Kuhaa ang Bug-os nga Kamatuoran!
WALA gayod ako makakita nianang ngalana diha sa akong Bibliya,” miingon si Francisco. Ang ngalang Jehova mitungha lang sa diskusyon uban sa usa sa mga Saksi ni Jehova. Matuod, dili mahitabo nga makita niya ang balaang ngalan diha sa iyang Bibliya, usa ka 1969 nga edisyon sa Portuges Almeida nga bersiyon. Ang ngalang Jehova wala motungha diha niana. Ingong usa ka Kotolikong Braziliano, si Francisco regular nga tigtambong sa Misa matag Dominggo ug malingaw sa pagbasa sa Bibliya diha sa iyang balay. Apan ang ngalang Jehova nakaikag kaniya.
Kinsa ang Diyos?
Sa pagkasunod semana, gidalhan siya sa Saksi ug laing bersiyon sa Almeida. Ilang gitandi ang duha ka edisyon diha sa Salmo 83:18. Ug unsay ilang nakita? Aw, diha sa 1966 nga edisyon, kini nga tektso mabasa: “Ikaw lamang, kansang ngalan mao si JEHOVA, ikaw lamang ang Hataas Uyamot sa ibabaw sa tibuok yuta”! Apan, sa 1969 nga edisyon, inay “JEHOVA” ang terminong “GINOO” ang gigamit. “Tan-awa, sila dunay giilisan dinhi,” miingon ang Saksi, ug unya siya nangutana: “Dayag nga dili gayod ngalan ang ‘Ginoo,’ dili ba?” “Dili,” miingon si Francisco. Daw nasuko, siya midugang: “Nganong gibuhat man nila kana?”
Kini ang nagbukas sa dalan alang sa gamay nga pagdukiduki mahitungod sa ngalan sa Diyos. Pananglitan, nahibaloan ni Francisco nga sumala sa The Catholic Encyclopedia (1910), ang Jehova mao “ang propio nombre sa Diyos diha sa Daang Tugon.” Iyang nahibaloan usab nga diha sa “Daang Tugon,” nga diin ang kadaghanan gisulat sa Hebreohanong pinulongan, ang ngalan makita halos 7,000 ka beses. Walay katungod ang maghuhubad sa pag-usab sa propio nombre nga Jehova sa indepenido nga titulong Ginoo. Si Francisco gustong masayod sa kamatuoran mahitungod sa ngalang Jehova, ug iyang nakuha kana gikan sa Bibliya mismo ug pinaagi sa tukmang pagkatultol nga pagdukiduki.
Unsa ang Posisyon ni Jesus?
Sumala sa gipahayag sa nag-unang artikulo, gisambogan sa mga relihiyon sa kalibotan ang daghang mga kamatuoran. Sa sulagma, diha sa ilang balay-ug-balay nga ministeryo, ang mga Saksi ni Jehova nakabaton sa higayon sa pagtino kon unsay gituohan sa mga tawo. Siyempre, dili kini managsama gikan sa usa ka dapit ngadto sa lain, apan ang ubang mga pagtuo malarawanon. Pananglitan, sa dihang gipangutana, ‘Kinsa ang Diyos?’ ang ubang mga tagbalay miingon, ‘Jesus.’ Pinaagi niini ang ilang gipasabot nga si Jesus mao ang Diyos nga Labing Makagagahom. Apan kini ba nga pagtuo nagahawas sa kamatuoran?
Palandonga ang mosunod nga mga punto. Si Jesus miampo sa iyang Amahan: “Kini nagkahulogang kinabuhing walay kataposan, ang ilang pagbaton ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Nakamatikod ka ba nga wala magpunting si Jesus sa iyang kaugalingon kondili sa iyang langitnong Amahan nga mao “ang bugtong matuod nga Diyos”? Busa, ang unang mga tinun-an ni Jesus husto sa dihang sila miingon kaniya: “Ikaw mao gayod ang Anak sa Diyos.” Si Jesus mismo miingon: “Ako mao ang Anak sa Diyos.” Busa, ang kamatuoran mao nga si Jesus dili mao ang Labing Makagagahom nga Diyos, kondili siya mao ang Anak ni Jehova nga Diyos.—Mateo 14:33; Juan 10:36.
