulang kanila. Mibati ka na bag ingon niana? Mao kanay gibati sa pipila ka sakop sa kongregasyon, ug sila dili makadesisyon. Dihang gipangutana bahin sa pagpabawtismo, ang usa ka batan-on miingon: ‘Dili pa ako magpabawtismo karon tungod kay makahimo unya akog butang nga makapalagpot kanako.’ Apan dili mahimong maglangaylangay ka o magduhaduha sa duha ka lahi nga mga opinyon. Ang propeta sa Diyos miingon niadto: “Kon si Jehova mao ang tinuod nga Diyos, sumunod kamo kaniya; apan kon si Baal man, sumunod kamo kaniya.”—1 Hari 18:21.
9. Unsang panalipod ang mabatonan sa pagkahimong progresibo sa espirituwal?
9 Sa pagkatinuod, pinaagi paglikay sa imoral nga mga paagi sa kalibotan, ang mawala kanimo mao ang daghang problema. “Gibati ko ang dakong kausaban ug pagbasol sa kinabuhi nga akong gisubay niadto,” miingon ang usa ka babaye. “Gipaubos ug gilimbongan ko ang akong kaugalingon ug ang bata nga akong gisabak.” Oo, ang katahom ug pangidlap sa kalibotan ni Satanas maoy lipat sa mata lamang, usa ka limbong. Kini walay nabatonang butang nga bililhon. Ang pagsunod sa paagi sa kalibotan mosangpot ug gawas sa kaminyoong mga pagsabak, bungkag nga mga panimalay, sakit nga napasa sa sekso, ug dili-maasoy nga kapakyasan ug kagul-anan. Busa pamati sa tambag, magmauswagon sa espirituwal. “Pahilayo gikan sa daotan ug buhata ang maayo.”—1 Pedro 3:11.
10. Unsang tambag ug kang kinsang panig-ingnan ang angay sundon sa mauswagon sa espirituwal nga batan-on?
10 Ang mauswagon sa espirituwal nga batan-on nagkinahanglan sa tambag ni apostol Pablo: “Magpakabata kamo sa daotan; apan magpakahamtong kamo sa mga gahom sa salabotan.” (1 Corinto 14:20) Dayag nga gisunod sa batan-ong Timoteo kining tambaga. Imo ba siyang mahanduraw nga nakighugoyhugoy sa malapason, kalibotanong mga batan-on sa iyang adlaw? Dili gayod! Ang iyang mga kasandurot maoy kaubang mga alagad sa Diyos. (Proverbio 13:20) Sunda ang iyang panig-ingnan. Kon moapil ug kaduhaduhaang kalihokan, pangutan-a ang imong kaugalingon: Buhaton ba kini ni Timoteo ug Jesus?
Mapamatud-an Pinaagi sa Pagtuon sa Bibliya
11. Unsang panan-awon ang kulang sa mga batan-on sa kalibotan, ug sa unsang paagi mabatonan ug mapatunhay kini?
11 Diha sa usa ka artikulo nga gikan sa Italya nga gipatik sa World Press Review miingon: “Ang kapakyasan ug ang pagkawalay paglaom sa mga batan-on nagadugang sa adlaw-adlaw, ug walay makahatag kanilag masanagong umaabot.” Ang nabutaang mga mata niadtong anaa sa kalibotan ni Satanas walay panan-awon sa gisaad sa Diyos nga bag-ong kalibotan ug sa mahimayaong umaabot nga nagahulat niadtong kuwalipikado alang sa kinabuhi didto. (2 Corinto 4:4; Proverbio 29:18; 2 Pedro 3:13) Apan ang mauswagon sa espirituwal nga mga batan-on aduna niining panan-awona nga ginapasanag ug ginapatin-aw pinaagi sa regular nga pagtuon sa Bibliya.
12. (a) Unsay atong buhaton aron mabatonan ang kahibalo sa Diyos? (b) Nganong takos sa paningkamot kini nga kahibalo?
12 Ang bag-ong kalibotan sa Diyos tinuod ba alang kanimo? Mahimong tinuod kini, apan ang pagbaton niini nagkinahanglag tinuod nga paningkamot sa imong bahin. Kinahanglang imong ugmaron ang maidlot nga gana sa pagsabot sa Bibliya aron nga “imong pangitaon kini ingon sa salapi, ug ingon sa tinipigang mga bahandi.” (Proverbio 2:1-6) Unsay nakahimo sa mga tigpangitag bahandi sa pagpadayon sa pagkalot, nga moabot usahay ug daghang mga tuig? Mainiton kaayo niyang gitinguha ang mga bahandi nga mahatag kaniya niini. Apan ang kahibalo mas bililhon kay sa materyal nga bahandi. “Kini nagkahulogang kinabuhing dayon,” miingon si Jesus, “ang pagkuhag kahibalo kanimo, nga mao ang bugtong tinuod nga Diyos, ug kang Jesu-Kristo nga imong gipadala.” (Juan 17:3) Kon tinuod gayod nimong gituohan ang gipamulong ni Jesus didto, ang pagtuon sa Bibliya mahimong maikagong alatimanon nga mohatag kanimog balos sa butang nga mas bililhon kay sa hamiling mga bato.—Proverbio 3:13-18.
