Tinuod Bang Sila Nakigsulti sa mga Patay?

ANG mga tem sa soker sa Brazil usahay mangayog tabang sa mga espiritista. Ngano? Aron sa pagpangayog tambag tungod sa kahadlok nga tingalig makadaog ang kontrang tem. Sumala sa usa ka mantalaan, ang “higayon sa pagpakigsulti direkta sa labaw-sa-kinaiyanhon sa pagpangitag mga solusyon sa tanang matang sa mga problema adunay gamhanong impluwensiya sa milyonmilyong mga tawo.” Diha sa ubang mga nasod, ang dagko ug ranggong mga politiko, mga artistiko, ug mga negosyante regular nga tigkonsulta sa mga espiritu. Sa paningkamot sa pagpangitag tambal o sa pagsulbad sa pinansiyal nga problema, daghan ang misulay sa pagpakigsulti sa mga patay, nga gituohang mas nadan-agan.

Apan angay bang makigsulti sa mga patay? Posible ba ang paghimo niini? Ug may mga kapeligrohan bang nalangkit? Tingali matingala ka sa pagkasayod kon unsay gisulti sa Bibliya.

Unsay Nahitabo sa Kaso ni Saul?

Palandonga ang tinuod-kinabuhing eksperyensiya nga narekord sa Bibliya: Nahadlok sa mga kaawayng Pilistihanon, si Haring Saul sa karaang Israel midangop sa espiritista sa En-dor. Iyang gihangyo siya sa pagkontak sa namatayng propetang Samuel. Sa pagkadungog sa gibatbat sa espiritista bahin sa usa ka tigulang nga nagsul-ob ug walay manggas nga sapot, nagtuo si Saul nga si Samuel kining maong multo. Ug unsa ang mensahe? Ihatag ang Israel sa mga kamot sa Pilistihanon, ug sa sunod nga adlaw si Saul ug ang iyang mga anak makauban na ni “Samuel,” nga nagpasabot nga mamatay sila samtang makig-away sa mga Pilistihanon. (1 Samuel 28:4-19) Mao ba kana ang nahitabo?

Dili gayod. Grabe ang pagkasamad ni Saul diha sa gubat batok sa mga Pilistihanon, apan namatay siya tungod sa paghikog. (1 Samuel 31:1-4) Ug sukwahi sa panagna nga nagsugyot nga mamatay ang tanang mga anak nga lalaki ni Saul uban kaniya, ang iyang anak nga si Ishboset naluwas.

Apan matarong bang makigsulti sa patay? Dili, dili gayod matarong. Ang Kasulatan nagasulti kanato: “Namatay si Saul tungod sa iyang pagkadili-matinumanon . . . ug tungod sa pagpakigtambag sa usa ka espiritista sa pagpangutana kaniya niini.” (1 Cronicas 10:13) May makat-onan ba kita gikan niini? Oo. Namatay si Saul tungod sa paghanyo sa espiritista sa pagpangutana sa mga patay. Ngano? Tungod kay sa pagbuhat niini, iyang gilapas ang tino nga sugo sa Diyos: “Dili hikaplagan uban kanimo . . . nga magpakigsulti sa espirista o sa mananagna sa kapalaran o magpangutana sa mga patay. Kay dulumtanan alang kang Jehova ang bisan kinsa nga magabuhat niini.” (Deuteronomio 18:10-12) Nganong dulumtanan sa Diyos ang pagpangutana sa patay? Sa dili pa tubagon kanang pangutanaha, kita makapangutana:

Posible ba Kini?

Kon dunay nakapakigsulti sa patay, ang namatay sa aktuwal tingalig buhi. Tingali sila adunay dili-mamatayng mga kalag. Apan ang Bibliya nagaingon: “Ug giumol ni Jehova nga Diyos ang tawo gikan sa abog sa yuta, ug gihuypan siya sa mga buho sa iyang ilong sa gininhawa sa kinabuhi, ug ang tawo nahimong kalag nga may kinabuhi.” (Genesis 2:7) Busa, ang tawo mismo mao ang kalag. Siya walay dili-mamatay nga kalag nga magpadayon sa pagkabuhi human mamatay ang lawas. Sa pagkatinuod, ang Kasulatan nagaingon: “Ang kalag nga makasala—kini mamatay.” (Ezekiel 18:4) Dugang pa, ang Pulong sa Diyos nagaingon: “Kay ang mga buhi nasayod mga sila mangamatay; apan ang mga minatay dili mahibalo sa bisan unsa . . . Kay walay buluhaton ni lalang, ni kahibalo, ni kaalam didto sa Sheol,” ang komung lubnganan sa tawo.—Ecclesiastes 9:5, 10.

