“Si Kristo, ang Anak sa Diyos nga Buhi”

TAPOS motaho ang iyang mga tinun-an kon unsay ginaingon sa mga tawo kon kinsa siya, si Jesus nangutana: “‘Apan kamo, unsay inyong sulti kon kinsa ako?’ Sa pagtubag si Simon Pedro miingon: ‘Ikaw mao ang Kristo, ang Anak sa Diyos nga buhi.’”—Mateo 16:15, 16.

Si Pedro ba mao lamang ang nahidangat sa maong konklusyon? Dili gayod! Matikdi kon kinsa pay nahidangat niana, ug matikdi ang ilang pasikaranan sa maong pag-ila.

UNANG MGA TIGPALUYO: Si Juan Bawtista, ang mga tinun-ang si Nataniel ug si Marta, ug si Saulo sa Tarso, apil sa uban pa, ngatanan nagtawag kang Jesus nga Anak sa Diyos. (Mateo 14:33; Juan 1:33, 34, 49; 11:27; Buhat 9:20) Ang ilang hugot nga pagtuo o kombiksiyon nalig-on samtang ilang nakita sa unsang paagi ang mga tagnang gilaraw sa pag-ila sa sinaad nga Mesiyas natuman diha kang Jesus.

UNANG MGA MAGSUSUPAK: Ang mga Hudiyo nga buot mopatay kang Jesus nagtawag kaniyang Anak sa Diyos, mao usab ang mga sundalo nga presente sa paglansang kaniya. (Mateo 27:54; Juan 19:7) Bisan tuod kini wala gayod magpaila sa pagtuo sa bahin niadtong mga magsusupak, labing menos kini nagapakita nga sinati sila sa gipangangkon sa uban bahin kang Jesus, ug ang labaw-kinaiyanhong mga hitabo palibot sa paglansang kaniya dayag nagpahinabo nga ang pipila kanila nagpalandong pag-usab sa isyu sa iyang ilhanan.

MGA MANULONDA: Sa dihang nagpahibalo sa pagkatawo ni Jesus, ang manulondang si Gabriel nagtawag kaniyang Anak sa Diyos. (Lucas 1:32, 35) Bisan ang mga tawong giyawaan nga ilalom sa impluwensiya sa daotang mga manulonda misinggit: “Unsay labot namo kanimo, Anak sa Diyos?” (Mateo 8:28-32) Tungod sa una-tawhanong paglungtad ni Jesus sa langit, dayag nga nakaila ang maayo ug daotang mga manulonda kon kinsa siya.

SI JESUS MISMO: Si Jesus wala gayod magpasigarbo nga Anak sa Diyos sa tinguha nga makabatog pabor sa uban o magpahimulos sa dungog nga gihatag sa maong relasyon. Sa kasukwahi, sa kadaghanang kaso siya mapainubsanong nagtumong sa iyang kaugalingon ingong “ang Anak sa tawo.” (Mateo 12:40; Lucas 9:58) Apan sa daghang okasyon iyang giangkon gayod nga siya mao ang Anak sa Diyos.—Juan 5:24, 25; 10:36; 11:4.

SI JEHOVA NGA DIYOS: Kinsay makaila kang Jesu-Kristo uban ang labawng awtoridad kay kang Jehova nga Diyos mismo? Kaduha si Jehova nagpamatuod gikan sa langit: “Kini mao ang akong Anak, ang pinalangga, nga akong giuyonan.”—Mateo 3:17; 17:5.

Giuyonan sa Diyos si Jesus—Giuyonan Mo Ba?

Sa unang siglo, libolibong tawo nagtuo kang Jesus kon unsa siya: ang sinaad nga Mesiyas, o Kristo, nga gipadala sa yuta sa pagbayaw sa pagkasoberano ni Jehova ug sa paghatag sa iyang kinabuhi ingong lukat alang sa katawhan. (Mateo 20:28; Lucas 2:25-32; Juan 17:25, 26; 18:37) Atubangan sa mapait nga pagsupak, ang mga tawo dili matukmod nga mahimong mga sumusunod ni Jesus kon sila wala makatino sa iyang ilhanan. Sila, nga madasigon ug maisogon, midawat sa buluhatong iyang gihatag kanila, nga “himoa nga mga tinun-an ang katawhan sa tanang kanasoran.”—Mateo 28:19.

Karong adlawa, minilyong Kristohanong tinun-an nahibalo nga si Jesus dili kasugiran. Ilang gidawat siya ingong langitnong naentronong Hari sa natukod nga Gingharian sa Diyos, nga karon mauswagong nagagahom sa yuta ug sa kahikayan niini. Kining umaabot nga balaang kagamhanan maoy kahinangpang balita kay kini nagasaad ug kahupayan gikan sa mga suliran sa kalibotan. Kining matuod nga mga Kristohanon nagapasundayag sa ilang tibuok-kasingkasing nga pagpaluyo sa piniling Magmamando sa Diyos pinaagi sa pagpahayag “niining maayong balita sa gingharian” ngadto sa uban.—Mateo 24:14.

Kadtong nagapaluyo sa kahikayan sa Gingharian pinaagi ni “Kristo, ang Anak sa Diyos nga buhi,” mabuhi nga makapahimulos sa mga panalangina dayon. Kining mga panalangina mahimong maimo usab!

[Blurb sa pahina 8]

Minilyon nga kaniadto wala makatino sa ilhanan ni Jesus karon nahiusa sa pagpaluyo kaniya ingon nga Magmamando sa Gingharian sa Diyos

[Hulagway sa panid 7]

Si Pedro nag-ila kang Jesus ingong “si Kristo ang Anak sa Diyos nga buhi.” Mao usab ang kapin sa 3,000,000 ka saksi ni Jehova karong adlawa