Pagtagana sa mga Panginahanglan sa Atong mga Tigulang—Usa ka Kristohanong Hagit

MILABAY ang tulo ka bulan. Apan walay usa sa mga anak sa tigulang nga babaye ang nagtagad sa pagbisita kaniya. Siya mamingawong nagpuyo sa usa ka balay sa mga tigulang sa Cape Town, South Africa. Ang iyang mga anak nagapuyo sa duol.

Sa usa ka balay sa tigulang sa Johannesburg, ang usa ka babayeng tigulang nagapalabay sa kadaghanan niyang panahon sa balkonahe sa iyang kuwarto. Siya kadaghanan makita nga nagahilak.

Ang makapahinuklog nga mga talan-awong sama niini dugang ug dugang nagkakomun, bisan diha sa kanasoran diin ang mga tigulang sa naandan inatiman pag-ayo. Sa Soweto, sa dako kaayong mga puy-anan sa mga itom duol sa Johannesburg, “ang mga tigulang nawad-an sa naandang pagtahod, pagbulot-an ug pag-alima sa ilang mga pamilya,” sumala sa usa ka taho sa prensa. Naugmad ang susamang situwasyon taliwala sa daghang India nga molupyo sa South Africa. Bisan tuod ang mga Indian sa naandan maoy matinagdanon sa ilang mga tigulang, ang usa ka opisyal karong bag-o nagsaysay nga ang batan-ong mga Indian nga magtiayon ‘dili gustong mabug-atan sa ilang mga ginikanan.’

Hinuon, ang matuod nga mga Kristohanon nagapamati sa sugo sa Bibliya: “Pasidunggi ang imong amahan ug ang imong inahan.” (Exodo 20:12; Efeso 6:2) Kining obligasyona dili matapos inigkatigulang sa ilang mga ginikanan. Matud sa 1 Timoteo 5:8: “Sa pagkamatuod kon adunay dili magatagana niadtong mga iya, ug ilabina niadtong mga sakop sa iyang panimalay, iyang gilimod ang pagtuo ug daotan pa kay sa tawong walay pagtuo.” Ang tigulang nga mga ginikanan nahiapil niadtong kinahanglang tagan-an sa usa ka Kristohanon, bisan pag malangkit niini ang dagkong mga pagsakripisyo—sa emosyon ug sa salapi.

Sa katibuk-an, ang mga sakop sa Kristohanong kongregasyon karong adlawa nakahimog dalayegong buhat sa pag-atiman sa emosyonal ug pisikal nga mga panginahanglan sa ilang mga ginikanan. Ugaling, unsay mahitabo dihang ang tigulang nga mga Kristohanon walay mahadlokon-sa-Diyos nga mga anak o mga apo nga mag-atiman kanila? Sa unsang paagi matagan-an ang ilang mga panginahanglan?

Usa ka Responsabilidad sa Kongregasyon

Ang disipulong si Santiago misulat: “Ang matang sa pagsimba nga mahinlo ug walay hugaw sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan.” Si Santiago mipahayag usab: “Kon ang usa ka igsoong lalaki o igsoong babaye anaa sa kahimtang sa kahubo ug nakulangan sa pagkaon alang sa adlaw, apan ang usa kaninyo magaingon kanila: ‘Lakaw sa kalinaw, magpainit ug mabusog,’ apan kamo wala maghatag kanila sa mga kinahanglanon sa ilang lawas, unsa bay kapuslanan niini? Busa, usab, ang pagtuo, kon walay binuhatan, patay sa kaugalingon.”—Santiago 1:27; 2:15-17.

Busa kon ang usa ka tigulang nga Kristohanon nagakinahanglag tabang, kini atimanonon sa tibuok kongregasyon. Ang mga ansiano ang manguna niini. Sumala sa gisugo ni Pablo sa 1 Timoteo 5:4, pagatinoon nila una kon ang tigulang may mga anak ba o mga apo nga andam “mopadayon sa paghatag ug nahiangay nga balos sa ilang mga ginikanan ug mga apohan, kay kini dalawaton sa panan-aw sa Diyos.” Kon wala, ang mga ansiano tingali makasusi kon unsay mabatonan nga seguro o mga tagana nga gipasiugda sa gobyerno. Mahimo pa gani nga ang pipila sa kongregasyon makaarang sa pagtabang sa pinansiyal sa personal nga paagi.

