Kon Giunsa Pagpalambo ni Jehova ang Iyang Buluhaton

SA BAG-O pang mga dekada nasinati sa mga Saksi ni Jehova ang katingalahang pag-uswag. Sa miagi lang nga pulo ka tuig, sila miuswag gikan sa 42,600 ka kongregasyon ngadto sa katibuk-ang gidaghanon nga 60,192 diha sa 212 ka kayutaan. Tungod niini, ang pipila nangutana: Sa unsang paagi ang buluhaton sa mga Saksi gisuportahan sa salapi? Ang Watch Tower Society malipay sa pagtubag niini ug sa langkit nga mga pangutana niining artikuloha.

Ang mga Saksi ni Jehova nagapatuman ba sa paghatag sa ikapulo?

Wala. Sa karaang Israel, ang paghatag sa ikapulo o diyesmos gisugo ilalom sa Moisesnong Kasugoan aron masuportahan ang mga magbubuhat sa templo sa Diyos, ang mga Levihanon ug mga saserdote. (Numeros 18:21, 24-29) Sila walay mga yuta sa tribo gawas sa pipila ka siyudad, mao nga gikinahanglan nila ang maong espesyal nga suportar. Dugang pa, ang matinuohong mga Israelinhon madagayaong naghatag ug kinabubut-ong mga amot alang sa espesyal nga mga proyekto, sama sa pagtukod sa tabernakulo ug, sa ulahi, sa templo.—Exodo 25:1-8; 1 Cronicas 29:3-7.

Bisan pa niana, sa dihang namatay si Jesus, ang Bibliya nagaingon nga “iyang gipapas . . . ang Kasugoan nga nalangkoban sa kalagdaan.” (Efeso 2:15; Colosas 2:13, 14) Sa laing mga pulong, sa panan-aw sa Diyos ang Kasugoan dili na kinahanglang tumanon sa mga Hudiyo o mga Kristohanon. Busa, duyog sa uban pang bahin sa Kasugoan, sama sa regular nga mga halad sa templo, ang paghatag sa ikapulo wala na ibaod sa mga matinuohon.

Taliwala sa mga Kristohanon, ang paghatag gidasig sa gugma, dili sa kasugoan. Gipatin-aw ni apostol Pablo ang prinsipyo sa dihang nag-organisar ug koleksiyon alang sa nanginahanglang mga Kristohanon sa Judea. Siya miingon: “Pasagding ang matag usa maghatag sumala sa pagbuot sa iyang kasingkasing, nga dili magpanuko o nga pinugos, kay ang Diyos nahigugma sa malipayong maghahatag.” (2 Corinto 9:7) Kining Kasulatanhong paagi sa paghatag gituman sa mga Saksi ni Jehova.

Nagadangop ba kamo sa mga pangaon para makapatunghag pondong salapi, mga sobre sa koleksiyon, pangambas alang sa mga pondo, ug susamang mga paagi sa pagpatunghag salapi?

Wala, ang matuod nga mga Kristohanon dili kinahanglang pugson o hiphipan aron mohatag pinaagi sa pagpabitay sa mga premyo sa ilang atubangan. Ang relihiyosong mga pundok nga nagadangop sa bingo, mga bazaar, mga ripa, mga karnabal, pagpaabang sa mga lingkoran sa simbahan, o pagpasa sa mga plato sa kolekta nagapadayag nga wala sila maghatag sa ilang katawhan sa espirituwal nga pagkaon, ug mao nga ang espiritu sa Diyos wala magdasig sa ilang mga parokyano sa pag-amot nga dagaya sa salapi. Ang sama ikaingon niadtong nagadangop sa kinaraang tulomanon sa paghatag sa ikapulo.—Mateo 10:8.

Sa unsang paagi inyong gisuportahan sa salapi ang mga proyekto sama sa pagtukod sa bag-ong mga Kingdom Hall ug mga sangang-buhatan, ingon man ang inyong pagpadako sa hedkuwarter sa kalibotan sa Brooklyn ug sa Patterson, New York?

