Mga Magmamantala sa Gingharian Nagtaho
Kamatuoran sa Gingharian Nagmalamposon sa Sri Lanka
ANG Sri Lanka, nga nagkahulogang “Masilakong Yuta,” mao ang karaang ngalan nga gipasig-uli niining nindot nga isla nga nailhan pa sa daghan pinaagi sa koloniyal nga ngalan niini, ang “Ceylon.“ Tungod sa puwesto niini diha sa Dagat Indian, kini gitawag usab ang Lusok sa Luha sa India; apan ang mga luha dili tanan mga luha sa kalipay kay misilaob sa dili pa dugay ang etnikong kabangisan, nga nahabalita sa tibuok kalibotan.
Bisan pa niana, ang kamatuoran sa Ginghanan nagmalamboon usab dinhi. Ang Budhista, Hindu, Muslim, Parsi, ug Kristohanon sa ngalan gitudloan nga ang Gingharian ni Jehova lamang pinaagi ni Kristo Jesus ang makapatunghag malungtarong pagkaayo sa etniko ug politikanhong mga samad nga nagabahin sa mga komunidad. Ang mosunod nga mga kasinatian nagapakita sa paglambo sa kamatuoran sa Gingharian niining “Masilakong Yuta.”
◻ Si Salimoon gimatuto sa pagtuo nga ang Qur’an mao ang Pulong sa Diyos. Apan siya dili bug-os makadawat nga ang maluluy-on-sa-tanan nga Diyos magsakit sa mga tawo diha sa nagdilaab nga impiyerno. Usa ka adlaw gidapit siya sa mga Saksi ni Jehova sa usa ka tigom. Kay nakaila dayon sa kamatuoran, siya wala na molingi, ug siya karon malipayong nagaalagad ingong usa ka ansiano sa Kristohanong kongregasyon.
◻ Si Harry, usa ka tibuok-kinabuhing Buddhista nga nagpasundayag sa iyang relihiyosong pagtuo pinaagi sa paglakaw sa nagdilaab nga uling, wala makasunod sa mga prinsipyo nga nasulod diha sa Buddhistang pagtulon-an bahin sa walog-pilong dalan, usa ka dalan sa (1) matarong nga pagsabot, (2) matarong nga hunahuna, (3) matarong nga sinultihan; (4) matarong nga lihok, (5) matarong nga pangabuhian, (6) matarong nga paningkamot, (7) matarong nga pagkamatinagdanon, ug (8) matarong nga konsentrasyon. Kini angay magpuno sa matag bahin sa kinabuhi sa usa ka tawo. Bisan pag siya nagtuo nga siya maayong Buddhista ang iyang pagsigarilyo, pag-inom, ug ubang dili-matarong nga kagawian nagmugnag mga suliran diha sa iyang pamilya. Sa kataposan, siya mihukom sa pagtuon sa Bibliya. Apan, walay mausang mitanyag sa pagtuon sa Bibliva uban kaniya. Nadunggan niyang ang mga Saksi ni Jehova basin andam motuon, mao nga mitambong siya sa usa ka miting sa Kingdom Hall, ug nahikay ang usa ka pagtuon. Usa sa mga Saksi nga Muslim sa nangagi nagtabang niya sa pagkat-on kon unsay ginatudlo sa Bibliya. Sa kataposan siya nakakaplag ug kusog gikan kang Jehova sa pagsunod nga malamposon sa usa ka dalan sa matarong nga mga prinsipyo. Siya nagakalipay sa pag-alagad nga usa ka ministeryal nga alagad ug nagaplano sa pagsulod sa payunir nga ministeryo.
Busa ang kamatuoran sa Gingharian nagmalamboon sa Sri Lanka, ug karon adunay 1,086 ka Saksi niining matahom nga yuta. Kining pag-uswaga nagkahulogang gikinahanglan ang mas dagkong mga pasilidad sa sangang buhatan, ug gipangita ang usa ka dapit alang niini. Ang mga igsoon nagatukod usab ug bag-ong mga Kingdom Hall. Sa Puttalam ang usa ka kongregasyong gilangkoban sa napulo ka pamilya mihukom sa pagtukod ug Kingdom Hall ug sa pagtukod niini nga may igong gidak-on alang sa mga asembliya sirkito. Ang tigomanan natapos nga eksakto sa panahon alang sa asembliya sirkito, diin 107 ang mitambong. Karon ang kongregasyon halos midoble, nga may kapin sa 75 nga nagatambong sa mga tigom nga gihimo sa Tamil ug Sinhalese. Ug may dako pang luna alang sa dugang pag-uswag.
Ang natuman nga tagna sa Bibliya nagapunting sa kamatuorang sa dili na madugay ang tanang luha sa kasub-anan pagapahiran gikan sa tanang mata sumala sa gisaad sa Diyos. Bisan ang mga hunahuna sa etnikong kabangisan dili na motungha sa kasingkasing. (Pinadayag 21:4; Isaias 65:17) Ug niining nindot nga “lusok sa luha nga Isla, ang mga luha sa kalipay modagayday samtang ang tanan padayong makatagamtam sa mga epekto sa malinawong mga bunga sa Gingharian sa Diyos hangtod sa kahangtoran.