Diyosnong Debosyon—Mapuslanon Alang sa Tanang Butang

ANG mga Saksi ni Jehova nahibalo nga ang “diyosnong debosyon mapuslanon alang sa tanang butang” ug hinungdanon sa matuod nga pagsimba. (1 Timoteo 4:8) Kon wala kini, ang relihiyon maoy usa lamang ka pormalismo. Busa ang “Diyosnong Debosyon” maoy tukma nga serye sa ilang distritong mga kombensiyon nga nagsugod sa miaging Hunyo.

Niadtong Agosto, tulo sa maong kombensiyon ang gihimo sa Polandiya uban ang usa ka malipayong palibot. Kini gihimo human nga giila sa kagamhanan ang mga Saksi ni Jehova niadtong Mayo. (Alang sa ubang mga detalye mahitungod sa kombensiyon sa Polandiya, tan-awa ang Pagmata! sa Disyembre 22, 1989.) Atong sublion dinhi ang programa sa kombensiyon sumala sa pagkapresentar niini sa Polandiya.

Piątek w Poznaniu (Biyernes sa Poznan)

Nangayog pagkaon ug kagawasan, 50,000 ka demonstrador ang migubot sa Poznan niadtong Hunyo 1956. Kini miresultag kapin sa 50 ka tawo ang nangamatay ug ang pagkatukod sa bag-ong kagamhanang Polako. Lahi kaayo, 33 ka tuig sa ulahi, diha sa atmospera nga naila tungod sa kadaya sa espirituwal nga pagkaon ug Kristohanong kagawasan, ang malinawong mga Kristohanon nagtigom didto sa pagpamati sa mga pakigpulong bahin sa “Pag-alagad sa Usa ka Diyos nga Nagapangayog Bug-os nga Debosyon,” nga maoy tema sa Biyernes. Ang kinatas-ang tumatambong nga 40,442 ang nagtigom didto sa adlawng Dominggo.

Human sa pakigpulong sa pag-abiabi sa tsirman sa kombensiyon ug sa pag-interbiyo sa mga tawo nga “Nagkinabuhing May Bug-os Diyosnong Debosyon,” ang praktikal nga tambag gihatag sa pakigpulong nga “Likayi ang mga Ngabil nga Makadaot.” Pagkadali sa walay pulos nga tabi nga mahimong makadaot nga tabi! Ug ang makadaot nga tabi motultol ngadto sa makamatayng pagbutangbutang. Apan sa dili pa maghisgot bahin sa laing tawo, ang hamtong nga mga Kristohanon, nga maikagong motipig sa kalinaw ug panaghiusa, maalamong mangutana sa kaugalingon: ‘Isulti ba kini ni Jesus? Kinahanglan bang isulti pa kini? Kini ba makapadasig? Unsay akong katarongan nga isulti kini?’

Ang talagsaon sa mga kombensiyon sa Polandiya mao ang panahon nga gigahin sa kada adlaw aron sa pagpamati ug mga taho nga gihatag sa mga Saksi gikan sa ubang kayutaan. Ang mga eksperyensiya nga giasoy sa mga delegado nga naghawas sa 24 ka nagkalainlaing mga nasod nagpasiugda sa kamatuoran nga ania ang usa ka internasyonal nga pamilya nga tinuod nga nagkahiusa sa pag-ila sa kamatuoran nga si “Jehova Nangayo sa Bug-os nga Debosyon.” Sanglit ang Diyos takos sa pagdawat sa maong debosyon, ang iyang mga alagad angay nga dili-mabahin sa pagbati ug pagsimba. Ang panig-ingnan ni Jesus nagpakita nga dili-tinaphaw ang bug-os nga debosyon.

Ang diyosnong debosyon naglakip sa tanan natong pagabuhaton. Busa, ang tulo-ka-bahin nga diskusyon nagpasidaan sa mga Kristohanon sa “Paglikay nga Mahisalaag” maylabot sa pagkaon ug pag-inom, sa pamisti ug pamostura, ug sa kalingawan. Ang pagkaulitan ug pagkapalahubog maoy mga matang sa kadalo nga makahabol sa espirituwal nga mga sentido, mopahinabog mga suliran sa panglawas, modaldal ngadto sa daotang paggawi, ug mopahinabog mga aksidente. Ang sobrang mga estilo sa pamisti—dili-makasaranganon, katingad-anan, kataw-anan, o kaha makalilisang—angay likayan. Ang nagkato, sobra ka kasuwal, o huot nga mga besti dili angay. Ang punto dili kay ang usa ka estilo maoy uso, kondili kini ba angay alang sa usa ka ministro sa Diyos. Ang kalingawan nga nahugawan sa rebelyon, kapintasan, mga droga, okultismo, o seksuwal nga imoralidad dili alang sa mga Kristohanon.—Filipos 1:27.

