Ikaw makabalhin ug mga Bukid!
MAYO 29, 1953, gitaho nga mao ang unang panahon nga ang tawo nakatindog sa tumoy sa labing taas nga bukid sa kalibotan—ang Mount Everest, nga 8,848 ka metros ibabaw sa lebel sa dagat. Uban sa tabang sa kapin sa 450 ka tawo, si Edmund Hillary sa New Zealand ug si Tenzing Norgay, usa ka Sherpa sa Nepal, malamposong nakabuntog sa mga kapeligrohan sa danlog nga yelo, sa makabuta nga niyebe, ug sa kakulang sa oksiheno aron makaabot sa tumoy sa ilang lima-ug-tunga-ka-milya gihabugong tumong.
Ang pagkatkat sa ibabaw sa habog nga mga bukid sa tino maoy tagsaon nga kahimoan. Apan wala ra kini sa kumingking sa gibatbat ni Jesus sa iyang mga tinun-an: “Sultihan ko kamo, nga kon may paguto kamo nga ingon ug liso sa mustasa, makaingon kamo nianang bukira, ‘Bumalhin ka gikan dinhi ngadto didto,’ ug walay magamakuli alang kaninyo.” Hunahunaa, dili pagkatkat kondili sa pagbalhin ug bukid!—Mateo 17:20, The Jerusalem Bible.
Unsay nakaaghat kang Jesus sa pagsulti niini ngadto sa iyang mga tinun-an? Sila wala makaayo sa giyawaang batang lalaki. Gipasiugda ni Jesus nganong wala sila makaayo: Sila nagkinahanglan ug dugang pagtuo. (Mateo 17:14-20) Iyang gitandi ang pagtuo sa usa ka liso sa mustasa, usa ka butang nga sila sinati kaayo. Bisan pa nga usa sa “labing gamay,” ang liso sa mustasa human sa pila ka bulan sa pagtubo mahimong samag-kahoy nga tanom. (Mateo 13:31, 32) busa, gipasiugda ni Jesus ang dakong potensiyal nga mahimo sa gamayng pagtuo kon husto nga pagkakultibar ug pagkapatambok—ang daw imposible mahimong posible.
Apan human sa pagpalambo sa maong paguto, unsang matanga sa mga bukid ang mahimong mabalhin sa mga tinun-an ni Jesus? Sama nga habog ang literal nga bukid, ang samag-bukid nga kakulian makababag sa atong kauswagan sa pag-alagad kang Jehova. Unsa kaha katong “mga bukid” nga kababagan ug sa unsang paagi kita “makabalhin” kanila?
Si apostol Pablo maoy usa ka pananglitan sa usa ka Kristohanon nga nag-atubang ug daghang mga kababagan. Diha sa 2 Corinto 6:4-10 ug sa 2 Corinto 11:23-28, imong mabasa nag iyang naagiang mga kawalad-on, mga paghampak, mga pagkabilanggo, ug pagkalunod, ug uban pang mga katalagman. Dugang pa niadtong mga butanga, ana pa kanang mahulagwayong “tunok sa lawas,” tingali ang hanap niyang panan-aw. (2 Corinto 12:7; Buhat 14:15) Sa unsang paagi nakabuntog siya sa samag-bukid nga kakulian ug malamposong nakatuman sa kabubut-on sa Diyos alang kaniya? “Nahimo ko ang tanang butang pinaagi kaniya nga nagapalig-on kanako,” misulat si Pablo. Kini mao “ang labawng gahom nga iya sa Diyos ug dili gikan sa atong kaugalingon.” (Filipos 4:13; 2 Corinto 4:7) Busa, si Pablo dunay bug-os nga pagsalig sa katakos ni Jehova sa paglig-on kaniya sa malisod nga panahon. Siya may pagtuo.