Si Jehova nagabubo sa iyang balaang espiritu diha sa iyang mga Saksi, nga nakapaarang nila “sa pagbuhat sa maayo, sa pagkadato sa maayong mga buhat, nga mahimong mahinatagon, mapaambiton, nga luwas magatipig alang sa ilang kaugalingon sa usa ka maayong patukoranan alang sa umaabot, aron sila makapangupot nga malig-on sa tinuod nga kinabuhi.” (1 Timoteo 6:18, 19) Kining espirituha nagadasig sa mga Saksi ni Jehova sa pagsuportar sa buluhaton sa Gingharian sa tanang paagi.

Pananglitan, niadtong 1989, 3,787,188 ka Saksi diha sa 212 ka nasod migugol ug 835,426,538 ka oras sa pagtudlo sa Pulong sa Diyos sa uban. Ug sila midumalag 3,419,745 ka regular nga pagtuon sa Bibliya sa balay uban sa mga tawong interesado. Ang gastos sa maong buluhaton gipas-an sa mga indibiduwal nga nagbuhat niana. Gigantihan ni Jehova ang maong buhat sa gugma sa uswag nga 263,855 ka bag-ong bawtismadong mga Saksi.

Ang susamang espiritu sa paghatag nagadasig sa mga Saksi ug mga tawong interesado sa pagsuportar sa buluhaton sa pinansiyal nga paagi. Gawas sa pagtabang sa pagpasig-uli sa regular nga galastohan sa ilang lokal nga kongregasyon, sila nagasuportar sa konstruksiyon nga tingali kinahanglanon, sama sa pagbag-o o pagpadako sa ilang Kingdom Hall o Assembly Hall o pagtukod ug bag-o. Kada tuig, tungod sa kusog nga pag-uswag, daghang Kingdom Hall ang kinahanglang tukoron, nga ang pipila mikostar ganig ginatos ka libong dolyar. Ang maong galastohan gipas-an sa lokal nga mga Saksi pinaagi sa ilang kinabubut-ong mga amot ug trabaho.

Dugang pa, diha sa daghang nasod ang mga pasilidad sa imprenta ug opisina sa sangang-buhatan ingon man ang mga residensiya kinahanglang padak-an—o tukoron ang mga bag-o—aron mapuy-an sa midaghang trabahante ug pasilidad nga gikinahanglan sa nagatubong organisasyon. Kini usab gisuportahan sa kinabubut-ong mga amot ug trabaho, sama sa mga proyekto sa pagtukod ug pagbag-o sa Brooklyn ug sa Patterson, New York. Kon posible, ang lokal nga mga Saksi maoy nagasuportar sa salapi alang sa konstruksiyon. Sa pila ka kaso, gihikay sa Watch Tower Society nga ang mga sangang-buhatan makadawat ug tabang—salapi ug sa hanas nga mga trabahante—gikan sa ubang kayutaan. Busa, ilalom sa pagdumala sa Sosyedad, nahitabo ang “panag-angay.”—2 Corinto 8:14.

Nganong dili kamo magdumalag mga ospital o mga klinika ug maghimo sa buhat-sa-kaluoy ug sa ubang serbisyong katilingbanon sama sa ginabuhat sa daghang relihiyosong pundok?

Ang mga Saksi ni Jehova daling mosanong sa mga emerhensiya sa pagkatapos sa gubat o kinaiyanhong katalagman sa dihang sila makahimo. Ngani, kasagaran nga sila nahiapil sa mauna nga makaabot sa dapit nga may pagkaon, biste, ug mga boluntaryo sa pagtabang sa pagtukod pag-usab. Bisan pa niana, ang mga Saksi ni Jehova dili magdumalag mga ospital o mga klinika, sama ra nga sila dili magdumalag mga departamento sa sunog o puwersa sa kapolisan, nga alang usab sa pagluwas ug kinabuhi.

Sila maoy dedikadong mga ministro sa ebanghelyo, ug ang ilang tinudlong-buluhaton mao ang pagwali ug pagtudlo sa maayong balita sa Gingharian sa tibuok nga kalibotan ingong usa ka pamatuod una pa moabot ang kataposan. (Mateo 24:14) Sumala sa giingon ni Jesus, ang alanihon dako ug diyutay ra ang mga mamumuo. Dili mapasaylo nga pasagdan kining hinungdanon-sa-tanang buluhaton ug himoon ang ubang buluhaton, bisan unsa ka dalayegon.—Mateo 9:37, 38.