Ang programa sa Biyernes sa hapon gisugdan uban sa pakigpulong nga “‘Ang Matinumanong Ulipon’ ug ang Nagamandong Lawas Niini.” Masaligon sa pagkamaunongon sa iyang matinumanong mga linalang, si Jehova nagtugyan ug awtoridad. Mao man usab ang iyang Anak. Gikan sa taliwala sa iyang dinihogang mga sumusunod, “ang matinumanon ug maalamong ulipon,” siya nagpili ug pipila nga mag-alagad ingong makitang nagamandong lawas. (Mateo 24:45) Sa unang siglo, kining grupoha gilangkoban sa mga apostoles ug daghan pang mga tigulang nga lalaki sa Jerusalem.

Sa modernong mga panahon ang Nagamandong Lawas suod nga nalangkit uban sa mga trabahanteng manunulat sa Watch Tower Society ug sa hunta sa mga direktor niini. Apan ang Nagamandong Lawas lahi gikan nianang legal nga korporasyon, ingon sa gipunting sa mamumulong: “Sanglit ang paglungtad sa korporasyon maoy sa bug-os legal, nga dunay tino nga mga hedkuwarter, kini mahimong bungkagon ni Cesar, ang Estado.” Dili ingon niana ang Nagamandong Lawas, nga dili usa ka legal nga instrumento apan ang mga membro niini “maoy tinudlo pinaagi sa balaang espiritu ubos sa pagtultol ni Jehova ug ni Kristo.” Busa, ang Nagamandong Lawas magpadayon sa paglihok ug sa pagdawat sa bug-os nga pagpaluyo sa mga Saksi ni Jehova sa tibuok yuta.

Ang mga kombensiyon sa Polandiya gitambongan sa lima sa 12 ka membro sa Nagamandong Lawas karon. Ang usa kanila mihatag sa keynote nga pakigpulong, “Nganong Tun-an ang Sagradong Tinagoan sa Diyosnong Debosyon.” Dinhi gipakita nga ang tinagoan sa diyosnong debosyon dili na usa ka tinagoan, kay “kini gipersonipikar man diha kang Jesus.” Gibatbat sa mamumulong ang unom ka bahin sa sagradong tinagoan nga gihisgotan sa 1 Timoteo 3:16, ug miingon: “Ang atong pagsabot sa sagradong tinagoan sa diyosnong debosyon angay nga moagda kanato kanunay sa suod nga pagsunod sa mga tunob ni Jesus.”

Gipatin-aw sa duha ka simposyum ang diyosnong debosyon gikinahanglan sa mga batan-on ug tigulang. Ang mga ginikanan maoy responsabli sa pagtagana alang sa ilang mga anak sa espirituwal nga panulondon pinaagi sa pagtudlo kanila sa pag-ugmad sa tukmang pagsabot sa husto ug sayop. Ang makahuloganong pagtuon sa pamilya, apil ang usa ka realistikong diskusyon sa mga suliran sa kabataan, gikinahanglan. Magmaalisto kanunay sa mga timaan sa kapeligrohan, ang mga ginikanan angay magbantay sa mga anak gikan sa dili-maayong panagkauban, bisan sulod sa kongregasyon.

Sa laing bahin, aron ang mga batan-on makabatog magantihong mga kinabuhi, kinahanglan motutok sila kang Kristo, kinsa ‘nagbilin kanila ug usa ka sumbanan alang kanila aron suod nilang sundon ang iyang mga tunob.’ (1 Pedro 2:21) Sa tukma, sila gipangutana: “Kon ikaw gipadako sa kamatuoran, ikaw nahibalo kon unsa ang imong gituohan, apan ikaw ba nahibalo kon ngano?” Sila gidasig sa paghimo sa kamatuoran nga ilang kaugalingon pinaagi sa pagmatuod sa ilang kaugalingon nga ang Bibliya mao ang Pulong sa Diyos ug nga ang mga Saksi ni Jehova mao gayod ang nakabaton sa kamatuoran.

