Pagkadili-minyo—Usa ka Magantihong Paagi sa Kinabuhi
“Siya may kagawasan sa pagpamana kang bisan kinsa, diha lamang sa Ginoo. Apan labi pa siyang malipayon kon magpabilin siya sa iyang kahimtang karon.”—1 CORINTO 7:39, 40.
SI Jehova takos sa bug-os kalag nga pagsimba sa tanan nga nagapahinungod kaniya. Kon minyo o dili man minyo siya, angay gayod nga atong higugmaon ang Diyos sa atong bug-os nga kasingkasing, kalag, hunahuna, ug kusog. (Marcos 12:30) Tinuod, ang dili-minyong mga Kristohanon diyutay rag mga kababagan kay sa niadtong nahiusa sa kaminyoon. Apan mahimo bang magmalipayon ang dili-minyong alagad ni Jehova?
2, 3. (a) Sa diwa, unsay gipamulong ni Pablo diha sa 1 Corinto 7:39, 40? (b) Unsang mga pangutana ang angay tagdon?
2 Si apostol Pablo nagtubag oo. Mahitungod kanila nga minyo niadto apan nabag-o ang mga kahimtang, siya misulat: “Ang asawa nabugkos ngadto sa iyang bana samtang buhi pa. Apan kon ang bana mamatay, siya may kagawasan sa pagpamana kang bisan kinsa, diha lamang sa Ginoo. Apan ang babayeng balo labi pang magmalipayon kon magapabilin siya sa iyang kahimtang karon, sumala sa akong hunahuna. Ug ako nagatuo nga ako usab nakabaton sa espiritu sa Diyos.”—1 Corinto 7:39, 40.
3 Sanglit gipakita ni Pablo nga mahimong magmalipayon ang mga dili-minyo, kinsa ang makapalandong sa pagpabiling dili-minyo, labing menos sa pila ka panahon? Unsay makaamot sa kalipay sa dili-minyong mga Kristohanon? Sa pagkatinuod, sa unsang paagi ang pagkadili-minyo mahimong magantihong paagi sa kinabuhi?
Magantihong mga Tuig sa Pagkadili-minyo
4. Unsa ang tinuod diha sa mga katuigan sa pagkabatan-ong lalaki ug babaye?
4 Miawhag ang maalamong Haring Solomon: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang daotan nga mga adlaw [sa pagkatigulang], ug sa magsingabot ang mga tuig ikaw magaingon: ‘Ako walay kalipay kanila.’” (Ecclesiastes 12:1) Ang mga tuig sa pagkabatan-ong lalaki o babaye sa katibuk-an mao ang panahon sa kabaskog ug maayong panglawas. Nan, pagkaangay, nga kining mga kusoga gamiton diha sa pag-alagad kang Jehova nga walay mga kababagan! Dugang pa, kining linghod nga mga katuigan maoy panahon sa pagbaton ug eksperyensiya sa kinabuhi, aron maugmad ang kalig-on. Apan panahon usab kini nga bation sa mga batan-on sa kalibotan ang dili-makataronganong kaibog. Pananglitan, palandonga ang mga resulta sa usa ka surbi nga nalangkit sa 1,079 ka tawo taliwala sa panuigong 18 ug 24. Sila nakaagi sa aberids ug pito ka “romantikong mga kasinatian” ug sa tino miingon nga gibati sila ug tinuod nga gugma, dili kay dili-makataronganong kaibog.
