Mga Magmamantala sa Gingharian Nagtaho
Mga Batan-on sa Italya Mihimog Kahigayonan sa Pagsangyaw
KADTONG nagapabili sa kahibulongang mga katuyoan sa Diyos malipay sa pagtabang sa uban nga makakat-on sa kahibulongang paglaom sa Gingharian. Kadaghanan kini magalangkit sa pagpahimulos sa kahigayonan nga motungha, sama sa gipakita sa mosunod nga taho gikan sa Sardinia.
◻ “Usa ka 12-anyos nga magmamantala misakayg bus sa pagpauli gikan sa pagsangyaw sa kanataran. Sakay usab sa bus ang duha ka batan-ong lalaki ug usa ka babaye nga mga tag 18 anyos. Ang batan-ong magmamantala milingkod duol sa babaye ug misugod sa pagbasa sa magasing Pagmata!, nga naglaom nga pukawon ang iyang kamausisaon. Nakamatikod siya sa magasin ug nangutana kon unsay iyang gibasa. Iyang gisaysay nga siya nagbasa sa usa ka artikulong naghisgot sa solusyon sa mga sulirang atubangon sa mga batan-on. Siya miingon nga nakabaton siyag dakong kaayohan sa maong materyal ug kana makatabang usab kaniya. Malipayong gidawat sa batan-ong babaye ang mga magasin.
“Kay nakapamati sa kabildohay, ang duha ka laing batan-on mihangyo sa mga magasin. Samtang sila nagkuha sa amot, giingnan sila sa drayber nga dili usikan ang ilang kuwarta diha sa maong walay-kapuslanang mga butang. Ang mga batan-on mitubag nga sila intelihente man, ug makaiikag ang mga magasin. Niana gipadaplin sa drayber ang bus, gihunong ang bus, ug buot motan-aw kon unsay makaiikag kaayo sa maong mga magasin. Midawat usab siyag mga kopya.
“Ang batan-ong Saksi nga nag-asoy sa maong kasinatian miingon: ‘Ako nalipay kaayo nga nasugdan nako ang pagsangyaw diha sa bus.’”
◻ Ang laing batan-ong Saksi nagpahimulos sa usa ka situwasyon sa tunghaan. Kining batan-ona miasoy: “Ang among magtutudlo sa tunghaan nagtudlo kanamo sa usa ka paagi sa pagtuon nga lahi sa naandang paagi. Tapos sa paghisgot sa materyal, kinahanglang himoon namo ang usa ka laraw nga magaapil sa dagkong mga punto ug segundaryong mga punto ug dayon ihatag ang ekstemporanyong pakigpulong bahin sa ulohan.
“‘Sinati ako kaayo niining paagiha,’ miingon ang Saksi. ‘Kini mao ang gisugyot sa Giya sa Tunghaan sa Teokratikanhong Ministeryo.’ Sa wala madugay namatikdan sa magtutudlo nga ako lamang ang milampos sa pagpadapat sa maong paagi. Nangutana siya nganong may kalainan tali sa akong trabaho ug sa iya sa uban. Akong gisaysay nga akong nakat-onan kining paagiha diha sa Tunghaan sa Teokratikanhong Ministeryo. Siya nalipay kaayo ug gidapit ako sa pag-ilustrar niini ngadto sa klase, nga migamit sa Giya sa Tunghaan sa Teokratikanhong Ministeryo. Kini akong gibuhat.
“Sa akong pagkauli sa balay, akong gisultihan ang akong pamilya kon unsay nahitabo. Ang akong amahan, nga dili Saksi, kanunay nag-ingon nga ang pagka Saksi ni Jehova maoy kakulian sa tunghaan, apan tapos makadungog sa akong kasinatian, siya napugos sa pagbag-o sa iyang hunahuna.”
Dako gayong pribilehiyo nga kamong mga batan-on, ingon man kamong mga hamtong, makatuboy ug makapaila sa ngalan ni Jehova!—Salmo 148:12, 13.