Ang Relihiyon ba Nakatagbaw sa Atong mga Panginahanglan?
SI Maria maoy usa ka Romano Katolikong madre sulod na sa 21 ka tuig. Nagdako siya sa relihiyoso kaayong palibot. Ngani, sa bata pa, mobangon siya magabii aron mag-ampo alang sa uban! Apan, sa ulahi, ang kakabos, pag-antos, ug inhustisya nga nagpadayon bisan pa sa libolibong katuigan sa impluwensiya sa relihiyon nakapahibulong kaniya: ‘Ang relihiyon ba tinuod nga nakatagbaw sa atong mga panginahanglan?’
Ang kadaghanang mga relihiyon nagpasiugda ug taas nga mga tingusbawan ug moral nga mga prinsipyo. Apan sagad ginalantaw ang relihiyon nga maoy hinungdan sa mga problema, nga nakadugang sa atong mga kalisdanan, inay makatagbaw sa atong mga panginahanglan. Pananglitan, palandonga kining mga komentoha sa mga naniid sa mga hitabo sa relihiyon: “Ang kinailadmang rason sa dili-tawhanong kabangisan mao ang relihiyon.” (National Review) “Ang pangunang motibo sa gubat dili na kahakog kondili relihiyon.” (Toronto Star) “Ang Holocaust ‘bug-os nga gihimo sa bawtismadong mga Kristohanon.’”—The Tampa Tribune.
Ikatingala bang dili na motuo ang mga tawo sa pangangkon sa relihiyon nga kini magtatagbaw sa atong mga panginahanglan? Ilang nakita ang bunga niini. Pananglitan, “ang Shinto, nga maoy lumad nga relihiyon sa Japan, naghatag dili lamang sa iyang kinasingkasing nga pagpaluyo sa kalihokan sa gubat kondili mao gayod ang nanguna niini,” matud pa sa The Christian Century. Pagkadaghang mga relihiyon ang mihimo niini—‘nga naghatag ug bug-os kasingkasing nga pagsuportar sa kalihokan sa gubat’! Palandonga ang mga pagpamatay ug mga panimalos nga gihimo sa mga Buddhista ug mga Hindu sa Sri Lanka, ang mga pagbuno ug mga kabangisan nga niini nalangkit ang mga Katoliko ug mga Protestante sa Irlandiya—tinuod, daw walay kataposan ang listahan! “Ang mga Hindu, Moslem, Sikh ug ubang mga sekta nag-ulaay ug dugo batok sa usag usa sa daghan nang kasiglohan sa India,” mahay pa sa U.S.News & World Report.
Tingali wala makita sa uban ang relihiyon ingong puwersa alang sa daotan, apan sila nagalantaw niana ingong gamhanong puwersa alang sa maayo. Ang National Catholic Reporter naghisgot sa “tradisyonal nga kapakyasan sa iglesya sa igong pagtagana sa mga kagustohan ug mga panginahanglan sa tawo.” Ug ang basahong Liberty miingon nga ang katilingban daw nagalantaw sa mga klero ingong “tigpanalangin-tigbalaan-tigbendisyon” nga himoon lamang sa mga panahong may mga seremonya. Kini midugang: “Diha sa mga hunahuna sa daghang mga tawo siya mao ang ministro sa status quo.” Imong bang gilantaw ang relihiyon nianang kahayaga—nga dili mahitabong mohatag kanato ug kadaot ug dili usab mahitabong mohatag ug dakong kaayohan?
Ang relihiyon karon dako kaayog kaamgiran samtang dinhi pa si Jesu-Kristo sa yuta. Siya miingon nga ang relihiyosong mga lider sa iyang adlaw nagpasidungog sa Diyos sa ilang mga ngabil lamang. Ang resulta sa ilang mga binuhatan mao nga sila nakadugang hinoon sa palas-anon sa mga tawo inay sa pagtagbaw sa ilang mga panginahanglan. “Nagabugkos sila ug mabug-at nga luwan ug ilang gibutang kini diha sa mga abaga sa mga tawo,” siya miingon. (Mateo 23:4) Karon, daghan ang gisaad sa relihiyon apan diyutay lamang kaayo ang natuman. Busa duna bay katarongan sa pagtuo nga ang relihiyon makatagbaw sa atong mga panginahanglan?