Unsay Dulnganan sa Kalibotan
Komosta ang bahin sa dulnganan niining kaliwatana ug sa yuta? Si John F. Kennedy, ang kanhing presidente sa Tinipong Bansa, miingon diha sa usa ka pakigpulong sa General Assembly sa HK: “Kita adunay gahom sa paghimo niini nga labing maayong kaliwatan sa katawhan diha sa kasaysayan sa kalibotan—o sa pagpalungtad niini ug dugay.” Ang presenteng-adlaw nga mga lider sa kalibotan dayag nga nagtuo sa samang paagi. Ang kasagarang madungog sa mga Saksi diha sa ilang ministeryo mao nga ang kataposan sa kalibotan, ang planetang Yuta pagalaglagon pinaagi sa kalayo o sa nukleyar nga gubat. Sa paglig-on niining pagtuoha, ang pipila mopunting sa Pinadayag 21:1, nga nagaingon: “Nakita ko ang usa ka bag-ong langit ug ang usa ka bag-ong yuta; kay ang unang langit ug ang unang yuta nangahanaw na man, ug ang dagat wala na.”
Ang Bibliya kasagarang mogamit sa terminong “yuta” sa mahulagwayong paagi, sa paghisgot sa katawhan. Ang usa ka pananglitan makita diha sa Genesis 11:1, nga nagaingon: “Ang tibuok yuta may usa lamang ka sinultihan ug usa usab ka pinulongan.” (Tan-awa usab ang 1 Hari 2:1, 2; Salmo 96:1.) Diha sa Pinadayag 21:1, “ang unang yuta” nagpunting, dili niining planetaha, kondili sa daotan tawhanong katilingban nga pagalaglagon. Kini maoy mobukas sa dalan aron mapasig-uli ang Paraiso sa yuta. (Lucas 23:43; 2 Tesalonica 1:6-9; Pinadayag 21:4) Ug kini magkauyon sa nahibilin sa Bibliya, nga nagpaila nga ang literal nga yuta dili gayod pagalaglagon. Pananglitan, ang Salmo 104:5 nag-ingon nga ang Diyos “nagpahaluna pag-ayo sa patukoranan sa yuta; kini dili gayod matarog sa walay kataposan.” (Itandi ang Ecclesiastes 1:4.) Sa pagkamatuod, si Jehova ang ‘nag-umol sa yuta aron pagapuy-an’ sa walay kataposan.—Isaias 45:18.
Nganong Kuhaon ang Bug-os nga Kamatuoran?
Ang nahauna maoy mga pananglitan lamang sa sayop nga mga pagtuo nga komun kaayo karong adlawa. Apan, kon ang tagbalay andam sa pagpangatarongan, sama sa kaso ni Francisco, ang mga Saksi ni Jehova malipay nga bukas ang dalan alang sa usa ka madan-agong diskusyon mahitungod sa Kasulatanhong mga kamatuoran.
Ang dili pagkuha sa bug-os nga kamatuoran mahimong motultol sa makapasubong mga sangpotanan. Sa pag-ilustrar: Sa dihang dinhi pa si Jesus sa yuta, daghan ang nakabig sa pagtuo nga siya maoy usa lamang sa mga anak ni Maria ug Jose, nga usa lamang ka panday kanhi nga gikan sa Nazareth. Busa, sila wala kaayo mamati kaniya. Sa usa ka paagi, sila husto. Si Jesus mao ang anak ni Maria, nga gisamkon pinaagi sa balaang espiritu. Siya mao ang sinagop nga anak ni Jose, ug siya tinuod nagtrabaho isip panday. (Marcos 6:3) Apan, mao ba kana ang bug-os nga kamatuoran bahin kaniya? Dili! Siya mao ang Mesiyas ug ang umaabot nga “hari sa mga hari”! (Pinadayag 17:14; Lucas 1:32-35; Buhat 2:36) Ang dili pagkuha sa bug-os nga kamatuoran bahin kang Jesus nagtultol sa daghang tawo nga mapildihan sa dili-masubli nga pribilehiyo—ang pagtagamtam ug personal nga pag-ubanay kang Jesus dinhi sa yuta.
