Mga Pag-ampo nga Tubagon

ANG tinguha sa pagpakigsulti sa usa ka hataas nga gahom sama ka karaan sa tawo mismo. Pananglitan, usa ka karaang Ehiptohanong mga kinulit dunay mga pag-ampo. Ang pila niini nangayog panalipod gikan sa diyos, samtang ang uban dunay mga pulong sa pagdayeg o sa pagsalig diha sa diyosdiyos nga gisangpit. Taliwala sa mga Grego sa ikawalong siglo W.K.P., komun ang mga alawiton maingon man ang balaknon ug seremonyal nga mga pag-ampo. Diha sa Romanhong mga pag-ampo, kinahanglan ang pag-amping dihang manangpit sa usa ka partikular nga diyos, sanglit daghan man nga mga diyosdiyos niadto ang gisimba.

Hangtod karong adlawa, ang pag-ampo maoy komung bahin sa dagkong mga relihiyon sa kalibotan. Ang ilado sa ilang kanunayng paggamit sa pag-ampo mao ang mga Budhista, Hindu, Hudiyo, Muslim, ug kadtong nagaangkong Kristohanon. Bisag kaylap ang paggamit sa pag-mpo sa ika-20ng siglong relihiyon, ang hilabihan ka daghang paagi ug mga estilo sa pag-ampo nakalibog sa daghang mga tawo nga nagatinguha nga tubagon ang ilang mga pag-ampo.

Madawat ba ang Bisan Unsang Pag-ampo?

Sanglit dunay daghang porma ang mga pag-ampo, ang bisan unsa bang pag-ampo epektibo? Gituohan sa kadaghanan nga basta sinserong nagaampo ang tawo ug “nagatuo,” dili na importante kon unsang pormaha sa pag-ampo ang gamiton. Unsay imong hunahuna? Sanglit nagkalainlain man ang opinyon niining bahina, kinahanglang moadto kita labaw pa sa opinyon sa mga tawo ug susihon ang gipadayag nga impormasyon gikan sa mas hataas nga tuboran.

Ang mga tubag sa mosunod nga mga panid gikuha gikan sa maong tuboran, ang Balaang Bibliya. Kini nagpakita nga dili lang bisan unsa nga pag-ampo ang dawaton kon nagapaabot ang indibiduwal nga dunggon ug tubagon ang iyang pag-ampo.

Ang Bibliya Nagsaysay:

Ngadto kang kinsa ipatumong ang mga pag-ampo

Kon nganong ang ubang mga pag-ampo wala tubaga

Unsay mahimong pangayoon diha sa pag-ampo

Unsay bahin sa indibiduwal nga nagatanyag sa pag-ampo?

Ang pangunang kinahanglanon mao ang pagtuo, dili lamang sa katim-os sa pagtuo nga naglungtad ang Diyos ug makadungog sa mga pag-ampo. (Hebreohanon 11:6) Kining maong pagtuo ginapasundayag sa pagpaningkamot sa pagkinabuhi sibo sa matarong nga mga sukdanan sa Diyos nga gipakita sa Bibliya. Diha sa iyang Wali sa Bukid, gipasiugda ni Jesu-Kristo kining puntoha: “Dili ang tanang magaingon kanako, ‘Ginoo, Ginoo’ ang makasulod sa Gingharian sa langit, kondili ang nagatuman sa kabubut-on sa akong Amahan nga anaa sa langit.”—Mateo 7:21, Today’s English Version.

Ingong pananglitan niadtong mga pag-ampo nga dili dunggon, ang Hebreohanong propetang Isaias misulat: “Sa diha nga kamo magahimo ug daghang mga pag-ampo, ako [Jehova nga Diyos] dili mamati; ang inyong mga kamot nangapuno sa dugo.” (Isaias 1:15) Busa ang bisan kinsa nga dili magtahod sa pagkabalaan sa kinabuhi dili makalaom nga dunggon ang ilang mga pag-ampo, bisan ka pila ug bisan unsa pa ka sinsero sila moampo.

Nganong ang pila ka “mga magtutuo” sagad dili makadawat sa tubag sa ilang mga pag-ampo?