Nan, inay kay mas nadan-agan, ang mga patay walay kalibotan. Busa imposible ang pakigsulti kanila. Sa ingon ang pagsunod sa sugo sa Diyos batok sa pagpangutana sa mga patay makapanalipod kanato nga malimbongan. Apan, ang mga mensahe gikan sa gingharian sa espiritu posible, sumala sa gipakita sa eksperyensiya ni Haring Saul.

Apan Kinsa ang Tuboran Niini?

Alang sa usa ka butang, komun ang panglimbong taliwala niadtong nangangkon nga makapakigsulti sa mga patay. Ang The World Book Encyclopedia nagpahibalo kanato: “Napadayag na nga limbongan sa mga espiritista ang mga tawo diha sa mga sesyon sa espiritismo pinaagi sa pagpatuo nga makapakigsulti ang mga espiritu sa mga buhi. Ang mga siyentipiko naghatag mga katin-awan kon unsay nangahitabo diha sa mga sesyon sa espiritismo. Pananglitan, ang ubang mga espiritista mga bentrilokista. Ang uban mogamit ug mga katabang ug nagkalainlaing matang sa mga gamit sa panglimbong. Gamiton sa uban ang hypnosis. Ang kadaghanan sa mga tawong moapil sa mga sesyon sa espiritismo may dakong tinguha nga makigsulti sa minahal nga namatay. Kining tinguhaa maoy nakapatuo kanila nga ang mensahe nga ihatag sa espiritista nagagikan sa kalibotan sa mga espiritu.”

Apan, angay bang niining termoniha lamang nato kini hunahunaon? Dili, kay ang pagsunod sa sugo sa Diyos batok sa pagpangutana sa mga patay makapanalipod usab kanato sa labi pang bililhong paagi. Tinuod nga may mga mensahe sa gingharian sa mga espiritu, apan ang ilang tuboran maoy gamhanang mga linalang nga nagapaningkamot sa pagpahisalaag sa katawhan. Gipaila sila sa Bibliya nga “mga panon sa daotang espiritu”—si Satanas nga Yawa ug ang maalsahong mga manulonda nga nailhang mga demonyo. (Efeso 6:12) Dihang miduaw si Haring Saul sa espiritista sa En-dor, demonyo ang misundog sa panagway sa namatayng propetang Samuel.

Sama sa gipakita sa kaso ni Saul, walay mapuslanong butang ang mahatag sa mga demonyo, ug sa ilang ginaingong tabang dili magdugay. Sama sa ilang magmamando, ang Yawa, sila mga bakakon. (Marcos 3:22; Juan 8:44) Niining bahina, ang kanhing sikikong tigdukiduki nga si Sir Arthur Conan Doyle misulat: “Sa makasubo, atong atubangon ang pagkabakakon sa kabahin sa daotan kun siaw nga linalang nga may kinaadman. Nagtuo ako nga ang tanang nakasusi niining butanga, nakaagig mga pananglitan sa tinuyong panglimbong nga may panahong isagol sa maayo ug tinuod nga mga komunikasyon.” (The New Revelation, panid 72) Siyempre, dili ka buot nga malimbongan, di ba?