Diha sa kadaghanang nasod kining pakigpulonga gitapos uban sa pagluwat sa bag-ong 320-panid nga librong Mga Pangutanang Gisukna sa mga Batan-on—Mga Tubag nga Mosaler. (Palihog tan-awa ang nag-uban nga kahon, “‘Usa ka Gasa nga Gikan ni Jehova Alang sa mga Batan-on.”) Gilaoman nga ang mga batan-on sa Polandiya ug sa ubang mga nasod sa Sidlakang Uropa sa umaabot makapahimulos usab gikan sa maayong tambag nga nasulod niining basahona pinaagi sa pagbasa niini sa ilang kaugalingong pinulongan.

Sobota w Chorzowie (Sabado sa Chorzów)

Sentro ang Chorzów sa industriya nga nahimutang sa kinataliwad-an sa daghag karbon nga habagatang Polandiya. Ang Silesian nga mga mina sa karbon nagdalag ekonomikanhong kaabunda sa maong lugar. Apan ang pangunang ulohan nga gihisgotan taliwala sa 65,710 ka tawo sa Slaski Stadium sa miaging Agosto maoy ganansiya nga may dakog bili.

Ang “Diyosnong Debosyon Nagdalag Dakong Ganansiya,” nga maoy tema sa Sabado, gipatin-aw sa unang mamumulong sa sesyon sa hapon. (1 Timoteo 6:6) Nagpasiugda sa kamatuoran sa mga pulong sa mamumulong mao ang mga interbiyo sa mga indibiduwal nga nakaeksperyensiya ug dakong ganansiya sa ilang mga kinabuhi pinaagi sa pagpaninguha sa pagkab-ot sa diyosnong debosyon.

Sa panahon sa programa sa buntag, ang mga kaayohan sa pagpaninguha sa pagkab-ot sa diyosnong debosyon gipasiugda diha sa usa ka simposyum. “Pinaagi sa Regular nga Pagbasa sa [Pulong sa Diyos] Uban ang Pagsabot,” tugkaron ang kahulogan sa atong gibasa, ug mainampoong palandongon kon unsaon sa pagpadapat sa atong nakat-onan, kita ingong mga Kristohanon makahimo sa pagpaninguha sa pagkab-ot sa diyosnong debosyon “Pinaagi sa Pagpasiga Kanunay sa Atong Kahayag.” (Josue 1:8) Gipadayag nga kon ang matag usa ka Saksi ni Jehova sa tibuok nga yuta mogugol ug 15 minutos sa usa ka adlaw sa pakigsulti sa uban sa dili-pormal nga paagi, ang dugang 327 ka milyong oras ang magugol sa usa ka tuig sa bulahatong pagsangyaw sa Gingharian.

Ang diyosnong debosyon makab-ot usab “Pinaagi sa Pagsukol sa mga Tentasyon.” Ang mga butang sama sa pagkaon, ilimnon, sekso, o kuwarta, bisan tuod kini dili daotan, mahimong daotan ubos sa dili maayong mga sirkumstansiya. Ang paagi sa panalipod mao ang paglikay nga dili kita maladlad sa materyalismo, sa pornograpiya, sa mga droga sa kalibotan, ug pagkapalahubog, ingon man usab ang pagkalinga sa mga kalingawan niini, sama sa musika, sa mga dula, ug sa sosyal nga mga kalihokan. Ang pag-ampo hinungdanon. Ang mga Kristohanon angay makakat-on sa pagdumot sa daotan. Kini tukma, kay gipunting sa sunod nga mamumulong nga sila kinahanglang “Magkinabuhi Dili na sa Ilang Kaugalingong Kabubut-on Kondili sa Diyos.”

Dugang ug dugang mga tawo ang mihukom sa pagbuhat niana. Kini gipakita sa dihang 2,663 ka bag-ong mga Saksi publikong mipahayag sa ilang determinasyon sa “Pagpaninguha sa Pagkab-ot sa Diyosnong Debosyon Ingong Dedikado, Bawtismadong mga Kristohanon.” (Sa tulo ka kombensiyon sa Polandiya, ang total nga 6,093 ka kandidato ang nabawtismohan.) Aron mahuptan ang kalipay sa pag-alagad kang Jehova, sila nga hapit nang bawtismohan gidasig sa pagpalandong sa daghang mga katarongan nga magmalipayon: Sa pakighigala kang Jehova, sa ilang tibuok yutang panag-igsoonay, ug sa paglaom sa kinabuhi sa Paraiso.

