Kon Nganong ang Uban Nag-usob sa Ilang Relihiyon

ARON himoon sa usa ka tawo ang dakong lakang sama sa pag-usob sa iyang relihiyon, tinong siya may maayong mga katarongan. Ang mga kaayohan kinahanglang molabaw sa mga kapildihan.

Isipon ba nimo nga usa ka maayong katarongan ang pagkaila sa imong Maglalalang ug pag-ugmad sa usa ka relasyon uban kaniya? Alang sa daghan kana maayong katarongan. Aron maugmad ang usa ka relasyon uban sa lain, kinahanglang mailhan natog maayo ang tawo. Pananglitan, ang usa ka gamayng bata mahadlok mokupot sa kamot sa usa ka estranghero hangtod nga siya makaila kaniya. Mao usab kita, kinahanglang mailhan nato ang Diyos, una kita mosugod sa pagsalig kaniya. Tinuod, ang kadaghanang relihiyon may pinakasentrong pigura nga ilang gisimba ingong Diyos. Apan dili ba usab matuod nga sa kadaghanang tawo ang Diyos maoy hanap ug halayo nga walay tin-awng pagkahubit nga personalidad? Busa sa unsang paagi kita makaila kaniya?

Kon motan-aw kita sa mga butang alirong kanato, kita mahingangha sa atong makita. Makamatikod kita sa katahom, intelihensiya, ug gahom. Ang sinugdanan niini nakapalibog sa daghan, apan adunay usa ka basahong nagapatin-aw niini. Kini mao ang Bibliya. Pinaagi sa mga panid niini, atong masayran nga kining mga kahibulongang butang naggikan sa Maglalalang nga may ngalan ug personalidad. Samtang tun-an natong mainampingon ang Bibliya, ang personalidad sa Diyos mahimong tin-aw kaayo kanato. Atong masabtan nga siya usa ka Diyos sa gugma ug pagmahal. “Ang Diyos gugma,” nagaingon ang Bibliya. (1 Juan 4:8) Madani kita sa maong labing maayong personalidad, nga sa hingpit timbang sa gugma, kaalam, hustisya, ug gahom. Ang usa ka suod nga relasyon mosunod.

Nasinati ni Misae ang pagkasuod kang Jehova. Siya misaysay: ‘Sa pagkabata, ako gitudloan nga naglungtad ang daghang diyos. Diha ang diyos alang sa tubig, usa ka diyos alang sa kakahoyan, ug usa alang sa balay. Bisan pag akong giduhaduhaan ang paglungtad nila, ako nagtuo nga duna gayod ing usa ka matuod nga Diyos. Tungod sa akong estriktong Buddhista-Shinto nga pagkamatuto akong gihunahuna nga ang Diyos maoy usa nga kahadlokan, nga nagpahamtang ug silot sa daotang binuhatan. Bisan pag gitinguha nako nga moadto sa usa ka simbahan ug makakat-on bahin sa Diyos sa Kristohanon, ang akong Buddhistang kagikan nagpugong kanako. Unya usa ka babaye miabot sa akong balay ug mitanyag sa pagtuon sa Bibliya uban kanako. Pinaagi niatong pagtuona, akong nasayran nga ang Diyos may ngalan, si Jehova. Nalipay ako sa pagkahibalo nga siya dili usa ka Diyos nga makahahadlok kondili usa nga mahigugmaon, nga kanunay nagabantay kanato, dili aron sa pagsilot, kondili aron sa pagtabang. Buot kong moalagad sa maong Diyos, ug busa giusob ko ang akong relihiyon.’ Napahimuslan niya ang makapatagbawng relasyon uban sa Diyos sulod sa 29 ka tuig.

Relasyon nga Nagahatag sa Kagawasan ug Paglaom

Adunay usa ka mosangpot nga benepisyo nga nadawat sa daghan tungod sa pag-ugmad sa relasyon uban sa Diyos. Samtang ang ubang relasyon mahimong dili na kaayo hinungdanon sa ilang mga kinabuhi, naangkon sa daghan ang kagawasan gikan sa makapaulipong kahadlok sa tawo ug sa bug-at nga mga kostumbre nga walay tinuod nga kahulogan ug bili. Busa, sila nahigawas sa bug-at nga mga gastos sa pagbaton sa panggawas nga dagway ug sa mga tradisyon, nga nagahimo sa daghang pamilya nga dagkog utang. “Ang pagkahadlok sa mga tawo maoy nagabutang sa usa ka lit-ag,” nagapasidaan ang Bibliya, nga nagadugang sa pasalig, “Siya nga nagasalig kang Jehova mapanalipdan.”—Proverbio 29:25.

