Usa ka Misteryo—Kinsa ang Bigaong Dakong Babilonya?

USA ka babaye, daotag-dungog nga bigaon, nga nag-impluwensiya sa kinabuhi sa binilyong tawo, gipatay, gilaglag. Apan dili kini ordinaryong paglaglag. Unsay nakapalahi niini? Ang manglalaglag usa ka hayop, usa ka mapintas nga hayop nga nagahukas kaniya, nagakaon sa iyang unod, ug dayon nagabiya sa iyang lawas aron ut-oton sa kalayo. Kinsa kining may-impluwensiyang babaye? Nganong ginaatake siya sa usa ka mapintas nga mananap? Unsay iyang nahimo nga takos siya niining mabangisong kamatayon?a​—Pinadayag 17:16, 17.

Kini mahimong pasikaranan sa makaikag nga sugilanong misteryoso​—gawas nga kini dili mao ang dugokan sa usa ka nobela. Kini usa ka matuod nga panghitabo sa kasaysayan nga nagakatuman. Ug kini bililhon kanimo kay kining daotag-dungog nga bigaon basin nagaimpluwensiya sa imong kinabuhi sa pagkakaron. Dugang pa, kon kaha magpabiling uban niya o mobulag magpasabot sa kalainan sa kinabuhi ug kamatayon. Busa kinsa ba siya?

Ang mga Parokyano sa Misteryosong Babaye

Kining femme fatale o kontrabida, kining way-ulaw nga manenental, gibatbat ni Juan diha sa matagnaong basahong Pinadayag sa Bibliya, diin atong mabasa: “Ug [ang manulonda] nagdala kanako diha sa gahom sa espiritu ngadto sa kamingawan. Ug nakita ko ang usa ka babaye nga nagkabayo sa usa ka mapintas nga mananap nga mapula nga nalukop sa mga ngalan nga mapasipad-anon ug kini may pito ka ulo ug napulo ka sungay. Ug ang babaye nagbisteg purpora ug eskarlata, ug nadayandayanan sa bulawan ug mahalon nga bato ug mga mutya ug sa iyang kamot nagkupot siya sa usa ka bulawang kopa nga napuno sa kangil-aran ug kahugawan sa iyang pagpakighilawas. Ug diha sa iyang agtang nahisulat ang usa ka ngalan, usa ka misteryo: ‘Dakong Babilonya, ang inahan sa mga bigaon ug sa mga kangil-aran sa yuta.’”​—Pinadayag 17:3-5.

Karon kining “Dakong Babilonya” usa gayod ka babayeng makagagahom, kay ang asoy nagaingon sa bersikulo 1 nga siya “nagalingkod sa daghang katubigan.” Unsay kahulogan niana? Ang manulonda sa Diyos misaysay kang Juan: “Ang mga tubig nga imong nakita, diin ang bigaon nagalingkod, nagkahulogan sa mga katawhan ug sa mga panon ug mga nasod ug mga pinulongan.” (Pinadayag 17:15) Sa walay pagduhaduha kini usa ka bigaon nga may impluwensiya sa tibuok kalibotan. Apan dili siya ordinaryong bigaon. Siya “ang inahan sa mga bigaon,” ang madam sa institusyon. Kon bahin sa pakighilawas, siya ang nagahatag sa mga mando. Apan siya usab may espesyal nga mga parokyano.

Gipadayag sa manulonda kon kinsa kining pinalabing mga parokyano sa dakong bigaon. Giunsa niya pagpaila sila? Siya miingon nga ang Dakong Babilonya mao ang usa “nga uban kaniya ang mga hari sa yuta nakighilawas, samtang kadtong nagapuyo sa yuta nahubog sa bino sa iyang pakighilawas.” (Pinadayag 17:2) Kini usa gayod ka makapadaning bigaon nga may maayong mga koneksiyon aron makadani sa politikanhong mga pangulo sa kalibotan, ang mismong “mga hari sa yuta”! Busa kinsa ba kini siya?

Ang manulonda miingon nga siya may ngalan, usa ka misteryosong ngalan, “Dakong Babilonya.” Karon ania ang duha ka timailhan sa iyang pagkamao​—ang usa mao ang mga parokyano nga pinalabi niya ug ang lain mao ang iyang ngalan, Dakong Babilonya. Sa unsang konklusyon mosangpot ang maong mga timailhan?

[Mga Footnote]