Mga Magmamantala sa Gingharian Nagtaho
“Ang Kamatuoran Magapahigawas Kaninyo”—Ug Maghatag Kalipay
SA BRITANYA, ang kamatuoran sa Bibliya nakapahigawas sa kapin sa 113,000 ka tawo, ug daghan pa ang nagadawat sa kamatuoran sa kada adlaw. Sa pagkamatuod ang mga pulong ni Jesus nagakatuman: “Inyong mahibaloan ang kamatuoran, ug ang kamatuoran magapahigawas kaninyo.” (Juan 8:32) Kining kagawasana mosangpot sa kalipay, sumala sa gipakita sa mosunod nga kasinatian nga gikan sa Britanya.
◻ Samtang si Penny nagsangyaw sa balay-balay, miasoy ang sangang-buhatan, gisinghagan siya sa usa ka tigulang babaye, “Okupado ako.” Mitubag si Penny nga mobalik ra siya sa pagduaw. Pila ka adlaw sa ulahi, sa usa ka panahon nga dili siya kasagarang moduaw, giduaw niya ang mga wala-sa-balay ug wala-tuyoang nakaduaw sa samang balay. Gibuksan sa tigulang nga babaye ang pultahan ug gipadayon si Penny. “Nasayod ako nga ikaw mobalik,” matud niya, “ug nagpaabot ako kanimo.” Gihisgotan nila ang paglaom sa Gingharian, ug ang babaye miingon nga naglaom siya nga kana matuman. Siya 79 anyos na, ug ang iyang bana namatay tulo ka tuig nang miagi. Wala siya makadawat ug paglipay gikan sa iyang simbahan ug wala makakitag katarongan nga mabuhi pa. Buot na niyang mamatay. Sa ulahi, tapos masugdi ni Penny ang usa ka pagtuon sa Bibliya uban kaniya, giingnan niya si Penny nga siya naghunahunang maghikog apan nasayod nga kana daotan. Miampo siya sa Diyos nga hatagan unta siyag paglipay ug tabangan siya nga makabaton na usab ug paglaom. Sa inanay, samtang siya nagtuon, ang iyang kawalay-paglaom nailisan sa paglaom, uban ang halalom nga pagtuo ug pagpasalamat kang Jehova. Giputol niya ang iyang tibuok-kinabuhing koneksiyon sa simbahan, gibawtismohan sa 80 anyos, ug karon maoy regular nga magmamantala nga madasigon kaayo. Sa pagkamatuod, ang kamatuoran sa Pulong sa Diyos nagpahigawas kaniya ug naghatag kaniyag dakong kalipay.
◻ Ang kamatuoran mahitungod sa Gingharian sa Diyos nagahatag kagawasan gikan sa pagkaulipon sa bakak nga relihiyon. Makausob kini sa personalidad sa usa, ug kining pagkausob kadaghanan makapahingangha sa uban ug makatabang nila nga makasabot sa kamatuoran, sumala sa gipakita sa mosunod nga kasinatian.
Usa ka batan-ong babaye nanuktok sa pultahan sa balay sa usa ka Saksi ug nangayog usa ka pagtuon sa Bibliya. Unsay mipahinabo niadto? Ang mga ginikanan sa babaye nagtuon sa Bibliya uban sa mga Saksi ni Jehova, ug ang epekto niana diha sa iyang mga ginikanan—ilabina sa iyang amahan—dako kaayo ug makapahingangha nga nakapatingala gayod sa anak babaye. Ang iyang amahan, nga tigtabakog 80 ka sigarilyo sa usa ka adlaw, bug-os mihunong sa pagtabako sa gipatin-aw kaniya nga dili mouyon si Jehova. Halos dihadiha human niadto iyang giuli ngadto sa iyang mga amo ang usa ka pondo sa mga manggad nga gikawat niya gikan kanila sulod sa usa ka yugto sa panahon. Gibati sa anak babaye nga ang butang nga makapatandog sa iyang mga ginikanan sa ingon kinahanglan gayong susihon. Karon ang mga ginikanan bawtismado na, ug ang anak babaye nagatambong sa tanan nga tigom.
Ang kamatuoran nga gimantala ni Jehova naghatag kalipay ngadto sa mga gihisgotan sa ibabaw ug sa dili-maihap nga uban. Kini makahimo sa sama alang ni bisan kinsa nga modawat sa kamatuoran sa Bibliya ug magpadapat niini diha sa ilang mga kinabuhi.—Salmo 19:7, 8.