13. Unsang mga sugyot sa pagtuon ang sundon sa mauswagon sa espirituwal nga mga batan-on?
13 Imong makita nga sa imong dugang nga pagtuon, labi pang modako ang imong gana sa espirituwal nga pagkaon. Tun-i ang maayong mga paagi sa pagtuon. Ayaw lamang badlisi ang mga tubag, kondili tan-awa usab ang gikutlong mga teksto sa Bibliya, ug susiha ang nalangkit nga mga teksto pinaagi sa mga cross reference sa Bibliya. Makahimo ka usab ug dugang pagtuki pinaagi sa paggamit sa mga indesi, sama sa Watch Tower Publications Index 1930-1985. Palandonga kon unsaon sa pagpadapat sa materyal ug sa paggamit niini. Isulti sa uban ang butang nga imong natun-an. Mopasilsil kini sa mga punto diha sa imong hunahuna ug magsilbi sa pagdasig sa uban sa paghimo usab ug pagtuki. Pinaagi sa pagpadapat sa imong kaugalingon, imong gisunod ang tambag nga gihatag ngadto sa batan-ong Timoteo: “Palandonga kining mga butanga; usaha niini ang imong hunahuna, aron ang imong pag-uswag makita sa tanan.”—1 Timoteo 4:15; 2 Timoteo 2:15.
Makita Diha sa mga Tigom ug sa Pag-alagad
14. Unsang mga tabang aron mahimong makalilipay ang Kristohanong mga tigom, ug sa unsang paagi nga imong madasig ang uban samtang nagatambong?
14 Kon mawili ka sa pagtuon sa Bibliya ug nakaandam ug maayo, ang Kristohanong mga tigom mahimong dakong kalipay. (Salmo 122:1; Hebreohanon 2:12) Magapaabot ka sa dugang pang pakig-ambit sa bahin sa mamiminaw ug sa paghatag ug pakigpulong sa Teokratikanhong Tunghaang Ministeryo. Apan dihang motambong ug mga tigom, adunay ubang mga paagi sa pagtuman sa instruksiyon ‘sa pagdasig sa usag usa’ ug “sa pag-agda sa paghigugma ug sa maayong mga binuhatan.” (Hebreohanon 10:24, 25) Ikaw ba, pananglitan, mangitag paagi sa pagpakigsultig una sa uban? Ang mahigalaong, “Hello, nalipay akong nakakita kanimo!” o ang kinasingkasing nga pangutana, “Komusta ka?” makadasig kaayo, ilabina kon gikan sa usa ka batan-on.
15. Sa unsang paagi imong matanyag ang imong kaugalingon sa paghimog mapuslanong mga pag-alagad, ug nganong maayong ibutang sa hunahuna ang panig-ingnan ni Kristo?
15 Dakong trabaho ang nalangkit sa pagpalakaw ug kongregasyon. Makabahin ka ba? Malagmit, ang batan-ong Timoteo nakahimog daghang mapuslanong pag-alagad kang Pablo—gisugo siya bisan unsa, sa pagkuhag mga suplay, sa paghatod sa mga mensahe, ug uban pa. Kon wala ka pa makahimo, nganong dili hisgotan sa mga ansiano ang imong pagkamainandamon sa pagtabang. Tingali sugoon ka sa pagtunol sa mga asaynment sa tigom, sa paghinlo sa hall, o sa paghimog ubang gikinahanglang mga serbisyo. Hinumdomi, gihugasan ni Kristo ang tiil sa iyang mga tinuna-an, busa walay trabaho ang makapaubos sa dignidad sa tawong progresibo sa espirituwal.—Juan 13:4, 5.
