Ang Relihiyon ug Nazismo

“Si Hitler . . . dunay Katoliko nga Bise-Kansilyer ug gikan sa unang adlaw sa pagmando si Franz von Papen nahimong tigtambol sa pagdani sa Katolikong mga grupo aron suportahan ang bag-ong pagmandong Reich. Sa matag bahin sa Reich si von Papen nadunggan nga mitambag sa mga matinumanon sa binutang pagsunod kang Adolf Hitler.”

“Sa sayong 1933 ang mosunod opisyal nga pahibalo gihimo sa katilingbanong lawas sa Katolikong aksiyon ug hunahuna sa Alemanya, nga gipangunahan ni [Franz] von Papen: ‘Kita nga mga Katolikong Aleman mobarog, uban ang bug-os natong kalag ug bug-os natong pagtuo, sa pagpaluyo kang Adolf Hitler ug sa iyang Pagmando. Atong ikatingala ang iyang gugma sa yutang natawhan, ang iyang kaabtik ug ang iyang kabatid sa pangagamhanan. . . . Ang Alemang Katolisismo . . . kinahanglang makigbahin nga aktibo sa pagpalig-on sa Ikatulong Reich.’”

Si Franz von Papen usa ka himan aron makab-ot ang usa ka kasabotan tali sa Nazi nga pagmando nga iyang gialagaran sa Alemanya ug sa Batikano sa Roma. Ang kasabotan gipirmahan niadtong Hulyo 20, 1933. Ang espesyal nga kasabotan miingon: “Ang Kardinal ug ang Sekretaryo sa Nasod si Pacelli [sa ulahi mao si Papa Pio XII] karon mihatag kang Bise-Kansilyer von Papen, sa Dakong Krus sa Orden ni Pio . . . Si Bise-Kansilyer von Papen mipresentar ngadto sa Kardinal nga Sekretaryo sa Nasod sa usa ka Birhen sa Puti Seramikong Porselana ingong usa ka gasa ngadto sa Reich nga Pagmando. . . . Ang tanang mga gasa nagdala ug mga dedikasyon: ‘Usa ka handumanan sa Kasabotan sa Reich 1933.’”​—Ang tanang pangutlo gikuha gikan sa Franz von Papen​—His Life and Times, ni H. W. Blood-Ryan.