Pagbalhin ug mga Bukid Karong Adlawa
mao bay imong tinguha ang pagpadako sa imong pag-alagad kang Jehova? Sama sa ginatos ka libo nga miduyog sa nagtubong mga ranggo sa bug-os panahong mga magwawali (mga payunir), hayan imong gibati ang pagkadinalian sa panahon ug tingali seryosong nagapalandong sa pagpadako sa imong ministeryo. Apan, ang kababagan ba daw dili-mabuntog sama sa bukid nga nagbuntaog sa imong atubangan? Kon mao makahimo ka ba sa pagbalhin sa mga bukid? Libolibo ang nakahimo niana diha sa ilang mga paningkamot sa pagpadako sa ilang pag-alagad kang Jehova. Ania ang pila sa ilang mga eksperyensiya.
Ang usa ka igsoong babaye nga hapit nang mograduwar sa tunghaan nga mao ang labing hawod sa ilang klase gustong mopayunir, apan ang kawalay trabaho mao ang iyang bukid. Siya miasoy:
“Ang akong negatibong panghunahuna ug mga pagduhaduha bahin sa akong pagpayunir nahimong kababagan kanako nga buntogonon. Sanglit nabalaka kaayo ako nga makakitag trabaho sa dili pa magsugod sa pagpayunir, wala nako ihatag ang akong bug-os nga pagsalig kang Jehova ug sa iyang katakos sa pagtagana lang niadtong nagauna sa iyang pagsimba. Naghunahuna ako, ‘Mangita una akog trabaho, ayha pa nga ihatag ko ang akong aplikasyon sa pagpayunir.’ Wala ako magpayunir; nag-usik lang ako sa bililhong panahon. Apan, ang usa sa mga ansiano sa kongregasyon miingon ng akon langanon nako ang pagsuogod sa pagpayunir, mahimong mas madanihon tan-awon ang bug-os panahong mga trabaho, sanglit wala may butang nga nagahawid kanako gikan sa pagdawat niana.”
Unsay iyang gihimo? “Miampo ako kang Jehova nga walay hunong alang sa iyang balaang espiritu nga mogiya kanako ug sa pagtultol sa akong mga aksiyon ug panghunahuna.” Human sa graduwasyon kining maong igsoong babaye miauxiliary payunir, ug dayon misulod sa regular payunir nga ministeryo. Human gilayon niana, nakakita siyag maayong sekular nga trabaho nga mitakdo sa iyang iskedyol sa pagpayunir.
Ang usa ka ansiano, kansang asawa anaa sa payunir nga pag-alagad ug dunay duha ka anak nga gipadako, mibati nga kinahanglan mohimo pa siya ug dugang pa kay sa pagsuportar lamang sa iyang pamilya sa pinansiyal nga paagi. Alang sa ubang mga tumatan-aw, ang mga sirkumstansiya nga nagbabag kaniya gikan sa payunir nga pag-alagad daw sili-mabuntog, apan nagtinguha siya sa pagpadako sa iyang ministeryo. Unsay kinahanglang bag-ohon?
“Sa hunahuna ko nga ang labing dakong kababagan nga akong buntogon mao ang akong kaugalingon,” siya miingon. “Ang pag-alagad sa kanataran maoy usa ka butang nga gikalipayan ko kanunay, ug ang pagpakigsulti niadtong anaa sa bug-os nga ministeryo ug sa pagkakakita sa ilang mga panalangin, nakita nakong mananakod ang maayong espiritu nga ilang gipasundayag. Akong nakita ang akong kaugalingon diha sa bug-os panahong ministeryo sa umaabot. Ang problema sa akong panghunahuna mao nga ang pagpayunir nahimong usa ka butang nga gihunahuna ko lamang. Apan wala gayod nako hatagi ug petsa ang akong kaugalingon kon kanus-a makab-ot ko ang akong tumong.”
Human sa mainampoong pagpalandong, misugod kining igsoona sa pagkab-ot sa iyang tumong sa bug-os panahong pag-alagad. Iyang giduol ang iyang superbisor sa trabaho, gisaysay ang iyang tuyo ug mihangyo nga tugotan siya sa pagtrabaho sa mas diyutayng oras kada seman. kon bahin sa polisa sa kompaniya, ang matang sa iskedyol nga gipangita wala pa mahimo sukad.
