Ginapangita ba Nimo ang Nalubong nga Bahandi?
“Hinaot ang dili-takos nga kalulot ug kalinaw ipadagaya kaninyo pinaagi sa tukmang kahibalo sa Diyos ug kang Jesus nga atong Ginoo.”—2 PEDRO 1:2.
1, 2. Unsang mga hinungdan ang nagahimo sa bulawan nga bililhon ug mahal?
NGANONG mahal man kaayo ang bulawan? Kini usa ka metal lamang nga humokon, apan ang prisyo niini moabot ug ginatos ka dolyar sa matag onsa. Tinuod, kini mahulma ug magama nga matahom nga pahiyas sama sa singsing o pulseras. (1 Timoteo 2:9; Santiago 2:2) Bisan pa niana, kon ikaw mawala sa desyerto, nga himalatyon tungod sa kagutom ug kauhaw, ikaw dili makakaon o makainom niini. Sa maong kahimtang ang tinapay o platong kan-on uban sa tubig nga ilimnon labaw pag bili kay sa bulawan.
2 Nan, nganong ang bulawan gimahal man kaayo? Sa usa ka butang, kini nihit ug lisod mabatonan. Pananglitan, sa dihang ang Empire nga minahag bulawan sa amihanang California gisirhan niadtong 1957 kay kana dili na makaganansiya, ang mga minero nangutkot nga bertikal o deretso sa giladmon nga kapig 1,500 metros apan kinahanglang kanaogon ang 3 kilometros nga diyagonal aron maabot ang bulawan. Hangtod nianang puntoha, tungod sa mahal nga prisyo sa bulawan nahiangay ang dako kaayong paghago aron ipadayon ang pagpangita niana.
3. Unsang bahandi ang atong mapangita?
3 Hinuon, kita makakutkot ug butang nga bililhon pa kay sa bulawan. Unsa ba kini? Ang maalamong Haring Solomon mihatag ug tubag mga 3,000 ka tuig kanhi: “Kon, dugang pa, ikaw magasangpit sa salabotan mismo ug magapatugbaw sa imong tingog alang sa pag-ila mismo, kon ikaw magapadayon sa pagpangita niini ingon nga salapi, ug ingon sa nalubong nga bahandi ikaw nagapadayon sa pagpangita niini, niana ikaw makasabot sa kahadlok ni Jehova, ug hikaplagan nimo ang kahibalo mismo sa Diyos.” Tiaw na nga ang waypulos nga mga tawo makakaplag sa “kahibalo mismo sa Diyos”!—Proverbio 2:3-5.a
Kon Nganong ang Tanan Nagakinahanglag Tukmang Kahibalo
4. Unsay angay nga maapil sa tukmang kahibalo sa usa ka Kristohanon?
4 Sukad sa panahon ni Kristo, kanang bililhong kahibalo midako nga naapil ang dugang pa kay sa nabatonan sa matinuohong Hebreohanong mga lalaki ug mga babaye sa kakaraanan. Sumala sa gipahayag kini ni Pablo: “Nga ang Diyos sa atong Ginoong Jesu-Kristo, ang Amahan sa himaya, magahatag unta kaninyo sa espiritu sa kaalam ug sa pinadayag diha sa tukmang kahibalo mahitungod kaniya; kay nalamdagan ang mga mata sa inyong kasingkasing, aron inyong hisayran ang paglaom nga alang niana kamo gipanagtawag, kon unsa ang mahimayaong mga bahandi nga iyang nabatonan ingong panulondon sa mga balaan.”—Efeso 1:17, 18.
