Mga Pangutana Gikan sa mga Magbabasa

◼ Ang materyal ba bahin sa pagkahimong inuyonan sa Diyos nagkahulogan nga ang mga Kristohanon makahimo sa pakigsulti sa tawong giisip nga usa ka “inuyonang kauban” apan sa ulahi, tungod sa daotang buhat gilikayan?

Oo, matuod kana. Ang Bantayanang Torre sa Nobyembre 15, 1988, nagpakita nganong Kasulatanhon ang pagpaangay sa atong paglantaw sa usa ka tawong walay-bawtismo kinsa nakig-ambit sa publikong ministeryo uban sa mga Saksi ni Jehova. Niadto, ang maong tawo gitawag ingong “inuyonang kauban.” Kon siya human niana sa walay paghinulsol makalapas sa balaod sa Diyos, ang kongregasyon pahibaloon, ug unya ang mga sakop sa kongregasyon maglikay na sa pakig-uban ug sa pakigsulti kaniya.

Sumala sa gipakita sa dili pa dugayng materyal, ang Bibliya nagsugo nga ang maong aksiyon sa pagdisiplina himoon maylabot sa mga bawtismado kinsa dili-mahinulsolong mga makasasala. (1 Corinto 5:11-13; 2 Juan 9-11) Apan ang tulobagon sa tawong walay-bawtismo kinsa magpadayon sa paghimog daotan dili sama niana sa usa ka tawong bawtismado. (Lucas 12:48) Siya walay bawtismo ug busa dili inuyonan sa panan-aw sa Diyos, busa ang pagpalagpot dili-angay sa iyang kaso. Sa lintunganay, siya karon maoy usa ka kalibotanong tawo ug busa mahimong pakiglabotan nga sama.

Apan, unsay ikasulti bahin sa usa ka tawong gitawag niadtong usa ka “inuyonang kauban” apan dili na kuwalipikado alang sa publikong ministeryo tungod sa iyang doatang dalan? Sanglit wala man siya ipalagpot, siya tagdon ingong tawo sa kalibotan nga siya mao.a Siyempre, ang Nobyembre 15 nga Bantayanang Torre nagtambag diha sa panid 19 nga kinahanglan mag-amping ang maunongong mga Kristohanon. Tingali sila nakaamgo nga ang tawong walay-bawtismo nakahimog daotan bisan pa sa iyang kahibalo bahin sa mga kinahanglanon sa Diyos. Ang hamtong nga mga Kristohanon kinahanglang mag-amping sa pakigsandurot sa maong indibiduwal. Kon may mga pangutanang mobangon kon asa kutob ang pakigkontak maylabot kaniya, ang kadaghanan niadto masulbad pinaagi sa pagsunod sa diyosnong tambag. Kita makapalandong sa tambag sama nianang makita diha sa 1 Corinto 15:33 ug sa Proverbio 13:20 ug pangutan-on ang atong kaugalingon: ‘Unsa may angay nakong pakig-ubanan sa usa ka tawo nga wala magkinabuhi sumala sa Kristohanong mga sukdanan?’ Kon makita sa mga ansiano nga hulga ang tawong kalibotanon niining matanga, sila sa pribado makahatag pasidaang tambag niadtong sakop sa kongregasyon kinsa daw nameligro.

Sa ulahi, ang tawong walay-bawtismo kinsa nahimong usa ka “inuyonang kauban” mopakitag igong pamatuod nga naghinulsol, ug siya tingali gustong magtuon sa Bibliya pag-usab. (Buhat 26:20) Siya mahimong makigsulti sa mga ansiano sa kongregasyon nga iya karong ginatambongan, kinsa, kon makataronganon, mohikay alang niya nga tun-an sa Bibliya. Kini aplikado usab kon sa umaabot ang usa dili na takos ingong dili-bawtismadong magmamantala ug sa ulahi naghinulsol. Sa kasagaran, siya angay makigsulti sa duha ka ansiano nga maoy nakig-atubang sa iyang nahimong kalapasan o sa duha pang uban nga pilion sa lawas sa mga ansiano sa pagsobli sa butang kon mohangyo siya niini.

Sa tukma, Ang Bantayanang Torre nagbatbat nga lahi na nga kaso bahin sa mga ginikanan nga nag-atiman sa minor-de-edad nga mga bata diin sila maoy responsable sa pagtaganag materyal nga panginahanglan. (Efeso 6:1-4) Ang Kasulatan naghatag diha sa mga ginikanan sa obligasyon sa pagtudlo ug paggiya sa ilang mga anak. Busa ang mga ginikanan (o magtutuong ginikanan) mopili sa pagdumalag pribadong pagtuon sa Bibliya uban sa nakasalang minor-de-edad o sa paglakip kaniya sa programa sa pamilya sa pagtuon sa Bibliya ug sa panaghisgot.

Samtang ang dili pa dugayng materyal sa Bantayanang Torre nag-awhag sa pagbag-o sa atong paghunahuna ug mga pakiglabot, himoon kini sumala sa Kasulatan nga mapuslanon “alang sa pagmatuto diha sa pagkamatarong.”—2 Timoteo 3:16, 17.

◼ Sumala sa Tito 1:6, kinahanglan bang bawtismado ang tanang mga anak sa usa ka tawo aron siya mahimong kuwalipikadong ansiano sa kongregasyon?

Diha sa unang kapitulo sa Tito, gilatid ni apostol Pablo ang mga kuwalipikasyon sa mga tawo nga nag-alagad ingong mga ansiano sa kongregasyon. Ang usa mao nga ang igsoon “libre gikan sa sumbong, . . . kansang mga anak mga magtutuo.”

Wala kini magkahulogan nga ang mga anak sa ansiano kinahanglang bawtismado ang tanan, kay tingalig masuso pa ang uban. Busa ang Tito 1:6 sa makataronganon nagkahulogan nga ang iyang minor-de-dad nga mga anak bawtismado o kaha sila nagatuon sa kamatuoran sa Bibliya, nagadawat ug nagapadapat niana ug nagapadulong sa bawtismo, samtang ilalom sa merito sa pamilya. (1 Corinto 7:14) Ang ansiano kinahanglan maningkamot nga mahimong mga tinun-an ang iyang mga anak, sila dili ilalom sa “sumbong sa pagkamapatuyangon o pagkamasupilon.”b

Labi pa natong masabtan kini pinaagi sa pagtagad kon giunsa sa paggamit sa Bibliya ang ekspresyong “magtutuo.” Siyempre, ang tawo tingali may pagtuo, o nagatuo, sa daghang butang. (Buhat 26:27, 28; 2 Tesalonica 2:3, 11; Santiago 2:19) Apan atong nakita nga ang “pagtuo” labing nalangkit sa pagdawat sa Kristiyanidad ug magpabawtismo. (Buhat 8:13; 18:8; itandi ang 19:5.) Ang bawtismo ilabinang nagpakita nga ang tawo maoy usa ka magtutuo.​—Buhat 2:41, 44; 4:4, 32.

Ang ubang mga anak sa usa ka ansiano tingali dili pa sa pisikal, sa emosyonal, o sa espirituwal andam alang sa bawtismo. Apan, ang Tito 1:6 nagbatbat kanila ingong “mga anak nga magtutuo” kon sila nagauswag paingon sa bawtismo, sumala sa ilang edad ug kahimtang.

[Mga Footnote]