16. Unsang kalihokan ang giila sa usa ka basahong Katoliko nga usa ka Kristohanong responsabilidad?
16 Kon atong tan-awon ang ubang mga relihiyon, angay kitang magpasalamat sa pagbansay nga atong nadawat gikan sa atong mga meting alang sa labing importanteng buluhaton sa pagsangyaw. Nagsulat sa U.S. Catholic sa miaging Septiyembre, si Kenneth Guentert miingon: “Nagdako ako sa panahon dihang wala tugti ang mga Katoliko sa pagbasa sa Bibliya tungod kay makapupo silag katingalahang mga ideya—sama sa pagpanuktok sa mga Kristohanon sa mga pultahan sa pagkombertir ug mga tawo. Dayon miabot ang Batikano II, ug misugod ako sa pagbasa sa Bibliya. Tinuod man; karon nagtuo ako nga angay manuktok ang mga Kristohanon sa mga pultahan sa pagkombetir ug mga tawo.” Siya midugang: “Dili buot ingnon nga nakaangay ako sa maong ideya, apan kon imong basahon ang Bag-ong Tugon, imposibleng malikayan kining konklusyona.”—Mateo 10:11-13; Lucas 10:1-6; Buhat 20:20, 21.
17. Sa unsang paagi mahimong mas makalilipay ang ministeryo alang kanimo?
17 Oo, ang unang mga Kristohanon aktibo sa balay ug balay nga pagsangyaw, ug tataw nga ang mga batan-on sama kang Timoteo atua didto sa ministeryo uban sa mga edaran. Apan, sa pagkatinuod, alang sa pipila karon dili kini labing makalipay nga buluhaton. Ngano? Ang pagkahanas ang hinungdan. Pananglitan, kon maayo kang modula, dili ba mas malingaw ka niini? Sama niini ang ministeryo. Dihang magkahanas ka sa paggamit sa Bibliya ug sa paghisgot sa mga topiko sa Bibliya, ang ministeryo mahimong tuboran sa kalipay, ilabina kon makakaplag kag tawo nga kapaambitan nimo sa makahatag kinabuhing kahibalo. Busa magmauswagon sa espirituwal! Bansaya ang imong pultahan sa pultahan nga mga presentasyon. Pagkuhag mga sugyot sa uban. Pangayog tabang kang Jehova.—Lucas 11:13.
Sa Relasyon sa mga Edaran
18. Unsang matang sa mga relasyon ang gitagamtam ni Jesus ug Timoteo uban sa mga edaran?
18 Sa dihang usa pa siya ka batan-on nga 12 anyos, nalipay si Jesus sa pagpalabay sa panahon uban sa mga edaran, sa paghisgot sa espirituwal nga mga butang. Nakit-an siya kas-a sa iyang mga ginikanan “sa sulod sa templo, nga naglingkod sa taliwala sa mga magtutudlo ug naminaw kanila ug nangutana kanila.” (Lucas 2:46) Ingon man usab si Timoteo. Dihang miduaw si Pablo ug ang iyang mga kauban sa Lystra, dayag nga nalipay si Timoteo sa pakig-uban kanila ug kinasingkasing nga naminaw sa ilang mga pagpanudlo. Siya may pagbati sa lokal nga mga igsoon nga may maayong rekomendasyon kaniya.—Buhat 16:1-3.
19. Nganong gipili ni Pablo si Timoteo ingong kauban sa pagpanaw, ug sa unsang paagi nakatabang si Timoteo?
19 Bisag andam si Timoteo sa paghimog pisikal nga mga pag-alagad alang sa uban, gipili siya ni Pablo nga kauban sa pagpanaw ilabina sa iyang katakos sa pag-alagad sa espirituwal nga mga panginahanglan sa mga tawo. Tungod niana, dihang gipugos si Pablo sa magubtanong mga tawo sa pagbiya sa Tesalonica, iyang gipadala ang batan-ong Timoteo sa paglipay ug sa paglig-on sa bag-ong mga disipulo. Busa dili lamang maikagon si Timoteo sa pagtuon gikan sa mga edaran ug nalipay sa pagpakig-uban kanila; siya maoy usa ka tinuod espirituwal nga tabang alang kanila.—Buhat 17:1-10; 1 Tesalonica 3:1-3.
20. Unsa ang imong maalamong buhaton, ug unsang mga buluhatona ang imong mahimo alang sa mga edaran?
20 Maalamon ka kon imong sundon si Jesus ug Timoteo ug maikagon sa pagpahimulos gikan sa kasinatian ug kahibalo sa mga edaran. Pakigkuyog kanila ug pangutana kanila. Apan ipakita usab ang imong pagkamauswagon sa espirituwal pinaagi sa pagtabang kanila. Aduna bay tigulang o mga masakiton nga malipay kon mamalit ka alang kanila o sa paghimog ubang gikinahanglang mga serbisyo? Tingali imong maduaw sila, basahan sila, ug ipaambit ang imong mga eksperyensiya nga imong gikalipayan diha sa ministeryo.