5. Mahitungod sa kaminyoon, unsang personal nga mga pangutana ang angay palandongon sa mga batan-on?
5 Ang kaihapan bahin sa pagbulagay, diborsiyo, ug bungkag nga mga panimalay nagpakita nga dili maayong magminyo ug sayo. Inay magdalidali sa pakigdeyt, pagpangulitawo, ug pagminyo, maalamon ang batan-ong mga Kristohanon sa paghunahuna sa positibo kon unsaon nila paggamit ang ilang linghod nga katuigan diha sa walay kababagang pag-alagad kang Jehova. Sa pagtimbangtimbang sa imong mga kahimtang ingong batan-on, maayong magbangon kag mga pangutana sa imong kaugalingon sama niini: Hamtong na ba ako sa emosyon ug andam sa pagpalandong nga seryoso bahin sa kaminyoon? May igo ba akong eksperyensiya sa kinabuhi nga mahimong maayong kapikas sa kaminyoon? Makahimo ba ako sa maayong paagi sa mga responsabilibad sa kaminyoon ug hayan usa ka pamilyang may mga anak? Sanglit nakapahinungod na kang Jehova, dili ba angay hatagan nako siya sa kalagsik ug kusog sa pagkabatan-on nga walay mga kababagan nga nalangkit sa kaminyoon?
Mga Ganti sa Putling Pagkadili-minyo
6, 7. (a) Unsa ang pila ka mga bentaha nga ginatagamtam sa katibuk-an sa dili-minyong mga Kristohanon? (b) Niining bahina, unsay giingon sa dili-minyong misyonero sa Aprika?
6 Ginatagamtam sa dili-minyong mga Kristohanon ang kagawasan gikan sa kababagan ug nakakaplag “madagayaong buluhaton sa Ginoo.” (1 Corinto 7:32-34; 15:58) Inay isentro ang pagtagad sa usa ka indibiduwal sa kaatbang nga sekso, ang dili-minyo adunay daghang mga higayon sa pagpalapad sa Kristohanong gugma alang sa kadaghanan diha sa kongregasyon, lakip sa mga tigulang ug uban nga nagkinahanglan ug mahigugmaong pagtagad. (Salmo 41:1) Sa katibuk-an, ang mga dili-minyo adunay daghang panahon sa pagtuon ug sa pagpalandong sa Pulong sa Diyos. (Proverbio 15:28) Sila adunay daghang mga higayon sa pag-ugmad ug suod nga relasyon kang Jehova, sa pagtuon sa labi pang pagsalig kaniya ug sa pagpangita sa iyang pagtultol. (Salmo 37:5; Filipos 4:6, 7; Santiago 4:8) Ang usa ka dili-minyo nga nag-alagad sa daghan nang katuigan ingong misyonero sa mga kabaryohan sa Aprika miingon:
7 “Ang kinabuhi sa mga baryo sa Aprika yano sa nangaging mga katuigan, nga walay daghang mga kababagan gikan sa modernong sibilisasyon. Sanglit walay mga kababagan nga sama niini, may igo akong higayon sa pagtuon ug sa pagpalandong sa Pulong sa Diyos. Kini ang nakahimo kanakong malig-on. Oo, ang misyonerong kinabuhi maoy tinuod nga panalangin ug panalipod batok sa materyalismo. Sa matahom tropikal nga mga gabii ako may igong panahon sa pagpalandong ug sa paghanduraw sa kalalangan ni Jehova nga nakapasuod kaniya. Ang akong dakong kalipay modangat magabii dihang ang akong hunahuna nagmata pa, ug samtang nagainusara makagugol akog dugang panahon ilalom sa daghang bitoong kalangitan nga nagalakaw ug nagapakigsulti kang Jehova.”
8. Mahitungod sa pagkadili-minyo, unsay gipahayag sa usa ka dili-minyong igsoong babaye nga nagaalagad sa daghang mga tuig diha sa hedkuwarter sa Sosyedad?
8 Hinungdanon, usab, mao kining komento sa dili-minyong igsoong babaye nga nakagugol ug daghang mga tuig sa pag-alagad diha sa hedkuwarter sa Watch Tower Society: “Gipili ko ang dili-minyong kinabuhi sa akong pag-alagad kang Jehova. Bation ba akog kamingaw? Dili gayod. Ngani, ang akong panahon lamang sa pag-inusara mao ang pila sa labing bililhon. Makapakigsulti ako kang Jehova diha sa pag-ampo. Malipay ako sa pagpalandong ug sa personal nga pagtuon nga walay kababagan. . . . Ang pagkadili-minyo nakahatag kanakog dakong kalipay.”