5. Nganong ang mga dinihogan kinahanglang mohatag ug mapinadayonong pagtagad sa ilang kahibalo sa kabubut-on sa Diyos?
5 Balik niadto, kadto laktud nga tambag alang sa balaang mga dinihogang igsoon ni Kristo, ug kini mao gihapon karong adlawa. Ingong ikaduhang bahin sa “binhi” sa saad, sila maoy linaing mga tumong sa espirituwal nga pagpamukan ni Satanas. (Galacia 3:26-29; Efeso 6:11, 12) Ang mga dinihogan, ilabina, kinahanglang maghimo sa ilang panawag nga tino pinaagi sa dili pagpasagad sa walay-bayad nga gasa sa dili-takos nga kalulot sa Diyos. Kana ang hinungdang sila kinahanglang magpadayon sa paglig-on sa ilang espirituhanong kahinguhaan pinaagi sa pagdugang sa ilang tukmang kahibalo sa kabubut-on ug Pulong sa Diyos.—Efeso 3:7; Hebreohanon 6:4-6; 2 Pedro 1:9-12.
6. (a) Nganong kitang tanan nagakinahanglag tukmang kahibalo, walay sapayan kon kaha ang atong paglaom langitnon o yutan-on? (b) Unsay gikinahanglan aron mabatonan ang tukmang kahibalo?
6 Komosta kadtong kansang paglaom mao ang kinabuhing walay kataposan sa yuta? Nganong hinungdanon alang nila ang tukmang kahibalo? Kay ang Kristohanong integridad o pagkamatarong wala may mga gradogrado, maingon nga walay mas taas nga sukdanan alang sa mga dinihogan, nga may langitnong paglaom, kay sa alang sa ubang mga karnero, nga may yutan-ong paglaom. (Juan 10:16; 2 Pedro 3:13) Ang Kristohanong mga prinsipyo samang mapadapat sa tanan. Tungod niana, kinahanglang pakargahan na usab natong tanan ang espirituwal natong mga bateriya pinaagi sa tukmang kahibalo sa regular nga paagi. Apan nalangkit ang panahon ug paghago. Kinahanglang himoon nato ang espirituwal nga pangutkot, nga samag alang sa nalubong nga bahandi.—Salmo 105:4, 5.
Pagpalit ug Panahon sa Pagkutkot
7. (a) Unsang mga suliran ang nagalungtad nga basin makapugong sa atong pagbatog tukmang kahibalo? (b) Unsa kaha ang mahimong sangpotanan sa espirituwal nga pagpasagad?
7 Ang kadaghanang tawo karong adlawa okupadog mga kinabuhi, ug ingong mga Kristohanon mopatim-awng mas okupado kita kay sa kadaghanan tungod sa atong mga eskedyul alang sa mga tigom sa Bibliya, pagsangyaw sa kanataran, sekular nga trabaho, buhat sa panimalay, buluhaton sa tunghaan, ug uban pa. Bisan pa niana, maingon nga moeskedyul kitag panahon kada adlaw sa pagkaon, busa kinahanglang mogahin kitag panahon sa pagpakaon sa atong kaisipan ug atong espirituwalidad. Dili kay waypulos nga pamulong ang gipahayag ni Jesus sa mikutlo siya sa Deuteronomio 8:3: “Nahisulat na, ‘Ang tawo mabuhi, dili lamang sa tinapay, kondili sa matag pulong nga nagagula sa baba ni Jehova.’” (Mateo 4:4) Kon pasagdan nato ang atong espirituwalidad, mapasagdan nato ang atong espirituhanong mga prinsipyo ug atong paglaom sa umaabot. Unya mosugod kita sa pagkadakin-as ug pagkatarog. Busa sa unsang paagi kita makahatag ug panahon alang sa regular personal nga pagtuon sa Bibliya?
8. Unsang Kasulatanhong tambag ang nagahatag kanatog tukmang panglantaw sa personal nga pagtuon?
8 Ang mga pulong ni apostol Pablo haom kaayo: “Pagbantay kamo pag-ayo nga ang inyong paggawi dili ingon nga dili-maalamon kondili ingong maalamong mga tawo, nga magapalit ug higayon alang sa inyong kaugalingon, tungod kay ang mga adlaw daotan. Tungod niini hunong na kamo sa pagkahimong dili makataronganon, kondili magpadayon kamo sa pagsabot kon unsa ang kabubut-on ni Jehova.” Makasabot kita kon unsa ang kabubut-on ni Jehova kon mamati kita sa iyang Pulong pinaagi sa atong personal nga pagtuon. Ug kana nagkahulogang kinahanglang kita ‘mopalit ug higayon’ o ‘pahimuslan sa labing maayo ang atong panahon.’—Efeso 5:15-17; Phillips.
