Hinumdomi ang Inyong Dakong Maglalalang sa Inyong Pagkabatan-on
“WALAY Kalipayng mga Batan-on: Usa ka Kamatuoran sa Internasyonal nga Kinabuhi.” Ang mabasa sa ulohan sa usa ka artikulo diha sa The Star sa Johannesburg, Habagatang Aprika. Ang kapsiyon sa artikulo mabasa: “Uban sa dakong populasyon sa mga batan-on karon nga nag-atubang sa limitadong mga kahigayonan nga dugang nagakamenos tungod sa pagkunhod sa mga butang sa tibuok yuta, ang pagkawalay kalipay sa mga batan-on diha sa naghuot nga mga siyudad nahimong usa ka dayag nga kamatuoran sa internasyonal nga kinabuhi. Diha sa mga kasamok sa Miami, San Salvador, Managua, Teheran ug sa Cape Town adunay usa ka gikausahang butang—diha sa matag kaso ang unang mopatay ug mamatay mao ang mga batan-on.”
Kana gipatik mga napulo na ka tuig ang milabay, ug ang mga kahimtang mas misamot pa sukad niadto. Nganong walay kalipay ang mga batan-on sa tibuok yuta? Ang nagatubong pagkawalay kalig-on niining sistemaha sa mga butang maoy usa ka tinong hinungdan. Ang pagkawalay trabaho miuswag sa hilabihan. Ug uban sa kusog nga nagakadaot nga panimalaynong kinabuhi, unsa pa may kasegurohan sa mga batan-on? Dili ikatingala nga ang pipila kanila moatake sa kalibotan nga dili nila mapugngan. Dili ba kini tungod kay sila kulang sa usa ka tino nga paglaom nga maoy mohatag kalig-on sa ilang mga kinabuhi?
Ang usa molaom sa mga relihiyon sa kalibotan nga mohatag niana nga paglaom. Apan, usa ka batan-on misulat: “Ako nalibog kaayo. . . . Daghan ako ug mga higala, nga sakop sa nagkalainlaing mga relihiyon, ug sila sama ra gihapon nako. Ako nalibog gayod nga wala na ako mahibalo kon unsa pay tuohan. Palihog, makahatag ba kamo kanakog tambag?” Unsang tambag ang ikahatag nimo nianang matanga sa batan-on?
Ang mga batan-on nga nagapabilin sa Pulong sa Diyos ug sa matuod Kristohanong kongregasyon makalingkawas niana nga kalibog ug kaguol. Samtang daghang mga batan-on ang walay tinong paglaom alang sa umaabot, ang mga batan-ong Kristohanon nagasalig kang Jehova nga Diyos ug sa iyang tino nga Pulong sa kamatuoran. Busa, sila adunay paglaom nga makalabang-buhi sa kataposan niining sistema sa mga butang uban ang panglantaw sa kinabuhing walay kataposan. Human niana, diha sa usa ka yuta nga nahinloan na sa inhustisya ug pagkadaotan, sila mahimong bahin sa patukoranan sa “bag-ong yuta” nga niana “magapuyo ang pagkamatarong.” (2 Pedro 3:13; Juan 17:3) Alang sa katumanan nianang mahimayaong palaabuton, ang mga batan-on gitambagan nga ‘hinumdoman ang ilang Dakong Maglalalang.’ (Ecclesiastes 12:1) Ug ang labing maayong tambag nga ikahatag mao nga sila mahimo ug magpabiling dakong bahin sa Kristohanong kongregasyon. Ngano man?
Ang kadaghanan kaninyo nga mga batan-on diha sa Kristohanong kongregasyon adunay magtutuong mga ginikanan nga nahigugma kaninyo ug nagaatiman kaninyo. Sa matag kongregasyon adunay tinudlong mga ansiano, nga maikagon kaayo sa inyong espirituwal nga kaayohan. Kana nga tabang ug pag-atiman dili angayng pakamenosan. Ang kamatuoran nga gikan sa Pulong sa Diyos, uban sa teokratikanhong pagtultol, mohatag kaninyog kasegurohan, kagawasan gikan sa kapakyasan, ug usa ka tinong paglaom sa umaabot. Kining tanan motabang kaninyo nga ‘mahuptan ang pagtuo ug usa ka maayong tanlag’ ug hawiran ang usa ka paglaom nga samag usa ka angkla nga mopugong sa barko gikan sa pagkalunod diha sa bagyohon nga dagat.—1 Timoteo 1:18, 19; itandi ang Hebreohanon 6:19.
Pahilayo Gikan sa Kalibotanong mga Panghaylo
Bisan pa sa daghang espirituwal nga mga panalangin nga matagamtam ninyo nga mga batan-on diha sa Kristohanong kongregasyon, ang tendensiya sa uban mao ang pagpangagpas sa mga dalan sa kalibotan. Daw bation nila nga sila nakulangan ug usa ka bililhong butang nga makita lamang diha sa kalibotan nga gawas sa Kristohanong kongregasyon. Apan ang kalibotan aduna ba gayoy bililhong butang nga ikatanyag?
