Ginasunod Mo ba ang mga Pahimangno?
ANG usa ka mahigugmaong amahan magapahimangno sa iyang mga anak aron sila magmalamposon sa kinabuhi ug magmalipayon inigkahamtong na nila. Ug ang mga anak nga nahigugma ug nagatahod sa ilang mga ginikanan magadawat sa maong pahimangno kay nasayod sila nga kana alang sa ilang kaayohan. Sa susama, ang atong mahigugmaon langitnong Amahan, si Jehova, nagatagana sa iyang mga alagad sa giya nga mohatag kanila sa kalamposan ug kalipay sa ilang mga kinabuhi. Busa, hinungdanon nga atong sundon ang mga pahimangno nga ginahatag kanato sa Diyos pinaagi sa iyang Pulong, ang Bibliya, ug sa iyang yutan-ong organisasyon.
Sulod sa Pamilya
Adunay lainlaing mga natad nga alang niana kita gihatagag mga pahimangno. Ang usa maoy sa sulod sa sirkulo sa pamilya. Ang kaminyoon ug pamilya may balaang sinugdanan. Ang Bibliya nagaingon nga gikasal sa Diyos ang unang tawhanong magtiayon ug gisugo sila nga magbaton ug mga anak. (Genesis 1:27, 28; 2:22-24) Ang Maglalalang nagtaganag mga pahimangno alang sa tanang sakop sa pamilya bahin sa ilang tinagsa ka mga katungdanan. Pananglitan, ang bana ug amahan mao ang ulo sa panimalay, nga nagkahulogang siya may responsabilidad sa pagtaganag pahimangno, pagkaon, biste, puy-anan, proteksiyon, ug disiplina. Siya nagahimo usab sa hinungdanong mga desisyon sa pamilya. Ingon nga bana, siya angay magpakitag konsiderasyon alang sa iyang asawa ug hatagan siyag kadungganan ingon nga ngadto sa usa ka mahuyang nga sudlanan. (Efeso 5:22, 23; 1 Timoteo 5:8; 1 Pedro 3:7) Ang asawa angay magpasakop sa iyang bana, magpakita kaniyag lalom nga pagtahod, ug mahimong iyang katabang ug komplemento. Ug ang Kasulatan nagapunting nga ang mga anak kinahanglang magmasinugtanon sa ilang mga ginikanan.—Genesis 2:18; Efeso 6:1-3; 1 Pedro 3:1, 2.
Unsay mahitabo kon dili tagdon ang maong mga pahimangno? Mahitabo ang mga kawalay-panagkauyon ug mga lalis dihang ang mga bana walay konsiderasyon alang sa ilang mga asawa, ug ang mga asawa nagapakitag diyutayng pagtahod sa pagkaulo sa bana. Sa pagkamatuod, ang maong mga butang nakabugto sa daghang kaminyoon. Ang pagkamasupilon ug pagkarebelyoso sa mga anak nakahatag ug dakong kasub-anan sa daghang ginikanan. Kasagaran, ang mga ginikanan mabasol ug dako tungod sa dili pagmatuto sa ilang mga anak sumala sa tukmang disiplina, sa ingon makapasuko kanila.—Efeso 6:4.
Bisan pag ang mga social worker, mga sikologo, ug uban pa nagtanyag sa lainlaing mga sugyot kon unsaon pagsulbad sa mga problema sa pamilya, walay tambag ang labi pang epektibo kay sa mga pahimangno nga gitagana diha sa Bibliya sa Maglalalang sa pamilya. Ang pagsunod niini nagadalag tinuod nga kalipay ug katagbawan.—Salmo 19:7-9.