9. Hain kaha kita basin nawad-ag panahon nga mabakwi alang sa personal nga pagtuon? Paghatag ug personal nga mga kasinatian.
9 Kon atong susihon ang atong dili-kinahanglanong mga kalihokan sa matag adlaw, unsay atong hisayran kon hain nato gigugol ang kadaghanan natong panahong diokupado? Sa atubangan ba sa telebisyon? Kanang makapahipno nga kasangkapan makakawat ug duha ngadto lima ka oras kada gabii sa atong kinabuhi! Pila ka oras kada adlaw ang imong gigugol sa pagtan-awg telebisyon? Kasagaran, ang gisalida, tungod sa pasiugda niini sa kabangisan ug sekso, makapadaot sa moral. Ug subsob nga kini gilaraw sa pagdasig sa “pangibog sa unod ug sa pangibog sa mga mata ug sa mapagawalong pasundayag sa pangabuhian sa usa.” (1 Juan 2:15-17) Bisan pa niana, daghan ang kulag determinasyon sa pagpalong sa telebisyon. Oo, kining modernong imbento makahurot sa kadaghanan natong bililhong kahinguhaan, ang panahon.
10. Nganong hinungdanon kaayo karong adlawa nga atong gamitong maalamon ang atong panahon?
10 Kon matinud-anon kita sa atong kaugalingon, ilhon nato nga kasagarang posible ang pagbakwi sa panahon alang sa kinahanglanong mga buluhaton sama sa pagtuon sa Bibliya. Ug ang personal nga pagtuon sa Bibliya nga motultol sa tukmang kahibalo kinahanglanon alang sa usa ka Kristohanon niining lisod nga panahon. Apan, tungod sa kapin sa 41,000 nga napalagpot sa miaging tuig, tin-aw nga daghang igsoong lalaki ug babaye ang nagpasagad sa ilang espirituwalidad. Ang pagsul-ob ug padayong paghupot sa “hingpit nga hinagiban sa Diyos” dili ra kaswal nga buhat. Sama sa kahimtang sa usa ka sundalo nga nagasul-ob sa literal nga armadura, kini matag-adlawng katungdanan.—Efeso 6:10-18; Roma 1:28-32; 2 Timoteo 3:1.
11. Unsa ang panig-ingnang gihatag sa pamilyang Bethel sa pagkahimong organisado alang sa pagtuon sa pamilya?
11 Sa tibuok nga kalibotan ang kapin sa 9,000 ka membro sa 95 ka pamilyang Bethel sa mga sangang-buhatan sa Watch Tower Society nagahimo sa ilang pamilyahanong pagtuon sa Bibliya kada Lunes sa gabii. Sila nagatuon sa The Watchtower sa pagpangandam alang sa tigom sa hinapos sa semana, ug sa daghang okasyon sila may usa ka pahayag sa Bibliya usab o usa ka klase alang sa bag-ong mga membro sa pamilya. Oo, ang Lunes mao ang tibuok-kalibotang gabii sa pagtuon sa pamilyang Bethel. Kanus-a ba ang inyong personal o pamilyahanong pagtuon?—Hebreohanon 10:24, 25.