Ang Kristohanong pagpasakop gihisgotan sa pakigpulong “Pagpakita sa mga Buhat sa Diyosnong Debosyon—Ingong mga Lalaki Ubos sa Pagpangulo ni Kristo.” Ang mga lalaki nga nagabatasan sa diyosnong debosyon moatiman sa mga kaakohan sa pamilya sa mahigugmaon, samag-Kristo nga paagi. “Ingong mga Babaye nga Nagapakitag Angay nga Pagpasakop,” ang atong Kristohanong mga babaye mapaluyohon, dili impluwensiyahan ang mga ulo sa pamilya diha sa sayop nga paagi o tugotan nga ang emosyon mopakiling kanila sa paghimog dili-maalamong mga desisyon. “Ingong mga Anak nga Masinugtanon sa mga Ginikanan,” ang mga batan-on makakat-on sa pagsunod, sa paghatag komento sa mga tigom, ug sa pakigbahin sa Kristohanong ministeryo.

Pagkamaayong tambag! Apan, pagkaalaot sa bakak nga relihiyon nga napakyas sa paghatag nianang hustong paggiya! Alang niini, takos kini sa kusganong pagsaway, nga maoy misunod diha sa pakigpulong nga “Pagyagyag sa ‘Tawo sa Kalapasan.’” Kining misteryosong tawo nailhan ingong “usa ka hugpong sa mga ‘tawo,’ ang bug-os relihiyosong kaklerohan sa apostatang Kakristiyanohan.” Banggiitan sa ilang paglutos sa mga alagad sa Diyos, ang kaklerohan giduyogan karon sa “modernong mga apostata, nga niadto nangangkon nga mga Saksi, [apan kinsa] mibalik sa gisuka nga doktrina sa Kakristiyanohan ug nakigkunsabo sa mga palahubog sa espirituwal sa Dakong Babilonya sa pagdagmal ug sa pag-ataki sa matinumanon ug maalamong ulipon nga matang ni Jehova.” Ang palakpak nagpaila sa pag-uyon sa mamumulong sa dihang siya miingon: “Magpadayon kita sa pagyagyag sa Dakong Babilonya ug sa ‘tawo sa kalapasan’ niini.”

Kini nagkinahanglag kaisog, ilabina sa panahon sa dinha, sumala kang M. G. Henschel, membro sa Nagamandong Lawas, nga ang kadaghanan sa katawhan “mitalikod sa Diyos ug sa iyang Pulong, ang Bibliya.” Bisan pa nga ang “pagtahod sa Bibliya karong adlawa diyutay na lamang,” ang Bibliya nakalahutay sa pagsulay. Ang mamumulong nangatarongan nga “walay laing libro nga hinimog tawo nga salabtonon kaayo ug husto gayod.” Siya miingon nga ang “mga Saksi ni Jehova nagtugot sa Pulong sa Diyos nga mogahom sa ilang mga kinabuhi [ug] ang misangpot nga internasyonal nga panag-igsoonay sa matuod nga mga Kristohanon maoy kusganong pamatuod nga ang Bibliya mao ang dinasig nga Pulong sa Diyos.” Ang adlaw malipayong gitapos uban ang pahibalo sa bag-ong librong Ang Bibliya—Pulong sa Diyos o sa Tawo?, nga giluwat sa daghang pinulongan.

Niedziela w Warszawie (Dominggo sa Warsaw)

Ang kadaghanang mga bisita sa Warsaw mangadto aron sa pagtan-aw sa halandumong lugar nga nagtimaan sa gibantog nga Ghetto sa Warsaw, diin didto gitaral sa mga Nazi ang gatosan ka libong mga Hudiyo nga gitiman-an sa kamatayon sa panahon sa Gubat Kalibotan II. Nahimutang sa pipila lamang ka minutos nga biyahe sa kotse, hinunoa, ang X-Lecia Stadium puno kaayo, niadtong Agosto 13, nga dunay 60,366 ka tawo ang miabot sa pagpamati sa kahulogan sa “Pagsalikway sa Pagkadili-diyosnon ug sa Pagkinabuhi Uban ang Diyosnong Debosyon,” ang tema sa Dominggo.—Tito 2:12.