Bisan pa niana, kon walay mahimong ingong kahikayan, ang mga ansiano makapalandong kon ang indibiduwal takos bang modawat ug hinabang gikan sa kongregasyon mismo. Matud ni Pablo: “Ibutang sa talaan ang usa ka babayeng balo nga dili mokubos sa kan-uman ka tuig, asawa sa usa ka bana, nga gipanghimatud-an siya tungod sa maayong mga binuhatan.”—1 Timoteo 5:9, 10.

Hinuon, subsob kaayo nga ang gikinahanglan dili salapi. Ang mga ansiano makatino kon unsa ang gikinahanglan. Gikinahanglan ba sa tigulang ang tabang sa pagpaniyangge? Mamingawon ba siya o nagkinahanglag pagdasig? Gikinahanglan ba niya ang sakyanan paingon sa mga tigom? Gikinahanglan ba niya ang usa nga mobasa kaniya sa Bibliya ug mga Kristohanong basahon? Kon ang tigulang sa lawasnon dili makaarang sa pagtambong sa mga tigom, mahimo ba ang mga rekording sa teyp aron makapamati siya sa balay? Tingali kinahanglan ang daghang pagduaw ug pakigsultiay una mogawas ang bug-os nga hulagway. Apan ingong mga magbalantay, ang mga ansiano ‘angay makaila sa dagway sa panon.’—Proverbio 27:23.

Kon sa Unsang Paagi Nakatabang ang mga Kongregasyon

Sa dihang masayran ang mga panginahanglan sa usa ka tigulang, mahimo ang espisipikong mga kahikayan. Kon adunay mainiton, matinagdanon, ug dili-hakog nga espiritu sa kongregasyon, dili lisod ang pagpangitag ubay-ubay nga igsoong lalaki ug igsoong babaye nga gustong motabang. Sa ingon malikayan ang pagbutang ug dili-makataronganong kabug-at sa pila ka indibiduwal. Pananglitan, ang usa ka kongregasyon nakabuhat ug usa ka eskedyul aron ang mga magmamantala moduaw sa mga tigulang. Ang mga igsoong lalaki ug mga babaye malipay nga makaambit sa pagbuhat niini, ug walay mausa sa mga tigulang ang mahikalimtan.

Sa laing kongregasyon, ang usa ka tigulang nga Saksi wala tagda sa iyang mga anak nga dili magtutuo. Ang lokal nga mga batan-ong Saksi, hinunoa, maoy nagbuhat sa tanan niyang panglaba, pagplantsa, ug panglimpiyo, nga nag-areglar usab sa iyang tugkaran. Ang mga igsoon mitabang sa pagbayad sa iyang abangan ug pagkaon. Ila siyang gidala sa mga asembliya ug sa mga tigom. Ug sa dihang namatay siya, giatiman nila ang tanang kahikayan ug gastos sa paglubong.

Sa usa ka gamayng kongregasyon sa South Africa, ang usa ka tigulang nga tabunon igsoong lalaki (usa nga mestiso) naparalitiko sa bug-os tungod sa usa ka atake. Sanglit walay usa ka membro sa iyang pamilya ang makaatiman kaniya, ang usa ka igsoong babaye sa kongregasyon—nga usa ka biyuda mismo—ug iyang anak lalaki nagpaipon kaniya. Ang kalalakin-an sa kongregasyon nagturnohay sa pagdigo kaniya. Dugang pa, ang usa ka puting payunir nga igsoong lalaki maoy magtulod sa wheelchair sa maong tigulang nga igsoong lalaki sa mga pamasiyo. Ang maong talan-awon, nga talagsaon sa South Africa, nakapatingala. Gihatagan sa kongregasyon ang tigulang nga igsoong lalaki sa mahigugmaong pag-atiman hangtod siya namatay.

Hinuon, kini dili pag-ingon nga masayon ang pagtagana sa mga panginahanglan sa tigulang nga mga igsoong lalaki ug mga igsoong babaye. Mahimong kinahanglanon ang dakong pagpanguna ug determinasyon sa pagbuntog sa mga suliran nga mahimong motungha.