Mga Kahimanan ug Kon Unsaon Paggamit Kanila
12. Unsa ang pipila sa talagsaong mga tabang sa pagtuon sa New World Translation of the Holy Scriptures—With References?
12 Maingon nga ang minero dunay kahimanan alang sa iyang trabaho, busa kinahanglang kita may kahimanan nga magamit sa pagkutkot sa minahan sa bulawan sa Pulong sa Diyos. Palandonga, pananglitan, ang New World Translation of the Holy Scriptures—With References. Kini karon gipatik sa Olandes, Ingles, Pranses, Aleman, Italyano, Hapones, Portuges, ug Kinatsila. Busa, ang kadaghanang mga Saksi ni Jehova nakabatog talagsaong himan aron makabatog tukmang kahibalo sa matuod nga Diyos. Giapil sa maong edisyon sa Bibliya ang libolibong panapling mga reperensiya ug daghan kaayong potnot. Kini usab may 36-panid nga apendice uban sa detalyadong impormasyon bahin sa lainlaing hinungdanong pangutana sa Bibliya.b
13. Unsang makaiikag nga mga impormasyon ang gihatag mahitungod sa paggamit sa “kahibalo” ug “tukmang kahibalo” diha sa Hebreohanong Kasulatan ug sa Gregong Kasulatan?
13 Sa likod, ang Reference Bible dunay listahan sa pangunang “Bible Words Indexed.” Sa unsang paagi atong magamit kana? Kon pangitaon sa imong kopya ang pamulong “accurate knowledge” o tukmang kahibalo, hikit-an nimo ang napulo ka tekstong nalista. Apan walay mausa kanila ang anaa sa Hebreohanong Kasulatan. Nagkahulogan ba kana nga ang Hebreohanong Kasulatan wala magpasiugda sa panginahanglan sa maong kahibalo? Dili. Kay ubos sa pulong “knowledge” o kahibalo, adunay 24 ka reperensiya, apil ang 18 gikan sa Hebreohanong Kasulatan. Ugaling lamang, ang Hebreohanong pinulongan walay espesyal nga pulong alang sa “accurate knowledge” o tukmang kahibalo. Busa, sumala sa imong makita gikan sa mga reperensiya, kini nagapasiugda usahay sa panginahanglan sa labaw pa kay sa katibuk-ang kahibalo lamang pinaagi sa paglangkit sa “knowledge” o kahibalo sa mga pulong sama sa “discernment” ug “insight” o paghisgot bahin sa kahibalo ingon nga “abundant” o dagaya.—Daniel 1:4; 12:4; Jeremias 3:15.
14. Unsang makaiikag nga mga dagkong punto ang anaa ubos sa “knowledge” o kahibalo sa Insight on the Scriptures?
14 Sumala sa atong nakat-onan sa nag-unang artikulo, ang Biblikanhong Grego nagpasa sa usa ka malalangong kalainan tali sa duha ka gidak-on sa kahibalo. Ug samtang kita mokutkot o motugkad, buot natong hisayran sa dugang ang kalainan tali sa maong duha ka pamulong ingon nga mapadapat sila sa mga Kristohanon. Nganong ang kahibalo, gnoʹsis, ug tukmang kahibalo, e·piʹgno·sis, kinahanglanon sa mga Kristohanon? Diin ba nato hikaplagi ang tubag? Diha sa ensiklopedia sa Bibliya nga Insight on the Scriptures. Pagkadakong tipiganan sa bahandi kining mga tomoha! Tan-awa ang ulohang “Knowledge.” Dinha imong hikaplagan ang kompletong artikulo bahin sa mga pulong atong ginatun-an ug bahin sa may-kalangkitang mga hiyas nga kaalam, pagsabot, pag-ila, ug katakos sa panghunahuna. Ug atong nakaplagan kining tanang “bulawan,” kini nga impormasyon, pinaagi lamang sa paggamit ug pipila ka tabang sa pagtuon sa Bibliya! Apan adunay labaw pa.—Salmo 19:9, 10.
