Himoa si Jehova nga Imong Pagsalig
“Salig kang Jehova ug buhata ang maayo; . . . magkalipay ka usab kang Jehova.”—SALMO 37:3, 4.
1, 2. (a) Unsay nahitabo niadtong wala mosalig kang Jehova sa unang siglo, ug sa mga misalig? (b) Unsang mga pangutana ang mahimong ibangon bahin sa relihiyon sa atong panahon?
SA UNANG siglo sa atong Komung Panahon, ang Hudiyohanong mga lider sa relihiyon nangangkon nga nagsimba sa Diyos. Apan sila wala mosalig kaniya. Ilang gibungkag ang iyang mga kasugoan ug gilutos ang iyang mga hawas. (Mateo 15:3; Juan 15:20) Ingong resulta, ‘ang ilang balay gibiyaan’ ni Jehova. (Mateo 23:38) Sa 70 K.P., gilaglag sa mga sundalong Romanhon ang Jerusalem ug ang templo niini, nga napildihag daghang kinabuhi sa mga lider sa relihiyon ug sa ilang mga sumusunod. Apan kadtong misalig kang Jehova napanalipdan, kay ilang gisunod ang mga pasidaan sa iyang tigpamaba ug nakaikyas.—Mateo 24:15-22; Lucas 21:20-24.
2 Niining kataposang mga adlaw niining sistema sa mga butang, ang mga relihiyon ba niining kalibotana nagasalig sa tinuod nga Diyos, si Jehova? Gisunod ba nila ang iyang mga sugo ug ang pagtuman sa iyang kabubut-on, o gisundog ba nila ang mga lider sa relihiyon sa unang siglo kinsa mibiya sa Diyos? Hain sa mga relihiyon karong panahona ang makalaom nga panalipdan ni Jehova tungod kay sila “nagasalig kang Jehova ug nagabuhat ug maayo”?—Salmo 37:3.
Hain ang Inigsoong Gugma?
3. Nganong ang mga paningkamot sa relihiyon sa pagpatunghag kalinaw napakyas?
3 Dili pa dugay, si Papa Juan Paulo II nagpasidaan nga “nagaatubang ang tanang katawhan ug kapeligrohan sa iyang paglungtad.” Iyang gipasiugda nga “kadtong maong mga kapeligrohan mabuntog pinaagi sa hiusang mga paningkamot sa nagkalainlaing mga grupo sa relihiyon.“ Kini maoy kabubut-on sa Diyos, siya miingon, nga ang mga lider sa relihiyon “molihok nga magkausa” alang sa “pakigdait ug pagsinabtanay.” Apan, kon kana kabubut-on sa Diyos, nan nganong wala panalangini sa Diyos ang dugay nang kasiglohang mga paningkamot alang niini? Wala niya kini panalangini tungod kay kining mga relihiyona wala mosalig sa paagi sa Diyos sa paghatag ug kalinaw pinaagi sa iyang langitnong Gingharian. (Mateo 6:9, 10) Hinunoa, sila misuportar sa mga politika ug sa mga gubat sa mga nasod. Sumala sa gisangpotan, sa panahon sa gubat, ang relihiyosong mga tawo sa usa ka nasod nagpinatyanay sa relihiyosong mga tawo sa laing nasod, bisan pagpatay sa mga tawo sa ilang kaugalingong relihiyon. Ang mga Katoliko mipatay ug mga Katoliko, ang mga Protestante mipatay ug Protestante, ug ang ubang mga relihiyon mao man gihapon ang gihimo. Apan ang tinuod ba nga espirituwal nga mga igsoon magpinatyanay sa usa ug usa samtang nagapangangkon nga nagaalagad sa Diyos?
