Ang Ipasabot sa mga Balita
Resipe sa Katalagman
“Dihang bag-o pa ang telebisyon, panagsa rang ipasundayag ang kabangisan ug dili kaayo realistikanhon sama karon,” miingon si Dr. Paul Wilson sa Australian Institute of Criminology. Apan, sa pagbatbat nianang iyang giisip nga resipe sa sosyal nga katalagman ug anarkiya, si Wilson midugang: “Karon, nagasidlit ang dugo gikan sa nasamdang lawas ug ang kasakit sa kamatayon gilarawan sa bug-os nga kabangisan. . . . Giatsa ang mga tin-edyer hangtod sa kamatayon ug hinayhinay ginatuok gikan sa nalaslas nga mga liog ug ang ilang pagtinga sa kamatayon mahigugmaong gikuha sa kamera.”
Diha sa iyang artikulo nga migula sa The Sydney Morning Herald, si Dr. Wilson mikomento bahin sa kalisod nga naagian sa mga reporter sa balita sa pagkuha sa interes sa katilingban sa Australia bahin sa walay-dugong kodeta dili pa dugay sa kanait nga Fiji. Ang rason? “Ang kapintasan mao ang sukdanan sa modernong kalingawan,” miingon si Wilson. Ang balita nga gipakita sa TV ug prensa tinuod, mainampingong gisusi, ug sumala gayod sa hitabo, apan walay “kulbahinam nga mga larawan sa kapintasan diha sa telebisyon ug pamantalaan nga nagbatbat sa mga rayot,” siya miingon.
Pagkahaom kaayo kining nagadakong kaibog sa mga pasundayag sa kapintasan diha sa paghubit sa Bibliya bahin niadtong nagkinabuhi sa “kataposang mga adlaw” sa presente daotang sistema sa mga butang! Niining malisod kataposang kaliwatan, ang mga tawo gibatbat nga “walay pagpugong sa kaugalingon, mabangis, walay gugma sa pagkamaayo.”—2 Timoteo 3:1, 3.
Monogamiya o Poligamiya?
Angay bang dawaton sa iglesya ang mga membro nga adunay kapin sa usa nga kapikas sa kaminyoon? Aron masulbad kining isyuha, ang Anglican Church sa Uganda mitudlo ug usa ka grupo sa pagtuon sa “poligamiya ug sa Kristohanong pamilya.” Ang Ecumenical Press Service mitaho nga, ang usa ka sakop sa grupo nga nagtuki, si Obispo Christopher Senyonjo, miingon nga ang pagbaton ug daghang mga kapikas dili lamang madawat kondili mapuslanon. Nganong mao kanay iyang gibati? Ang daghang asawa nga kaminyoon, matud pa niya, makatabang sa pagsanta sa sakit nga AIDS. Labaw pa niana, siya miingon nga ang poligamiya wala ilugos sa mga Kristohanon, nga nag-ingon “bag-ohon [ni Kristo] ang atong walay lami nga mga kaminyoon nga mahimong matam-is nga bino, usa o daghan man ug asawa.”
Apan, ang Bibliya tin-awng nagpakita nga si Jehova nga Diyos, ang Magmumugna sa usa ra nga kapikas nga kaminyoon, nagabatok. Iyang gidasig si apostol Pablo sa pagsulat: “Pasagdi nga ang matag lalaki magbaton ug iyang kaugalingong asawa ug ang matag babaye magbaton ug iyang kaugalingong bana.” (1 Corinto 7:2) Labing hinungdanon, si Pablo misulat sa ulahi mahitungod sa mga kuwalipikasyon niadtong nagabantay sa panon: “Ang obispo kinahanglang dili badlonganon, bana sa usa ra ka asawa.”—1 Timoteo 3:2, King James Version.
Busa, ang tinuod nga mga Kristohanon sa Aprika, ug bisan diing dapit, naglantaw sa poligamiya sumala kon unsa kana—paglapas sa kasugoan sa Diyos.
Nagawaling May Suhol
Ang mga pari sa Lutheran Church sa Sweden dili malipayon sa ilang mga suweldo tungod, kay sumala sa gitaho, ang ilang suweldo, “gamay kon itandi niadtong gibayad sa ubang mga propesyon nga mas mubog gitun-an ug pagbansay sa ilang likod.” Apan, sumala sa serbisyo sa balita sa World Council of Churches, karon miarang-arang na ang mga kahimtang. Tapos sa “dugay ug may kapait nga kampaniya,” ang mga pari nakabaton dili pa dugay ug 40-oras nga semana sa pagtrabaho. Apan komusta kon ang mga taga Sweden nagkinahanglan ug tabang sa pari tapos sa oras sa pagtrabaho? Ang bag-ong kasabotan sa pamuo mipasalig usab ug kabayaran sa obertaym alang sa matag ekstrang oras sa pag-atiman sa panon. Kining suweldo sa obertaym gilaoman nga makapataas sa ilang suweldo sa tibuok tuig gikan sa 10 ngadto sa 12 porsiento.
Kasukwahi sa kabalaka taliwala sa mga pari sa Sweden nga nagapangayog taas nga suweldo sa ilang mga serbisyo, dihang gipadala ni Jesus ang iyang mga disipulo sa pagsangyaw, iyang gisultihan sila: “Nakadawat kamo nga walay bayad, busa panghatag kamo nga walay bayad. Ayaw kamo pagbalon ug bulawan o salapi o tumbaga diha sa inyong bulsa sa bakos.” (Mateo 10:8, 9) Unsay buot niyang ipasabot? Ang maayong balita sa Gingharian kinahanglang dili himoong komersiyo, ni gamiton alang sa hakog personal nga bentaha. Gisunod sa mga disipulo ang sugo ni Jesus, ug ang ilang ministeryo nahimo. Ngano? Tungod kay ang Diyos mao ang milig-on kanila diha sa ministeryo.