Mga Magmamantala sa Gingharian Nagtaho
◻ ANG apostol nga si Juan miingon: “Mahigugma kita, dili sa pulong o sa sulti, kondili sa buhat ug sa tinuoray gayod.” (1 Juan 3:18) Si Jesus miingon nga ‘higugmaon nato ang atong silingan sama sa atong kaugalingon.’ (Mateo 22:39) Ang pagpakitag gugma sa buhat nagarekomendar sa kamatuoran, sumala sa gipakita sa mosunod nga kasinatian gikan sa Britanya.
Sa giduaw ni Pauline ang iyang inahan, kinsa may multiple sclerosis, wala gayoy laing tawo didto sukad masukad. Apan niadtong okasyona, sa pagsulod niya sa balay, iyang nadunggan nga nag-andar ang makinang panglaba ug may naggamit ug vacuum cleaner sa itaas. “Unsay nagakahitabo, kinsay nia dinhi?” gisukna niya ang iyang inahan. Ang iyang inahan mipatin-aw nga ang mga Saksi ni Jehova mianha sa iyang ganghaan, nakakita sa iyang kahimtang, ug mihapit sa pagtabang. Tapos nila mabuhat ang buluhaton sa balay ug makalutog pagkaon, sila nanglingkod ug miingon: “Andam na ba ka?” “Andam alang sa unsa?” nangutana si Pauline. Ang iyang inahan misaysay nga siya misugot sa usa ka pagtuon sa Bibliya. Si Pauline nagpanuko sa pagpabilin, apan kay siya gikan man sa layo, siya nangutana kon puwede ra ba nga siya moduyog sa pagtuon. Nakaangay siya pag-ayo niadto nga gihikay niya nga moanha sa samang adlaw kada semana aron siya makatambong nga regular. Sa kadugayan, ang usa ka higala mikuyog niya, ug karon silang duha bawtismado na. Ingong resulta sa maong orihinal nga pagtuon, pulo ka membro sa mao mismong pamilya karon mga Saksi ni Jehova! Oo, tabang “sa buhat”!
Pastor sa New Guinea Misanong sa Kamatuoran
◻ Sa adlaw ni Jesus ang pila ka saserdote midawat sa pagtulon-an ni Jesus. Ang mga klerigo nga mabuot ug kasingkasing karong adlawa nagadawat usab, sumala sa gipakita sa usa ka kasinatian gikan sa kabukiran sa New Guinea, mitaho ang usa ka magtatan-aw sa sirkito. Siya miasoy: “Ang usa ka edukado kaayong batan-ong lalaki, usa ka Pentekostal nga pastor, nagtukod ug usa ka gamayng simbahan nga duol ra sa Kingdom Hall. Usa ka igsoong lalaki gikan sa maong kongregasyon nagsangyaw niya, ug siya maorag mahigalaon. Wala madugay human niadto, ako nagduaw sa kongregasyon ug mipuyo sa usa ka igsoong lalaki sa unahan ra sa karsada gikan sa balay sa pastor. Sa unang gabii sa akong pag-abot, kining batan-ong lalaki mianha sa among ganghaan uban sa iyang Bibliya, kauban sa usa ka dakong pundok gikan sa iyang kongregasyon. Ang tanan buot makadungog sa mensahe sa Gingharian. Daghan siyag pangutana, ug ang panaghisgot miabot sa gabii nang dako. Sa matag gabii sa akong pagduaw, siya ug ang ubang interesado nanganha aron matubag ang dugang nilang mga pangutana. Gidapit ko siya sa asembliya sirkito sa sunod nga semana, ug siya mitambong kauban sa igsoong lalaki nga unang nakasangyaw kaniya. Kining tawhana nagpadayon sa iyang pagtuon sa Bibliya, mipahawa sa Pentekostal nga Iglesya, ug karon usa na ka regular nga magmamantala sa maayong balita.”
Sa pagkamatuod, kabubut-on sa Diyos “nga ang tanang matang sa mga tawo mamaluwas ug mahidangat sa tukmang kahibalo sa kamatuoran.”—1 Timoteo 2:4.