9. Unsa ang ubang mga pribilebiyo sa pag-alagad nga mahimong tagamtamon sa dili-minyong mga Kristohanon?
9 Ang mga dili-minyo makadawat usab ug mga pribilehiyo sa pag-alagad nga dili bukas alang sa mga minyo nga may mga responsabilidad sa pamilya. Pananglitan, adunay mga higayon sa pakigbahin sa bug-os panahong ministeryo ingong payunir diha sa mga dapit diin dako ug panginahanglan sa mga magmamantala sa Gingharian. O ang ulitawo makapribilehiyo sa pag-alagad ingong membro sa pamilyang Bethel diha sa hedkuwarter sa Watch Tower Society o sa sangang buhatan. Ang batan-ong dalaga mahimong makauban sa edarang dalaga sa payunir nga pag-alagad diha sa ilang kaugalingong kongregasyon o sa uban nga may teritoryong pagakobrehan. Nganong dili hisgotan kining mga posibilidara uban sa magtatan-aw sa sirkito? Ingong dili-minyong Kristohanon, itanyag ang imong kaugalingon alang sa nagauswag nga pag-alagad sa kadayegan ni Jehova, ug ikaw madagayaong panalanginan niya.—Malaquias 3:10.
Mga Pananglitan sa Nangagi
10. Kinsa ang naghatag ug pangunang pananglitan sa dili-minyong alagad ni Jehova, ug ngano sa imong hunahuna nga may bentaha ang iyang pagkadili-minyo?
10 Ang pangunang pananglitan sa dili-minyong alagad ni Jehova mao si Jesu-Kristo. Siya puliki kaayo sa pagbuhat sa kabubut-on sa Diyos. “Ang akong pagkaon mao ang pagbuhat sa buluhaton sa nagpadala kanako ug sa pagtuman sa ipabuhat niya,” miingon si Jesus. (Juan 4:34) Pagkaokupado niya—nagwali, nangayo sa mga sakit, ug uban pa! (Mateo 14:14) Si Jesus adunay tinuod nga kaikag sa tawo ug haruhay diha sa presensiya sa mga lalaki, babaye, ug mga bata. Sa pagkatinuod, siya nagabiyahe sa iyang ministeryo, ug may mga panahong may kauban siya. (Lucas 8:1-3) Apan unsa ka lisod unta kadtong buluhatona kon may kauban pa siyang asawa ug gagmayng mga anak! Piho, usa ka bentaha ang pagkadili-minyo sa kaso ni Jesus. Karon, mahimong tagamtamon sa dili-minyong Kristohanon ang samang mga bentaha, ilabina kon tawgon sa pagsangyaw sa balita sa Gingharian sa halayo o peligrosong mga dapit.
11, 12. Unsang maayong mga pananglitan ang gikutlo alang sa dili-minyong mga babaye nga nagaalagad kang Jehova karon?
11 Nakita usab sa uban ang pagkadili-minyo nga praktikal ug magantihon. Ang anak ni Jepte kinabubut-ong mituman sa panaad sa iyang amahan pinaagi sa pagpabiling dili-minyo diha sa usa ka katilingban nga gihatagan ug dakong pasiugda ang kaminyoon ug mga anak. Nalipay siya sa iyang pag-alagad kang Jehova, ug maayong mahibaloan usab nga kanunay nga gidasig siya sa uban. Ngani, “ang mga anak nga babaye sa Israel magaadtoan tuig-tuig sa pagpasidungog sa anak nga babaye ni Jepte ang Gileadhanon, sa upat ka adlaw sulod sa usa ka tuig”! (Maghuhukom 11:34-40) Sa susama, angay pasidunggan sa minyong mga Kristohanon ug sa uban ang dili-minyong mga babaye nga maisogong nagaalagad kang Jehova karon.
12 Ang upat ka anak ni Filipe nga dalagang ulay “nanagpanagna.” (Buhat 21:8, 9) Hayan dako kaayo ang katagbawan niining dili-minyong mga babaye gikan sa ilang aktibong pag-alagad sa kadayegan ni Jehova. Sa susama, daghang batan-ong mga dalaga karon may magantihong pribilehiyo sa pag-alagad ingong mga payunir, o bug-os panahong mga magmamantala sa Gingharian. Siyempre, sila takos sa pagdayeg ingong bahin sa ‘dakong panon sa mga babaye nga nagamantala sa maayong balita.’—Salmo 68:11.
