Unsay Kahulogan sa Kamatayon ni Jesus Alang Kanimo?
“SA TANANG kasundalohan nga nakamartsa sukad, sa tanang mga navy nga natukod sukad, sa tanang mga parliamento nga nakalingkod sukad, ug sa tanang mga hari nga nakamando sukad, kon tiponon, wala makaapekto sa kinabuhi sa tawo niining yutaa nga sama ka gamhanan niining usa ka personalidad.” Misulat ang awtor nga si James A. Francis mahitungod kang Jesu-Kristo.
Gilantaw sa mga tawo si Jesus sa nagkalainlaing mga paagi, apan ang Bibliya nagpaila kaniya isip Anak sa Diyos ug usa ka tawo nga adunay masinakripisyohon sa kaugalingon nga gugma. Si Jesus mikutlo ug dakong paagi nga diin iyang gipakita kana nga gugma sa dihang siya miingon mahitungod sa iyang kaugalingon: “Ang Anak sa tawo mianhi, dili aron siya pagaalagaran, kondili sa pag-alagad ug sa paghalad sa iyang kalag ingon nga lukat alang sa daghan.”—Mateo 20:28.
Unsay kahulogan niini nga lukat? Nganong gikinahanglan kadto? Kinsa ang gilukat? Sa pagkamatuod, unsay kahulogan sa kamatayon ni Jesus alang kanimo?
Unsa Man Kini?
Ang lukat maoy usa ka butang nga makapahigawas. Ang paglukat ug usa ka tawo nagkahulogan sa pagluwas kaniya gikan sa pagkabihag o silot pinaagi sa pagbayad ug kantidad. Sa espirituwal nga diwa, “ang paglukat” nagkahulogan sa paglibre gikan sa sala ug sa silot niini. Maoy hinungdan nga namatay si Jesus. Sama sa gisulat sa Kristohanong apostol Pablo: “Ang bayad sa sala mao ang kamatayon, apan ang gasa nga gihatag sa Diyos mao ang kinabuhing dayon pinaagi ni Kristo Jesus nga atong Ginoo.”—Roma 6:23.
Ang bili sa pagtubos sa Kasulatanhon nalangkit sa pagbayad ug lukat. Ang Salmo 49:6-9 nagaingon: “Silang mga nanagsalig sa ilang katigayonan, ug nangandak sa kadaghan sa ilang mga bahandi, walay bisan kinsa kanila ang makahimo sa bisan unsang paagi sa pagtubos bisan sa iyang igsoon, ni makahatag sa Diyos ug usa ka lukat alang kaniya; (kay ang bili sa pagtubos sa ilang kalag bililhon kaayo ug kini mihunong sa walay-kataposan) aron siya mabuhi sa walay kataposan ug dili makakita sa bung-aw.” Ang lukat maoy pagtubos nga gihimo sa Diyos, dili pinaagi sa bisan unsang dili-hingpit nga tawo.
Nganong Gikinahanglan?
Ang lukat gikinahanglan tungod kay ang atong unang tawhanong amahan, si Adan, nakasala. Busa nawala niya ang walay kataposan hingpit nga kinabuhi, ug sa makataronganon gisilotan sa kamatayon, ug sa ulahi namatay. (Genesis 2:15-17; 3:1-7, 17-19; 5:5) Ingong iyang mga anak, atong napanunod ang sala ug kamatayon. “Pinaagi sa usa ka tawo ang sala misulod sa kalibotan ug ang kamatayon misulod pinaagi sa sala,” misulat si Pablo, “ug tungod niini ang kamatayon mikuyanap sa tanang mga tawo sanglit silang tanan nakasala man.” (Roma 5:12) Oo, “diha kang Adan ang tanan mangamatay.” (1 Corinto 15:22) Busa ang salmistang David tukmang miingon: “Ako natawo sa kasal-anan ug sa sala gipanamkon ako sa akong inahan.”—Salmo 51:5.