Sumala sa kahimtang, ang ubay-ubayng Saksi ni Jehova maoy mga doktor, mga nars, ug mga katabang sa ospital. Apan giisip nila kining buluhatona ingong dugang sa ilang pangunang okupasyon, ang Kristohanong ministeryo.

May si bisan kinsa ba sa mga opisyal o mga membro sa Watch Tower Society nga makasapi gikan sa inyong dakong buluhaton sa pag-imprenta?

Tino nga wala! Sumala sa balaod, ang Sosyedad dili-panapi nga korporasyon. Walay stockholders, walay mga dividendo, wala ganiy mga suweldo. Ang matag ministro sa hedkuwarter, apil ang presidente ug mga direktor sa Sosyedad, nagdawat sa legal nga panumpa sa kakabos. Siya nagadawat ug pagkaon, puy-anan, ug kinahanglanong medikal nga pag-atiman, ingon man gamayng pasig-uli sa ginagmayng mga galastohan. Kon ang usa ka Saksi mobiyahe labot sa buluhaton sa Sosyedad, kasagarang ang iyang galastohan sa biyahe bayran.

Dugang pa, sa bisan diin sa kalibotan ang among mga ministro dili magpabayad sa mga kasal, mga bawtismo, o mga serbisyo sa paglubong. Ug walay mga bayranan sa pagpasulod o mga koleksiyon sa mga publikong pakigpulong o mga kombensiyon.

Sanglit wala may ginapasang mga plato sa kolekta, sa unsang paagi ang lokal nga mga kongregasyon makadawat sa mga amot sa pagtagana sa ilang mga galastohan?

Ang mga kahon sa amot gibutang diha sa mga Kingdom Hall aron ang mga indibiduwal makahimog kinabubut-ong mga donasyon kon gusto nila. (2 Hari 12:9) Ang tanang donasyon, dako o gamay, gipabilhan. (Marcos 12:42-44) Kas-a sa bulan, ang ministro nga nagaatiman sa kuwenta sa kongregasyon magbasa sa mubong pahayag ngadto sa kongregasyon nga magpahibalo kanila sa bug-os nga mga amot nga nadawat, mga galastohan, ug mga donasyong gihimo sa kongregasyon ngadto sa Watch Tower Society sa pagsuportar sa tibuok-kalibotang buluhaton sa pagsangyaw ug ubang mga proyekto.

Sa dihang hisabtan sa mga indibiduwal kining kahikayana, sila libreng moambit kon gusto nila, ang matag usa “sumala sa iya tingaling pag-uswag.” (1 Corinto 16:2) Kini mao ang ginabuhat diha sa matag usa sa kapin sa 60,000 ka kongregasyon sa tibuok nga kalibotan.

Sa Pentekostes ang unang mga Kristohanon nag-ambitay sa tanang butang. Ginabuhat ba kini sa mga Saksi ni Jehova?

Ang usa ka emerhensiyang kahimtang mitungha tapos sa Pentekostes 33 K.P. sa dihang ang mga Hudiyo gikan sa lagyong mga dapit nga bag-o pang nakombertir sa Kristiyanidad nagpabilin sa Jerusalem aron makabatog dugang espirituwal nga kalamdagan. Gikinahanglan nila ang temporaryong puy-anan ug pagkaon; busa, ang lokal nga mga Kristohanon mihimog boluntaryong pagbaligya sa yuta ug nag-ambitay nga nagkahiusa sa mga halin aron sa pagtagana sa taastaas nga panahon sa panag-uban. (Buhat 2:1, 38-47; 4:32-37) Walay mausa ang gipugos sa pagbaligya o paghatag. (Buhat 5:1-4) Kining pag-usa sa mga butang dili komunismo, sumala sa gituohan sa pipila. Kadto temporaryo lamang nga kahikayan. Sa dihang ang mga Kristohanon namauli ngadto sa ilang kaugalingong mga balay, kadto mihunong.

Nagatudlo ba kamo nga ang materyal nga paghatag maoy paagi sa pagtabon sa sala?

Halayo niana! Ang Bibliya nagaingon: “Kamo nahibalo nga dili pinaagi sa mga butang madunoton, sa salapi o bulawan, nga kamo giluwas gikan sa inyong dili-mabungahong matang sa kagawian nga nadawat pinaagi sa gikabilinbiling sugilanon sa inyong mga katigulangan. Apan maoy pinaagi sa bililhong dugo, sama sa iya sa walay-buling ug walay-mantsa nga kordero, nga mao ang kang Kristo.”—1 Pedro 1:18, 19.

