Nganong Isipon nga Ugdang ang Relihiyon?

“ANG tawo dili lamang mabuhi sa tinapay.” (Mateo 4:4, The New English Bible) Kining sigeng-gikutlo nga mga pulong magtandog sa usa ka panginahanglan sa tawo nga nahikalimtan sa daghan karong adlawa. Kana magpaila nga kita may espirituwal nga bahin sa atong kahulmahan nga kinahanglang tagbawon. Kana ang hinungdan ang nagsulti nianang mga pulonga, si Jesu-Kristo, miingon usab: “Pagkabulahan niadtong nahibalo sa ilang panginahanglan sa Diyos.”​—Mateo 5:3, NEB.

Ang relihiyon lang ang makatagbaw sa atong “panginahanglan sa Diyos.” Ang relihiyon lang ang makatubag sa atong paninugdang mga pangutana bahin sa sinugdan, katuyoan, ug kahulogan sa kinabuhi. Ug ang relihiyon lang ang makahatag sa tinuod nga kahulogan ug bili sa atong kinabuhi. Apan dili kay bisan unsa lang nga relihiyon ang mohimo niining tanan. Giingnan ni Jesus ang usa ka babayeng Samaritanhon: “Ang matuod nga mga magsisimba magasimba sa Amahan uban sa espiritu ug sa ­kamatuoran.” (Juan 4:23) Ang pagsimba ‘uban sa kamatuoran’ nagkahulogan ug labaw pa kay sa pagsunod sa karaan nang mga tradisyon ug mga rituwal. Kini sila kasagarang maghatag sa mga sumusunod sa umalaging pagbati sa pagkamaayo, samtang magbilin kanila sa tradisyonal nga relihiyon.

Pananglitan, si Edwin O. Reischauer, kanhi U.S. nga embahador ngadto sa Hapon, miingon: “Ang Shinto ug Budhismo alang sa kadaghanang tawo labaw pang maylabot sa kostumbre ug naandang butang kay sa makahuloganong mga pagtuo.” Itugot nato, daghang Hapones ang kontento nga maingon niini. Apan ang katigoman sa “bag-ong mga relihiyon” sa Hapon nagbanaag sa mausbawong kawalay-katagbawan sa relihiyosong tradisyon.

Ang “bag-ong mga relihiyon” lagmit masentro diha sa karismatik nga mga pangulo​—dili sa Diyos. Daghan niining relihiyosong mga pangulo nangangkon nga inspirado sa Diyos. Apan ang ilang mga doktrina mao lamay panagsagol sa Budhista, Shinto, ug ubang mga tinuohan​—uban ang dakong dosis sa pilosopiya sa magtutukod nga gidugang niana. Ang ilang atraksiyon kasagarang nahiluna sa saad sa mas maayong kinabuhi ug giangkong mga gahom misteryoso o sa pagpanambal. Apan ang mao bang mga relihiyon naghatag ebidensiya nga sila nagtudlo sa ilang mga sumusunod sa pagsimba “uban sa espiritu ug sa kamatuoran”? Wala. Sa usa ka butang, ang relihiyosong mga kulto lagmit ania karong adlawa ug wala na ugma. Ang ilang samag-uso nga kinaiyahan dili maghatag ug katarongan sa pag-isip kanila nga ugdang.

Usa ka Relihiyon nga Pagaisipon nga Ugdang

Hinuon, adunay usa ka relihiyon nga dugay nang naglungtad kay sa ubang matang sa pagsimba. Kini ang relihiyon nga gitudlo diha sa Balaang Bibliya. Ang Bibliya gisugdan sa pagsulat mga 35 ka siglo kanhi, ug pipila sa ‘mga kasaysayan’ nga gitipigan sa unang mga kapitulo niini may petsang kapin sa usa ka libo ka tuig nga saylo pa niana.a Kini nasudlan sa labing karaang mga talaan nga anaa bahin sa sinugdanan sa relihiyon. Kana lang maoy katarongan sa pag-isip nga ugdang sa relihiyon sa Bibliya.

Ang The Encyclopedia Americana nagaingon mahitungod sa Bibliya: “Ang kahayag niini ‘nasabwag sa tibuok nga kalibotan.’ Kini karon giisip nga usa ka etikal ug relihiyosong bahandi kansang dili-mahurot nga pagtulon-an gidahom nga mas bililhon pa samtang mouswag ang paglaom sa sibilisasyon sa kalibotan.” Apan kon ang usa ka basahon tinuod nga katuohang giya sa matuod nga relihiyon, dili ba nimo dahomon nga kini may labing dakong sirkulasyon, nga mabatonan sa tanang nagapangita sa kamatuoran?

