Ang Pagkamatinud-anon Mao ang Labing Maayong Lagda
ANG pagkamatinud-anon gidayeg pag-ayo diha sa Bibliya ug usa ka kinahanglanon alang sa matuod nga mga Kristohanon. (Mateo 22:39; 2 Corinto 8:21) Dugang pa, ang pagkamatinud-anon mao gayod ang labing maayong lagda, sumala sa gipasundayag diha sa mga kinabuhi sa daghan karong adlawa kansang mga hunahuna ug mga kasingkasing nabag-o sa tukmang kahibalo sa Bibliya. Usa ka panig-ingnan niini nagagikan sa Liberia.
Tapos sa dakong mainampoong pagtulotimbang, ang usa ka Kristohanong ansiano ug iyang asawa nagsira sa ilang tahianan. Ngano? Kay kana nakahurot sa dako kaayo nilang panahon ug nakababag sa ilang ministeryal nga mga kalihokan ug personal nga pagtuon. Nagkasabot sila nga matagbaw sa kasarangang kinitaan gikan sa pagbaligyag diyobos sa panapton. Ugaling, tapos gayod sa ilang paghimo sa maong lakang ang mga prisyo sa diyobos mius-os diha sa lokal nga baligyaan. Ang ilang kinitaan sa maong panahon dili na makabuhi sa pamilya. Unsay ilang buhaton?
Gihangyo nila ang kompaniya nga nagsuplay sa diyobos nga paus-osan ang ilang mga prisyo, sa ingon madakodako ang ganansiya. Kadto gibalibaran. Hinuon, mitanyag ang kompaniya nga magpadalag duha ka resibo, ang usa magpakita sa aktuwal nga prisyo ug ang lain sa prisyong gius-osan nga ilang ikapakita sa Adwana aron menos ang mabayrang alkabala. Kana makatugot sa ansiano sa pagpahimulos ug $2,000 ilegal nga ganansiya sa matag angkat.
Ang igsoong lalaki midumili nga mahimong bahin sa usa ka kalihokan nga malimbongon ug magtikas sa gobyerno. Natingala ang opisyales sa kompaniya. Misulat sila: “Gitahod namo ang imong konsensiya,” ug gitudlo nila ang ansiano nga bugtong ahente alang sa ilang produkto sa Liberia. Kay ang materyal nga panginahanglan sa pamilya sa maong panahon naatiman na man nga igo, ang ansiano ug iyang asawa nakaarang sa pag-auxiliary payunir, nga nakigtambayayong nga suod sa mga igsoon sa paglig-on sa kongregasyon. Sa pagkamatuod, ang ilang pagkamatinud-anon nahimong panalangin alang kanila.
Si Alfonso, sa Espanya, nakadiskobre usab nga ang pagkamatinud-anon mao ang labing maayong lagda. Kining batan-ona mibiya sa balay sa edad 12, ug sa wala madugay siya namaligyag mga droga, ingon man nangawat sa mga kotse, mga balay, ug mga tindahan. May panahong nangawat siyag abot sa napulo ka tindahan sa usa ka adlaw. Sa edad 21, upat sa iyang mga kaubanan nagbun-og kaniya, nagkawat sa iyang enterong suplay sa droga, ug mibahad sa pagpatay kaniya kon iya silang ireport sa polis. Sanglit siya ilado sa mga polis, siya nahadlok gani nga moadto sa ospital aron magpatambal.
Samtang inanayng nagpaalim sa iyang mga samad, si Alfonso namalandong nga seryoso sa iyang pagkinabuhi. Nakahinumdom siya sa mga butang bahin sa Bibliya ug sa Kristohanong mga prinsipyo nga gisulti kaniya sa iyang inahan samtang bata pa siya. Niadto, wala siya magpakabana sa iyang mga pulong, apan sa maong panahon mihangyo siyag pagtuon sa Bibliya uban sa mga Saksi ni Jehova. Sa unom ka bulan siya bug-os nakabag-o sa iyang kagawian ug personalidad ug nakuwalipikado alang sa bawtismo.
Ugaling, sa adlaw una sa iyang bawtismo, nakadawat siyag abiso nga moatubang sa korte sa kiha nga armadong panulis. Kadto usa ka krimen nga iyang nabuhat sa dugaydugay nang panahong miagi. Bisan pa niana, dayag nga iyang gidawat ang sala ug napriso samtang nagpaabot sa husay. Ang iyang abogado sa depensa miagda niya sa pag-ingon nga wala siyay gikawat ug siya wala magdalag pusil. Apan miinsistir si Alfonso sa pagtug-an sa tinuod. Tungod sa sala ug sa iyang daotang dokit sa kapolisan, ang piskal nangayo sa sentensiya nga 13 ka tuig. Apan tungod sa iyang maayong kagawian ug matinud-anong tinamdan, siya gihatagag unom ka bulan, nga ang maong panahon iya nang nasilbihan samtang nagpaabot sa husay.
Karon si Alfonso ug ang iyang asawa nagaalagad kang Jehova nga matinumanon, nga malipayong nakakaplag ug tinuod nga katuyoan sa kinabuhi ug nakapamatuod pinaagi sa ilang kasinatian mismo nga ang pagkamatinud-anon mao ang labing maayong lagda.