Pagkompisal sa mga Sala—May Sayop Ba?

“ANG pagkompisal sa mga sala maoy usa ka espirituwal nga paghinlo, usa ka paagi sa pagsugod pag-usab, usa ka paagi sa paglimpiyo sa hugaw. Buot ko nga Mangompisal, sa pagsugid sa pari sa akong mga sala, aron iya akong pasayloon ug bation ang kalipay.” Matud pa sa usa ka debotadong Katoliko.​—Bless Me, Father, for I Have Sinned.

Sumala sa New Catholic Encyclopedia, “diha sa pari lamang gihatag o gitugyan ni Kristo ang gahom sa pagbugkos ug sa pagbadbad, sa pagpasaylo ug dili” sa mga sala. Ang mao gihapong reperensiyang basahon miingon nga ang regular nga pagkompisal gikinahanglan “aron mahibalik ang pagkabalaan sa kinabuhi nga giwala tungod sa dako nga sala ug . . . aron putlion ang tanlag sa usa.” Bisan pa, ang kahimtang sa moral diha sa daghang kayutaan nagpakita nga ang regular nga pagkompisal wala mopahinabo sa daghan nga nagbuhat niana sa “pagpahilayo gikan sa daotan, ug sa pagbuhat ug maayo.” (Salmo 34:14) Busa sayop ba?

Usa ba Lamang ka Rituwal?

Ang pagkompisal tingali magsugod ingong usa ka rituwal lamang. Sa Irlandiya, ang unang pagkompisal himoon dayon sa dili pa ang unang Komunyon. Ug katingalahan ba nga ang hunahunaon lamang sa usa ka siyete-anyos nga batang babaye mao ang maanindot, gamayng besti sa kasal nga iyang isul-ob kay sa ‘paghibalik sa pagkabalaan sa kinabuhi nga nawala tungod sa dako nga sala’?

“Ang butang nga nakapaikag kaayo kanako mao ang senina, gawas pa sa makuhang kuwarta gikan sa akong mga paryente,” miangkon si Ramona, kinsa mihimo sa iyang unang pagkompisal sa dihang siya siyete anyos pa. “Tali sa tanang batang mga babaye nga akong nailhan,” siya nagpadayon, “wala gayoy nasinatiang espirituwal nga pagbati. Walay bisan usa kanamo ang naghunahuna bahin sa Diyos niadtong panahona.”

Ngani, ang pagpugos sa inyong mga anak sa pagkompisal sa regular mosangpot lang sa mekanikal nga pagsumaysumay. “Balikbalikon ko lang pagsumaysumay ang mao gihapong mga pulong,” nagkanayon si Michael, kinsa usab misugod sa pagkompisal sa edad siyete.

Ang mga komento sa daghang Katoliko nga gikutlo diha sa librong Bless Me, Father, for I Have Sinned nagpakita nga ang pagkompisal diyutay rag espirituwal nga bili alang kanila bisan pa nga sila magkaedaran. “Ang pagkompisal magtudlo kanimo sa pagpamakak, tungod kay adunay mga butang nga dili nimo ikasugid ngadto sa pari,” miangkon ang usa ka tawo. Ang kakulang sa pag-uyonay sa mga pari mahimong pahimuslan alang sa gamay nga pagsilot. Mangita ang uban ug usa ka “maayong” tagpakompisal aron makuha ang tambag nga buot nilang madunggan. “Human sa pagpangita sa tulo ka bulan, akong nakaplagan ang akong tagpakompisal. Ako nakigkita kaniya kada bulan, nawong sa nawong diha sa lawak kompisalan, ug siya maayo kaayo,” matud sa usa ka batan-ong babaye. “Kon abtik ka, makakita kag paring bungol ug nga dili makasultig Iningles gawas sa mga pulong ‘tulo ka Maghimaya Ka Maria,’” miingon ang laing Katoliko.

Nan, dayag, adunay sayop ang pagkompisal sama sa gibuhat sa ubang mga tawo. Apan ang Bibliya nagpaila nga adunay panginahanglan sa pagsugid sa mga sala, kay kini nag-ingon: “Walay usa nga nagatago sa iyang mga sala nga magmauswagon, ang bisan kinsa nga magasugid ug magabiya kanila makakaplag ug kaluoy.”​—Proverbio 28:13, The New Jerusalem Bible.

Nagkahulogan ba kini nga kinahanglang isugid sa usa ka Kristohanon ang tanan niyang mga sala? Kon mao, ngadto kang kinsa? Susihon sa sunod nga artikulo kining mga pangutanaha.