Unsay Paglaom sa mga Patay?
USA ka batan-on nga pamilya mibiyahe sa sidlakang baybayon sa Habagatang Aprika aron mobakasyon. Ang mga ginikanan sa asawa didto sa laing kotse nga nag-una. Sa kalit lamang, mibuto ang ligid. Samtang nangandam sila sa pagpuli niana diha sa daplin sa dalan, gidaro sa hubog nga drayber ang duha ka kotse. Ang tigulang nga lalaki ug ang iyang asawa namatay. Ang batan-ong lalaki namatay sa pila lang ka adlaw sa ulahi. Ang iyang asawa nag-antos sa bali nga gusok ug ubang mga samad. Ang iyang anak nga masuso nag-antos sa makaparalisar nga pagkadaot sa utok.
Pagkadakong katalagman alang niining alaot nga pamilya! Sa dihang si Carolann, ang igsoong babaye sa batan-ong asawa, nakadungog sa balita, naminhod siya. Ang mga trahedya nga sama niini mahitabo sa tanang mga nasod. Ang naguol nga mga paryenti ug mga higala nahibulong, ‘Ang mga patay ba tinuod nga patay,’ o . . .
‘Buhi ba ang mga Patay?’
Halos ang tanang relihiyon nagtudlo nga ang kalag dili-mamatay. Busa, ang ilang mga sumusunod nagtuo nga kadtong nangamatay wala gayod mamatay kondili buhi gihapon sa langit, sa purgatoryo, o sa impiyerno. Sama sa gitudlo sa daghang simbahan, kadtong anaa diha sa ulahi nga dapit mag-antos sa makalilisang sa walay kataposan. Apan ang Diyos ba sa gugma mohatag ug ingon nga kasakit diha sa iyang mga linalang?—1 Juan 4:8.
Mopatim-aw nga daw dili, apan sa unsang paagi kita makatino? Palandonga sa mainampingon ang mosunod nga pamatuod sa Bibliya: “Giumol ni Jehova nga Diyos ang tawo gikan sa abog sa yuta, ug gihuypan niya sa mga buho sa iyang ilong sa gininhawa sa kinabuhi, ug ang tawo nahimong kalag nga may kinabuhi.” (Genesis 2:7) Kini bang dinasig nga pulong nag-ingon nga ang unang tawo, si Adan, gihatagan ug kalag? Wala, siya nahimong kalag nga may kinabuhi, usa ka buhi nga tawo. Kini gipamatud-an ni apostol Pablo, kinsa misulat: “Ang unang tawo, si Adan, sumala sa giingon sa kasulatan, nahimong usa ka buhi nga kalag.” Si Pablo nagkutlo gikan sa Genesis.—1 Corinto 15:45, The Jerusalem Bible.
Ang tawhanong kalag mamatay ba? Si propetang Ezekiel misulat: “Ang tanang kalag—ako man. Ingon man ang kalag sa amahan, ingon man usab ang kalag sa anak nga lalaki—ako man, ang kalag nga makasala—kini mamatay.” (Ezekiel 18:4, 20; Ecclesiastes 9:5, 10) Sa matin-aw, kon ang kalag mamatay, nan ang tawo walay kahibalo, busa dili siya mag-antos. Diha sa iyang unang publikong pakigpulong human sa Pentekostes 33 K.P., si apostol Pedro mipahayag: “Sa pagkamatuod, ang tanan nga magadumili sa pagpatalinghog sa maong Propeta [Jesus] bug-os nga pagalaglagon gikan sa katawhan.” Busa ang kalag mamatay.—Buhat 3:23.
Ang mga Patay Mabuhi ba Pag-usab?
Kadtong nagtuo nga tinuod ang Bibliya nahibalo nga si Jesus namatay ug gibanhaw sa ikatulong adlaw. (Buhat 10:39, 40) Sa unsang paagi nahitabo kini? Pinaagi sa gahom sa balaang espiritu sa Diyos.
Ang pagkabanhaw ba ni Kristo maoy usa ka eksipsiyon? Dili. Si Pablo misulat sa kongregasyon sa Corinto: “Si Kristo gibanhaw gikan sa mga patay, ang nahaunang mga bunga niadtong nangatulog diha sa kamatayon. Kay maingon nga pinaagi sa usa ka tawo miabot ang kamatayon, ang pagkabanhaw mahiabot usab pinaagi sa usa ka tawo . . . si Kristo.” (1 Corinto 15:20-22) Busa, daghan ang banhawon gikan sa mga patay. Si Jesus miingon usab: “Ayaw kahibulong niini, kay ang takna nagasingabot na nga kadtong tanan nga anaa sa handomanang mga lubnganan managpakabati sa iyang tingog ug managpanggula, kadtong nagahimog maayong mga butang ngadto sa usa ka pagkabanhaw sa kinabuhi.” (Juan 5:28, 29) Kini ang nagapasalig sa pagkabanhaw sa milyonmilyon.
Kon ang ibabaw nga pagpatin-aw nakapukaw sa imong interes sa pagkabanhaw, tingali mangutana ka, ‘Alang kang kinsa ang pagkabanhaw, ug kanus-a?’ Atong tagdon kadtong hinungdanong mga pangutana.