Sulod sa Kongregasyon
Angay natong sundon ang mga pahimangno nga ginahatag sa Ulo sa Kristohanong kongregasyon, si Jesu-Kristo, pinaagi sa “matinumanon ug maalamong ulipon,” ang tinudlong kanal-galamiton sa organisasyon sa Diyos dinhi sa yuta. (Mateo 24:45-47; Efeso 5:23) Aron mabatonan ang kalinaw ug panaghiusa diha sa kongregasyon ang tanan niining membro kinahanglang molihok nga nahiuyon sa giya nga gihatag. Pananglitan, kadtong nagapanguna sa pagtudlo sa kongregasyon ug sa pagtabang sa ubang tawo kinahanglang mosunod sa mga direksiyon nga ilang madawat gikan sa organisasyon ni Jehova. Kini makaamot sa pagkaepektibo sa ilang buluhaton. Ang mga pahimangno tingali maoy bahin sa kon unsaon pagpakig-ambit sa buluhatong pagsangyaw, kon unsaon pagsulbad sa mga problema diha sa kongregasyon, kon unsaon paghatag tambag ug pagdasig, kon unsaon paghupay sa mga sinakit, ug uban pa. Adunay mga pahimangno usab bahin sa kon unsaon pag-andam sa matulon-anon ug makapalig-ong mga tigom alang sa tanan nga nakig-uban sa Kristohanong kongregasyon.—Buhat 20:20; Roma 12:6-8; Galacia 6:1; 1 Tesalonica 3:1-3.
Ang mga ansiano, o mga magtatan-aw sa kongregasyon, angay ilabina ang maghatag ug maayong panig-ingnan niining bahina. Ang Nagamandong Lawas nagapadalag mga pahimangno nga maampingon ug matinumanon nga pagasundon. Kinahanglang huptan nato sa hunahuna nga ang usang nagatultol sa Kristohanong kongregasyon mao si Jesu-Kristo. Iyang naila sa hingpit ang mga panginahanglan sa tanang kongregasyon sa tibuok kalibotan, ug siya nagatagana sa gikinahanglang pagdasig ug tabang. Busa, ang mga ansiano angay dili magpanuko sa pagpadapat sa bisan unsang mga pahimangno nga ilang madawat gikan sa teokratikanhong organisasyon sa Diyos. Kini mahimong maayong panig-ingnan sa tanan diha sa matag usa ka kongregasyon ug motabang nila nga mahiusa sa ilang kaugalingon ug sa uban sa Kristohanong kapunongan sa tibuok yuta.—Buhat 15:1-31; Hebreohanon 13:7; Pinadayag 5:6.
Makalipay nga mga Resulta
Sa dihang ang usa ka magtutukod magtukod ug usa ka dakong balay, maampingon niyang sundon ang mga plano sa mga arkitekto aron ang iyang pagatukoron molungtad. Sa mga adlaw sa kabangisan sa wala pa ang Lunop, si Noe gisugo sa pagtukod ug usa ka arka. Gisultihan siya kon unsaon sa pagtukod niadto ug unsang mga tawhana ug mga hayopa ang ipasulod aron maluwas sa umaabot nga Lunop. Unsay sanong ni Noe? Ang Bibliya nagaingon: “Gibuhat ni Noe ang sumala sa tanan nga gisugo kaniya sa Diyos. Gibuhat gayod niya kana.” Si Noe lamang ug kadtong nahauban kaniya sulod sa arka ang naluwas sa Lunop. (Genesis 6:5, 13-22; 7:23) Karong adlawa, kita nagapuyo sa panahon nga susama kaayo sa adlaw ni Noe, ug tungod niini laglagon sa Diyos ang tanang daotang katawhan. Ang Bibliya nagatug-an kanato kon unsang mga lakang ang atong kuhaon kon buot natong mahiapil sa mga maluwas.—Mateo 24:37-39; 2 Pedro 3:5-7, 11.
Busa, atong dawaton uban ang apresasyon ug ipadapat ang mga pahimangno nga ginahatag ni Jehova pinaagi sa iyang sinulat nga Pulong ug sa iyang yutan-ong organisasyon. Ang pagbuhat niini mohatag kanato sa kalamposan ug kalipay ug magluwas usab sa atong mga kinabuhi.