Mga Magmamantala sa Gingharian Nagtaho
Paghupot sa Pagtuo sa Usa ka Nabahing Panimalay
SI APOSTOL Pablo nagtambag sa mga Kristohanon: “Tagda ang imong kaugalingon ug ang imong pagpanudlo. Magpabilin niining mga butanga, kay sa pagbuhat mo niini maluwas mo ang imong kaugalingon ug kadtong magapatalinghog kanimo.” (1 Timoteo 4:16) Sa usa ka nasod sa Oriente, ang ‘pagpabilin’ sa mga pagtulon-an sa Bibliya misangpot sa kahibulongang mga panalangin kang Gng. L—— tapos mahimo siyang usa sa mga Saksi ni Jehova.
Si Gng. L—— ug ang iyang bana naggikan sa Hindu nga mga pamilya. Siya giduaw sa mga Saksi ni Jehova sa 1959, ug tapos sa pagtuon sa Bibliya uban nila, gidawat niya ang kamatuoran sa Pulong sa Diyos. Dayon gisangyawan niya ang iyang bana ug ang uban niyang paryente. (Itandi ang Juan 1:40, 41.) Wala magpakitag interes ang iyang bana, apan ang iyang igsoong babaye sa unod nga si R—— miapil sa pagtuon. Niadtong 1961 siya ug ang iyang igsoong babaye nabawtismohan sa pagsimbolo sa ilang pagpahinungod kang Jehova. Samtang nagtubo ang mga anak ni Sister L——, gitun-an niya ug gidala sila sa mga tigom. Sa dihang ang kinamagulangang anak babaye, si S——, mihunong sa pagtungha, gipahinungod niya ang iyang kinabuhi kang Jehova, nabawtismohan, ug naminyog Saksi. Hinuon, sa wala madugay siya ug ang iyang bana nahimong dili aktibo. Ang kinamagulangang anak lalaki mipadayon sa kolehiyo ug nabuylog sa daotang mga kauban. Dayon naminyo siyag usa ka babayeng Katoliko ug mihunong sa pagpakig-uban sa katawhan ni Jehova. Sa laing bahin, ang manghod nga anak babaye, tapos sa paghunong sa pagtungha, nagpahinungod sa iyang kinabuhi kang Jehova ug nabawtismohan.
Si Sister L—— nagpadayon sa pagsangyaw sa iyang mga paryente. Ang laing igsoong babaye sa unod nainteresado, apan mapait siyang gisupak sa iyang bana, nga nagguba pa sa iyang Bibliya ug mga libro. Wala siya tugoti sa pagdala sa iyang tulo ka anak sa mga tigom, apan iyang gitun-an sila sa balay. Sa wala madugay siya nagpahinungod usab ug nabawtismohan, sa atubangan sa kusog nga pagsupak sa iyang bana. Sa kataposan, ang tanang tulo niya ka anak nahimong dedikado ug bawtismadong mga Saksi.
Kasamtangan, si Sister L—— nagpadayon sa pagsangyaw ngadto sa iyang mga paryente sa unod. Sa nakigsulti siya sa iyang igsoong lalaki ug iyang asawa, ang igsoong lalaki wala magpakitag interes, pero namati ang iyang asawa. Tapos makabatog igong kahibalo sa Bibliya, gipahinungod niya ang iyang kaugalingon sa Diyos ug gisimbolohan kadto pinaagig bawtismo sa tubig.
Si Sister L—— misangyaw ngadto sa laing igsoong lalaki sa unod, nga misupak sa kamatuoran. Apan ang iyang asawa, kauban sa ilang anak babaye, misugod sa pagtuon. Gipadala ang anak babaye sa Canada alang sa dugang sekular nga mga pagtuon apan nagpadayon sa iyang pagtuon sa Bibliya ug pagpakig-uban sa mga Saksi didto. Sa kataposan, siya mibarog sa kamatuoran ug nabawtismohan. Naminyo siyag usa ka igsoong lalaki nga payunir sa Canada, ug ang iyang amahan ug inahan mitambong sa kasal. Ang pagpakig-uban sa mga igsoon sa Canada maayo kaayog epekto sa amahan.
Sangpotanan sa Pagsangyaw Ngadto sa Iyang Pamilya
Ang matinuohong mga paningkamot ni Sister L—— gipanalanginan ni Jehova. Sa wala madugay ang iyang labing batang anak babaye mipahawa sa iyang trabahong dakog suweldo, mikuhag inoras nga trabaho, ug misugod sa pag-alagad kang Jehova ingong bug-os-panahong ministro. Ang kinamagulangang anak babaye ug iyang bana misugod sa pagtuon ug pagtambong na usab sa mga tigom ug nahimong aktibo sa ministeryo. Ang iyang anak lalaki nga naminyog Katolikong babaye ug nahilayo sa kamatuoran misugod na usab sa pagtuon ug sa kataposan nagpahinungod sa iyang kinabuhi kang Jehova ug nabawtismohan. Ang labing batang anak lalaki nahimo usab nga dedikado ug unya mibarog bahin sa isyu sa neyutralidad. (Isaias 2:4) Siya gisentensiyahag tulo ka tuig sa prisohang militar, apan latas nianang tanan mihatag siyag dakong pamatuod atubangan sa pundok sa mga maghuhukom. Ang iyang amahan, ang bana ni Sister L——, nakadayeg kaayo sa baroganan nga gikuha sa iyang anak lalaki nga siya karon interesado na ug nagsugod sa pagtambong sa mga tigom.
Sa pagkamatuod, makapatagbaw ug magantihon kaayo ang 29 ka tuig sa matinumanong pag-alagad ni Sister L—— diha sa nabahing panimalay! Siya karon nagakalipay sa pag-ihap sa mga 18 ka membro sa pamilya ug mga paryente nga nabawtismohan. Hinaot kining kasinatiana mahimong tinubdan sa pagdasig ug paglipay sa tanan natong mga igsoong lalaki ug mga igsoong babaye nga, ubos sa susamang mga kahimtang, nakalahutay ug nakahupot sa pagtuo diha sa nabahing mga panimalay.—1 Pedro 2:19, 20; 1 Corinto 7:12-16.