Mga Magmamantala sa Gingharian Nagtaho
Pagwali sa Maayong Balita sa “Kinalay-ang Bahin sa Yuta”
“KINING maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” Kana ang giingon ni Jesus ngadto sa iyang mga tinun-an sa dayon na siyang mamatay. Sa wala madugay tapos sa iyang pagkabanhaw, siya dugang miingon: “Kamo mahimong akong mga saksi sa Jerusalem ug sa tibuok Judea ug Samaria ug sa kinalay-ang bahin sa yuta.” (Mateo 24:14; Buhat 1:8) Karong adlawa, kining mga tagnaa natuman diha sa kapin sa 200 ka yuta, apil ang nasod sa Peru sa Habagatang Amerika.
Kapin sa 32,000 ka Saksi nagawali sa maayong balita nianang matahom nga yuta, ug ang ilang teritoryo nagaapil gayod sa pipila sa kinalay-ang mga bahin sa yuta: ang habog nga Andes, nga ang mga gihabogon moabot tali sa 4,000 ug 4,500 metros, ug usab ang init Amazon nga kalasangan, diin ang mga tawo maabot lang pinaagi sa mga bangka. Ang sangang-buhatan sa Peru nagtaho:
◻ “Sa dapit sa lasang, kami may walo ka espesyal payunir nga giasayn sa duha ka gagmayng bangka sa suba nga gitawag lanchas. Kining gagmayng mga bangka mohaw-as ug 0.3 metro lang nga tubig, mao nga posible ang pagpauswag sa pagwali sa maayong balita ngadto sa daghang bag-ong mga dapit diha sa gugagmayng mga suba. Sa pagkakaron, ang mga igsoon nga nagagamit sa maong mga bangka nakapahimutang ug ginatos ka libong mga magasin, mga libro, ug mga Bibliya sa tibuok Walog sa Amazon sa Peru. Ingong direktang resulta, upat ka bag-ong kongregasyon ang natukod, uban ang lima ka nahilit nga grupo nga nagataho sa kalihokan ug nagahimog mga tigom. Gilaoman nga kining mga grupoha sa dili madugay mahimong mga kongregasyon.”
◻ Usa ka lungsod sa lasang mitubo palibot sa usa ka bombahanang estasyon alang sa Trans-Andean nga linya sa tubo sa aseite, nga magadala sa aseite gikan sa lasang latas sa habog nga Andes abot sa kasadpang baybayon. Tungod sa presensiya sa mga trabahante sa linya sa tubo sa aseite, kining lungsora may mga 20 ka bar ug nailhan nga dapit sa paghubog ug paglipaylipay. Bisan pa niana, tapos ikahatag sa espesyal nga mga payunir ang bug-os nga pamatuod, daghan ang misanong sa mensahe sa Gingharian, ug karon upat na lang ka bar ang nahibilin sa lungsod! Panahon sa usa ka bag-ong duaw sa magtatan-aw sa sirkito, 189 ka tawo ang mitambong sa pakigpulong publiko. Karon adunay usa ka grupo sa 7 ka magmamantala sa lungsod, ug kapin sa 45 ka tawo ang nagatambong sa tanang tigom. Sa dili madugay, uban sa panalangin ni Jehova, kini mahimo gayong kongregasyon.
◻ Sa usa sa 221 ka kongregasyon sa kaulohang siyudad sa Peru, ang Lima, ang usa ka 29-anyos nga lalaki misugilon sa unsang paagi nahidangat siya sa kamatuoran. Kay mibiya sa tunghaan sa edad 13, siya mikuyog sa usa ka gang sa mga bugoy ug misugod sa karera sa pakig-away, pag-inom sa mga droga, ug pagbuhat sa imoralidad. Tapos sa duha ka tuig nga pinugos militaryong serbisyo, siya nagsugod sa pagbatog mga problema sa utok. Dayon, niadtong 1983, ang usa ka mapaubsanon, ligdong nga igsoong babaye nakakontak kaniya sa iyang balay-balay nga ministeryo. Sa unang panahon, iyang nadunggan ang bahin sa bag-ong kalibotan nga may gugma ug kalinaw. Nasugdan ang usa ka pagtuon sa Bibliya, ug uban sa mahigugmaong tabang gikan sa kongregasyon ug sa kusog ni Jehova, siya nakabuntog sa iyang mga bisyo. Niadtong 1986 siya nabawtismohan ug karon nagaalagad nga ministeryal nga alagad diha sa kongregasyon.
Sa pagkamatuod, ang mga pulong ni Jesus nga ang Gingharian igawali ngadto sa “kinalay-ang bahin sa yuta” ginatuman sa Peru uban ang kahibulongang mga resulta, sa kaayohan sa daghan nianang yutaa nga gigutom ug giuhaw sa kamatuoran.