4. Unsay giingon ni Jesus nga mao ang sukdanan sa tinuod nga relihiyon, ug nganong kini maoy “bag-o nga sugo”?
4 Si Jesus naghatag ug sukdanan alang sa tinuod nga relihiyon dihang siya miingon sa iyang mga sumusunod: “Ako magahatag kaninyog bag-ong sugo, nga kinahanglang maghigugmaay kamo sa usa ug usa; maingon nga ako nahigugma kaninyo, kinahanglan nga maghigugmaay kamo ang usa sa usa. Pinaagi niini mailhan kamo kamo nga akong mga tinun-an, kon kamo maghigugmaay ang usa sa usa.” (Juan 13:34, 35) Busa kadtong nagapraktis sa tinuod nga relihiyon kinahanglan maghigugmaay ang usa sa usa. Kadto maoy “bag-ong sugo” tungod kay si Jesus miingon: “Maingon nga ako nahigugma kaninyo, . . . maghigugmaay usab kamo sa usa ug usa.” Andam siya sa paghatag sa iyang kinabuhi alang sa iyang mga sumusunod. Sila kinahanglang andam usab sa paghimog sama—dili, dili sa pagkuha sa kinabuhi sa isigkamagtutuo, kondili sa paghatag sa ilang kaugalingong kinabuhi kon gikinahanglan. Mao kanay nakapabag-o sa maong sugo, kay wala man kana ipatuman sa Kasugoan ni Moises.
5. Sa unsang paagi mapasiugdahong gipahayag sa Bibliya ang panginahanglan ug gugma ug panaghiusa sa taliwala sa iyang tinuod nga mga magsisimba?
5 Ang Pulong sa Diyos nag-ingon: “Kon adunay magaingon: ‘Gihigugma ko ang Diyos,’ apan nagadumot sa iyang igsoon, siya bakakon. Kay siya nga wala mahigugma sa iyang igsoon nga iyang nakita, dili gayod makahimo sa paghigugma sa Diyos nga wala niya makita. Ug gikan kaniya nabatonan ta kining sugo, nga ang nahigugma sa Diyos kinahanglan magahigugma sa iyang igsoon usab.” (1 Juan 4:20, 21) Pinaagi niining gugmaha, kadtong nagasalig kang Jehova nagahupot ug tinuod internasyonal nga panaghiusa. Si apostol Pablo, diha sa 1 Corinto 1:10, nag-ingon: “Magahangyo ako kaninyo, mga igsoon, pinaagi sa ngalan sa atong Ginoong Jesu-Kristo nga unta kamong tanan managsulti sa mao rang usa ka butang, ug nga wala untay pagbahinbahin sa inyong taliwala, kondili mahiusa unta hinoon kamo diha sa mao rang paagiha sa panghunahuna ug sa mao rang pagsabot.”—Tan-awa usab ang 1 Juan 3:10-12.
6. Nganong makaingon ang mga Saksi ni Jehova nga sila “mahinlo gikan sa dugo sa tanang mga tawo”?
6 Ang The World Book Encyclopedia nag-ingon nga 55 ka milyong mga tawo ang nangamatay sa Gubat sa Kalibotan II. Gipamatay sila sa mga tawo nga nagagikan sa dagkong mga relihiyon gawas lamang sa mga Saksi ni Jehova. Walay bisan usa niadtong mga nangamatay ang gipatay sa usa ka saksi ni Jehova, kay ilang gisunod ang sugo sa paghigugma sa usa ug usa ug wala moapil sa mga gubat sa mga nasod. Samtang daghang mga saksi gipamatay tungod sa ilang neyutral nga baroganan, sila makaingon sama sa gipamulong ni apostol Pablo: “Ako mahinlo gikan sa dugo sa tanang tawo.”—Buhat 20:26.
7, 8. Sa unsang paagi gidawat sa pipila ka mga klerigo ang ilang pagkasad-an sa dugo?
7 Ang Katolikong pari sa mga sundalo nga mihulog sa mga bomba atomika diha sa Japan niadtong tuig 1945 miingon dili pa dugay: “Sulod sa milabay nga 1,700 ka tuig gilarawan sa iglesya ang gubat nga dungganon. Kini nagadani sa mga tawo sa pagtuo nga kini maoy usa ka talahurong propesyong Kristohanon. Dili kana tinuod. Kami na-brainwash. . . . Ang ebanghelyo nga may Makataronganong Gubat wala gayod itudlo ni Jesus. . . . Wala gayod diha sa kinabuhi kun sa pagtulon-an ni Jesus nga nagasugyot nga samtang dili-makataronganon ang pagsunog sa mga tawo pinaagi sa bombang nukleyar, makataronganon ang pagsunog sa mga tawo sa bombang napalm o flamethrower.”
