Ang Ipasabot sa mga Balita
Kinaraan?
Sumala sa usa ka Anglikanong pari sa Adelaide, Australia, ang mga pasidaan batok sa pisikal nga pagpukaw sa lawas nga mosangpot sa pakighilawas ug panapaw maoy kinaraan ug gikan sa dili-Kristohanong mga tuboran. Diha sa iyang dili pa dugay nga pagtuon bahin sa seksuwalidad, siya nag-ingon nga ang magtiayon nga nagsabot nga nagminyo dili makasala kon sila makigsekso sa dili pa magminyo. Ang pagtuon nag-ingon usab nga ang homoseksuwalidad madawat sa pila ka kaso. Sumala sa Courier Mail sa Brisbane, ang tigpamaba sa Uniting Church sa Australia “miuyon sa pasukaranang mga prinsipyo bahin sa taho.”
Ang Bibliya, hinunoa, nag-ingon nga maoy kabubut-on sa Diyos nga ang tanan “magpahilayo gikan sa pakighilawas” ug nga “ang mga makighilawason, ang mga tigsimbag mga diyosdiyos, ang mga mananapaw, ang mga lalaki nga ginatagana alang sa dili-kinaiyanhong mga katuyoan, o ang mga lalaki nga mohigda uban sa mga lalaki . . . dili makapanunod sa gingharian sa Diyos.” (1 Tesalonica 4:3, 4, 1 Corinto 6:9, 10) Sa pagkamatuod, kadtong modawat sa Bibliya ingong dinasig nga Pulong sa Diyos nagaila nga ang hunahuna niini bahin sa sekso nagagikan sa maalamon kaayong Maglalalang. Ang epekto niini diha sa mga tawo nga nagakinabuhi sa sukdanan sa Bibliya nagpamatuod nga kining gitawag nga kinaraan nga mga giya sa moral nakaamot gihapon sa kalig-on sa pamilya ug usa ka panalipod batok sa lalom emosyonal nga mga samad ug dulumtanang mga sakit nga maoy sangpotanan gikan sa imoral nga batasan.
Ang Labing Maayong Panalipod
Ang pag-abuso sa mga droga nagpabiling usa ka seryosong suliran. Busa, unsa ang labing maayong paagi sa pagpanalipod sa batan-on gikan sa pag-abuso sa droga? Diha sa usa ka interbiyo nga gipatik sa mantalaan sa Brazil nga O Estado de S.Paulo, ang Pranses nga propesor ug sikyatrista si Claude Olievenstein nagpasiugda sa panginahanglag mga giya ug mahigugmaong pagpaluyo. Siya miingon: “Sa dihang ang mga tawo maghisgot ug mga droga karong adlawa, ang papel sa kapolisan, sa husdisyal nga sistema, ug sa tunghaan gipasiugda. Apan, ang dakong panginahanglan maoy may kalabotan sa panalipod sa pamilya sa [paggamit sa droga]. . . . Daghang mga kabataan wala mahibalo kon unsa ang awtoridad sa ginikanan. Ang amahan wala; tingali siya miretiro na.”
Nagbatbat kon nganong ang pagpanalipod batok sa pag-abuso sa droga hinungdanon diha sa pamilyahanong sukod, si Dr. Olievenstein midugang: “Kita nagkinabuhi diha sa usa ka katilingban sa ganansiya diin ang mga tawo maulaw sa maayong paggawi. Sa dinha, tungod sa mga droga, ang atong mga anak mosugod sa pagpakita ug usa ka paggawi, tungod kini kay wala nato ipahibalo ang maayong paggawi. Ang atong katilingban nahimong matig-a, walay-pagbati, industriyalisado. Ang mga tawo naghunahuna lamang sa pakigbisog aron mabuhi.”
Sumala sa magasing Superinteressante, ang usa ka surbi sa U.S. mikompirmar sa bili sa awtoridad sa ginikanan. Ang basahon nag-ingon: “Ang mga bata nga taas kaayo ug grado sa mga eksamin sa tunghaan ug timbang sa emosyon nagagikan sa mga pamilya diin ang mga ginikanan nagapadapat sa awtoridad sa paghimog tino nga mga balaod sa paggawi ug nagahatag kagawasan sulod sa tino nga mga limitasyon. Sa susama, ang gidaghanon sa mga bata nga giyanon sa droga ug alkohol mas ubos niining mga pamilyaha.”
Uban sa maayong katarongan, ang Bibliya nagtambag sa mga ginikanan: “Sawaya ang imong anak ug siya magahatag kanimog pahulay ug magahatag ug kalipay sa imong kalag.” (Proverbio 29:17) Oo, ang pagbadlong nga pinasukad sa Bibliya makatabang sa mga ginikanan nga mapugngan ang pag-abuso sa droga ug mapauswag ang kalidad sa kinabuhi sa tibuok panimalay.