Mga Magmamantala sa Gingharian Nagtaho
Giabiabi sa Guinea ang “Balaang Kalinaw” nga mga Kombensiyonista
ANG unang upat ka adlaw sa 1987 mao ang unang distritong kombensiyon sa mga Saksi ni Jehova nga gihimo sukad sa Republika sa Guinea, Kasadpang Aprika. Bisan tuod ang Guinea maoy nasod nga naglabi ang Muslim diin ang buluhaton sa mga Saksi ni Jehova wala pa ilha sa opisyal nga paagi, ang mga Saksi didto nakaangkon sa dungog ingong maayo, maluluton, malinawong katawhan. Maoy tungod sa maong dungog nga gibuksan ug dako sa gobyerno ang mga ganghaan sa pagdawat sa “Balaang Kalinaw” nga mga kombensiyonista.
Apil sa mga delegado mao ang siyam ka misyonaryo nga mibiyahe gikan sa Freetown, Sierra Leone, sakay sa van ug sa duha ka motorsiklo. Sa utlanan, kinahanglang motabok silag suba sakay sa usa ka ferry nga nalangkoban sa tulo ka bangka nga may gibalabag nga mga tabla sa gisangkaron nila. Sa dihang luwas na silang nakatabok uban sa mga sakyanan, ang mga misyonaryo nangutana: “Pila bay ibayad namo?” “Mga Saksi ni Jehova kamo,” mao ang tubag. “Walay bayad.”
Komosta ang aduwana ug imigrasyon? “Ayaw kamo kabalaka niana,” sila giingnan. “Naatiman na ang tanan. Itaod lamang ang inyong mga lapel kard.” Ginatos ka ubang delegado ang may susamang mga kasinatian. Ang gobyerno sa Guinea wala lamang magpatabok kanilang walay bayad sa suba nga nagbulag sa Guinea gikan sa Sierra Leone ug Liberia; sila naghiklin sa mga pormalidad sa aduwana ug sa imigrasyon alang kang bisan kinsang may “Balaang Kalinaw” nga mga lapel kard! Usa ka magtatan-aw sa sirkito, nga taga-Liberia, miingon: “Ang lapel kard mas maayo pa kay sa pasaporte.”
Ang gobyerno sa Guinea matinabangon sa ubang mga paagi. Ilang gitagana ang usa ka sakyanan sa pagdalag mga Saksi gikan sa kaulohan, sa Conakry, ngadto sa siyudad sa kombensiyon sa Guéckédou, kapin sa 640 kilometros ang kalayo. Ilang giawtorisar ang pagpalit ug gasolina alang sa mga sakyanan nga gikan sa Freetown. Ilang gitugon ang otel nga labing duol sa dapit sa kombensiyon sa pagreserba sa tanan nilang kuwarto alang sa mga Saksi. Ilang gitugot usab ang paggamit sa balay-panglalawigan alang sa kombensiyon, nga nagtagana niana nga walay bayad.
Ang distritong gobernador, kinsa mao ang labing taas nga opisyal nianang bahina sa nasod, nagpasakag 11 ka delegado sa iyang kaugalingong balay. Siya apil usab sa 1,132 nga namati sa pakigpulong publiko sa Dominggo.
Dili hikalimtan ni Jehova nga Diyos ang maong kalulot nga gipakita ngadto sa iyang mga alagad.—Mateo 10:42; 25:40.