Pagdala sa mga Tigulang Ngadto sa mga Miting

Ang usa ka tigulang igsoong babaye, usa ka biyuda ug masakiton sa kasingkasing, giduaw sa usa ka adlaw sa usa ka ansiano. Samtang didto siya, ang usa ka silingan miduaw ug mireklamo, nga miingon: “Kanunay akong moanhi ug makaplagan siyang maghilak kay walay mianhi aron sa pagdala kaniya ngadto sa Kingdom Hall.” Ang suliran hinuon dili seryoso sumala sa morag gipasabot sa silingan, kay ang usa ka pamilya diha sa kongregasyon nagtaganag regular nga transportasyon. Hinuon, sa pila ka okasyon ang amahan nagtrabahog obertaym ug wala makaanha sa pagkuha sa igsoong babaye. Sa pagkamatuod, mahimo unta ang laing kahikayan sa transportasyon.

Busa, maayong hinumdoman nga ang pagtambong sa tigom hinungdanon alang sa mga tigulang. (Hebreohanon 10:24, 25) Ang usa ka ansiano kanunay magsusi sa pagtino kon anaa ba ang usa ka tigulang nga Saksi. Kon siya wala diha kay ang kahikayan sa sakyanan wala madayon, ang ansiano modali sa pag-adto sa iyang kotse ug kuhaon siya. Ang tam-is nga pahiyom sa iyang nawong dakong balos sa iyang ekstrang paningkamot.

Mataktikanhon Apan Malahutayon

Hinuon, may panahong ang mga tigulang mahimong independente kaayo. Tingali kinahanglan nila ang tabang apan dili gustong modawat niana. Ug gawas ang mga ansiano, o kadtong giasayn sa pagtabang, maigmat, ang maong mga tigulang tingali makiling nga maningkamot sa ‘pagkinaugalingon sa pagbuhat.’

Usa ka tigulang nga babayeng balo nagsakit ug kanser apan gitago niya ang iyang sakit. Gikinahanglan niya ang tabang sa pagbalhin sa iyang personal nga mga butang ngadto sa usa ka puwesto usa ka milya ang kalayo. Inay pahibaloon ang uban sa iyang panginahanglan, gihangyo niya ang tabang sa usa ka 84-anyos nga higala. Silang duha nagkarga sa pila ka butang sa usa ka karomata ug nagsulay sa pagtulod niana sa ilang kaugalingon. Hinuon, sa wala madugay ilang naamgohan nga ang trabaho dili nila maarangan, ug ang higala sa babayeng balo miadto sa usa ka ansiano sa duol alang sa tabang.

Busa, basin kinahanglan ang mataktikanhon apan malahutayong pakisusi sa atong bahin sa pagtino kon unsay atong mahimo sa pagtabang nianang mga tawhana. Kon kita yanong mohimog dili-klarong tanyag, sama sa: ‘Kon duna kamoy panginahanglan, pahibaloa ko,’ mahimong may kalit nga tubag: ‘Salamat, pero wala akoy panginahanglan.’ Hinumdomi, hinunoa, nga sa dihang si Lydia nagpakitag pag-abiabi kang apostol Pablo ug sa uban, siya wala magpapugong sa ilang lagmit unang pagbalibad. Hinunoa, ‘siya nagpaadto gayod kanila.’ (Buhat 16:15) Busa magmalahutayon. Susiha ang mga panginahanglan ug mga kagustohan sa mga tigulang una sila mohangyog tabang.

Hinuon, ang mga tigulang angay nga mapabilhon sa mga paningkamot sa uban ug dili masensitibo, nga sobra ka pugoso, o kritikal. Pananglitan, kon itagana ang sakyanan ang tanyag nga motabang sa pagbayad sa mga gastos sa biyahe maoy angay. Ang usa ka tigulang nga igsoong babaye nagalutog tinapay ug nagagantsilyog ginagmayng mga butang ug nagahatag niini ingong mga gasa niadtong nagadala kaniya ngadto sa mga tigom. Hinuon, usa lamang ka pulong sa pasalamat ang gikinahanglan.

Ang mga Kristohanon karong adlawa naningkamot sa pagsugot sa sugo sa Levitico 19:32: “Sa atubangan sa ubanong buhok angay kang motindog, ug kinahanglang imong ipakita ang pagkamahunahunaon sa pagkatawo sa usa ka tawong tigulang.” Ang mga alagad ni Jehova dili mosunod sa kalibotanong uso sa pagpasagad sa mga tigulang ug paglikay sa pamilyahanong responsabilidad. Hinunoa, uban sa panahon, pailob, ug tabang ni Jehova, ang mga Kristohanon nagabuhat aron malamposong makaatubang sa hagit sa pag-atiman sa atong mga tigulang.

[Hulagway sa panid 23]

Ang mga batan-on sa kongregasyon kadaghanan dakog mahimo sa pagtabang sa mga tigulang