Init ba ang Impiyerno?

“SA USA punto sa katuigang 1960, ang Impiyerno nahanaw.” Kana ang giingon sa Britanikong awtor si David Lodge diha sa iyang librong Souls and Bodies, ug ang iyang mga pulong nagbanaag sa panghunahuna sa daghang Katoliko ug Protestante sulod sa mga dekada human sa ikaduhang gubat sa kalibotan. Sa usa ka panahon, daghan sa dagkong mga iglesya mismo wala kaayo magsaba bahin sa ilang opisyal nga doktrina sa kalayong impiyerno sa ilang singkamot nga magpahiuyon sa modernong panghunahuna.

Ang ideya sa pagsilot tapos mamatay ilabinang dili madawat sa mga tawo kay ang ideya sa sala mismo nahanap diha sa ilang mga kaisipan. Nga giinterbiyo niadtong 1984, si Cardinal Ratzinger sa Roma miingon: “Ang atong sibilisasyon . . . nagahatag bug-os nga pagtagad sa mga sirkumstansiyang makapahupay ug sa mga pasangil sa tinguha nga ang mga tawo mawad-an sa pagbati sa pagkasad-an, sa sala . . . , kanang kamatuoran mismo nga niana gilangkit ang pagtuo sa impiyerno ug sa Purgatoryo.”

Posible ba karong adlawa ang pagtuo sa kamatuoran sa sala nga dili tuohan ang doktrina sa pagsilot tapos mamatay diha sa purgatoryo ug sa impiyerno? Ang usa ka bag-ong libro, Abrégé de la foi catholique (Sumaryo sa Katolikong Pagtuo), nga ang pasiuna gisulat sa Pranses nga Cardinal Decourtray, prangkang nangutana: “Kinahanglan ba ang pagtuo sa impiyerno?” Ang tubag: “Dili posible ang paglikay sa makahadlok nga pangutana bahin sa impiyerno.” Ang basahong Vatican Council II​—More Postconciliar Documents (1982) nagakutlo sa “The Credo of the People of God” ingong nagaingon: “Nagtuo kami . . . [nga] kadtong mosanong sa gugma ug kaluoy sa Diyos moadto sa kinabuhing dayon. Kadtong dili modawat kanila ngadto sa kataposan nga ibalhog sa kalayo nga dili gayod mapalong.”

Busa, bisan pa sa tanang teolohikanhong paningkamot sa pagpamatuod sa kaatbang, ang impiyernong-kalayo bahin gihapon kaayo sa opisyal Katolikong doktrina. Bisan pa niana ang A New Dictionary of Christian Theology (1983) nagahisgot sa “kaulawan” ug “kagil-as” nga gipahinabo sa doktrinang walay-kataposang pagkatinunglo sa daghang membro sa mga iglesya sa Kakristiyanohan karong adlawa. Nalisdan sila sa pagpahiuyon niining doktrina sa ideya sa usa ka Diyos sa gugma. Sila nahibulong: ‘Ang init ba nga impiyerno tinuod nga Kristohanon ug Biblikanhong doktrina? Kon dili, diin kini gikan?’

[Hulagway sa panid 3]

Bourges Cathedral, Pransiya