Kana ang kahimtang sa Bibliya. Kini gihubad na sa 1,928 ka pinulongan, sa tibuok o sa bahin, ug kini mao ang labing kaylap natagtag nga basahon sa kasaysayan. Dugang pa, kini napamatud-ang nahiuyon sa kasaysayan ug sa siyensiya. Ang arkeolohiya ug kasaysayan nagapamatuod sa tukmang katumanan sa mga tagna sa Bibliya. Kini nahigawas sa tanang matang sa espiritismo ug mistisismo ug okulto. Kining tanan nahiuyon sa kaugalingong pangangkon sa Bibliya nga kini dinasig sa Diyos.b​—2 Timoteo 3:16.

Ang “mga Bunga” sa Matuod nga Relihiyon

Apan dili ba tinuod nga daghang relihiyon nag-angkon nga nagasunod sa Bibliya? Ug dili ba ang panagbingkil, pagkontrahanay, ug pagkasalingkapaw dayag taliwala sa daghan nga nag-angkong mga Kristohanon? Oo, apan kini dili hinungdan sa dili pagtagad sa Bibliya. Gipaila ni Jesu-Kristo mismo nga ang kinabag-an niadtong nag-angkong Kristohanon dili uyonan sa Diyos. (Tan-awa ang Mateo 7:13, 14, 21-23.) Nan, sa unsang paagi ang usa makaila sa mga nagatuman sa matuod nga relihiyon nga gitudlo diha sa Bibliya? Mitubag si Jesus: “Pinaagi sa ilang mga bunga inyong mailhan sila. Ang mga tawo dili magpupog mga ubas gikan sa mga katunokan o mga igos gikan sa kasampinitan, dili ba? Mao usab ang maayong kahoy mamungag maayong bunga, apan ang matag dunot nga kahoy mamungag walay pulos nga bunga. Busa, sa pagkamatuod pinaagi sa ilang mga bunga inyong mailhan sila.”​—Mateo 7:16, 17, 20.

Oo, ang matuod nga relihiyon angay nga usa ka gamhanang impluwensiya sa kaayohan, nga magpatunghag maayong mga epekto taliwala sa mga magsisimba. Tagda, pananglitan, si Aki­nori, usa ka lalaking Hapones si kinsa, sa kaugalingon niyang mga pulong, “nahimong personipikasyon sa usa ka maindigong espiritu.” ­Malamposon niyang nakab-ot ang iyang mga tumong nga makagraduwar gikan sa usa ka iladong unibersidad ug makabatog usa ka trabaho uban sa usa ka dungganong kompaniya. Gibati niyang walay katarongan nga ibutang ang relihiyon diha sa iyang kinabuhi. ‘Ang relihiyon maoy alang sa mga huyang nga nagkinahanglag kratsis sa kinabuhi,’ siya naghunahuna.

Hapsay ang dagan sa kahimtang hangtod nga, ingong sangpotanan sa tensiyon ug kakapoy, siya gitakboyan ug seryosong sakit. Nalubag ang iyang liog, ug ang iyang sulang “nanikig” sa iyang walang abaga. Daghang “mga higala” diha sa kompaniya ni Akinori wala kaayo makahupay sa iyang panahon sa kagul-anan. (Itandi ang Proverbio 17:17.) Mao nga siya nahitumpawak ngadto sa lalom nga bung-aw sa alkoholismo ug naghunahuna pa sa paghikog.

Apan, sa nahaigong panahon, ang asawa ni Akinori misugod sa pagtuon sa Bibliya uban sa mga Saksi ni Jehova. Usa ka adlaw samtang nag-estoryahay, iyang gisulti kaniya ang kasulatan sa Galacia 6:7, nga mabasa: “Bisan unsa ang igapugas sa usa ka tawo, kini usab ang iyang pagaanihon.” Kay natandog sa maong mga pulong, si Akinori miduyog kaniya sa pagtuon, ug ang iyang nakat-onan nakausob sa iyang panglantaw sa kahulogan sa kinabuhi. Samtang misanag ang panglantaw ni Akinori, ang iyang gipahinabo-sa-tensiyon nga sakit misugod sa pagkahanaw! Sumala sa pagpahayag niana sa usa ka proverbio sa Bibliya: “Ang usa ka kasingkasing nga malinawon mao ang kinabuhi sa unod.” (Proverbio 14:30) Oo, ang matuod nga relihiyon magpatunghag maayong mga bunga!

Si Toshiro maoy laing Hapones nga lalaki nga nakasabot nga ang matuod nga relihiyon mahimong impluwensiya sa kaayohan. Bisan pag nagtuo siya nga may bili ang pagtuman sa relihiyon, siya walay gibuhat niana. Ang iyang interes natumong sa pagbaton ug kaugalingong balay. Ugaling, ang pagkab-ot sa maong tumong wala magdala sa katagbawan nga iyang gidahom. Dugang pa, samtang gipaliraw niya ang iyang panan-aw sa iyang trabahoan, napanid-an niya nga kasagaran ang mga panglimbong ug misangpot niana ang dili-maayong personal nga mga relasyon. Nayugot si Toshiro sa iyang nakita.