8 Ang Catholic Herald sa London miingon: “Ang unang mga Kristohanon . . . mituo sa pulong ni Jesus ug wala magpalista sa pagkasundalo sa Roma bisan pa kon sila silotan sa kamatayon. Dili ba lahi unta ang lakat sa bug-os nga kasaysayan kon ang Iglesya nagpabilin pa sa iyang orihinal nga baroganan? . . . Kon ang mga iglesya karong adlawa nagkahiusa pa sa pagtunglo sa gubat . . . , nga nagkahulogan nga magbaton ang tanang membro ug konsensiya, sama sa mga Kristohanon, nga tigtutol tungod sa konsensiya, nan seguradong mabatonan gayod unta ang pakigdait. Apan nasayod kita nga dili gayod kini mahitabo.”
9. Nganong makaingon kita nga gisalikway ni Jehova ang relihiyon niining kalibotana?
9 Busa, makamatayng gikompromiso sa mga relihiyon niining kalibotana ang kasugoan sa Diyos. Sila wala mosalig kaniya sama sa pagkawalay pagsalig sa mga Pariseo. “Sila nanagpahayag sa katilingban nga sila nakaila sa Diyos, apan ilang gipanghimakak siya pinaagi sa ilang mga binuhatan, tungod kay sila dulumtanan ug masukihon ug dili mapuslan alang sa bisan unsang maayong binuhatan.” (Tito 1:16) Ingong resulta, gisalikway sa Diyos ang mga relihiyon niining kalibotana sama sa iyang tinong pagsalikway sa salingkapaw nga relihiyong Hudiyohanon sa unang siglo.—Mateo 15:9, 14.
Pagkahimong Luwas Pinaagi sa Pagsalig Kang Jehova
10, 11. Unsay gihimo ni Haring Hezekias dihang gipamugos sa Asirya ang pagsurender sa Jerusalem, ug kinsa ang gibiaybiay sa tigpamaba ni Sennacherib?
10 Ayaw pag-ibutang ang imong pagsalig diha sa mga solusyon sa mga tawo sa problema niining kalibotana. Hinunoa, salig sa Usa nga makatuman sa iyang mga saad. (Josue 23:14) Ingong pananglitan, matikdi kon unsay nahitabo sa ikawalong siglo sa wala pa si Kristo, sa mga adlaw ni Haring Hezekias sa Juda. Ang Bibliya naghisgot bahin kaniya: “Siya padayong nagabuhat sa matarong sa atubangan sa mga mata ni Jehova.” (2 Hari 18:3) Sa panahon sa iyang pagmando, ang gamhanang puwersa sa kalibotan nga mao ang Asirya miasdang sa Jerusalem. Gipamugos sa tigpamaba sa hari sa Asirya nga si Sennacherib ang pagsurender sa Jerusalem, nga nagaingon: “Mao kini ang giingon sa hari, ‘Ayaw kamo palimbong kang Hezekias, kay siya dili makaluwas kaninyo gikan sa akong kamot. Ug ayaw kamo padala kang Hezekias sa pagsalig kang Jehova.’”—2 Hari 18:29, 30.
11 Unsay gihimo ni Hezekias? Ang Bibliya nagaingon: “Si Hezekias misugod sa pag-ampo kang Jehova ug nagaingon: ‘Oh Jehova nga Diyos sa Israel, nga nagalingkod ibabaw sa mga kerubin, ikaw lamang ang matuod nga Diyos sa tanang mga gingharian sa yuta. Ikaw ang nagbuhat sa langit ug sa yuta. Ikiling ang imong igdulongog, Oh Jehova, ug pamatia ako. Bukha ang imong mga mata Oh Jehova, ug tuman-aw, ug pamatia ang mga pulong ni Sennacherib nga iyang gipadala sa pagtamay sa buhi nga Diyos. . . Oh Jehova nga among Diyos, luwasa kami, palihog, gikan sa iyang kamot, aron ang tanang mga gingharian sa yuta makaila nga ikaw, Oh Jehova, ikaw lamang ang Diyos.’”—2 Hari 19:15-19.