Ang pagtuo dili igo aron mapahimut-an ang Diyos ug aron iyang tubagon ang atong mga pag-ampo. Bisan ang tawong matuotuohon moangkon nga siya nagatuo. Aron mahimong makahuloganon ang pagtuo, kinahanglang ipasukad kini sa tukmang kahibalo, nga mabatonan lamang pinaagi sa pagtuon sa Bibliya. Dugang pa, ang pagtuo ug pagsalig kinahanglang pamatud-an pinaagi sa mga binuhatan nga ilang himoon. “Patay ang lawas kon walay espiritu, mao man usab patay ang pagtuo kon walay binuhatan.”—Santiago 2:26.

Kinahanglang hatagag pagtagad sa tinuod nga magtutuo ang Diyos sa adlaw-adlaw, dili lang moampo kon mag-atubang nag problema. Kinahanglang mohimo usab siyag mga buhat sa pagtuo, hustong mga binuhatan nga nagalakip sa pagsulti sa uban bahin sa iyang pagtuo ug pagsalig sa Diyos.

Unsa ang angay nga porma sa pag-ampo?

Ang pag-ampo dili kay usa lamang ka rituwal, ni basahon kini gikan sa libro, ang pag-ampo kinahanglang walay pabalikbalik nga mga pulong ingon nga daw ang pagbalikbalik makahimo niini nga labi pang epektibo. Ug ang pag-ampo dili gayod “himoon” aron sa pagpasundayag lamang o sa pagpadayeg sa uban. Si Jesus mihatag niining maayong tambag bahin sa porma sa atong mga pag-ampo ug unsa ang atong likayan: “Ug sa mag-ampo kamo, ayaw kamo panig-ingon sa mga maut; tungod kay sila gustong mag-ampo nga magbarog diha sa mga sinagoga ug diha sa mga likoanan sa dalan aron makita sa mga tawo. . . . Sa mag-ampo ka, ayaw pagyamyam nga pabalikbalik sa mga pulong, ingon sa ginahimo sa mga tawo sa mga nasod, kay maoy ilang pagdahom nga pagadunggon gayod sila tungod sa ilang paggamit ug daghang mga pulong.”—Mateo 6:5-7.

Walay partikular nga posisyon sa lawas ang gihatag alang sa mga pag-ampo aron madunggan. Apan, ang usa nga nagaampo kinahanglang magmapainubsanon ug matinahuron diha sa posisyon ug sa mga pulong nga gamiton sa iyang pag-ampo.

Ngadto kang kinsa ipatumong ang mga pag-ampo?

Ang basahon sa Bibliya sa Hebreohanon naghisgot sa tawong “magaduol sa Diyos.” (Hebreohanon 11:6) Kinsa kining maong Diyos? Dunay usa lamang ka labing-makagagahom nga Diyos, bisan pa nga dunay daghang hinimo-sa-tawo ug bakak nga mga diyos. (1 Corinto 8:5, 6) Ang labing-makagagahom nga Diyos sa Bibliya ginganlan ug Jehova. (Salmo 83:18) Siya mao ang Maglalalang sa tanang butang, ug sa maong katarongan ang pag-ampo kinahanglang ipatumong lamang kaniya. Matin-awng nagtudlo si Jesus sa iyang mga sumusunod sa pag-ampo: “Amahan namo nga anaa sa langit.” (Mateo 6:9) Wala, si Jesus wala magtudlo sa iyang mga disipulo sa pag-ampo ngadto kaniya, ngadto sa iyang inahang si Maria, ni sa ubang mga tawo. Apan gikinahanglan sa Diyos karon nga atong ilhon ang posisyon sa iyang Anak ug sa pagtanyag sa atong mga pag-ampo pinaagi sa ngalan ni Jesus. Maoy hinungdan nga gisultihan ni Kristo ang iyang mga sumusunod: “Walay bisan kinsa ang makaadto sa Amahan gawas kon pinaagi kanako.”—Juan 14:6.

Nan, aron madawat ang mga pag-ampo sa Diyos, kinahanglang ipatumong kini kang Jehova nga Diyos pinaagi sa iyang Anak, si Jesu-Kristo. Sa ato pa, kini kinahanglang ibungat ngadto sa Diyos pinaagi sa ngalan ni Jesus.

Unsay mahimong pangayoon diha sa mga pag-ampo?