Usa ka adlaw gidapit sa iyang asawa ang usa ka ansiano gikan sa lokal nga kongregasyon sa mga Saksi ni Jehova sa pagduaw kaniya. Namatikdan dayon ni Toshiro nga ang ansiano lahi sa iyang mga kauban. Ang hinungdan? Sinserong gipadapat sa ansiano ang mga prinsipyo sa Bibliya diha sa iyang kinabuhi. Kay nakadayeg niadto, si Toshiro midawat sa imbitasyon sa pagtuon sa Bibliya ug pagsugod sa paghimo sa relihiyon sa Bibliya nga iyang dalan sa kinabuhi.

Amo kamong gidapit usab nga masinati sa mga Saksi ni Jehova. Ang ilang “mga bunga” nagahatag pamatuod nga sila nagasimba “uban sa espiritu ug sa kamatuoran.” Sila naningkamot sa pagpadapat sa mga pagtulon-an sa Bibliya diha sa ilang mga kinabuhi. Ug bisan tuod ingong mga indibiduwal sila dili hingpit, ingong usa ka grupo ilang gipadayag unsa ka dakong espirituwal nga impluwensiya sa kaayohan ang matuod nga relihiyon.

Libolibo taliwala sa mga Saksi ang masulob-on sa usa ka panahon sa ilang dalan sa kinabuhi. Apan pinaagi sa pagpadapat sa mga prinsipyo sa Bibliya, daghan kanila ang nakaarang sa paghimog talagsaong kausaban. Pinaagi sa pag-ugmad sa ginatawag sa Bibliya “mga bunga sa espiritu,” nga mao, ang mga hiyas sa gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon, ilang nakaplagan ang yawi sa personal nga kalipay.​—Galacia 5:22, 23.

Walay-Kataposang mga Kaayohan Tungod sa Pagtuman sa Matuod nga Relihiyon

Hinuon, kinahanglang mohimog labaw pa ang matuod nga relihiyon kay sa pagbag-o sa mga personalidad o paghupay sa personal nga mga suliran. Ang tibuok-kalibotang mga suliran sama sa polusyon, hulga sa nukleyar nga gubat, ug pagpanghimulos sa silinganan peligrosong makalaglag sa matahom natong planeta. Ang mga problema sa pangabuhi magpukgo sa kalipay ug kaayohan sa minilyon. Walay relihiyon ang isipong ugdang gawas kon magtanyag kinig paglaom sa pagsulbad niining tibuok-kalibotang mga suliran.

Ang relihiyon sa Bibliya nagatanyag sa maong paglaom. Ang Diyos nagsaad sa pagpasulod sa usa ka matarong bag-ong kalibotan ubos sa usa ka langitnong kagamhanan, o “gingharian.” (Mateo 6:9, 10; 2 Pedro 3:13; Pinadayag 21:3, 4) Ang maong Gingharian mao ang tambal sa tanang sakit sa katawhan. Ug mahitungod sa pagkamalungtaron nianang tibuok-yutang mga benepisyo, ang Bibliya nagapasalig kanato: “Ang kalibotan umalagi ug mao usab ang pangibog niini, apan siya nga nagabuhat sa kabubut-on sa Diyos magapabilin sa walay kataposan.” Oo, ang kinabuhing walay kataposan diha sa kalipay mao ang paglaom sa matag matuod nga Kristohanon! (1 Juan 2:17) Apan kadto lamang nag-isip nga ugdang sa pagtuman sa matuod nga relihiyon ang makabatog kaayohan gikan sa maong umaabot nga Gingharian. Busa ikaw among giawhag sa pagsugod sa seryosong pagtuon sa Bibliya.c (Juan 17:3) Samtang sugdan nimo ang pagpasidlak sa kahayag sa Pulong sa Diyos diha sa imong kinabuhi, maagoman nimo ang dakong kalipay samtang ang imong ‘panginahanglan sa Diyos’ matagbaw, lakang por lakang. Sa pagkatinuod, maimo ang mga panalanging walay kataposan tungod kay ikaw nag-isip​—sa matuod nga relihiyon​—nga ugdang.

[Mga footnote]

[Hulagway sa panid 5]

Ang pagkaanaa sa Bibliya diha sa kapin sa 1,900 ka pinulongan nahiuyon sa pangangkon niini nga inspirado sa Diyos

[Hulagway sa panid 7]

Ang relihiyon sa Bibliya nagtanyag sa paglaom sa malinawong mga kahimtang sa tibuok nga kalibotan ubos sa langitnong kagamhanan