Papel sa mga Ginikanan ug sa Uban
21. Unsa ka hinungdanon ang papel sa mga ginikanan, ug unsa ang dili mosobra sa pagpasiugda?
21 Ang espirituwal nga kahimsog sa mga batan-on nagadepende ug dako sa instruksiyon ug panig-ingnan nga ihatag sa ilang mga ginikanan. (Proverbio 22:6) Si Jesus tinuod nga nakapahimulos gikan sa pagtultol nga gihatag sa iyang mahadlokon sa Diyos nga yutan-ong mga ginikanan. (Lucas 2:51, 52) Ug dayag dili unta mauswagon sa espirituwal si Timoteo kon dili pa sa pagbansay sa iyang inahan ug sa apohang babaye. (2 Timoteo 1:5; 3:15) Ang bili sa regular nga intruksiyon sa Bibliya dili mosobra sa pagpasiugda! Ingong mga ginikanan, gitagana ba nimo kini? O napasagban ba kini?
22. (a) Kon lantawon sa mga ginikanan nga hinungdanon ang pagtuon sa Bibliya, sa unsang paagi maapektohan ang mga anak? (b) Unsang pagtultol ang angay ihatag sa mga ginikanan alang sa ilang mga anak?
22 Usa ka batan-on diha sa hedkuwarter sa kalibotan sa mga Saksi ni Jehova miasoy nga sa mga katuigan sa pagdako, ang dili-masipyatang bahin sa ilang panimalaynong kinabuhi mao ang senemanang pagtuon sa Bibliya uban sa mga bata. “Usahay kapoy na kaayo si Papa gikan sa trabahoan ug katulogon na kaayo, apan bisan pa dumalahon gihapon ang pagtuon, ug kini ang nakatabang kanamo sa pagpabili sa pagkaseryoso niini.” Mga ginikanan, walay posibilidad nga pabilhan ug dako sa inyong mga anak ang espirituwal nga butang gawas kon inyong pabilhan kinig dako. Busa itanyag ang mga tumong sa pagpayunir ug ang misyonero ug pag-alagad sa Bethel. Tabangi nga ilang pabilhan nga ang ministeryo maoy usa ka karera nga may palaabuton ug nga walay tinuod nga kaugmaon diha sa kalibotanong mga karera.—Itandi sa 1 Samuel 1:26-28.
23. Sa unsang paagi ang uban diha sa kongregasyon makatabang sa mga batan-on aron mauswagon sa espirituwal?
23 Ang uban, usab, makatabang sa mga batan-on sa pag-uswag sa espirituwal. Himoang tumong ang pakigsulti kanila diha sa mga tigom. Lain pa, ilakip sila sa uban nimong mga kalihokan. May permiso sa mga ginikanan, makahimo ang ansiano sa paghikay sa pagpauban ug batan-on sa tinudlong-buluhaton sa pagpakigpulong sa ubang kongregasyon o sa pagpauban kaniya sa ekskursiyon. (Job 31:16-18) Dakog kahulogan ang daw gamayng mga butang. Ang usa ka nagapanawng magtatan-aw, nakamatikod nga walay Bibliya ang batan-ong lalaki nga namati sa iyang pakigpulong, tapos niadto iyang giregalohan siya ug Bibliya. Nakadayeg ang batan-on dili lamang sa gasa kondili sa kaikag usab nga gipakita kaniya. Kapin sa 30 ka tuig sa ulahi, ang batan-ong lalaki, nga karon usa na ka ansiano, mahinangpong makahinumdom gihapon sa mahigugmaong pagtagad niadtong igsoona.
24. Unsa ang makalipayng masayran, ug unsa ang angay natong determinasyon?
24 Dili ba makalipay ang pagkasayod nga adunay ginatos ka libong “mga batan-ong sama sa yamog” nga nagamantala sa makapapreskong balita sa Gingharian ug nga adunay halos samang gidaghanon sa mga batan-ong kababayen-an nga napormang ‘usa ka dakong panon nga nagawali sa maayong balita’? Hinaot nga maningkamot silang tanan nga mahimong mauswagon sa espirituwal, ug hinaot atong tabangan silang tanan nianang tumonga.—Salmo 110:3; 68:11.
Mga Pangutana Agig Repaso
◻ Unsay makatabang sa batan-on sa paghimog desisyon kon kanus-a magpabawtismo?
◻ Sa unsang paagi usa ka sukod ang batasan sa batan-on sa iyang pagkamauswagon sa espirituwal?
◻ Unsay makatabang sa mga batan-on aron malipay sa mga tigom ug sa pag-alagad sa kanataran?
◻ Unsay relasyon ang angay ugmaron sa mga batan-on uban sa mga edaran?
◻ Sa unsang paagi ang mga ginikanan ug ang mga edaran makatabang sa mga batan-on?
3. Kanus-a gibawtismohan si Timoteo?
[Hulagway sa panid 16]
Unsay nakapugong kanimo sa pagpabawtismo?