Ang laing kagawasan nga maangkon mao ang kagawasan sa kahadlok sa kamatayon. Ang gikutlo-sa-ibabaw nga si Misae nag-ingon: “Sa dihang ako 22 anyos pa, ako nagsakit sa tipos. Samtang ako naghigda nga halos walay panimuot, nadungog ko ang paghisgot sa mga higala ug sa mga sakop sa pamilya bahin kanako nga sila nagdahom nga ako mamatay. Apan nahadlok akong mamatay. Ang bugtong kong nahunahunaan mao nga buot kong mabuhi, ug maayo na lamang ako naarang-arang. Pinaagi sa akong pagtuon sa Bibliya sa ulahi, ako nahigawas gikan sa maong kahadlok sa kamatayon. Akong nasayran nga ang kamatayon mao lamay pagkawala maglungtad.” Ang Bibliya nagaingon: “Bahin sa mga patay, sila walay nahibaloan nga bisan unsa.” (Ecclesiastes 9:5, 10) Kon may mamatay, anaa ang kahibulongang paglaom sa pagkabanhaw tungod kay gihuptan sa Diyos ang mga patay nga buhi sa iyang panumdoman.—Juan 5:28, 29.

Ang daghan pa nga nagatuon sa Bibliya susamang nakadiskobreng ang mga butang ilang nakat-onan naghatag sa ilang kinabuhi sa tinuod nga kahulogan ug paglaom. Kini ang usa ka katarongan nga ang Bibliya gisulat, nga mao, aron “kita makabaton untag paglaom.” (Roma 15:4) Ang Buddhismo walay ginatudlo bahin sa usa ka Maglalalang o sa Diyos. Giingon nga ang pagkadaotan ug pag-antos sa kanunay naglungtad ug mopadayon sa walay kataposan pinaagi sa walay-kataposang mga pagtuyok o siklo sa pagkagianak pag-usab. Ang kadaghanang relihiyon sa Kasadpan nagatudlo nga ang maayo moadto sa langit, usa ka dapit nga dili tino, apan kon unsay ilang buhaton didto, sila wala makatino. Kasukwahi niining relihiyosong mga pilosopiya nga nagahatag ug gamay kaayong paglaom o kahulogan sa ilang mga kinabuhi, ang Bibliya nagatudlo nga ang tawo gibuhat aron magpahimulos sa kinabuhi sa walay kataposan sa yuta ingong tig-atiman niini. (Genesis 2:15-17; Isaias 45:18) Sa ingon kita makaamgo nga ang kinabuhi angay gugolon dili lamamng aron makabatog mga kabtangan ug mag-alagad sa kaugalingon kondili aron sa pag-alagad sa Diyos ug sa uban sa dili-mahakogong paagi.—Ecclesiastes 12:13; Mateo 22:37-39.

Pagbaton sa Kamatuoran ug sa Tinuod nga mga Higala

Ang uban napugos sa pag-usob sa ilang relihiyon tungod sa ubang hinungdan. Apil kanila mao ang tinguha sa pagpangita sa relihiyosong kamatuoran. Hinuon, gibati sa daghang tawo nga walay ingon nga absolutong kamatuoran ug, sumala sa ginaingon sa Bibliya sila ‘wala mangita.’—Salmo 10:4.

Apan anaa kadtong nangita niana. Si Sakae, nga nagapuyo sa sentral nga Hapon, miadto sa usa ka Buddhistang sekta ngadto sa lain sulod sa 25 ka tuig aron mangita sa kamatuoran. Siya wala gayod matagbaw. Samtang siya miuswag ngadto sa responsableng mga katungdanan sa matag organisasyon, siya sa kanunay nakakitag mga butang nga nakapandol kaniya, sama sa komersiyalismo, imoralidad, ug pagpahimulos. Siya miadto pa sa India sa pagpangita sa gigikanan sa Buddhismo diha sa makasaysayanhong mga dapit diin si Buddha nagpuyo ug nagtudlo. Siya nahiubos ug dako sa pagkaplag ug diyutay kaayong interes sa Buddhismo diha sa maong Hindu nga nasod. Dayon sa iyang mga pagpakigsulti sa mga Saksi ni Jehova, siya gisultihang dili ang tanang relihiyon nagagikan sa Diyos kondili nagagikan sa iyang kaaway, si Satanas nga Yawa.—1 Corinto 10:20.

Kadto nakapakurat kang Sakae, apan tungod niadto siya namalandong ug nagsusi. Iyang gibasa ang librong What Has Religion Done for Mankind?a ug ubang basahon sa Bibliya. Iyang nasabtan nga, samtang ang Buddhismo, sumala sa gisunod sa Hapon, nakasinatig daghang kausaban latas sa katuigan, ang Bibliya nagpabiling walay kausaban sulod sa libolibo ka katuigan. Sa kataposan ang iyang pagsusi gibaslan. Iyang nakaplagan ang kamatuorang iyang gipangita. Ang iyang kalipay nahisama sa kalipay sa tawo sa sambingay ni Jesus nga nakakitag usa ka bahanding nalubong sa uma: “Tungod sa iyang kalipay siya milakaw ug nagbaligya sa mga butang iyang nabatonan ug gipalit kadtong uma.”—Mateo 13:44.