“Kon mangayo kag bisan unsa sumala sa iyang kabubut-on, siya [Diyos] magapatalinghog gayod kanato.” Kining daw katingalahang pasalig natala diha sa 1 Juan 5:14. Apan nakamatikod ka ba sa kondisyon—“sumala sa iyang kabubut-on”? Oo, ang pangunang katarongan nganong daghang mga pag-ampo wala tubaga mao nga ang usa nga nagaampo wala pa sukad makasulay sa pagsusi kon unsa ang kabubut-on sa Diyos.—Proverbio 3:5-7.

Ingong makatabang nga giya kun sulondan, gihatagan ni Jesus ang iyang mga disipulo ug pag-ampo nga ilado karong panahona ingon nga “Pag-ampo sa Ginoo.” (Mateo 6:9-13) Bisan pa nga dili usab kini angay iampo ingong rituwal, gipakita niini ang mga butang nga angay unahon. Una mao ang ngalan sa Diyos ug katuyoan. Sunod mao ang gilistang materyal nga mga panginahanglan, kapasayloan sa sala, ug kaluwasan gikan sa pagsulay sa usa nga daotan. Ang ekspresyong “Amahan namo” makatabang sa tawong nagaampo sa pagpasangkad sa iyang mga pag-ampo ug sa iyang kaisipan aron sa paglakip dili lamang sa mga sakop sa pamilya ug sa mga paryente kondili sa uban nga nagapaningkamot sa pagpahimuot sa ilang Magbubuhat.—Buhat 17:26, 27.

Unsa katas-a ang mga pag-ampo?

Wala maghatag ang Bibliya ug espisipikong gitas-on sa mga pag-ampo. Mahimong sa mubo lamang o itanyag sa mahilom. (Nehemias 2:4; 1 Samuel 1:12, 13) Sa laing bahin, ang mga pag-ampo mahimong tas-on. Dihay okasyon dihang si Jesus “nagpadayon sa tibuok gabii sa pag-ampo sa Diyos.” Sa dayag kini mao ang pagpangayo sa tabang sa Diyos sa pagpili sa iyang 12 ka apostoles. (Lucas 6:12) Busa ang gitas-on sa mga pag-ampong madawat isibo sumala sa mga panginahanglan.

Mga Pag-ampo nga Pihong Tubagon

Daghang mga asoy sa Bibliya bahin sa mga pag-ampo nga gitubag sa dakong “Tigpatalinghog sa pag-ampo,” si Jehova nga Diyos. (Salmo 65:2) Ang labing tagsaong pananglitan mao ang “pag-ampo sa pagsulay” sa mga adlaw ni Elias nga propeta, nga narekord sa 1 Hari kapitulo 18. Sa unang siglo, nakaesperyensiya ang mga disipulo ni Jesus kining dihadihang tubag sa pag-ampo: “Ug sa miampo na sila, nauyog ang dapit diin nanagkatigom sila; ug silang tanan napuno sa balaang espiritu ug nanagsulti sa pulong sa Diyos sa walay kahadlok.”—Buhat 4:23-31.

Taliwala sa daghang mga eksperyensiya nga nadawat sa mga magpapatik niining magasina mao kanang mga eksperyensiya sa mga lalaki ug babaye sa tanang edad kinsa mibati nga midangat sila sa usa ka krisis. Ingong resulta, sila mituo nga nadunggan ug natubag ang ilang mga pag-ampo.

Sa pag-ilustrar: Usa ka batan-ong lalaki nga nagpuyo sa hilit nga walog sa kabukiran sa Switzerland duol sa utlanan sa Italya miingon: “Ang akong pagkawalay-gahom sa pagkakitag solusyon [sa mga problema sa kinabuhi] dayag kaayo nga gumikan niini nangandoy akong mamatay. . . . Gihimo ko ang misantop lamang sa akong hunahuna. Miampo ako: ‘Oh wala hiilhing Diyos, naglungtad ka gayod, ug ikaw Diyos gayod sa gugma. Tabangi ako! Dili na ako makaagwanta—tabangi ako nga makakaplag sa kamatuoran.’” Sa pila ka adlaw sa ulahi, usa ka batan-ong magtiayong mga Saksi ni Jehova miduaw niining tawhana. Gihikay ang pagtuon sa Bibliya, ug siya karong panahona usa na ka bawtismadong saksi ni Jehova.