Dili angay magpakitag kalibotanong espiritu sa pagkaindepente ang pagkinabuhi uban ang diyosnong debosyon. Ang tinuod-nga-kinabuhing drama “Magpasakop Kamo Kang Jehova,” gipasundayag uban ang kinaiyanhong Polako nga kadasig, nga nagpasiugda sa hinungdanong mga kausaban nga angay himoon sa mga Kristohanon aron madawat ang pag-uyon sa Diyos.

Giktulo sa usa ka membro sa Nagamandong Lawas ang 1 Corinto 8:6, nga nag-ingon: “Alang kanato adunay usa lamang ka Diyos ang Amahan.” Siya miingon nga ang dugokang doktrina sa Kristiyanidad dili ang Trinidad, ingon sa giangkon sa daghan, kondili ang kabayawan ni Jehova pinaagi sa iyang Gingharian ilalom ni Kristo. “Ang doktrinang Trinidad maoy pagtipas gikan sa kamatuoran, pagbulag gikan niana,” siya miingon. Busa, ang mga tawo nga nagtawag kang Maria nga inahan sa Diyos ug ang Babayeng-Tigpataliwala sa Diyos ug sa tawo wala “mag-ila sa Diyos diha sa tukmang kahibalo.” (Roma 1:28) Busa, “ang pagsimba sa Diyos sa hustong paagi nagpasabot sa pagsalikway sa doktrina sa Trinidad.” Ang palakpak maoy miabiabi sa giluwat nga 32-panid nga brosyur, Czy wierzyć w Trójcę? (Angay ba Nimong Tuohan ang Trinidad?) Pagkamaayong galamiton sa pagyagyag sa kabakakan niining nagpasipala sa Diyos nga doktrina!

Ang kaluwasan wala gayod moabot sa mga biktima sa Ghetto sa Warsaw. Apan ang saad sa Diyos, ingon sa gipatin-aw sa pakigpulong sa publiko, mao “Ang Kaluwasan Haduol Na Alang sa Katawhan sa Diyosnong Debosyon!” (2 Pedro 2:9) Kini tinuod bisan pag ang mga Kristohanon maoy mga biktima sa duha-ka-pilo nga kapintasan—ang adlaw-adlawng kapintasan ug kana gitumong batok kanila diha sa porma sa paglutos. Nangagda sa pagsusi sa kaugalingon, gipasiugda sa mamumulong nga “ang kaluwasan maoy alang lamang sa mga tawo sa diyosnong debosyon, kanila kansang debosyon matuod, kanila kansang pagkamasinugtanon maoy kapahayagan sa pagkamaunongon.”

Human sa panapos nga pahinumdom nga “Magmalipayon sa Espiritu,” gitapos ang kombensiyon uban ang makapadasig nga presentasyon sa tema nga “Ang Atong Padayong Pagbansay sa Diyosnong Debosyon Mapuslanon.” Dayon gibuksan sa mga kombensiyonista ang ilang bag-ong mga songbook nga Polako, nga gikan sa imprentahanan sa pipila pa lamang ka semana, ug nagkahiusang mitanyag ug “Pag-ampo sa Pagpasalamat” pinaagi sa awit 45.

Ang usa ka kinasingkasing nga panapos nga pag-ampo ang misunod, ug unya ang masipang palakpak midahunog sa Warsaw, sa Poznan, ug sa Chorzów. Sa Warsaw ang masipang palakpak sa tinagpulo ka libong mga kamot milanog sulod sa mga 15 minutos. Walay usa ang buot nga mobiya, ug ang madasigong palakpak nga nagtindog, maoy dulot nga pasundayag sa kalipay niining dakong panon sa mga Saksi, diin libo-libo ang mitambong sa ilang unang tulo-ka-adlaw nga kombensiyon, nga dramatikanhon kaayong nagpasundayag sa ilang mga pasalamat kang Jehova ug sa iyang organisasyon. Daw tubag kadto sa Salmo 47:1, 2: “Oh pagakpaka ninyo ang inyong mga kamot, tanan kamong katawhan. Managhugyaw kamo sa kadaogan ngadto sa Diyos uban ang malipayong tingog. Kay si Jehova, ang Labing Hataas, makalilisang gayod, usa ka dakong Hari ibabaw sa tibuok yuta.” Samtang natapos ang usa sa labing dako nga mga hitabo sa modernong kasaysayan sa mga Saksi ni Jehova, kadtong madasigong mga igsoon nangandam sa pagpauli, ang ilang mga kasingkasing natugob sa kalipay ug sa usa ka determinasyon sa pagpalambo sa dakong pagpamatuod sa Gingharian nga nahiuyon sa hamiling panig-ingnan ni Jesus sa diyosnong debosyon.