Ang mga Saksi ni Jehova nagatuo sa halad lukat ni Jesus alang sa kaluwasan. Sila dili mohimog kinabubut-ong mga amot nga nagalaom nga kini mohatag kanila sa kaluwasan. Bisan pa niana, sila nahibalo nga ang dakong salapi gikinahanglan sa pagsabwag sa maayong balita sa matarong nga bag-ong kalibotan sa Diyos. (2 Pedro 3:13) Ug ilang gibati nga ang pag-amot alang sa maong pagmantala maoy usa ka pribilehiyo nga gihatag ni Jehova.

Sa dihang mihimog dakong amot alang sa templo ni Jehova nga tukoron sa iyang anak si Solomon, si Haring David miampo: “Imoha, Oh Jehova, ang pagkadako ug pagkagamhanan ug ang katahom ug kahalangdon ug kahamili; kay ang tanan sa mga langit ug sa yuta maoy imoha. . . . Ug ngani, kinsa ba ako ug kinsa ba ang akong katawhan, nga among pagakuptan ang gahom sa paghimog kinabubut-ong mga halad sama niini? Kay ang tanang butang gikan man kanimo, ug gikan sa imong kaugalingong kamot kami nagahatag kanimo.”—1 Cronicas 29:11, 14.

Karong adlawa, ang mga Saksi ni Jehova ug ubang mahiligon sa pagkamatarong nga katawhan mibati sa gibati ni David. Sila malipay nga may pribilehiyo nga makaamot sa pagsuportar sa buluhaton sa pagdayeg kang Jehova, nga nagaila nga ang tanang ilang ginahatag ngadto sa iyang pag-alagad nagagikan man kaniya. Si Jehova nagapanalangin sa maong espiritu, ug kini ang paagi sa iyang pagpalambo sa iyang buluhaton.

[Kahon sa panid 23]

KON SA UNSANG PAAGI ANG PIPILA MOAMOT SA BULUHATON SA GINGHARIAN

◻ MGA GASA: Ang boluntaryong mga donasyon nga salapi ikapadalang direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang-buhatan sa Sosyedad. Ang propiedad sama sa yuta, ingon man alahas o ubang mahalong butang, ikadonar usab. Ang mubong sulat nga magapahayag nga kana maoy laktud nga donasyon angay magauban sa maong mga amot.

◻ KONDISYONAL-DONASYONG KAHIKAYAN: Ang kuwarta ikahatag ngadto sa Watch Tower Society nga huptang sinalig, uban ang probisyon nga enkaso sa personal nga panginahanglan, kini iuli sa nagdonar.

◻ SEGURO: Ang Watch Tower Society kanganlan nga benepisyaryo sa usa ka polisa sa seguro o life-insurance o sa plano sa pagretiro/pensiyon. Ang Sosyedad angay pahibaloon sa maong mga kahikayan.

◻TRUSTS: Ang mga tinigom sa bangko ikabutang nga in trust for sa Sosyedad. Kon himoon kini, palihog pahibaloa ang Sosyedad. Ang stocks, bonds, ug propiedad ikadonar usab ilalom sa usa ka kahikayan sa pagbenepisyo sa nagdonar panahon sa iyang pagkinabuhi. Kining metodoha nagapapas sa gastos ug kadili-piho sa kapanghimatuoran sa testamento, samtang nagatino nga madawat sa Sosyedad ang propiedad sa pagkahitabo sa pagkamatay.

◻ MGA TESTAMENTO: Ang propiedad o kuwarta ikabilin sa Watch Tower Society pinaagi sa gihimo sa legal nga testamento. Ang usa ka kopya igapadala ngadto sa Sosyedad.

Alang sa dugang impormasyon ug tambag bahin nianang mga butanga, pagsulat sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang-buhatan sa Sosyedad.

[Hulagway sa panid 24]

Bahin sa sentro sa edukasyon sa Bibliya sa mga Saksi ni Jehova nga gitukod sa Patterson, New York

[Mga hulagway sa panid 25]

Si Jehova nagapauswag sa buluhatong pagpanukod sa iyang katawhan nga nagahimo sa kinabubut-ong mga donasyon