Usa ka rehistradong nars nga dili-malipayon sa kinabuhi tungod sa iyang bana nga mapatuyangon ug sa panagbulag nila sa ulahi relihiyoso kaayo. Usa ka adlaw tim-os siyang miampo, nangaliyopo sa Diyos sa pagpahibalo kaniya kon siya may mapuslanon bang katuyoan. Niadto mismong hapona, miabot sa iyang pultahan ang mga Saksi ni Jehova sa ilang buluhaton sa pagpamalaybalay. Iyang gidapit sila sa iyang balay, nagbangon ug daghang mga pangutana, ug nalipay sa pagdawat sa mga tubag sa Kasulatan. Sa ulahi, ang nars mismo nahimong magwawali sa “maayong balita” ug nagdumalag pagtuon sa Bibliya.—Mateo 24:14.

Ang usa sa mga Saksi ni Jehova nagbasa sa Ang Bantayanang Torre sa iyang kotse dihang sa kalit lamang dihay mituok sa iyang liog. Kinasingkasing nga miampo siya kang Jehova nga Diyos. Ang tig-atake wala-makalihok, ug miluag ang iyang paghawid. Gipaandar sa Saksi ang kotse, mibabay, ug gibiyaan siyang nagbarog samag estatuwa diha sa tunga sa karsada.

Diha sa kalibotan nga nagadugang ang pagduhaduha ug katahap, ang mga mahigugmaon sa Diyos ug sa kamatuoran madasig gikan sa positibong pasalig nga ang mga pag-ampo nga itanyag ngadto kang Jehova nga Diyos pinaagi sa hustong alagianan, sa husto nga paagi, ug sa hustong kaisipan ug kasingkasing pagadunggon. Dili lamang makadungog ang labing-makagagahom nga Diyos sa maong mga pag-ampo kondili tubagon niya usab kini sa walay pagkapakyas, sumala sa iyang balaang kabubut-on ug sa iyang piniling panahon.

[Kahon sa panid 4]

Mga Porma sa Pag-ampo

Ang lakbit nga pagsusi sa nagkalainlaing mga porma sa pag-ampo nga gigamit karon makahatag kadan-agan.

Ang kasagarang gigamit sa Hinduismo mao ang paninugdang pag-ampo nga nagapasidungog sa piniling diyos o diyosa, nga diin gituohan nga dunay 330,000,000 nga ginasimba diha sa mga 10,000 ka templo. Apan, sa kasagaran, ang mga pag-ampo sa Hindu maluho ug dunay duha ka porma—pagpalandong (dhyana) o pagdayeg (stotra). Gipasiugda pag-ayo ang pagbungat sa pag-ampo nga makusog.

Diha sa monasteryo sa Budhista ug sa Taoista sa Intsik, ang mga pag-ampo regular nga ginabungat tulo ka besis sa usa ka adlaw (sayo sa buntag, sa udto, ug sa gabii). Ubanan kining mga pag-ampoa ug tingog sa gamayng kampana. Ingong tabang kanila sa pag-ampo, magdala ang Budhistang monghe ug 108 ka lusok nga rosaryohan. Gamiton usab sa ubang mga layko kining rosaryohan nga paagi aron mahinumdoman ang gidaghanon sa mga pag-ampo nga nabungat na.

Alang sa debotadong mga Muslim, ang labing importanteng bahin sa ilang pagsimba mao ang adlaw-adlawng pag-ampo (salat). Sobli-soblion kini lima ka besis sa usa ka adlaw samtang nagaatubang sila sa Mecca sa Saudi Arabia.

Lakip sa mga pag-ampo sa Hudiyo mao kadtong kinuha direkta sa Bibliya, sama sa mga Salmo. Lakip sa mga pag-ampo mao kanang gidugang sa nagkalainlaing mga rabbi.

Taliwala sa nagaangkong mga Kristohanon, dunay daghang kapiliang mga pag-ampo ug mga paagi sa pag-ampo. Gikan sa mga pag-ampo nga balikbalikon pinaagi sa rosaryohan sa kamot ngadto sa pinatik nga mga pag-ampo, maingon man sa pila ka pulong nga ibungat nga walay pag-ensayo.

[Hulagway sa panid 7]

Ang mga pag-ampo ni Jesus gitubag. Mahimong tubagon usab ang imong pag-ampo