Human nga nakagugol ug kapin sa 40 ka tuig sa bug-os panahong ministeryo, ang usa sa mga alagad sa Diyos mihimo niining komentoha: “Ang bahin lamang sa akong kinabuhi nga ako nagbasol mao ang bahin sa akong kinabuhi kaniadto sa wala pa ako nakadangat sa kamatuoran. Ako kaniadto bahin pa sa kalibotan. Ako nagkinabuhi nga iya lamang sa kalibotan. Sa miabot ako sa edad nga 18 ug namalandong sa akong kinabuhi, akong naamgohan nga kadto maoy haw-ang. Walay tumong, walay katuyoan ang akong kinabuhi. Ang kalibotanong kalingawan nga akong gituohang makalipay sa pagkamatuod naghatag lamang kanakog kapakyasan ug kasakitan. Ako misugod sa pagpangita sa kamatuoran. Akong nakaplagan kini ug sa usa ka tuig sa ulahi ako misugod sa pakigbahin sa bug-os panahong pag-alagad. Ako walay kuwarta, usa pa lamang ka tuig nga kasinatian diha sa kamatuoran ug nagtuo nga paluyohan ako ni Jehova. Karon kon tan-awon nakog balik ang akong kinabuhi, ang dos-tersiya nga bahin niini nagamit ko sa bug-os panahong pag-alagad, ako malipayon kaayo. Dili ko gayod ibaylo ang akong nabatonan gikan sa pag-alagad kang Jehova sa bisan unsang butang nga igatanyag sa kalibotan.” Sa pagkamatuod, kini nagapalanog sa mga pagbati sa kaliboan ka mga Saksi ni Jehova.
Busa nganong kawilihan ang mga butang nga gitalikdan sa ubang mga Kristohanon? Nganong mangandoy sa mga butang sa kalibotan nga nagapadulong sa kalaglagan? (1 Juan 2:15-17) Ingong usa ka batan-on, tingali imong bation nga ang pag-alagad kang Jehova maoy mapig-oton ra kaayo ug mohikaw kanimo sa kalipay nga gitanyag sa kalibotan. Apan maalamon ba ang paglantaw sa imong mga ginikanan ug sa mga ansiano nga mapig-ot ra kaayo diin ang tinguha lang nila mao ang pagtabang kanimo sa pagpahimuot kang Jehova ug makabaton sa kinabuhing walay kataposan?
Kon ang usa ka inahan nga nagsugo sa iyang anak ngadto sa usa ka tindahan sa duol ug gipahinumdom siya sa paghunong ug sa pagtan-aw sa matag daplin sa dili pa motabok sa dalan, isipon ba nimo siya nga mapig-oton ra kaayo? Hinunoa, dili ba siya sa pagkamahigugmaon naningkamot sa pagpanalipod sa iyang anak? Kon pananglit ang bata wala mamati sa pasidaan ug nabanggaan sa usa ka kotse ug namatay? Bation ba gihapon nimo nga ang inahan mapig-oton ra kaayo? Aw, ikaw tingali maghunahuna nga angay unta nga hatagan siyag dugang pahamangno aron mapanalipdan ang kinabuhi sa iyang anak! Sa susama, ang mga pahinumdom nga gikan sa Pulong sa Diyos ug sa iyang organisasyon mahigugmaong gihatag, dili ingon nga mga restriksiyon kondili alang sa atong proteksiyon.
Ang pagdako diha sa Kristohanong panimalay dili igo nga makahimo kanimo sa pagbarog sa mga pagpiit niining kalibotana. Ikaw usab kinahanglang sa personal kombensido sa kamatuoran sa Pulong sa Diyos. Ang maong personal nga kombiksiyon ug gugma alang sa Maglalalang maoy basehanan sa pagpahinungod sa imong kinabuhi ngadto sa Diyos. Kining personal nga pagtuo gikinahanglan usab aron nga ikaw makadepensa sa imong kombiksiyon atubangan sa uban. (1 Pedro 3:15) Ang pagpagiya sa Pulong sa Diyos maoy basehanan alang sa usa ka malamposong kinabuhi. (Josue 1:8; Salmo 119:9) Apan aron molampos sa kinabuhi, gikinahanglan usab nimo ang maayong pagbansay.
Paghatag Espisipikong Pagbansay
Sa pagkatinuod, kamong Kristohanong mga ginikanan malipay nga motan-aw sa inyong mga anak nga mobarog nga malig-on sa kamatuoran ug magpabiling nahiusa uban kaninyo diha sa matuod nga pagsimba. Ang amahan mao ang may dakong responsabilidad sa pagmatuto sa mga anak “diha sa disiplina ug pahamatngon ni Jehova.” (Efeso 6:4) Apan makakita ka bag mga bahin nga kinahanglang imong pauswagaon ang imong pagbansay kanila? Ikaw ba nagagugol ug igong panahon uban sa imong mga anak? Ginabuhat ba ninyo ang mga butang ingong usa ka pamilya? Ug gikalipayan ba ninyo sa tingob ang paglingawlingaw?