13. Sa unsang paagi ikailustrar ang kaso ni Pablo nga ang pagkadili-minyo maoy usa ka magantihong paagi sa kinabuhi?
13 Nakita ni apostol Pablo ang pagkadili-minyo nga may bentaha. Siya mibiyahe ug libolibong mga kilometro sa iyang ministeryo ug nakaatubang ug dagkong mga kalisdanan, daghang mga katalagman, masubsob nga pagtukaw sa kagabhion, grabeng kagutom. (2 Corinto 11:23-27) Sa walay duhaduha, malisod ug makapabalaka unta kining tanan kon minyo pa si Pablo. Dugang pa, hayan dili unta niya mabatonan ang iyang pribilehiyo ingong “apostol sa mga nasod” kon may pamilya pa siyang giatiman. (Roma 11:13) Bisan pa sa mga pagsulay nga iyang giatubang, naeksperyensiya ni Pablo nga ang pagkadili-minyo maoy usa ka magantihong paagi sa kinabuhi.
Modernong-Adlawng mga Pananglitan
14. Unsang mga eksperyensiya ang natagamtam sa mga colporteur, diin ang kadaghanan kanila dili-minyo?
14 Sama kang Pablo ug sa ubang dili-minyong unang mga Kristohanon, ubay-ubay sa katawhan sa Diyos nga nagapakigbahin sa colportuer nga buluhaton (gikan sa 1881 paunahan) mga dili-minyo nga walay nagasalig nga mga pamilya. Sila kinabubut-ong miadto sa dili-pamilyar nga mga siyudad, mga lungsod, ug kabaryohan, nangita sa mga tawong may maayog mga kasingkasing ug nagpahimutang ug mga basahon sa Bibliya diha kanila. Ang ilang pagbiyahe tingali pinaagi sa tren, bisikleta, tartanilya, o awto. Sa kadaghanan, sila malipayong nagbaktas gikan sa balay-balay. (Buhat 20:20, 21) “Usahay ilang ibaylo ang [basahon sa Bibliya] ug mga abot sa uma, mga manok, sabon ug bisan unsa, nga ilang magamit o ikabaligya sa uban,” nakahinumdom ang usa ka saksi ni Jehova, ug midugang: “May mga panahon, diha sa diyutay ra kaayog balay nga lugar, makig-uban sila sa mga mag-uuma ug sa mga ransero sa gabii, ug usahay matulog diha sa pundok sa dagami . . . Kining mga matinumanon [ang kadaghanan kanila dili-minyo] nagapadayon sa daghang katuigan hangtod nga miagpas kanila ang katuigan.” Siyempre, gihisgotan sa usa kanila kadtong karaang mga colporteur sa katibuk-an dihang siya misulat: “Kami batan-on ug malipayon diha sa pag-alagad, nalipay sa paggugol sa among kusog diha sa pag-alagad kang Jah.”
15. Alang sa daghang dili-minyong mga payunir, unsang pultahan nga nagatultol sa mas dakong buluhaton ang mibukas sa 45 ka tuig kanhi?
15 Daghang mga payunir, o bug-os panahong mga magmamantala sa Gingharian, may mga edad na ug dili usab minyo. Sila sagad nagapamatuod sa hilit nga mga lugar, mitabang sa pagtukod ug bag-ong mga kongregasyon, ug nakatagamtam ug ubang mga panalangin sa pag-alagad kang Jehova. Ang uban kanila, ang kulbahinam nga pultahan nga nagatultol sa mas dakong kalihokan mibukas kanila dihang ang Watchtower Bible School of Gilead gibuksan sa 1943 samtang gisangka pa ang Gubat sa Kalibotan II. (1 Corinto 16:9) Oo, daghan niadtong dili-minyong mga payunir nakadawat ug misyonerong pagbansay diha sa Gilead School ug sa ulahi nagapakaylap sa balita sa Gingharian diha sa bag-ong mga teritoryo. Walay kababagan sa mga responsabilibad sa pamilya, ilang gitanyag ang ilang kaugalingon sa pag-alagad kang Jehova, ug ang uban niadtong unang mga migraduwar dili gihapon minyo ug aktibo sa misyonerong pag-alagad o sa ubang natad sa bug-os panahong pag-alagad.