12. Sa unsang paagi gitubag ni Jehova ang pag-ampo ni Hezekias?
12 Gipatalinghogan ni Jehova kining pag-ampoa ug gipadala si propetang Isaias sa pagsulti kang Hezekias: “Mao kini ang giingon ni Jehova bahin sa hari sa Asirya: ‘Siya dili moanhi niining siyudara ni mopana ug usa ka udyong didto ni mosulong siya niana nga may taming ni maghimo ug usa ka bungdo batok niana.’” Gisugo ba si Hezekias sa pagsukol sa Asirya pinaagig mga sundalo? Wala, siya gisugo sa pagsalig kang Jehova, nga maoy iyang gihimo. Ang resulta? “Ang manulonda ni Jehova migula ug gipamatay sa kampo sa mga Asiryanhon ang usa ka gatos ug kawaloan ug lima ka libo.” Gibayran ni Sennacherib mismo ang iyang pagtamay kang Jehova ug sa mga alagad ni Jehova, kay gipatay siya sa iyang kaugalingong mga anak nga lalaki. Tinuod sumala sa pulong ni Jehova, walay bisan usa ka hinagiban ang miabot batok sa Jerusalem.—2 Hari 19:32-37.
13, 14. Sa unsang basehanan nga ang mga tawo sa tanang kanasoran maluwas sa kataposan niining presenteng sistema sa mga butang?
13 Sa atong adlaw ang samang butang ang mahitabo. Kadtong nagasalig kang Jehova maluwas sa mga pagbiaybiay niining kalibotana ug sa kataposan niining kalibotana. “Ug kanimo managsalig ang mga nakaila sa imong ngalan, kay ikaw Oh Jehova, dili gayod mobiya niadtong nagapangita kanimo.” (Salmo 9:10) Apan sa dili pa ipakanaog ang paghukom ni Jehova niining sad-an sa dugo nga kalibotan, iyang gidapit ang mga matinud-anon ug kasingkasing sa pagdangop kaniya alang sa kasegurohan. Kini langkoban sa “dakong panon” gikan sa tanang mga nasod, kinsa “makalabang-buhi sa dakong kasakitan.” Sila maluwas sa kataposan sa sistema ug tungod kay nagasalig man sila kang Jehova ug nagaalagad kaniya “sa adlaw ug sa gabii.”—Pinadayag 7:9-15.
14 Mao kini sila ang nagasanong sa panapit nga ginapalanog nga nagadugang ang kakusog diha sa tibuok-kalibotan, sumala sa gitagna sa Isaias 2:2, 3: “Ug mahitabo nga sa kataposang mga adlaw nga ang bukid sa balay ni Jehova matukod [ang iyang tinuod nga pagsimba] . . . Ug daghang katawhan mangadto ug manag-ingon: ‘Umari kamo, katawhan, ug manungas kita sa bukid ni Jehova, . . . ug kita pagatudloan niya sa iyang mga dalan, ug manlakat kita sa iyang mga alagianan.’” Ang bersikulo 4 nagaingon: “Ug ang ilang mga esdapa ilang himoon nga mga punta sa daro ug ang ilang mga bangkaw himoon nga mga galab. Usa ka nasod dili na mobakyaw sa espada batok sa laing nasod, ug dili na gayod sila makakat-on mahitungod sa gubat.”
15. Kinsa ang nagatuman sa tagna sa Isaias 2:2-4, ug sa unsang paagi?
15 Kinsa, sa atong panahon, ang ‘naghimo sa ilang mga espada nga mga punta sa daro’? Kinsa ang ‘wala na makakat-on sa gubat’? Kinsa ang adunay dili-mabungkag nga gugma alang sa ilang espirituwal nga mga igsoong lalaki ug mga babaye sa tibuok kalibotan ug may panaghiusa uban kanila? Kinsa gayod ang nagasalig kang Jehova ug nagadapit sa uban sa paghimo niini? Ang mga ebidensiya sa atong panahon nagpakita nga ang tubag walay lain kondili: ang mga Saksi ni Jehova. Sila, sama kang Hezekias, nagasalig kang Jehova uban sa ilang bug-os nga kasingkasing ug nagapasundayag niini pinaagi sa pagsunod sa iyang mga sugo.
Usa ka Masanag nga Kaugmaon
16, 17. Unsang masanag nga kaugmaon ang gitanyag ni Jehova niadtong may pagsalig kaniya?