[Kahon sa panid 27]

Mga Bag-ong Giluwat Nakapukaw ug ‘mga Buhat sa Diyosnong Debosyon’

Ang bag-ong librong Ang Bibliya—Pulong sa Diyos o sa Tawo? ug ang brosyur Angay ba Nimong Tuohan ang Trinidad? nakapukaw ug daghang mga ekspresyon sa apresasyon. Ang usa ka sister misulat mahitungod sa brosyur nga Trinidad: “Nakurat ako, naukyab, nalipay niana. Salamat kaninyo alang sa dakong panahon, kusog, ug trabaho nga nahimo sa pagpatik niining maayong publikasyon.”

Laing sister misulat mahitungod sa librong Ang Bibliya—Pulong sa Diyos o sa Tawo?: “Buot kong pasalamatan kamo gikan sa kinailadman sa akong kasingkasing alang niining maayo bag-ong libro. Ako nahibulong, kamo ba nakaamgo nga usa kini ka obra maestra? Ako tigbadlis ug importanteng mga pulong. Apan ako inyong giputol tungod kay ang matag pulong importante. Mao pay akong pagtapos sa kapitulo 5, apan kinahanglang ipahayag ko ang pasalamat.”

[Kahon sa panid 30]

‘Usa ka Gasa nga Gikan ni Jehova’ Alang sa mga Batan-on

Usa ka tagsaong bahin sa mga kombensiyon sa Tinipong Bansa ug daghan pang mga kayutaan mao ang sesyon sa Biyernes sa hapon, sa dihang ang mga batan-on sa panuigong 10 ug 19 gihangyo sa paglingkod sa usa ka gireserbang lugar. Human sa seryal sa mga pakigpulong, ang matag usa gihatagan ug libreng kopya sa bag-ong librong Mga Pangutanang Gisukna sa mga Batan-on—Mga Tubag nga Mosaler. Sa tibuok-kalibotan, duolan sa 8,840,000 ka kopya ang giluwat sa 21 ka pinulongan, ug gatos-gatos ka sulat sa apresasyon ang nadawat!

“Sa miaging mga asembliya, dihay mga pakigpulong nga gihatag alang sa mga batan-on,” misulat ang usa ka tin-edyer nga dalaga, “apan ang epekto sa pag-usa sa pagpalingkod kanamong tanan kahibud-nganan.” Misulat ang laing batan-on: “Milingkod ako sa lugar alang sa mga batan-on. Nadasig kaayo ako nga, sukad niadto, misugod ako sa pagkuhag mga nota sa mga tigom, nagtuon pa ug dugang, ug nagakomento na. Nagplano ako sa pagpabawtismo sa sunod nga ting-init.”

Alang sa kadaghanang batan-on, ang maong eksperyensiya maoy usa ka lisoanang-punto nga hitabo. “Sa dihang gipahibalo sa mamumulong nga palingkoron kami sa linain nga lugar,” nahinumdom ang usa ka batan-ong dalaga, “nahibalo ako nga duna gayoy dakong butang ang mahitabo. Sa dihang ilang gianunsiyo ang pagluwat sa libro, gibati ko ang dakong kalipay nga kahilakon ako. Ako nahibalo gayod nga kamo nagatagad kanamong mga batan-on, apan kini mitidlom sa akong kasingkasing. Kining libroha mao gayoy among gikinahanglan!”

“Maayo kaayo kining pagkasulat,” matud pa sa usa ka batan-ong ginganlag Leah, “ug ang mga hulagway realistiko ug makapahunahuna gayod kanimo.” Ang mga edisyon sa libro sa kombensiyon adunay mubong mensahe gikan sa Nagamandong Lawas nga gipahayag “Ngadto sa Tanang Batan-ong mga Saksi ni Jehova.” “Natandog kaayo ako nianang linain nga nota,” miingon ang batan-ong Andreá. “Alang kanako daw sama kana nga may nakigsulti kanako nga usa sa gipili ni Jehova sa pagpuyo uban kaniya sa langit!”