16. Unsay ebidensiya nga ang dili-minyong mga membro sa pamilyang Bethel nakakaplag nga ang pagkadili-minyo maoy usa ka magantihong paagi sa kinabuhi?
16 Daghang dili-minyong mga Kristohanon nakaalagad sa daghang katuigan ingong membro sa pamilyang Bethel diha sa hedkuwarter sa Watch Tower Society o sa mga sangang buhatan niini sa ubang bahin sa kalibotan. Nakita ba nila ang pagkadili-minyo nga usa ka magantihong paagi sa kinabuhi? Oo, tinuod. Pananglitan, usa ka ulitawo nga nakaalagad na sa daghang katuigan sa Brooklyn Bethel miingon: “Ang kalipay sa pagkakita ug milyonmilyong mga magasin ug ubang mga publikasyon nga nagaunod sa balita sa Pulong sa Diyos nga gipakaylap ngadto sa mga kinatumyan sa yuta maoy usa na ka katingalahang ganti mismo.” Human sa mga 45 ka tuig sa pag-alagad sa Bethel, laing ulitawong igsoon miingon: “Kada adlaw mohangyo ako sa atong minahal langitnong Amahan diha sa pag-ampo ug tabang ug kaalam aron makapabilin akong himsog ug malig-on sa espirituwal ug sa pisikal aron makapadayon ako sa pagbuhat sa iyang balaang kabubut-on. . . . Tinuod nga gitagamtam ko ang malipayon, magantihon ug mapanalanginong paagi sa kinabuhi.”
Pagpabiling Maputli sa Pagkadili-minyo
17. Unsa ang duha ka tabang aron makapabiling putli sa pagkadili-minyo?
17 Nga magantihon ang kinabuhi sa pagkadili-minyo makita gikan sa mga pananglitan sa Bibliya ug sa modernong-adlaw. Siyempre, bisan unsa pang yugtoa sa imong kinabuhi nga magugol diha sa dili-minyo nga kahimtang, kinahanglan nga ‘nakahukom ka na sulod sa imong kasingkasing.’ (1 Corinto 7:37) Apan unsay makatabang kanimo aron makapabiling maputli samtang dili-minyo? Ang labing dakong Tuboran sa tabang mao si Jehova, ang “Tigpatalinghog sa pag-ampo.” (Salmo 65:2) Busa himoang batasan ang pagpangaliyopo kanunay kaniya. “Paglahutay sa pag-ampo,” pangayo sa balaang espiritu sa Diyos ug sa iyang tabang sa pagpasundayag sa mga bunga niini, nga naglakip ang kalinaw ug pagpugong sa kaugalingon. (Roma 12:12; Lucas 11:13; Galacia 5:22, 23) Ug, usab, uban sa mainampoong kaisipan, palandonga sa regular ug kanunay nga ipadapat ang tambag sa Pulong sa Diyos.
18. Sa unsang paagi nalangkit ang 1 Corinto 14:20 sa pagpabiling putli sa usa ingong mga dili-minyo?
18 Laing tabang aron makapabiling maputli sa pagkadili-minyo mao ang paglikay sa tanang butang nga makapukaw sa seksuwal nga kailibgon. Sa dayag, lakip niini ang pornograpiya ug imoral nga kalingawan. Si Pablo miingon: “Magpakabata sa daotan; apan magpakahamtong sa mga gahom sa pagsabot.” (1 Corinto 14:20) Ayaw pangitag kahibalo o eksperyensiya may labot sa daotan, apan pinaagi sa tabang sa Diyos maalamong magpabiling walay kasinatian ug inosente sama sa bata niining bahina. Sa samang panahon, hinumdomi nga ang seksuwal nga imoralidad ug daotang buhat daotan sa panan-aw ni Jehova.
