Ang Pagpangitag Tinuod nga mga Higala

ANG batan-ong lalaki grabeng pagkasamad sa aksidente sa motorsiklo. Daghang semana nga wala siyay panimuot ug dayon anam-anam nga naulian. “Kon ang akong mga higala sama pa unta kadaghana sa akong mga kaila maulian unta ako dayon,” siya miingon. ‘Gitalikdan ako sa kadaghanan nakong mga higala sa wala pa ako maaksidente. . . . Apan makaayo ang tinuod nga maayong mga higala.’

Kining kahimtanga maoy larawan karon sa dili-mahigalaong kalibotan. Daghan ang gitawag nga mga higala kon maayo ang lakat sa imong kinabuhi. Apan kon moabot ang katalagman, mangahanaw sila. Apan ang tinuod nga mga higala lisod pangitaon.

Bisan pa, ang pagbaton ug usa kun duha ka tinuod, mainitong mga higala mohatag ug dakong kalainan sa kinabuhi. Ang mga eksperto niining bahina miingon: “Ang pagpangandoy ug suod personal nga relasyon maoy dakong tema sa atong panahon.” Ug sumala sa pagkapahayag niana sa karaang panultihon: ‘Ang tinuod nga higala anaa sa panahong magkinahanglan kag tabang.’

Sa miagi, ang mga tawo mas mabalak-on sa uban ug andam motabang sa ilang mga higala ug mga silingan. Apan ang lisoanang punto sa Gubat sa Kalibotan I mihatag dili maayong tawhanong relasyon sa katibuk-an. Ang dili-mapasalamaton, walay pagbati, ako-una nga tinamdan mao nay sukdanan karon.

Kining makasubong mga kahimtang gitagna sa 19 ka siglo kanhi niining mga pulonga: “Malisod unya kaayo alang sa mga Kristohanon ang panahon sa kataposang mga adlaw. Kay ang mga tawo unya mahigugmaon lamang sa ilang kaugalingon ug sa ilang salapi; sila mapahitas-on ug hambogiro, mayubiton sa Diyos, masukihon sa ilang mga ginikanan, dili-mapasalamaton kanila, ug bug-os nga daotan. Sila gahi ug mga ulo ug dili mahinatagon sa uban. Kanunay silang mamakak ug mga magubtanon ug gibale-wala ang imoralidad. Sila mabangis ug mapintas, ug mayubiton niadtong nagapaningkamot nga mahimong matarong. Ilang budhian ang ilang mga higala.”​—2 Timoteo 3:1-4, The Living Bible.

Pagkadulom apan unsa ka tukma sa larawan sa kalibotan karon! Ug kini naghatag kanatog gamayng paglaom sa pagkakitag tinuod nga mga higala. Apan, bisan karon posibleng makabaton kag tinuod nga mga higala. Ug pagkabililhon kanila! Ikaw makadangop kanila sa tanang panahon sa pagpangayog tabang, tambag, paglipay, ug mainit nga pag-ubanay. Apan hinungdanong mailhan ang tinuod gikan sa mini nga mga higala.

Dili Tanang “mga Higala” Tinuod nga mga Higala

Ang batan-ong nasamdan nga gihisgotan sa sinugdan maoy membro sa tem sa potbol ug adunay daghang “mga higala.” Ang mga membro sa mga klab o sa gagmayng mga komunidad makamugna usahay ug relasyon nga maayo. Apan ang maong “mga panaghigala” dili kaayo malig-on. Ug ang pagbaton ug daghang “mga higala” ug dayon sila mangawala makapaluya kaayo sa buot, sumala sa nadiskobrehan sa batan-on. Sayon rang makakitag mga higala; ang pagkahimong tinuod nga mga higala malisod.

Ang mga dato ug kadtong adunay taas nga posisyon dali rang makakitag daghang “mga higala.” Sumala sa gipamulong sa Bibliya: “Ang mga dato adunay daghang mga higala.” “Ang matag tawo maninguha sa pagpahimuot sa dagkong mga tawo; ug ang tagsatagsa buot moangkon nga higala siya sa tawong makahatag kaniyag mga kaayohan.” (Proverbio 14:20; 19:6, Today’s English Version) Apan pila kanila ang may tagong mga motibo? Ug kon mawala ang bahandi ug ang maayong pagkabutang sa tawong gihugopan ug mga higala, sila sa ulahi dili na mahigalaon.

Bisan ang mga tawong ambongan adunay daghang “mga higala”​—ang kadaghanan nadani sa pisikal nga mga butang. Apan makadaot ang maong “panaghigala” ug mawagtang sa panahon sa kalisdanan samag gabon diha sa kainit. Busa may tinuod nga panginahanglan sa . . .

Pagkamapilion

Oo, adunay kaalam ang pagkahimong mapilion bahin sa mga higala. Ang mini nga mga higala maayong moulog-ulog tungod kay may gitagong motibo. “Ang tawo nga nagaulo-ulo sa iyang silingan nagabuklad ug salag alang sa iyang tiil.”​—Proverbio 29:5, The Jerusalem Bible.

Busa, hunahuna pag-ayo ang imo karong mga higala. Ginaimpluwensiyahan ka ba nila sa maayo o sa daotan? Sila ba makikaugalingon, magahig hunahuna, o mapahitas-on? Madalidalion ra ba kaayo sila ug malipay sa pagpangriyesgo? Unsay ilang hunahuna mahitungod sa kaatbang sa sekso? Matimbayahon ug matinahuron ba sila o sobra ka pamilyar, o tingali imoral? Ang imong bang mga kauban limbongan, dili-kasaligang mga tawo? Tiggamit ba silag mga droga? Palainom? Kon mao, nameligro ka. Ingon ta nga matinuoron, mahinlo, ug mapaubsanon ka, apan hinumdomi: “Ang dili maayong mga kauban makadaot sa maayong pamatasan.”​—1 Corinto 15:33.

Ang dakong kapeligrohan sa pagbaton ug dili maayong mga kauban mao nga imo silang sundon. Sa hinayhinay, tingali wala lang dahoma, ang ilang mga paagi ug mga hunahuna motakod kanimo. Sumala sa gipamulong sa Bibliya: “Lakaw uban sa mga tawong maalamon ug ikaw mahimong maalamon. Apan pakighigala sa mga buangbuang, ug madaot ka.”​—Proverbio 13:20, TEV.

Madali ang paghimog sayop nga lakang sa pagbaton ug mga higala. Apan ayaw pagkaluya sa buot. Aduna gihapoy milyonmilyon nga buotan, mahigalaong mga tawo sa kalibotan. Busa sa unsang paagi makakaplag kag tinuod nga mga higala?

[Hulagway sa panid 4]

Makaimpluwensiya kanimog dako ang imong mga kauban