Siya mipadayon: “Gitapos sa superbisor ang pagsultihay pinaagi sa pag-ingon nga walay kalagmitang makuha ko ang iskedyol nga akong gihangyo. Natino ko nga kon siya lang ang padesisyonon, ang tubag maoy dili gayod. Busa ang aprobasyon moabotlamang pinaagi sa pagpaluyo ni Jehova. Sa milabay ang usa ug tunga ka semana, ang aprobasyon sa akong bag-ong iskedyol miabot gikan sa ehekutibo. Human nako gipasalamatan ang akong superbisor, misakay ako sa akong awto, nagpadagan ug pila ka bloke, nagpadaplin sa dalan, ug mipahayag sa akong pasalamat ug apresasyon kang jehova. Oo, ang akong tumong sa bug-os panahong pag-alagad nahimong tinuod.”
Sa unsang paagi ang minyong igsoong babaye “nakabalhin” sa iyang bukid? Siya miasoy: “Duna koy upat ka anak ug usa ka dili-magtutuong bana. Sa dihang nagsugod ako sa pagpalandong sa pagpayunir, may pila ako ka kababagan. Alang sa usa ka butang, sa temporaryo walay trabaho ang akong bana, sanglit panapanahon man ang iyang trabaho, ug nagtrabaho ako nga part-time aron makabayad sa mga balayranan. Busa miingon ako sa akong kaugalingon nga bisan pag may tinguha ako, dili ako makapyunir tungod sa akong mga sirkumstansiya. Apan, dinhi nga angay kong bag-ohon ang akong kaisipan. Akong naamgohan nga kon magpunay akog hunahuna nga dili ako makahimo, dili gayod ako maningkamot sa pagsulay. Ang sunod nga importanteng pangutana nga kinahanglan nakong tubagon mao, Asa man ako makakuha sa kusog aron makapayunir? Nakita nako ang tubag diha sa Filipos 4:13. Dli lamang miampo ako kang Jehova bahin sa maong butang kondili misugod ako sa dugang ug dugang pagsalig kaniya. Mihimo usab akog praktikal nga mga lakang sa pagkab-ot sa akong tumong pinaagi sa paghimog maayong iskedyol ug sa pagsulod ingong auxiliary payunir. Sa milabay ang panahon, mipadayon si Jehova sa pagbukas sa dalan alang kanako sa pagsulod sa payunir nga pag-alagad. ang akong bana nakabalik sa trabaho, ug nakahimo ako sa paglimiti sa akong part-time nga trabaho sa usa ka adlaw sa usa ka semana. Wala magdugay human niini, nahimo akong regular payunir.”
Dugang pa, ang pribilehiyo sa pagtambong sa Tunghaan sa Payunir nga Pag-alagad mibukas kaniya, nga nakitang dakong tabang sa iyang ministeryo. “Buot ko lang isulti sa tanan nga naghunhuna sa pagpayunir sa pag-ampo kang Jehova ug isalig kining tanan kaniya,” siya miingon. “Dayon paningkamoti kini, ug panalanginan ka sa imong pagsulay.”—Salmo 37:5.
Dili ba kining mga eksperyensiyaha nakatabang kanimo sa pagtan-aw sa unsang paagi ang pagtuo kon huptan makatabang sa usa ka Kristohanon sa pagbuntog sa samag-bukid nga kababagan? Busa, kon maoy imong tinguha nga magpayunir, susiha ang imong mga sirkumstansiya. Pakigsulti sa uban nga nagpayunir, ug pagtuon gikan sa ilang mga eksperyensiya. Paghimog praktikal nga mga lakang sa pagkab-ot sa imong tumong. Ug labaw sa tanan, iampo kang Jehova ang imong tinguha; ug unya sumalig kaniya sa pagpanalangin sa imong mga paningkamot. Oo, ikaw usa makabalhin ug mga bukid!