16 Kadtong nagasalig kaniya, si Jehova nagatanyag ug labing masanag nga kaugmaon nga mahanduraw sa dihang iyang ilisan kining katilingban sa daang kalibotan ug iyang bag-ong katilingban. Diha sa bag-ong kalibotan dinhi sa yuta, wala na unyay kahadlok o pagkawalay pagsalig, walay kakabos, inhustisya, o krimen. Dili na mamatay ang mga tawo sa mga gubat o pinaagi sa mga aborsiyon. Ang Pinadayag 21:4, nagasaad pa gani nga ang “kamatayon mawala na, ni may pagminatay ni paghilak ni kasakit pa unya.”
17 Sa dili magdugay, ang yuta mahimong paraiso sama si gisaad ni Jesus. (Lucas 23:43) Ug sanglit kay wagtangon man unya ang kamatayon, kadtong nagasalig kang Jehova makahimo sa pagpuyo sa yuta sa walay kataposan diha sa Paraiso. Bug-os nga matuman ang Miqueas 4:4: “Sila sa manglingkod, ang tagsatagsa ilalom sa iyang paras ug ilalom sa iyang kahoyng igos, ug walay magahadlok kanila.” Handurawa ang pagpuyo diha sa usa ka katilingban diin ang tanan nimong mahibalag maoy mga tawo nga imong kasaligan! Nganong mao man kanay mahitabo? Tungod, kay ang Isaias 54:13 nagaingon: “Ang tanan nimo nga mga anak pagatudloan ni Jehova, ug dako ang pakigdait sa imong mga anak.”
18. Unsang mga kaayohan ang maani niadtong nagasalig kang Jehova bisan karong adlawa?
18 Apan, bisan karong adlawa minilyong mga Saksi ni Jehova sa tibuok kalibotan nakaani na sa mga kaayohan pinaagi sa pagsalig kang Jehova. Pananglitan, tungod sa pagsunod sa mga kasugoan ug sa mga prinsipyo ni Jehova, ang mga alagad ni Jehova walay kanser sa baga nga gipahinabo tungod sa pagtabako. Tungod sa pagkinabuhig mahinlong moral nga palibot, sila sa katibuk-an wala mameligro sa tibuok-kalibotang epidemiya sa mga sakit nga napasa sa sekso, lakip sa AIDS. Ang ilang dili pag-abuso sa droga nakapanalipod kanilag dako batok sa makaapektar sa hunahuna ug makapatayng mga sakit nga maoy sakit sa daghang mga tig-abuso sa droga. Ug kay dili man sila magpadugang ug dugo, ilang nalikayan ang makapatayng mga sakit nga napasa sa dugo, lakip sa hepatitis, nga nakapatay o permanenteng nakahatag kadaot sa napulo ka libong mga tawong nagpadugang ug dugo kada tuig diha sa Tinipong Bansa lamang.
19. Sa unsang paagi luwason ni Jehova kadtong nagaalagad kaniya bisan pag mamatay sila karong adlawa?
19 Bisan pag pipila nga nagasalig karong adlawa kang Jehova mamatay tungod sa pagkatigulang, sakit, o aksidente, luwason sila ni Jehova. Iyang lukaton sila pinaagi sa pagkabanhaw. Busa, gidasig kita ni apostol Pablo sa “pagsalig, dili sa atong kaugalingon, kondili sa Diyos nga mobanhaw sa mga minatay.”—2 Corinto 1:9.
Si Jehova Magalig-on sa Iyang mga Alagad
20, 21. (a) Unsang pagbatok ang atong mapaabot, sumala sa napamatud-an sa nahitabo kang Jesus? (b) Sa unsang paagi pagabayawon ni Jehova ang iyang katawhan, sama sa iyang gihimo kang Jesus?
