Pagpabiling Mahimsog sa Pagtuo!
Mga Pangunang Punto Gikan sa Tito
ANG Kristohanong mga kongregasyon sa isla sa Creta sa Mediteraneo nagkinahanglag pagtagad sa espirituwal. Kinsay motabang kanila? Aw, ang isigkamagbubuhat ni Pablo nga si Tito! Siya maisogon, may katakos sa pagpanudlo, masiboton sa maayong binuhatan, ug mahimsog sa pagtuo.
Si Pablo miduaw sa Creta tali sa iyang una ug ikaduhang pagkabilanggo sa Roma. Iyang gibilin si Tito sa isla aron sa pagtul-id sa pipila ka mga butang ug sa pagtudlog mga ansiano sa kongregasyon. Si Tito angayng magabadlong usab sa bakak nga mga magtutudlo ug magpahimutang sa usa ka maayong panig-ingnan. Kining tanan gibutyag diha sa sulat ni Pablo ngadto kang Tito, malagmit gipadala gikan sa Macedonia tali sa 61 ug 64 K.P. Ang pagpadapat sa tambag sa apostol makatabang sa presenteng-adlaw nga mga magtatan-aw ug isigkamagtutuo nga magmaisogon, magmasiboton, ug magmahimsog sa espirituwal.
Unsay Gikinahanglan sa mga Magtatan-aw?
Gikinahanglan ang pagtudlog mga magtatan-aw ug sa pag-atiman sa pipila ka seryosong mga suliran. (1:1-16) Aron matudlo ang usa ka magtatan-aw, ang usa ka tawo angayng dili masaway, panig-ingnan sa kaugalingon ug diha sa iyang panimalaynong kinabuhi, maabiabihon, timbang, ug mapugnganon sa kaugalingon. Siya magatudlo sa tinuod ug magatambag ug magabadlong niadtong nagpakitag pagsupak. Ang kaisog gikinahanglan tungod kay ang mga badlonganon sa kongregasyon angayng pahilomon. Ilabina nga matuod kini niadtong nanagsunod sa sirkumsisyon, kay ilang gidahig ang tibuok panimalay. Ang grabe nga pagbadlong gikinahanglan kon ang kongregasyon magpabiling mahimsog sa espirituwal. Karong adlawa, ang Kristohanong mga magtatan-aw usab nagkinahanglag kaisog sa pagbadlong ug sa pagtambag, uban ang tinguha nga palig-onon ang kongregasyon.
Ipadapat ang Makapahimsog nga Pagtulon-an
Si Tito nagatudlo sa pagtulon-ang makapahimsog sa espirituwal. (2:1-15) Ang may edad nga mga lalaki angayng panig-ingnan sa pagkamakasaranganon, maugdang, mabuot, pagtuo, gugma, ug pagkamainantoson. Ang edarang mga babaye angayng “magmatinahuron sa pamatasan.” Ingong “mga magtutudlo sa matarong,” ilang matabangan ang batan-ong mga babaye nga makabaton sa hustong panglantaw sa ilang mga katungdanan ingong mga asawa ug mga inahan. Ang batan-ong mga lalaki angayng magmaugdang sa hunahuna, ug ang mga ulipon angayng magpasakop ngadto sa ilang mga agalon diha sa usa ka paagi nga magpasidungog sa pagtulon-an sa Diyos. Ang tanang mga Kristohanon angayng magasalikway sa pagkadili-diyosnon ug magkinabuhi uban ang kaugdang sa hunahuna niining sistema sa mga butang samtang nagapaabot sa mahimayaong pagpadayag sa Diyos ug kang Jesu-Kristo, “kinsa nagtugyan sa iyang kaugalingon alang kanato nga unta iyang maluwas kita gikan sa tanang matang sa pagkadaotan ug sa pagputli alang sa iyang kaugalingon sa usa ka katawhan nga mahimong iya gayod, masiboton sa maayong binuhatan.” Pinaagi sa pagpadapat sa maong makapahimsog nga tambag, angay usab natong ‘pasidunggan ang pagtulon-an sa Diyos.’
Ang panapos nga tambag ni Pablo nagpalambo sa espirituwal nga kahimsog. (3:1-15) Kinahanglang ipakita ang hustong pagpasakop ngadto sa mga magmamando ug ugmaron ang pagkamakataronganon. Ang mga Kristohanon adunay paglaom sa kinabuhing walay kataposan, ug ang mga pulong ni Pablo angayng ipasiugda sa pagdasig kanila aron ipunting ang ilang mga hunahuna sa maayong binuhatan. Ang binuang nga mga pangutana ug mga panaglantugi bahin sa Kasugoan pagalikayan, ug ang tawo nga malalison human katambagi sa makaduha igasalikway mo siya. Ingong mga ansiano ipadapat ang maong tambag karong adlawa, sila ug ang ilang mga isigkamagtutuo magpabiling mahimsog sa pagtuo.
[Kahon/Hulagway sa panid 22]
Dili Magpaulipon sa Alak: Bisag ang mga babaye dili magatudlo sa mga lalaki diha sa kongregasyon, ang edaran igsoong mga babaye makatudlo sa batan-ong mga babaye nga pribado. Apan aron mahimong epektibo niining bahina, ang edarang mga babaye angayng magpatalinghog sa mga pulong ni Pablo: “Agdaha ang mga babayeng tigulang sa pagkamatinahuron sa ilang mga paggawi, dili malibakon, ug dili magpaulipon sa daghang bino, mga magtutudlo sa matarong.” (Tito 2:1-5; 1 Timoteo 2:11-14) Tungod sa kabalaka bahin sa mga epekto sa pag-inom, ang mga magtatan-aw, mga ministeryal nga alagad, ug ang edarang mga babaye kinahanglang magmakasaranganon, dili magpadaog sa ilang kaugalingon sa daghang bino. (1 Timoteo 3:2, 3, 8, 11) Angayng likayan sa tanang mga Kristohanon ang pagkapalahubog ug angayng dili moinom ug alkoholikong mga ilimnon samtang nagabuhat “sa balaang buhat” sa pagsangyaw sa maayong balita.—Roma 15:16; Proverbio 23:20, 21.