Daghan ang miapresyar nga gipresentar ang libro ingong usa ka gasa. Nahinumdom ang usa ka ginikanan: “Nakahilak ako. Mga igsoon, lima niadtong mga batan-on maoy akong mga anak, nga nag-edad ug 11 ngadto sa 16. Ako makaabot sa pag-amot ug duha lamang ka libro.” Misulat ang usa ka batan-on nga ginganlag Mark: “Misugod ako sa pagkuwenta nga dako seguro ang gastos sa paghatag ug usa ka kopya sa matag usa ka batan-on, apan unya akong naamgohan nga ang giya sa sulod niini bililhon. Kon ang libro makatabang ug usa lamang ka badlongon nga batan-on sa pagbalik sa dalan nga nagatultol sa kinabuhi o, labing maayo pa, makatabang sa daghan kanamo sa pagpabilin nianang dalana, kini takos sa tanan nga gasto.”

Daghang batan-on misugod sa pagkuhag kaayohan gikan sa libro dihadiha. “Mitambong ako sa among kombensiyon sa Hulyo 7-9,” miingon ang usa ka batan-on, “ug sa pagka Lunes, sa Hulyo 10, natapos ko kini!” Miingon ang lain: “Ang kataposang duha ka kapitulo nakadasig kaayo kanako sa pagsugod sa paghimo sa akong kinabuhi nga labi pang seryoso. Hapit na akong magpabawtismo niadto apan nausab ang akong hunahuna. Karon nga akong nadawat kining kahibulongan nga publikasyon, akong naamgohan nga ‘ang kalibotan lumalabay’ ug nga kinahanglan mohimo akog aksiyon karon.”

“Tungod kay nabag-o na man ang panahon,” misulat ang usa ka dalagita, “maoy anaa sa akong hunahuna kanunay nga ang mga tigulang wala mahibalo kon unsay among gibati. Wala lang kamo masayod sa pagkadako sa akong kalipay nga nakita ko nga nasayop ako. Ang inyong pagtagad kanamong mga batan-on nagpabati kanako nga daw ako bililhon.” Misulat ang usa ka grupo sa mga batan-on nga gikan sa Sweden: “Among gibati nga kamo nakasabot kanamong mga batan-on, ug among gibati nga nahimong labi pa kaming suod kaninyo.”

Maayo kaayong pagkapahayag kini sa usa ka batan-on sa dihang siya miingon: “Ang akong igsoong lalaki ug igsoong babaye ug ako nakagusto kaayo sa libro. Among gibati nga kini maoy usa ka gasa nga gikan gayod ni Jehova.” Maoy among gipanghinaot nga kining gasaha padayong mapahimuslan alang sa panalangin sa mga batan-on nga mahadlokon sa Diyos.

[Chart sa panid 29]

Diyosnong Debosyon Nagauswag sa Uropa!

1979 1984 1989 1979 1984 1989

ALEMANYA 129,342 140,681 159,819 1,154 1,009 1,694

AUSTRIA 17,847 20,908 25,153 236 257 307

BELGIUM 23,185 28,456 30,622 234 248 429

BRITANYA 113,910 137,008 160,704 605 937 1,344

DENMARK 21,057 23,267 24,645 122 147 249

ESPANYA 62,201 84,706 115,981 1,278 1,521 2,935

FINLANDIYA 20,293 23,501 25,679 215 302 329

ITALYA 117,163 169,328 240,041 2,515 3,769 6,295

LUXEMBOURG 1,141 1,327 3,131 8 12 61

NETHERLANDS 36,768 42,060 44,185 126 143 271

NORWAY 10,327 11,352 13,829 107 159 294

POLANDIYA — 94,134a 166,518 — 3,140b 6,093

PORTUGAL 35,108 47,843 59,797 862 1,068 1,546

PRANSIYA 89,073 110,745 156,751 1,361 1,856 3,201

SWEDEN 21,286 25,204 30,943 279 323 410

SWITZERLAND 14,455 17,457 23,867 130 225 349

TOTAL 713,156 977,977 1,281,665 9,232 15,116 25,807

[Mga footnote]

[Hulagway sa panid 26]

Ang pagluwat sa “Trinidad” nga brosyur nahimong tuboran sa kalipay sa Warsaw

[Hulagway sa panid 31]

Bag-ong nagpahinungod nga mga Saksi sa Chorzów nagpakitag diyosnong debosyon pinaagi sa pagpabawtismo