Mga Pangutana Gikan sa mga Magbabasa
◼ Si Jehova ba o si Jesus ang gipunting ni Pablo dihang misulat siya: ‘Ang Ginoo nag-ingon kanako: “Ang akong gahom ginahingpit diha sa kahuyang”’?
Mopatim-aw nga nagpunting si apostol Pablo kang Ginoong Jehova. Pinaagi sa pagpaniid sa mga pulong ni Pablo diha sa konteksto, dili lamang nato makita kon ngano kini kondili atong mapalalom usab ang atong apresasyon sa relasyon tali sa Diyos ug sa iyang Anak. Si Pablo misulat:
“Aron dili ako makapasulabi sa pagpahimuot, ako gihatagan ug tunok dinhi sa lawas, nga manulonda ni Satanas, aron sa pagpadayon sa pagsagpa kanako, aron lagi dili ako magpasulabi sa pagkahimuot. Sa makatulo nangamuyo ako sa Ginoo mahitungod niini, nga unta iyang kuhaon kini gikan kanako; apan siya nag-ingon kanako: ‘Ang akong dili-takos nga kalulot igo alang kanimo; kay ang akong gahom ginahingpit diha sa kahuyang.’ Sa ingon niana, labi pang igakalipay ko diay hinoon ang pagpasigarbo tungod sa akong mga kahuyang, aron ang gahom ni Kristo mahisama sa balongbalong nga magapandong ibabaw kanako.”—2 Corinto 12:7-9.
Ang tunok sa lawas ni Pablo tingali maoy sakit sa mata o mini nga mga apostoles nga mihagit sa iyang pagkaapostol. (Galacia 4:15; 6:11; 2 Corinto 11:5, 12-15) Bisan unsa pa man kadto, ang tendensiya mao ang pagpaluya kang Pablo o sa pagpugong kaniya sa pagkalipay sa iyang ministeryo. Busa makatulo siya mihangyo nga kuhaon kini gikan kaniya. Apan kinsay iyang gihangyoan, ug kinsa ang mitubag nga nag-ingong “akong gahom”?
Sanglit ang mensahe naghisgot sa “gahom ni Kristo,” mopatim-aw nga nangaliyopo si Pablo kang Ginoong Jesus. Sa walay duhaduha, siya may gahom ug makapaambit niini ngadto sa iyang mga disipulo. (Marcos 5:30; 13:26; 1 Timoteo 1:12) Sa pagkatinuod, ang Anak sa Diyos “nagasapnay sa tanang butang pinaagi sa pulong sa iyang gahom.”—Hebreohanon 1:3; Colosas 1:17, 29.
Apan, ang Ginoong Diyos mao ang kinatayoktokang tuboran sa gahom, nga iyang igahatag ug igatagana sa iyang mga magsisimba. (Salmo 147:5; Isaias 40:26, 29-31) Kining gahoma nga gikan sa Diyos maoy nakaarang kang Jesus sa paghimog mga milagro ug makapalihok pa kaniya. (Lucas 5:17; Buhat 10:38) Sa susama, ang mga apostoles ug ubang mga disipulo ni Jesus nakadawat ug gahom gikan kang Jehova. (Lucas 24:49; Efeso 3:14-16; 2 Timoteo 1:7, 8) Lakip na niini si Pablo, kinsa nag-alagad “sumala sa gasa sa dili-takos nga kalulot sa Diyos nga gihatag [sa apostol] sumala sa paglihok sa iyang gahom.”—Efeso 3:7.
Sanglit nangaliyopo si Pablo nga kuhaon ang ‘tunok diha sa iyang lawas, nga manulonda ni Satanas,’ makataronganong modangop siya sa Ginoong Diyos sa pagbuhat niini, si Jehova ingong usa nga gipatungnan sa mga pag-ampo. (Filipos 4:6; Salmo 145:18) Dugang pa, ang pagdasig sa usa ka paagi ni Jehova kang Pablo niining mga pulonga, “Ang akong gahom ginahingpit diha sa kahuyang,” nagalangkit kang Kristo. Ang gahom nga gikan sa Ginoong Diyos ikahubit ingong “gahom ni Kristo [nga niadto] sama sa balongbalong” ibabaw kang Pablo, kay si ‘Kristo adunay gahom sa Diyos ug kaalam sa Diyos.’ (1 Corinto 1:24) Busa, ang 2 Corinto 12:7-9 makatabang kanato sa pag-apresyar sa dugang pa sa hinungdanong paagi nga gigamit ni Jehova ang iyang Anak sa katumanan sa balaang kabubut-on.