Ayaw kalimot nga ang inyong paghatag ug maayong sulondan adunay gamhanang epekto sa inyong mga anak. Kon buot ninyo nga seryoso nila nga dawaton ang kamatuoran, nan angay nga ingon niana ang inyong paglantaw. (3 Juan 2-4) Ug kon buot nimo nga molambo diha kanila ang halalom nga pagtahod sa organisasyon ni Jehova ug sa mga ansiano, nan ikaw sa kanunay angay nga aduna nianang maayong tinamdan sa kaugalingon.
Bisan pag ang pagbansay sa mga anak maoy pangunang katungdanan sa mga ginikanan, ang mga ansiano adunay responsabilidad usab sa mga batan-on sa kongregasyon. Sa pag-atiman sa panon sa Diyos, ang mga magtatan-aw usab kinahanglang magbantay sa mga nating karnero. (1 Pedro 5:1-3) Pagkamaayong panig-ingnan ang gihatag ni Jehova sa mahigugmaong pag-atiman bisan sa mga gagmay! (Isaias 40:11) Sa pagsanong sa iyang panig-ingnan, ang Kristohanong katabang nga mga magbalantay gusto usab nga mopasundayag ug mainit, mahigugmaong interes sa mga batan-on ug mopabati kanila nga bahin sa kongregasyon. Ang ubang mga batan-on nagpahayag ug tinguha nga ang mga ansiano makigsulti unta kanila kanunay ug tabangan sila diha sa ministeryo.
Ang pagbansay sa usa ka batan-on nagkahulogan ug labaw pa kay sa paghatag lamang kaniya ug kahibalo sa Kasulatan. Gikan sa iyang kasingkasing, kinahanglang dumtan niya ang ginadumtan sa Diyos ug higugmaon ang gihigugma sa Diyos. (Amos 5:14, 15) Kon siya gisugo sa pagpahinumdom sa iyang Maglalalang sa iyang pagkabatan-on, siya kinahanglang matutoon diha sa Kasulatan sa paglakaw sa matarong nga dalan ni Jehova. (Proverbio 22:6; 2 Timoteo 3:16) Kinahanglang dili magpugong ang mga ginikanan sa gikinahanglang disiplina. Ang ubang mga ginikanan nga buot magpabilin ang panaghigalaay sa ilang mga anak sa bisan unsa pay mahitabo may tendensiya nga mopalabay sa kalapasan, pakamenoson ang kaseryoso niini. Sila naimpluwensiyahan sa pagkamatugoton sa kalibotan. Apan ang mahigugmaong ginikanan mapamation sa mga sumbong nga nagbinuang ang iyang anak ug mohatag sa hustong disiplina sumala sa gikinahanglan. (Proverbio 13:24) Sa pagkatinuod, unsang matanga sa Kristohanong ginikanan ang buot mohupot sa panaghigalaay nga gipasukad sa pagkamatugoton apan mawad-an sa iyang anak tungod sa kakulang sa hustong disiplina?—Proverbio 22:15.
Pagbaton ug Tumong sa Kinabuhi
Si Jehova nga Diyos naglalang kanato aron atong mabatonan ang labing dakong kalipay ug katagbawan gikan sa pag-alagad kaniya. Palandonga ang dakong natad nga mapalambo ninyo nga mga batan-on. Duolan sa katunga sa populasyon sa kalibotan maoy 20 anyos ang edad ug bata-bata pa. Kining mga batan-ona nanugakod diha sa dagat sa katawhan. Samtang sila walay paglaom, kamong Kristohanong mga batan-on adunay tinong paglaom ug adunay butang bililhon nga ipakig-ambit kanila. Pinaagi sa inyong maayong Kristohanong paggawi ug sa inyong kadasig sa pag-alagad kang Jehova, kamo makadani sa daghan kanila sa kamatuoran. Busa kamo makatabang kanila diha sa dalan sa kinabuhi.
Unsa pa ang mas bililhong tumong nga inyong himoon kay sa paggugol sa inyong kinabuhi sa pag-alagad kang Jehova nga Diyos? Napalandong na ba ninyo ang pagkuha sa makaluwas-ug-kinabuhing buluhatong pagsangyaw sa bug-os panahon? Tingalig ikaw makaambit sa pagpakaylap sa maayong balita ingong usa ka payunir, o ikaw makaalagad sa usa sa mga sangang opisina sa Watch Tower Society diin ang mga literatura sa Bibliya gihimo. Bisan kon dili nimo mabuhat kana, dili ba nimo angayng himoon ang pagsimba kang Jehova ingong pangunang tumong sa imong kinabuhi, ug busa nagahinumdom sa imong Dakong Maglalalang? Ikaw adunay bililhong buluhaton nga pagabuhaton. Busa, hangtod nga matapos kining sistemaha sa mga butang, magmadeterminado nga magbaton ug ‘daghang buluhaton sa Ginoo.’—1 Corinto 15:58.
Busa magmauswagon kamong mga batan-ong Kristohanon. Hinumdomi ang inyong Dakong Maglalalang karon, ug kamo iyang pagaluwason sa dihang taposon na niya kining dili diyosnong kalibotan. Oo, si Jehova magapanalipod kaninyo nianang panahona ug magapanalangin kaninyo uban sa walay kataposan, mahimayaong palaabuton.