15. Unsang ubang mga kahimanan ang atong nabatonan, ug sa unsang paagi sila magamit?
15 Kon buot nimong ipadayon ang mas mabug-osong pagtuon sa “knowledge” o kahibalo ug may-kalangkitang mga pulong, makagamit ka sa Indexes sa mga basahon sa Watch Tower Society, nga anaa sa ubay-ubayng pinulongan. Ug maingon nga atong nasubay ang temang kahibalo, ikaw makasubay sa samang paagi alang sa ginatos ka laing ulohan. Tiaw ang kadaghang impormasyon ubos sa ngalan ni Jehova! Pagkadagaya ang tukmang kahibalo mahitungod sa Soberanong Ginoo sa Uniberso!—Salmo 68:19, 20; Buhat 4:24.
16. Unsay ginaingon sa Kasulatan mahitungod sa pagpangita?
16 Pinaagi niini ug sa ubang tabang sa pagtuon nga gipatik sa Watch Tower Bible and Tract Society, pagkanindot nga “nalubong nga mga bahandi” ang atong hikaplagan! Gusto ba nimog “bulawan”? Sa imong hunahuna kana ba mapuslanon? Mogahin ka bag panahon sa pagkutkot niana?—Proverbio 2:1-5.
Kinsay Nagapanguna sa Espirituwal nga Pagmina?
17. Unsay kinahanglang atong buhaton aron mabatonan ang kahibalo bahin sa Diyos ug kang Kristo?
17 Unsa ang yawi sa pagbaton niining bililhong kahibalo bahin sa Diyos ug kang Kristo? Ang motibasyon—pangandoy nga makabatog inuyonang pagbarog uban kang Jehova ug sa iyang Anak ug sa tinguhang makadawat sa gasang kinabuhing walay kataposan. Gipahayag kini ni Jesus niining paagiha: “Magpadayon kamo sa pagpangayo, ug kini igahatag kaninyo; magpadayon kamo sa pagpangita, ug kamo makakaplag; magpadayon sa pagpanuktok, ug kini pagabuksan alang kaninyo. Kay ang tanan nga magapangayo magadawat, ug ang tanan nga magapangita makakaplag, ug ang tanan nga magapanuktok pagabuksan.” Apan matikdi ang kondisyon. Si Jesus miingon, ‘Magpadayon kamo sa pagpangayo, pagpangita, ug pagpanuktok.’ Kini dili ra kay butang nga kas-ahay. Ang pagpangitag kahibalo kinahanglang mapinadayonon.—Mateo 5:6; 7:7, 8.
18. Sa usa ka pamilya, kinsay angay manguna sa pagpangitag tukmang kahibalo, ug ngano?
18 Sa usa ka Kristohanong pamilya, kinsay manguna sa pagkutkot alang sa tukmang kahibalo? Si Pablo nagatubag: “Kamong mga amahan, ayaw ninyo pagpasuk-a ang inyong mga anak, kondili magpadayon sa pagmatuto kanila sa disiplina ug kalagdaan sa kaisipan ni Jehova.” Oo, ang mga ginikanan, ilabina ang amahan, kinahanglang manguna sa pagpakitag apresasyon sa espirituwal nga mga prinsipyo. Ug kana nagapahinumdom kanato pag-usab sa panginahanglan sa regular nga kahikayan nga madahom ug mapaabot sa pamilya.—Efeso 6:4.
19. Sa unsang paagi ang mga yugto sa pagtuon sa pamilya mahimong makaiikag? Unsa ang kasinatian sa inyong pamilya?
19 Ang mga yugto sa pagtuon sa pamilya mahimong makaiikag. Pananglitan, kon kamo may mga anak, nganong dili ninyo sila papilion sa usa ka ulohan ug dayon iasayn nila ang paghimog panukiduki sa lainlaing basahon sumala sa ilang edad ug katakos. Dayon tapos sa tunga sa oras o labaw pa, magtapok kamo ug tan-awon kon unsay nadiskobrehan sa matag usa bahin sa giasayn nga ulohan. Kon anaay konkordansiya, ang usa ka batan-on makaihap pila ka panahon ang usa ka pulong makita diha sa Hebreohanong Kasulatan ug sa Gregong Kasulatan. Tingali ang usa nga gulanggulang na makapangitag pila ka mahal nga bato diha sa Insight nga mga tomo. Ang mga ginikanan nahibalo sa mga katakos sa ilang mga anak ug sa gidugayon sa ilang pagtagad ug magahimo sa sesyon nga ginatagad kanang mga butanga. Magmapailin-ilinon ug madayegon. Dasiga ang inyong pamilya sa ilang espirituwal nga pagpangutkot—ug magbaton sa hustong motibo.
