Mga Magmamantala sa Gingharian Nagtaho
Kamatuoran sa Bibliya Nagapahigawas sa Espiritismo
ANG hunahuna ni Jehova bahin sa espiritismo gipahayag pag-ayo ngadto sa Israel niining mga pulonga: “Dili kamo mangitag mga tilimad-on, ug dili kamo magbuhat sa salamangka.” (Levitico 19:26) Apan sa unsang paagi ang usang nalangkit sa salamangka ug espiritismo mahigawas sa gahom sa mga demonyo? Si Jesus miingon: “Kamo mahibalo sa kamatuoran, ug ang kamatuoran magpahigawas kaninyo.” (Juan 8:32) Kini nakitang matuod, ingong makita sa mosunod nga kasinatian sa usa ka Saksi sa Pransiya.
“Sa akong pagbalhin ngadto sa akong bag-ong balay, ako igo lamang nakapahimutang dihang ang mahigalaong silingan miabot ug mitanyag sa pagtagna sa akong kapalaran. Gihukom ko dihadiha nga dili makiglabot kaniya, nga dili gamayng trabaho, kay siya sosyalon kaayog kinaiya.
“Niadtong Nobyembre 1980 ako nagsakit, ug siya miabot nga mitanyag ug tabang. Nakapabili ako sa iyang pagkamaluluton. Ako labaw pang nakaangay kaniya sa misumbong siya nga siya mahigmata kanunay gumikan sa kagul-anan. Niadto akong naamgohang siya dili diay malipayon sumala sa akong gihunahuna. Apan unsaon nako pagsagubang ang maong suliran sa espiritismo? Kay mibating dili ako makapaabot, gihukom ko nga makigsulti kaniya bahin sa kamatuoran.
“Misugod kami nga naghisgot sa pinansiyal nga mga suliran nga kinaiyanhon sa mga dalagang sama kanamo. Unya siya miingon: ‘Ako may solusyon. Ako makasapi sa pagbasag mga barahang tarot.’ Busa akong gipagawas ang akong Bibliya ug gipakita kaniya kon unsa ka peligroso ang pagkalangkit sa gamhanang daotang mga puwersa.
“Kadto ang sinugdanan sa seryosong panaghisgot bahin sa espiritismo. Siya misaysay nga ang tanang iyang gitagna natuman. Gipaningkamotan ko ang pagtabang kaniya sa pagpangatarongan sa mga butang. Gipakita ko kaniya ang mga pulong ni Moises sa Deuteronomio 18:10, 11: ‘Dili pagahikaplagan kaninyo si bisan kinsa nga . . . nagagamit sa pagpanagna, usa ka salamangkero o si bisan kinsang nagapangitag mga tilimad-on . . . o si bisan kinsang nagakonsultag espiritista o propesyonal nga magtatagna sa mga hitabo o si bisan kinsang nagapakisusi sa mga patay.’ Sa talibiya na ako, siya miingon: ‘Abi kog akong nakaplagan ang solusyon sa akong mga suliran.’ Nakadasig kaayo kanako kadtong mga pulonga, kay diha siya, tapos sa usa lamang ka panaghisgot, nga nagtumong sa espiritismo ingon nga miagi na! Alang kanako nagkahulogan kadtong sa kahiladman siya nakasabot gayod sa punto.
“Kay may dili-matagbawng gana alang sa espirituwal nga pagkaon, iyang gibasa ang Bibliya hangtod sa alas tres o alas kuwatro sa buntag. Sa sinugdan, kami may duha ka pagtuon sa usa ka semana. Siya mitambong sa mga tigom ug kusog miuswag. Hinuon, among gituki sa bug-os ang ulohang espiritismo, nga migamit sa Bibliya ug sa mga basahon sa Watch Tower, ug gihimo niya ang personal nga desisyon sa pagsunog sa tanang iyang nabatonan maylabot sa demonismo.
“Ang babaye milahutay ug sa wala madugay migawas na sa pagsangyaw sa ‘maayong balita’ ngadto sa uban. Matag karon ug unya siya makadawat ug mga tawag sa telepono gikan sa kanhing mga suki, ug tapos sa pagsaysay nga mihunong na siya sa iyang espiritistang mga kalihokan, iya silang dapiton aron makabati sa butang labi pang makaiikag. Siya nabawtismohan ug karon ato nang igsoon.”