Ang kaluwasan gikan sa pagkahinukman sa sala ug kamatayon hinungdanon aron ang bisan kinsang makasasalang mga anak ni Adan makadawat ug kinabuhing dayon. Sanglit ang dili-hingpit nga mga tawo dili makatagana niini nga lukat, si Jehova sa mahigugmaon mihimo niini pinaagi kang Jesu-Kristo. Bisan pa, unsay gipalit sa lukat? Buweno, sa dihang nakasala si Adan, iyang nawala ang walay-kataposan hingpit nga tawhanong kinabuhi, uban sa tanang mga katungod ug mga palaabuton niini. Busa, ang samang butang ang tubson pinaagi sa halad lukat ni Jesus.
Kon Unsay Nagpaposible Niini
Ang katarongan napatagbaw diha sa pagkaeksperyensiya sa katawhan sa kamatayon, ang silot sa sala. Busa ang lukat maoy usa ka buhat sa kaluoy sa Diyos ug mahigugmaong-kalulot. Ang hingpit tawhanong kinabuhi ni Jesus, uban sa tanang mga katungod ug mga palaabuton, gilubong diha sa kamatayon ug wala na kuhaa ug balik, kay siya wala man banhawa isip usa ka tawo nga may unod ug dugo kondili isip usa ka dili-mamatay espiritu nga linalang. (1 Corinto 15:50; 1 Pedro 3:18) Ang gihalad nga tawhanong kinabuhi ni Jesu-Kristo nagpadayon nga adunay matuboson, o malukaton, nga gahom.
Ingong usa ka tawo nga walay sala, si Jesus samag kahimtang sa orihinal nga kahimtang sa hingpit nga Adan. Tungod kay masinugtanon sa Diyos hangtod sa kamatayon, gihimo si Jesus nga labing Labaw nga Saserdote, ug iyang gipresentar ang bili sa iyang hingpit tawhanong halad didto sa langit. (Hebreohanon 9:24-26) Tungod kay gidawat sa Diyos kining matubsanong bili, si Jesus makatubos sa nanagtuong mga anak ni Adan gikan sa sala ug kamatayon pinaagi sa pagpadapat sa merito sa iyang halad alang kanila. (1 Corinto 6:20; 7:23; 1 Juan 2:1, 2) Busa si Jesus “nahimong tuboran sa dayon nga kaluwasan alang sa tanang magasugot kaniya.” (Hebreohanon 5:8, 9) Kini mao ang nagpaposible kanila sa pagbaton ug matarong nga baroganan atubangan sa Diyos pinaagi sa iyang Anak.
Kinsa ang Ginalukat?
Nan, kinsa ang makapahimulos sa lukat? Ang mga tawo nga nagatuo niini nga tagana ug busa nakadangat sa panaghiusa uban sa Diyos. Pinaagi sa pag-alagad kaniya nga matinumanon, sila mahigawas gikan sa sala ug sa silot niini nga kamatayon ug makadawat ug kinabuhing dayon.—Juan 17:3.
Ang unang tawo makahukom sa pagsunod sa Diyos o dili. Siya mipili sa dili-pagsunod. “Si Adan dili mao ang nalimbongan,” apan siya namatay nga usa ka makasasala nga mituyo sa pagpakasala. (1 Timoteo 2:14) Bisan pa, komosta ang mga anak ni Adan? Sila makapili sa pag-alagad sa Diyos sa labing maayo sa ilang dili-hingpit nga katakos o sa pagsupak sa ilang Maglalalang.—Josue 24:15.
Si Jesus mianhi “sa paghatag sa iyang kalag ingong lukat alang sa daghan.” (Marcos 10:45) Apan kinsa ang “daghan”? Dayag nga walay labot si Adan tungod kay usa man siya ka hingpit nga tawo kinsa mituyo sa pagpili sa pagsupak sa Diyos ug namatay nga dili mahinulsolon, makasasala nga mituyo sa pagpakasala. Apan komosta ang iyang dakong pamilya, nga may gidaghanong libolibo ka milyon? Uban sa katumbas nga lukat, gibawi ni Jesu-Kristo ang napanunod nga pagkahinukman sa kamatayon nga midangat sa pamilya ni Adan. (Itandi ang 1 Timoteo 2:5, 6.) Alang sa “daghan” nga mga magtutuo, gipadapat ni Jesus ang merito sa iyang makatubos nga bili.