Pagpangutkot Uban sa Hustong Motibo
20. Unsang sayop nga motibo ang atong pagalikayan sa atong personal nga pagtuon?
20 Ang modestiya o kamakasaranganon maoy usa ka Kristohanong maayong hiyas. (Proverbio 11:2; 1 Timoteo 2:9) Nan, kita ba angay magtuon aron magpasigarbo kon unsay atong nakat-onan? O angay ba natong ipagawal sa kadaghanan ang atong kahibalo ug tingali ipadayag nga ang uban walay alamag? O angay ba natong imantala ang atong kaugalingong mga hubad o mga banabana? Si Pablo mitambag: “Kay pinaagi sa dili-takos nga kalulot nga gihatag kanako magasulti ako sa tanan dinha sa inyong taliwala nga dili maghunahuna ug labaw sa iyang kaugalingon kay sa kinahanglang pagahunahunaon; kondili sa paghunahuna aron makabaton sa maayong kaisipan, ang matag usa sumala sa gihatag sa Diyos kaniya nga sukod sa pagtuo.”—Roma 12:3.
21, 22. Sa unsang paagi angay nga matandog kita sa atong tukmang kahibalo?
21 Ang sinserong paningkamot ug pagpadapat sa tukmang kahibalo mahimong mosangpot sa pagtuo, maayong batasan, pagpugong-sa-kaugalingon, pagkamainantoson, diyosnong debosyon, gugmang inigsoon, ug gugma. Gipakita ni Pedro ang kahinungdanon niini sa misulat siya: “Kay kon kining mga butanga anaa kaninyo ug nagaawas, kini mopugong kaninyo sa pagkahimong dili aktibo o dili mabungahon mahitungod sa tukmang kahibalo sa atong Ginoong si Jesu-Kristo.”—2 Pedro 1:2-8.
22 Ang atong kahibalo angay magtandog sa kasingkasing. Kini angay magtukmod kanato sa pagpakitag gugma sa Diyos ug sa silingan ug mahimong mabungahong mga Kristohanon diha sa atong kagawian ug sa ministeryo. Kini mosangpot sa panaghiusa ug sa mas bug-os nga pagsabot sa panig-ingnan ni Kristo. (Efeso 4:13) Pagkamaayong balos tungod sa pagpangitag nalubong nga bahandi!
[Mga Footnote]
a Makaiikag, sa Proverbio 2:5 ang pamulong “ang kahibalo mismo sa Diyos” makita diha sa Gregong Septuagint ingong e·piʹgno·sis, o “tukmang kahibalo,” usa sa walo ka paggamit sa maong Gregong pulong diha sa Septuagint.
b Alang sa detalyadong katin-awan kon unsaon sa pagpahimulos sa labing maayo sa Reference Bible, tan-awa ang The Watchtower sa Nobyembre 1, 1985, mga panid 27-30.
Mga Pangutana nga Palandongon
◻ Sumala kang Haring Solomon, unsa ang bililhon pa kay sa nalubong nga bahandi?
◻ Nganong ang tukmang kahibalo hinungdanon alang sa mga dinihogan ug sa ubang mga karnero?
◻ Sa unsang paagi kita makapalit ug panahon alang sa personal nga pagtuon?
◻ Unsang espesyal nga mga kahimanan ang atong nabatonan sa pagpangutkot alang sa tukmang kahibalo?
◻ Kinsay angay manguna sa pagtuon sa pamilya, ug uban sa unsang motibo kita angay magtuon?