19. Unsang mga teksto ang nagpunting sa ubang mga paagi aron makapabiling maputli ingong dili-minyo?
19 Matabangan usab ikaw nga makapabiling putli ingong dili-minyo pinaagi sa pagbantay sa imong mga kauban. (1 Corinto 15:33) Ayaw pakig-uban sa mga tawo kinsa ang sekso ug kaminyoon mao ang pangunang bahin sa ilang mga kinabuhi ug sa mga kolokabildo. Sa tanang paagi likayi ang malaw-ay nga tiaw! Si Pablo mitambag: “Ang pakighilawas ug ang tanang kahugaw o kadalo ayaw gayod ninyo kini paghisgoti, sanglit dili kini angay sa nahimong balaan; ayaw ninyo gawia ang kalaw-ayan o ang sulting binuang, o ang mahilas nga katistis, mga butang nga dili angay, kondili himoa hinoon ninyo ang pagpasalamat.”—Efeso 5:3, 4.
Usa ka Magantihong Umaabot
20. Unsay moresulta sa paggamit sa labing maayo sa katuigan sa pagkadili-minyo diha sa pag-alagad kang Jehova?
20 Ang paghimo sa imong mga katuigan ingong dili-minyong Kristohanon sa labing maayo diha sa pag-alagad ni Jehova mohatag ug katagbawan karon ug kalinaw sa hunahuna. Ang paghimo niini makaamot usab sa imong espirituwal nga kahamtong ug kalig-on. Kon magpabilin kang dili-minyo alang sa Gingharian hangtod sa kataposan niining daotang sistema sa mga butang, dili kalimtan ni Jehova ang imong nagasakripisyo-sa-kaugalingong mga paningkamot diha sa iyang balaang pag-alagad.
21. Kon magminyo ka man ugaling tapos sa panahon sa kaputli ug sa magantihong pagkadili-minyo, uban sa unsa nga mosulod ka sa kaminyoon?
21 Kon makugihon kang magpadayon sa intereses sa Gingharian ingong dili-minyong lalaki o babaye, makatagamtam kag daghang mga panalangin. (Proverbio 10:22) Ug kon magminyo ka sa ulahi nga kinabuhi, mosulod ka sa kaminyoon nga may dakong eksperyensiya ug tugob nga espirituwal nga kahibalo. Dugang pa, pinaagi sa pagsunod sa tambag sa Kasulatan, imong pilion ang dedikado nagahupot sa integridad nga kapikas nga motabang kanimo sa pag-alagad sa Diyos nga matinumanon. Kasamtangan, imong makita nga ang pagdili-minyo maoy usa ka magantihong paagi sa kinabuhi sa pag-alagad sa atong mahigugmaong Diyos, si Jehova.
Unsaon Nimo sa Pagtubag?
◻ Taliwala sa mga alagad ni Jehova, unsa ang ubang mga ganti sa pagpabiling putli sa pagkadili-minyo
◻ Unsang mga pananglitan sa Kasulatan ang nagpakita nga magantihon ang pagkadili-minyo?
◻ Sa modernong mga panahon, unsang mga pananglitan sa magantihong pagkadili-minyo ang atong nabatonan?
◻ Unsa ang makatabang sa Kristohanon aron makapabiling putli samtang dili-minyo?
1. Dili man minyo o minyo, unsay atong nautang kang Jehova?
[Kahon sa panid 19]
Mga Tabang sa Pagpabiling Putli sa Pagkadili-minyo
◆ Pag-ampo kanunay alang sa espiritu sa Diyos ug sa iyang tabang sa pagpasundayag sa mga bunga niini
◆ Palandonga ug ipadapat kanunay ang tambag sa Pulong sa Diyos
◆ Likayi ang pornograpiya ug imoral nga kalingawan
◆ Bantayi ang imong mga kauban
◆ Likayi ang mahugawng sinultihan ug malaw-ayng tiaw
[Mga Letrato sa panid 19]
Ang anak nga babaye ni Jepte, si apostol Pablo, ug ubang mga alagad ni Jehova nakakaplag nga usa ka magantihong paagi sa kinabuhi ang pagkadili-minyo. Ikaw makahimo ba?