Apil sa nalukat nga mga magtutuo mao ang mga Hudiyo ug mga Hentil, o mga tawo sa ubang kanasoran. Si Pablo miingon: “Maingon nga ang paglapas nga gihimo sa usa ka tawo misangpot sa pagkahinukman sa silot sa tanang mga tawo, mao man usab ang buhat sa pagkamatarong mosangpot alang sa tanang mga tawo sa pagdeklarar kanila nga matarong alang sa kinabuhi.” (Roma 5:18) Pinaagi sa pagkamatay diha sa kahoy, “gilukat ni Kristo [ang mga Hudiyo] gikan sa tunglo sa Kasugoan pinaagi sa pagkahimong tunglo [kanila], kay nahisulat kini nga nagaingon: ‘Matinunglo ang matag usa nga pagabitayon diha sa kahoy.’” (Galacia 3:13; Deuteronomio 21:23) Ang Roma 4:11 naghisgot bahin sa mga Hentil sa dihang kini nag-ingon nga samtang si Abraham, ang kagikan sa mga Hudiyo, wala pay sirkunsisyon, siya nahimong “amahan sa tanan nga may pagtuo bisan wala pay sirkunsisyon.” Busa, ang halad lukat ni Jesus nakahatag kaayohan sa may pagtuong mga Hudiyo ug mga Hentil.
Ang dalan nga subayon sa tagsa-tagsa ka indibiduwal maoy motino kon siya makabaton bag kaayohan gikan sa halad ni Jesus. Sama kang Adan, ang motuyo sa pagkahimong daotan walay labot sa merito sa lukat ug sa kinabuhing dayon nga ihatag kanila. Sama sa giingon ni Kristo: “Ang motuo sa Anak may kinabuhi nga dayon; apan ang dili mosugot sa Anak dili makatilaw ug kinabuhi, hinunoa ang kapungot sa Diyos magpabilin diha kaniya.” (Juan 3:36) Ang lukat nagpaposible usab sa pagbanhaw sa mga tawong patay nga anaa sa panumdoman sa Diyos. (Juan 5:28, 29) Kon sila magpamatuod nga masinugtanon ug mapabilhon, ang aplikasyon sa mga kaayohan sa lukat kanila magkahulogan nga sila mabuhing walay kataposan. Ug alang sa mga tawo nga nagakinabuhi niining “kataposang mga adlaw,” adunay posibilidad nga mabuhi sa walay kataposan nga dili na kinahanglang mamatay pa.—2 Timoteo 3:1-5; Mateo 24:3-14, 21, 34; Juan 11:25, 26.
Mga Katarongan sa Pagpasalamat
Ang bisan kinsa nga gustong makapahimulos gikan sa lukat kinahanglang adunay dulot nga apresasyon alang niini. Ug pagkatukma sa maong pagpasalamat! Ilabina kay ang lukat nagkinahanglan man ug dagayang gugma sa Diyos ug ni Kristo.
Si Jehova nga Diyos nagpakitag dakong gugma sa pagtagana sa lukat pinaagi sa kamatayon sa iyang Anak. Si Jesus miingon: “Kay gihigugma gayod sa Diyos ang kalibotan [sa katawhan] nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon. Kay gipadala sa Diyos ang iyang Anak sa kalibotan, dili aron ang kalibotan iyang pagahukman, kondili aron ang kalibotan maluwas pinaagi kaniya.” (Juan 3:16, 17) Dili ba angay pasalamatan nimo kining pagpasundayag sa gugma sa Diyos?
Dugang palandonga ang lalom nga gugma ni Jehova sa paghimog tagana alang sa lukat. Sa wala pa ipadala ang Anak sa Diyos sa yuta aron mabuhi ug mamatay ingong tawong hingpit, siya adunay-una-tawhanong paglungtad. Siya mao “ang panganay sa tanang kalalangan,” nga pinaagi kaniya “gibuhat ang tanang butang diha sa langit ug dinhi sa yuta, makita ug dili-makita.” (Colosas 1:13-16) Pagkadako sa gugma ni Jehova alang sa iyang Anak! Bisan pa, ang Diyos wala magpadala ug bisan kinsa sa usa sa iyang milyon-milyong matarong mga manulonda sa yuta. Ang iyang gugma sa katawhan dako kaayo nga tungod niana iyang gipadala ang iyang bugtong Anak.