Karon, palandonga kini: Ang kasaysayan nagpahibalo kanato bahin sa negosyo sa pagpamaligyag ulipon ug ang nalangkit nga mga pag-antos niini. Duna bay malipayong modawat niining kalisora ug kaulawan? Siyempre wala. Nan nganong tugotan nato ang atong kaugalingon nga maulipon sa daotang mga espiritu? Sila dili lang mamakak kondili nagapangawat usab sa mga tawo sa ilang kagawasan ug moagak pa gani kanila sa kapintasan ug pagbuno. Pananglitan, ang 29-anyos nga si José sa Pernambuco, Brazil, miingon nga ang ‘espiritu misulod kaniya, nga nagpugos kaniya sa pagpatay sa iyang usa ka tuig nga edad anak nga babaye.’ Oo, ang pagkalangkit sa daotang mga espiritu moagak niining matanga sa pagkaulipon. Nan, sama nga nangandoy ang naguol nga mga ulipon sa miagi ug kagawasan, sa ingon kadtong naulipon sa mga demonyo karon nangandoy ug kagawasan. Ang usa ka paagi aron mabatonan kining maong kagawasan mao ang paghunong na sa pagpangonsulta sa mga espiritista ug sa pagsulay sa pagpakigsulti sa mga patay. Tungod niana, duna bay . . .

Panginahanglan sa Pagpakigsulti sa mga Patay?

Wala, tungod kay kita may tabang. Sama sa mga anak nga nagasalig sa ilang amahan, kita may kagawasan sa pagpangayog tabang sa langitnong Amahan, nga malipay sa pagtabang sa matinud-anon ug kasingkasing. (Lucas 11:9-13) Ang propeta sa Diyos nga si Isaias misulat: “Ug sa diha sila manag-ingon kaninyo: ‘Mangadto kamo sa mga espiritista o niadtong may espiritu sa panagna nga nanagpiyak ug nanagyagubyob,’ dili ba angay unta mangadto ang katawhan sa pagpangita sa ilang Diyos? Tungod sa mga buhi pangitaon ba nila ang mga patay? Ngadto sa kasugoan ug sa pagpamatuod!”—Isaias 8:19, 20.

Oo, kita may malig-ong basehanan sa pagsalig kang Jehova nga Diyos kon atong buhaton ang iyang kabubut-on ug sa pagdumili sa pagpakigkontak sa daotang mga espiritu. Ang Kristohanong disipulo nga si Santiago misulat: “Busa, magpasakop kamo nga masinugtanon sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Human nakatuon sa Bibliya uban sa mga Saksi ni Jehova, usa ka tawo nga nagpraktis sa espiritismo sulod sa 28 ka tuig miingon: “Ayawg kahadlok sa buhaton sa Yawa niadtong mobiya sa espiritistikanhong mga buhat, hinunoa, pagsalig kang Jehova nga Diyos.”

Ang pagpuno sa hunahuna pinaagi sa kamatuoran sa Pulong sa Diyos ug sa paglihok diha niana makahimo kanato sa “pagsul-ob sa tibuok [espirituwal] nga hinagiban sa Diyos” aron kita “makabarog batok sa malipatlipatong mga kaugdahan sa Yawa” ug dili maulipon sa mga panon sa daotang espiritu. (Efeso 6:11) Dugang pa, ang pag-ampo kang Jehova sa regular motaganag gamhanong panalipod batok sa panghasi sa demonyo.—Proverbio 18:10.

Pagkamakalipay ang pagkahibalo sa kamatuoran bahin sa kahimtang sa mga patay! Ang kamatayon sama lang sa hinanok nga katulog. (Juan 11:11) Ug nagpasalig si Jesus nga dunay pagkabanhaw sa mga patay.—Juan 5:28, 29.

Uban sa iyang bana ug mga anak, ang usa ka tawo nga espiritista nakakat-on gikan sa Kasulatan nga kinahanglang walay magsulay sa pagpakigsulti sa mga patay o sa usa nga mosundog kanila. Sama niining pamilyaha ug daghan pa sa tibuok kalibotan, ikaw usab makatagamtam ug espirituwal nga kagawasan. (Juan 8:32) Sayri ang kamatuoran bahin sa mga patay ug ang katuyoan sa Diyos alang sa katawhan. Ug malaoman mo ang bag-ong sistema sa Diyos, diin ikaw makahimo sa pagpakigsulti sa nabanhawng mga minahal ug makapahimulos sa kinabuhing walay kataposan ilalom sa malinawong mga kahimtang.—Isaias 25:8.

[Hulagway sa panid 4]

Kinsa gayod ang nakigsulti dihang nangayog mensahe si Haring Saul gikan sa namatayng propetang Samuel?