Pangitaa ang Bug-os nga Kamatuoran
Ang siyudad sa Berea (karon gitawag Véroia) sa karaang Macedonia ilado sa mga magbabasa sa Bibliya tungod sa dalayegong tinamdan sa unang-siglong mga molupyo niini. Unsa man ang ilang tinamdan? Ang rekord nag-ingon: “Sila midawat sa pulong [giwali ni apostol Pablo] uban ang bug-os nga pagkamasiboton, nga sa adlaw-adlaw nanagtuon sa Kasulatan sa pagsusi kon tinuod ba gayod kining mga butanga.” Ang gisangpotan? “Daghan kanila nangahimong mga magtutuo, uban sa daghang tinamod nga mga Gregong babaye ug lalaki.”—Buhat 17:11, 12.
Dalayegon usab ang tinamdan sa mga propeta sa Diyos sa karaan. Sila “nagasusi ug nagpakisayod” mahitungod niining maong kaluwasan nga moabot pinaagi sa Mesiyas. (1 Pedro 1:10) Gipanalanginan sa Diyos ang ilang mga paningkamot. Nan, sa dayag, walay panglaktod. Ang padayon nga pagpangita ug mausisaong mga pagtulon-an—mao ang paagi sa pagkuha sa bug-os nga kamatuoran gikan sa Bibliya!
Ikaw tingali mahibulong, ‘Asa man ako magsugod?’ Human nakabasa sa pipila ka Kristohanong mga publikasyon, ang usa ka babaye nga nagpuyo sa Brazil misulat: “Kami [siya ug ang iyang bana] nakaamgo sa ulahi nga kami nagkinahanglan ug dugang pa nianang matanga sa kahibalo, aron makuha ang mga tubag sa among daghang pangutana . . . Palihog, asa man ako makakuhag Bibliya ug ubang mga libro nga makatabang kanako sa pagkahibalo ug dugang pa bahin sa atong langitnong Amahan?” Siya diha sa hustong dalan: pagbasa sa Bibliya uban sa matinud-anon pinasukad sa Bibliya nga basahon. Kon gitinguha mo usab ang bug-os nga kamatuoran, buksi ang imong kasingkasing kang Jehova nga Diyos ug pangayo sa iyang tabang. Ug palihog matikdi kining makapadasig nga mga pulong: “Kon aduna man kaninyoy nakulangan ug kaalam, papangayoa siya sa Diyos kanunay, kay siya madagayaong nagapanghatag nga walay pagpamoyboy; ug kini igahatag kaniya. Hinoon kinahanglan nga mangayo siya uban sa pagtuo, sa walay pagduhaduha.”—Santiago 1:5, 6.
Milyon-milyong mga tawo nagahisgot sa Bibliya uban sa mga Saksi ni Jehova, busa nagahimog makugihong pagsusi ug mainampingong pagpakisayod sa kamatuoran. Ang pagkuha ug pagpadapat sa maong tukmang kahibalo sa matuod nga Diyos ug kang Jesu-Kristo magkahulogan ug kinabuhing walay kataposan. (Juan 17:3) Mabatonan nimo kanang dakong panalangin kon ikaw magkugi ug kuhaon ang bug-os nga kamatuoran.
[Hulagway sa panid 7]
Ang bug-os nga kamatuoran mahitungod kang Jesus mao nga siya mao ang Mesiyas, dili kay usa lamang ka panday