Palandonga, usab, ang lalom nga gugma ni Jesus nga gipakita maylabot sa lukat. Ingong espirituhanong linalang sa langit, siya mao ang “batid nga magbubuhat” sa Diyos. Matuod, “ang mga butang nga gikahimut-an [sa Anak sa Diyos] mao ang mga anak sa tawo.” (Proverbio 8:22-31) Bisan pa, dili sayon alang kaniya ang pagbiya sa langit, nga may maayo kaayong mga kahimtang uban sa iyang Amahan ug sa mga panon sa matarong nga mga manulonda. Gikan sa iyang langitnon bantaaw nga dapit, ang Anak sa Diyos nakakita sa daotang mga kahimtang sa yuta ug sa kadaotan sa sala ug kamatayon diha sa katawhan. Siya nahibalo usab nga ang pagtagana sa lukat nagkinahanglan nga siya mamatay. Bisan pa, iyang “gisul-ob ang kinaiya sa usa ka ulipon ug nahisama sa mga tawo. Labaw pa niana, . . . siya nagpaubos sa iyang kaugalingon ug nagmasinugtanon hangtod sa kamatayon.” Tungod sa pagkamatinumanon, gibanhaw si Jesus ngadto sa mahimayaong langitnong kinabuhi. (Filipos 2:5-11) Pagkadako sa gugma nga iyang gipakita maylabot sa lukat! Ikaw ba nagapabili sa gihimo ni Jesus?
Unsay Imong Buhaton?
Ang Ingles nga obispo nga si Richard sa Chichester (s. 1198-1253) miampo nga unta ang mga lalaki ug mga babaye modangat “sa labi pang tin-aw nga pagkaila kang Jesu-Kristo, sa paghigugma kaniya nga labaw pa, ug sa suod pa nga pagsunod kaniya.” Ang lukat ni Jesus tino nga nagatagana sa usa ug maayong katarongan sa pagkaila, sa paghigugma, ug sa pagsunod kaniya.
Kon dili pa sa lukat, ingong mga makasasala kita mangamatay unta nga walay paglaom, kay “ang ikot sa kamatayon mao ang sala.” (1 Corinto 15:56) Busa aron maluwas gikan sa kamatayon nga mosangpot tungod sa imong pagkabaton ug ikot sa sala, nan, unsay imong kinahanglang buhaton? Ikaw kinahanglan mahibalo bahin sa tagana sa Diyos alang sa kaluwasan pinaagi kang Jesu-Kristo. Unya kinahanglang imong ipasundayag nga ikaw may pagtuo sa lukat. Sa unsang paagi? Pinaagi sa pagpakitag kinasingkasing nga apresasyon alang niana, sa paggugol sa imong kaugalingon ngadto sa Diyos, ug sa pagsulti sa uban bahin niining katingalahang tagana alang sa kaluwasan.
Kining dalana mopahimutang kanimo taliwala sa “dakong panon” kinsa “nakalabang sa dakong kasakitan, ug . . . nakalaba sa ilang mga besti ug nakapaputi niini sa dugo sa Kordero,” si Jesu-Kristo. (Pinadayag 7:9, 14) Mailaha ang paglaom sa kinabuhing dayon diha sa usa ka yutan-ong paraiso. (Lucas 23:43) Oo, ug ikaw mahimong bahin nianang malipayong panon, kon ang kamatayon ni Jesus bililhon kanimo.
[Hulagway sa panid 4]
Ang walay-sala nga Jesus samag kahimtang sa orihinal nga kahimtang sa hingpit nga Adan
[Hulagway sa panid 6]
Ikaw ba nagapabili sa matuod nga kahulogan sa kamatayon ni Jesus?