“Puno sa mga Ngalan nga Mapasipad-anon”
ANG basahong Pinadayag sa Bibliya nagbatbat sa usa ka panan-awon sa “usa ka mapulang mapintas nga mananap nga puno sa mga ngalan nga mapasipad-anon.” Kini nagalungtad sa makadiyut, dayon moadto sa usa ka bung-aw nga gikan niana kini sa ulahi mogula. (Pinadayag 17:3, 8) Sa masubsob, ang mga panid niining magasina nagpaila nga kining mapulang mananap, sa sinugdan, mao ang Liga sa mga Nasod ug, busa, ang misunod niini, ang Hiniusang Kanasoran. Apan nganong ang mapulang mananap giingong “puno sa mga ngalan nga mapasipad-anon”?
Ang unang laraw sa Kasabotan sa Liga sa mga Nasod, nga gibase sa magkaubang mga sugyot sa Britaniko ug Amerikano, gipadayag sa publiko niadtong Pebrero 14, 1919. Sa sunod nga adlaw, sa usa ka editoryal nga nag-ulohang “Ang Liga sa Kalinaw,” ang The Times sa London miingon: “Usa ka hinungdan sa nahiangay nga garbo ang pag-ila diha sa Kasabotan sa dako kaayong buhat sa mga Ingles. . . . Kami mangahas sa pag-ingon nga kini ang labing importanteng internasyonal nga kasulatan nga sukad gipatik.” Si George Thayer, usa ka ministro sa First Congregational Church sa Cincinnati sa Tinipong Bansa, nagbatbat niini ingong “ang labing halangdong deklarasyon sa kabubut-on ug tinguha sa nalamdagang katawhan sa yuta nga sukad gibutang sa papel.” Ang pagdayeg miabot usab gikan sa langyawg-pinulongan nga prensa. “Dili kini Bibliya,” mipahayag ang Pranses nga mantalaang L’Homme Libre, “apan kini takos nga mahimong labaw pa niana, sanglit ang Bibliya, o bisan kinsang Ebanghelista sukad wala makapugong sa mga tawo sa pagpatyanay sa usag usa. Ang pagkamithianon nahimong kamatuoran.” Ang Pranses nga mantalaang Victoire nagbatbat niana ingong “ang kinadak-ang tiningob nga paningkamot nga nahimo sukad sa sinugdan sa kalibotan aron ipahimutang ang hustong pangatarongan ug hustisya sa yuta.”
Tapos sa pagkatukod sa Liga sa mga Nasod, si Heneral Jan Smuts, usa sa mga hawas sa Britanya sa maong komisyon, misulat: “Ang kasabotan maoy usa sa dakong mamugnaong mga kasulatan sa kasaysayan sa tawo. . . . Kinahanglang molampos kini, kay walay laing paagi alang sa umaabot sa sibilisasyon. . . . Nga tinagsa ang mga katawhan nga gawas pa sa kasabotan mopaluyo sa maong bandila nga ilalom niana ang tawhanong banay momartsa paabante ngadto sa mga kadaogan sa malinawong organisasyon ug kahimoan.”
Kanang tanang pagdahom namatud-ang bakak sa dihang ang Gubat sa Kalibotan II miulbo sa 1939. Napakyas ang Liga. Kadto usa lang ka tawhanong organisasyon nga gilangkoban sa mga tawong dili hingpit. Mao usab ang mipuli niini, ang Hiniusang Kanasoran. Bisan pa niana, sa adlaw nga gipirmahan ang Karta sa UN, ang usa ka editoryal sa The New York Times nagtawag niini nga “ang kahoy sa pakigdait” ug miingon, “Usa ka dakong paglaom ang natawo . . . Ang talagsaong mga butang mahimong moabot.” Sa susama, ang mga pangulo sa simbahan nagtawag sa UN “ang bugtong paglaom” sa pakigdait ug “ang kataposang paglaom.”
Ang pagpasidungog sa tawhanong mga organisasyon sa mga butang nga Gingharian sa Diyos lamang ang makahimo maoy mapasipad-anon. Busa, ang Hiniusang Kanasoran “moadto sa kalaglagan.” Ang hingpit langitnong kagamhanan lamang sa Diyos ang makahatag ug malungtarong pakigdait sa katawhan.—Pinadayag 17:11, 12; Isaias 9:6, 7; Daniel 2:44.