Kadtong nakakaplag sa relihiyosong kamatuoran nagapakitag “pagkamabination” sa uban nga nagapangita niana. (1 Pedro 3:8) Sa pagkamatuod, ang ilang kainit ug tinuod nga gugma sa sinugdan nagadani sa daghan sa pagtuon sa Bibliya. “Ang tanan mahibalo nga kamo akong mga tinun-an, kon kamo may gugma sa usag-usa,” matud ni Jesus. (Juan 13:35) Diin nato hikaplagi ang maong mahigugmaong atmospera karong adlawa? Si Kazuhiko Nagoya, sa pagsulat sa iyang lindog alang sa Daily Yomiuri sa Tokyo, mikomento bahin sa mainitong paagi sa pagtagad kaniya sa miduaw siya sa usa ka tigomanan sa mga Saksi ni Jehova. “Ang paagi sa ilang pagpahiyom,” matud ni Nagoya, “nahisamag sila nakaila kanamo gikan sa nangaging panagtagbo ug nalipay nga makakita kanamo pag-usab.” Apan kadto dili mao ang kahimtang. “Gitutokan nakog maayo ang ilang mga nawong ug nakadiskobreng sila bug-os mga estranghero.” Sa dihang ang duha pa ka tawo mipahiyom, “ako nalipay kaayo,” naghinumdom si Nagoya. “Kana mao ang paagi pagpahiyom sa maong mga tawo sa usa ka estranghero, dihang ilang makita siya sa bisan hain sa ilang mga tigom.”

Ang kainit ug gugma dili resulta sa pagkailhanay pag-ayo sa mga tawo sa usag usa tungod kay sila nagatigom sa regular sa lokal nga tigomanan. Hinunoa, kini resulta sa regular nga pagtuon sa Bibliya ug pagpadapat sa mga prinsipyo niana diha sa ilang mga kinabuhi. Daghang tawo nga gidapit sa pagtambong sa 1985-86 “Mga Maghuhupot sa Integridad” Distritong mga Kombensiyon sa mga Saksi ni Jehova sa langyawng kayutaan natandog ug dulot sa gugma ug pagkamaabiabihon nga gipakita kanila sa ilang mga tagbalay. Usa ka batan-ong magtiayon nga gikan sa Hapon nga mitambong sa kombensiyon sa Pilipinas mikomento: “Sa dihang kaming tanan nagkahiusa sa kataposang awit, ang matag usa nag-awit diha sa iyang kaugalingong pinulongan, kami dulot nga natandog. Sa unang panahon among gibati kon unsay kahulogan nga mahisakop sa tinuod internasyonal nga panag-igsoonay.”

Sa kataposan, daghan ang mosugilon kaninyo sa dagkong kausaban nga ilang gihimo sa ilang mga kinabuhi ingong sangpotanan sa pagtuon sa Bibliya ug pagpadapat niini. Ang mga tawong may mga personalidad nga sa nangagi nagkalain sama sa mga karnero gikan sa mga lobo karon nagakasinabtanay nga malinawon diha sa Kristohanong panagkatigom. (Isaias 11:6) Ang pipila sa nangagi sapoton ug dili mahigalaon, daling masuko ug mahinadlokon pa. Ang uban pa maulawon ug mahunahunaon sa kaugalingon. Daghan ang may daotang mga bisyo nga pagabuntogon. Apan pinaagi sa pagkugi, uban ang tinguha sa pagpahimuot sa Diyos, sila nakahimog dagkong kausaban.

Komosta ka man? Ang bisan hain ba sa mga hinungdan sa paghimog kausaban sa ibabaw nakadani kanimo? Kon mao, gidasig ka namo sa paghimog seryosong pagtuon sa Bibliya. Ang Bibliya nagapakitang ang tanang bakak nga relihiyon anaa sa dalan nga makabangga sa Diyos sa Bibliya. Sama sa abyador nga gihisgotan sa nag-unang artikulo, basin kinahanglang himoon nimo ang dakong aksiyon sa pagluwas sa imong kinabuhi ug ang mga kinabuhi sa imong mga minahal. “Sangkad ug haluag ang dalan nga padulong sa kalaglagan,” matud ni Jesus, “ug daghan ang nagasubay niana; samtang sigpit ang pultahan ug hiktin ang dalan nga padulong sa kinabuhi.” (Mateo 7:13, 14) Oo, kon ikaw nagalakaw nianang “sangkad ug haluag” nga dalan, dunay maayong hinungdan sa pag-usob sa imong relihiyon!

[Mga footnote]

[Hulagway sa panid 5]

Tungod sa akong estriktong Buddhista-Shinto nga pagkamatuto gihunahuna ko nga ang Diyos maoy kahadlokan

[Hulagway sa panid 7]

‘Sigpit ang dalan nga padulong sa kinabuhi’