20 Hinumdomi nga “ang tibuok kalibotan anaa sa gahom sa usa nga daotan,” si Satanas nga Yawa. (1 Juan 5:19) Busa kon ikaw nagasalig sa Diyos, supakon ka ni Satanas ug sa iyang kalibotan. Ilang daoton ang imong pagsalig pinaagi sa pagbiaybiay o paglutos, sama sa nahitabo kang Jesus. Human nga siya gilansang sa kahoyng pagsakit, “siya gibiaybiay sa mga nanagpangagi, nanagyangoyango sa ilang mga ulo ug nanag-ingon: . . . ‘Kon ikaw anak sa Diyos, kanaog sa kahoy sa pagsakit!’ Maingon man usab gibugalbugalan siya sa punoan sa mga saserdote uban sa mga eskriba ug sa mga ansiano nga nanag-ingon: ‘Ang uban iyang giluwas; apan sa iyang kaugalingon siya dili makaluwas! . . . Siya nagasalig sa Diyos; ipaluwas siya Kaniya kon Siya nahimuot kaniya.’”—Mateo 27:39-43.
21 Sa tulo ka adlaw sa ulahi, giluwas sa Diyos si Jesus pinaagi sa pagbanhaw kaniya gikan sa mga patay. Apan, ang mga kaliwatan sa nanagbiaybiay, nangamatay o nahimong ulipon sa mga sundalong Romanhon. Sanglit si Kristo ingong Hari sa langitnong Gingharian sa Diyos maoy magadumala sa pagkabanhaw, kon may usa niadtong mibiaybiay nga banhawon gikan sa patay, sila kinahanglang magpasakop sa Usa nga ilang gibiaybiay duha ka libo ka tuig kanhi! Oo, bayawon ni Jehova ang iyang mga alagad, kinsa nagaingon: “Sa Diyos ako nagabutang sa akong pagsalig. Dili ako mahadlok. Unsay mabuhat sa tawo kanako?”—Salmo 56:11.
22. Unsay giingon ni Jehova mahitungod niadtong kinsa nagasalig kaniya, ug niadtong walay pagsalig kaniya?
22 Mahitungod sa iyang mga alagad, si Jehova nagaingon: “Bulahan ang tawo nga nagasalig kang Jehova, ug kansang pagsalig mao si Jehova. Kay siya mahimong sama sa kahoy nga natanom sa daplin sa katubigan, ug magakatag sa iyang mga gamot sa daplin sa suba; ug dili mahadlok kon moabot ang ting-init, hinunoa magmalunhawon ang iyang dahon. Ug dili mangalarag ang iyang dahon sa tuig nga hulaw, ni mohunong kini sa pagpamunga.” Apan si Jehova nagaingon usab: “Tinunglo kadtong tawo nga nagasalig sa tawo ug nagahimo sa unod nga maoy iyang bukton, ug kansang kasingkasing mibiya kang Jehova. Kay siya mahimong sama sa nagainusarang kahoy didto sa kamingawan, ug dili makakita sa diha nga ang kaayohan moabot.”—Jeremias 17:5-8.
23. Unsa ang angay natong buhaton kon gusto kitag kinabuhing walay kataposan?
23 Busa, niining malisod nga mga panahon, “salig kang Jehova ug buhata ang maayo; magpuyo ka sa yuta, ug magpabilin nga matinumanon. Magkalipay ka kang Jehova, ug siya magahatag kanimo sa mga tinguha sa imong kasingkasing.” (Salmo 37:3, 4) Hinaot nga nalakip sa imong natuman nga mga hangyo ang gasa nga kinabuhing walay kataposan diha sa usa ka matarong bag-ong kalibotan, nga gisaad sa Diyos kinsa kaniya kita may pagsalig.
Mga Pangutana Agig Repaso
◻ Unsang sukdanan ang angay sundon niadtong nagasalig kang Jehova?
◻ Ang mga relihiyon ba niining kalibotana nagatudlo ug pagsalig kang Jehova?
◻ Sa unsang paagi ang pagsalig ni Haring Hezekias nabindikar?
◻ Sa atong panahon, sa unsang paagi ang tagna sa Isaias 2:2-4 natuman?
◻ Unsang palaabuton ang madawat niadtong nagasalig kang Jehova?
[Hulagway sa panid 17]
Gibiaybiay sa tigpamaba sa hari sa Asirya si Jehova ug giagda ang Jerusalem sa pagsurender
[Hulagway sa panid 18]
Diha sa bag-ong kalibotan sa Diyos, kadtong nagasalig kang Jehova makatagamtam ug bug-os nga kalinaw ug kasegurohan